ПРОЩЕНОЕ ВОСКРЕСЕНИЕ. Неделя сыропустная.Воспоминание Адамова изгнания.ЧАСЫ ТРЕТИЙ, ШЕСТЫЙ И ДЕВЯТЫЙ
6 мáрта 2022 гóда. Недéля сыропýстная. Прощéное воскресéнье. Воспоминáние Адáмова изгнáния. Заговéнье на Велúкий пост. Глас 4. Воскрéсная прáздничная слýжба для домáшнего (келéйного) совершéния. Слýжба мирскúм чúном.
Аще имаши произволение то прежде чти утреню с каноном и первым часом.
ЧАС ТРЕТИЙ
Молитвами святы́х отéц нáших, Гóсподи Иисýсе Христé, Бóже наш, помилуй нас, аминь.
Слáва Тебе, Бóже наш, слáва Тебé.
Царю Небéсный, Утéшителю, Дýше Истины, Иже вездé сый и вся исполня́яй, Сокрóвище благих и жизни Подáтелю, прииди́ и всели́ся в ны, и очи́сти ны от вся́кия сквéрны, и спаси, Блáже, Дýши нáша.
Святы́й Бóже, Святый Крéпкий, Святый Безсмéртный, помилуй нас. (3 раза)
Слáва Отцý и Сы́ну и Святóму Дýху, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святы́й, посети и исцели нéмощи нáша имене Твоегó рáди.
Гóсподи, помилуй. (3 раза)
Слáва Отцý и Сы́ну и Святóму Дýху, и ныне и присно и во вéки векóв, аминь.
Óтче наш, Иже еси на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, яко на небеси́ и на земли́. Хлеб наш насýщный даждь нам днесь, и остáви нам дóлги нáша, я́коже и мы оставляем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сыне Бóжий, помилуй нас. Аминь.
Гóсподи, помилуй, (12 раз.)
Слáва Отцý и Сы́ну и Святóму Дýху, и ныне и присно и во вéки векóв, аминь.
Прииди́те, поклони́мся Царéви нáшему Бóгу.
Прииди́те, поклони́мся и припадéм Христý, Царéви нáшему Бóгу.
Прииди́те, поклони́мся и припадéм Самомý Христý, Царéви и Бóгу нáшему.
Псалом 16
Услыши, Гóсподи, прáвду мою, вонми́ молéнию моемý, внуши молитву мою не во устнáх льстивых. От лицá Твоегó судьбá моя изы́дет, óчи мои да ви́дита правоты. Искусил еси сéрдце моé, посетил еси нóщию, искуси́л мя еси и не обрéтеся во мне непрáвда. Яко да не возглагóлют устá моя дел человéческих, за словесá устéн Твоих аз сохраних пути́ жéстоки. Соверши́ стопы моя во стезях Твоих, да не подви́жутся стопы моя. Аз воззвáх, яко услышал мя еси, Бóже, приклони ýхо Твоé мне, и услы́ши глагóлы моя. Удиви́ ми́лости Твоя, спасáяй уповáющия на Тя от проти́вящихся десни́це Твоéй. Сохрани мя, Гóсподи, яко зéницу ока, в крóве крилý Твоéю покры́еши мя. От лицá нечести́вых острáстших мя, врази мои дýшу мою одержáша. Тук свой затвори́ша, устá их глагóлаше горды́ню. Изгонящии мя ныне обыдóша мя, óчи свои возложиша уклони́ти на зéмлю. Объяша мя яко лев готóв на лов, и яко ски́мен обитáяй в тáйных. Воскресни́, Гóсподи, предвари́ я и запни́ им, избáви дýшу мою от нечести́ваго, орýжие Твоé от враг руки́ Твоея. Гóсподи, от мáлых от земли раздели я в животé их, и сокровéнных Твоих испóлнися чрéво их, насы́тишася сынóв, и остáвиша остáнки младéнцем своим. Аз же прáвдою явлю́ся лицý Твоемý, насы́щуся, внегдá яви́ти ми ся слáве Твоéй.
Псалом 24
К Тебé, Гóсподи, воздвигóх дýшу мою, Бóже мой, на Тя уповáх, да не постыжýся во век, ниже да посмеют ми ся врази́ мои; Ибо вси терпящии Тя не постыдятся. Да постыдятся беззакóннующии вотщé. Пути Твоя, Гóсподи, скажи ми, и стезям Твоим научи мя. Настáви мя на истину Твою и научи мя, яко Ты еси Бог Спас мой, и Тебé терпéх весь день. Помяни щедрóты Твоя, Гóсподи, и милости Твоя, яко от вéка суть. Грех юности моея и невéдения моегó не помяни, по милости Твоéй помяни мя Ты рáди блáгости Твоея, Гóсподи. Благ и прав Госпóдь, сегó рáди законоположи́т согрешáющим на пути. Настáвит крóткия на суд, научи́т крóткия путéм Своим. Вси путиé Госпóдни милость и истина, взыскáющым завéта Егó и свидéния Егó. Рáди и́мене Твоегó, Гóсподи, и очисти грех мой, мног бо есть. Кто есть человéк бояйся Гóспода; законоположит емý на пути, егóже извóли. Душá егó во благих водвори́тся, и сéмя егó наслéдит зéмлю. Держáва Госпóдь боящихся Егó и завéт Егó яви́т им. Óчи мои выну ко Гóсподу, яко Той истóргнет от сéти нóзе мои. Призри на мя и помилуй мя, яко единорóд и нищ есмь аз. Скóрби сéрдца моегó умнóжишася, от нужд моих изведи́ мя. Виждь смирéние моé и труд мой, и остáви вся грехи моя. Виждь враги моя, яко умнóжишася, и ненавидéнием непрáведным возненавидеша мя. Сохрани́ душу мою и избáви мя, да не постыжýся, яко уповáх на Тя. Незлóбивии и прáвии прилепляхуся мне, яко потерпéх Тя, Гóсподи. Избáви, Бóже, Изрáиля от всех скорбéй егó.
Псалом 50
Помилуй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóние моé. Наипáче омы́й мя от беззакóния моегó, и от грехá моегó очисти мя. Яко беззакóние моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотворих; яко да оправдишися во словесéх Твоих и победиши, внегдá судити Ти. Се бо в беззакóниих зачáт есмь, и во гресéх роди мя мáти моя. Се бо истину возлюбил еси, безвéстная и тáйная премýдрости Твоея явил ми еси. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлие, возрáдуются кóсти смирéнныя. Отврати лицé Твоé от грех моих, и вся беззакóния моя очисти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéния Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вии к Тебé обратятся. Избáви мя от кровéй, Бóже, Бóже спасéния моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестят хвалý Твою. Яко áще бы восхотéл еси жéртвы, дал бых ýбо, всесожжéния не благоволиши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнием Твои́м Сиóна, и да сози́ждутся стéны Иерусали́мския. Тогдá благоволи́ши жéртву прáвды, возношéние и всесожегáемая; тогдá возложáт на олтáрь Твой тельцы.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Слáва Отцý и Сыну и Святóму Дýху.
Тропáрь воскрéсный, глас 4: Свéтлую Воскресéния прóповедь от Áнгела увéдевша Госпóдни учени́цы и прáдеднее осуждение отвéргша, апóстолом хвáлящася глагóлаху: испровéржеся смерть, воскрéсе Христóс Бог, дáруяй ми́рови вéлию ми́лость.
И ныне и прúсно и во вéки векóв. Амúнь.
Богорóдичен: Богорóдице, Ты еси Лозá и́стинная, возрасти́вшая нам Плод Животá, Тебе мóлимся, моли́ся Влады́чице, со святы́ми Апóстолы, поми́ловати дýши нáша.
Госпóдь Бог благословéн, благословéн Госпóдь день дне, поспеши́т нам Бог спасéний нáших, Бог наш, Бог спасáти.(Пс.67:20-21)
Посем Трисвятое по Отче наш
Святы́й Бóже, Святый Крéпкий, Святый Безсмéртный, помилуй нас. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святы́й, посети и исцели нéмощи нáша и́мене Твоегó рáди.
Гóсподи, помилуй. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Óтче наш, Иже еси на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, яко на небеси́ и на земли́. Хлеб наш насýщный даждь нам днесь, и остáви нам дóлги нáша, якоже и мы оставляем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сыне Бóжий, помилуй нас. Аминь.
КОНДAК
Кондáк Триóди, глас 6: Премýдрости настáвниче, смы́сла подáтелю, немýдрых наказáтелю, и ни́щих защи́тителю, утверди́, вразуми́ сéрдце моé Влады́ко. Ты даждь ми слóво, Óтчее Слóво, се бо устнé мои́ не возбраню́, во éже звáти Тебé: Ми́лостиве, поми́луй мя пáдшаго.
Гóсподи, помúлуй. (40 раз)
Иже на вся́кое врéмя и на вся́кий час, на небеси́ и на земли́ покланя́емый и слáвимый Христé Бóже, долготерпели́ве, многоми́лостиве, многоблагоутрóбне, Иже прáведныя любя́й, и грéшныя ми́луяй, Иже вся зовы́й ко спасéнию обещáния рáди бýдущих благ; Сам, Гóсподи, приими́ и нáша в час сей моли́твы, и испрáви живóт наш к зáповедем Твои́м; дýши нáша освяти́, телесá очи́сти, помышлéния испрáви, мы́сли очи́сти, и избáви нас от вся́кия скóрби, зол и болéзней; огради́ нас святы́ми Твои́ми Áнгелы, да ополчéнием их соблюдáеми и наставля́еми, дости́гнем в соединéние вéры, и в рáзум непристýпныя Твоея́ слáвы, я́ко благословéн еси́ во вéки векóв, аминь.
Гóсподи, помилуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Честнéйшую Херувим и слáвнейшую без сравнéния Серафим, без истлéния Бóга Слóва рóждшую, сýщую Богорóдицу, Тя величáем.
Именем Госпóдним Гóсподи, благослови.
Молитвами святых отéц нáших, Гóсподи Иисýсе Христé, Бóже наш, помилуй нас, аминь.
Молитва святаго Мардария
Владыко Бóже Óтче Вседержителю, Гóсподи Сыне Единорóдный Иисýсе Христé, и Святый Дýше, Едино Божествó, Едина Сила, помилуй мя грéшнаго, и имиже вéси судьбáми спаси мя недостóйнаго рабá Твоегó, яко благословéн еси во вéки векóв, аминь.
ЧАС ШЕСТЫЙ
Прииди́те, поклони́мся Царéви нáшему Бóгу.
Прииди́те, поклони́мся и припадéм Христý, Царéви нáшему Бóгу.
Прииди́те, поклони́мся и припадéм Самомý Христý, Царéви и Бóгу нáшему.
Псалом 53
Бóже, во имя Твоé спаси мя, и в силе Твоéй суди ми. Бóже, услыши молитву мою, внуши глагóлы уст моих. Яко чýждии востáша на мя и крéпцыи взыскáша дýшу мою, и не предложиша Бóга пред собóю. Се бо Бог помогáет ми, и Господь застýпник души моéй. Отвратит злáя врагóм моим, истиною Твоéю потреби их. Вóлею пожрý Тебé, исповéмся имени Твоемý, Гóсподи, яко блáго; Яко от всякия печáли избáвил мя еси, и на враги моя воззрé óко моé.
Псалом 54
Внуши, Бóже, молитву мою и не прéзри молéния моегó. Вонми ми и услыши мя: возскорбéх печáлию моéю и смятóхся. От глáса врáжия и от стужéния грéшнича, яко уклониша на мя беззакóние и во гнéве враждовáху ми. Сéрдце мое смятéся во мне и боязнь смéрти нападé на мя. Страх и трéпет прииде на мя и покры́ мя тьма. И рех: кто даст ми крилé, яко голуби́не, и полещý, и почи́ю; Се удалихся бéгая и водворихся в пустыни. Чáях Бóга спасáющаго мя от малодýшия и от бýри. Потопи Гóсподи, и раздели языки их: яко видех беззакóние и пререкáние во грáде. Днем и нóщию обыдет и по стенáм егó: беззакóние и труд посредé егó и непрáвда. И не оскудé от стогн его лихва и лесть. Яко áще бы враг поносил ми, претерпéл бых ýбо, и áще бы ненавидяй мя на мя велерéчевал, укрыл бых ся от негó. Ты же человéче равнодýшне, владыко мой и знáемый мой; Иже кýпно наслаждáлся еси со мнóю брáшен, в дóму Бóжии ходихом единомышлéнием. Да приидет же смерть на ня, и да снидут во ад живи, яко лукáвство в жилищах их, посредé их. Аз к Бóгу воззвáх, и Госпóдь услыша мя. Вéчер и заýтра, и полýдне повéм, и возвещý, и услышит глас мой. Избáвит миром дýшу мою от приближáющихся мне, яко во мнóзе бяху со мнóю. Услышит Бог и смирит я, Сый прéжде век. Несть бо им изменéния, яко не убояшася Бóга. Прострé рýку свою на воздаяние, оскверниша завéт Егó. Разделишася от гнéва лицá Егó, и приближишася сердцá их, умякнуша словесá их пáче елéа, и та суть стрéлы. Возвéрзи на Гóспода печáль твою, и Той тя препитáет, не даст в век молвы прáведнику. Ты же, Бóже, низведéши их во студенéц истлéния, мýжие кровéй и льсти не преполовят дней своих. Аз же, Гóсподи, уповáю на Тя.
Псалом 90
Живый в пóмощи Вышняго, в крóве Бóга Небéснаго водворится. Речéт Гóсподеви: застýпник мой еси и прибéжище моé, Бог мой, и уповáю на Негó. Яко Той избáвит тя от сéти лóвчи, и от словесé мятéжна; Плещмá Своима осенит тя, и под крилé Егó надéешися: орýжием обыдет тя истина Егó. Не убоишися от стрáха нощнáго, от стрелы летящия во дни; От вéщи во тме преходящия, от сряща и бéса полýденнаго. Падéт от страны твоея тысяща, и тма одеснýю тебé, к тебé же не прибли́жится; Обáче очима твоима смóтриши, и воздаяние грéшников ýзриши. Яко Ты, Гóсподи, уповáние моé, Вы́шняго положил еси прибéжище твоé. Не приидет к тебé зло, и рáна не приближится телеси твоемý; Яко Áнгелом Своим заповéсть о тебé, сохранити тя во всех путéх твоих. На рукáх вóзмут тя, да не когдá преткнéши о кáмень нóгу твою; На áспида и василиска настýпиши, и поперéши льва и змия. Яко на Мя уповá, и избáвлю и: покрыю и, яко познá имя Моé. Воззовéт ко Мне, и услышу егó: с ним есмь в скóрби, измý егó, и прослáвлю егó; Долготóю дней испóлню егó, и явлю емý спасéние Моé.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Слáва Отцý и Сыну и Святóму Дýху.
Тропáрь воскрéсный, глас 4: Свéтлую Воскресéния прóповедь от Áнгела увéдевша Госпóдни учени́цы и прáдеднее осуждение отвéргша, апóстолом хвáлящася глагóлаху: испровéржеся смерть, воскрéсе Христóс Бог, дáруяй ми́рови вéлию ми́лость.
И ныне и прúсно и во вéки векóв. Амúнь.
Богорóдичен: Яко не и́мамы дерзновéния за премнóгия грехи́ нáша, Ты Иже от Тебé Рóждшагося моли́, Богорóдице Дéво: мнóго бо мóжет молéние Мáтернее ко благосéрдию Владыки: не прéзри грéшных мольбы, Всечи́стая, яко ми́лостив есть и спасти́ моги́й, Иже и страдáти о нас извóливый.
Скóро да предварят ны щедрóты Твоя, Гóсподи, яко обнищáхом зелó: помози́ нам, Бóже Спáсе наш, слáвы рáди и́мене Твоегó; Гóсподи, избáви нас, и очи́сти грехи́ нáша, и́мене рáди Твоегó.
Посем Трисвятое по Отче наш
Святы́й Бóже, Святый Крéпкий, Святый Безсмéртный, помилуй нас. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святый, посети и исцели нéмощи нáша имене Твоегó рáди.
Гóсподи, помилуй. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Óтче наш, Иже еси на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, яко на небеси́ и на земли́. Хлеб наш насýщный даждь нам днесь, и остáви нам дóлги нáша, якоже и мы оставляем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сыне Бóжий, помилуй нас. Аминь.
КОНДAК
Кондáк Триóди, глас 6: Премýдрости настáвниче, смы́сла подáтелю, немýдрых наказáтелю, и ни́щих защи́тителю, утверди́, вразуми́ сéрдце моé Влады́ко. Ты даждь ми слóво, Óтчее Слóво, се бо устнé мои́ не возбраню́, во éже звáти Тебé: Ми́лостиве, поми́луй мя пáдшаго.
Гóсподи, помúлуй. (40 раз)
Иже на вся́кое врéмя и на вся́кий час, на небеси́ и на земли́ покланя́емый и слáвимый Христé Бóже, долготерпели́ве, многоми́лостиве, многоблагоутрóбне, Иже прáведныя любя́й, и грéшныя ми́луяй, Иже вся зовы́й ко спасéнию обещáния рáди бýдущих благ; Сам, Гóсподи, приими́ и нáша в час сей моли́твы, и испрáви живóт наш к зáповедем Твои́м; дýши нáша освяти́, телесá очи́сти, помышлéния испрáви, мы́сли очи́сти, и избáви нас от вся́кия скóрби, зол и болéзней; огради́ нас святы́ми Твои́ми Áнгелы, да ополчéнием их соблюдáеми и наставля́еми, дости́гнем в соединéние вéры, и в рáзум непристýпныя Твоея́ слáвы, я́ко благословéн еси́ во вéки векóв, аминь.
Гóсподи, помилуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Честнéйшую Херувим и слáвнейшую без сравнéния Серафим, без истлéния Бóга Слóва рóждшую, сýщую Богорóдицу, Тя величáем.
Именем Госпóдним Гóсподи, благослови.
Молитвами святых отéц нáших, Гóсподи Иисýсе Христé, Бóже наш, помилуй нас, аминь.
Таже молитва святаго Великаго Василия
Бóже и Гóсподи сил и всея твáри Содéтелю, Иже за милосéрдие безприклáдныя милости Твоея Единорóднаго Сына Твоегó, Гóспода нáшего Иисýса Христá, низпослáвый на спасéние рóда нáшего, и честным Егó Крестóм рукописáние грех нáших растерзáвый, и победивый тем начáла и влáсти тьмы. Сам, Владыко Человеколюбче, приими и нас, грéшных, благодáрственныя сия и молéбныя молитвы и избáви нас от всякаго всегуби́тельнаго и мрáчнаго прегрешéния и всех озлóбити нас и́щущих видимых и невидимых враг. Пригвозди стрáху Твоемý плóти нáша и не уклони сердéц нáших в словесá или помышлéния лукáвствия, но любóвию Твоéю уязви дýши нáша, да, к Тебé всегдá взирáюще и éже от Тебé свéтом наставляеми, Тебé, непристýпнаго и присносýщнаго зряще Свéта, непрестáнное Тебé исповéдание и благодарéние возсылáем, Безначáльному Отцý со Единорóдным Твоим Сы́ном и Всесвяты́м, и Благи́м, и Животворящим Твоим Дýхом ны́не, и присно, и во вéки векóв, аминь.
И глагóлем зде изобразúтельные. Аще кто хóщет глагóлет прéжде и девятый час.
ЧАС ДЕВЯТЫЙ
Прииди́те, поклони́мся Царéви нáшему Бóгу.
Прииди́те, поклони́мся и припадéм Христý, Царéви нáшему Бóгу.
Прииди́те, поклони́мся и припадéм Самомý Христý, Царéви и Бóгу нáшему.
Псалом 83
Коль возлюбленна селéния Твоя, Гóсподи сил! Желáет и скончавáется душá моя во дворы́ Госпóдни, сéрдце моé и плоть моя возрáдовастася о Бóзе живе. Ибо птица обрéте себé хрáмину, и гóрлица гнездó себé, идéже положи́т птенцы своя, олтари́ Твоя, Гóсподи сил, Царю мой и Бóже мой. Блажéни живýщии в домý Твоéм, в вéки векóв восхвалят Тя. Блажен муж, eмýже есть заступлéние eго у Тебé; восхождéния в сéрдце своéм положи, во юдóль плачéвную, в мéсто éже положи, ибо благословéние даст законополагáяй. Пóйдут от силы в силу: явится Бог богóв в Сиóне. Гóсподи Бóже сил, услыши молитву мою, внуши́, Бóже Иáковль. Защи́тниче наш, виждь, Бóже, и призри на лицé христá Твоегó. Яко лучше день един во двóрех Твоих пáче тысящ: извóлих приметáтися в домý Бóга моего пáче, нéже жити ми в селéниих грéшничих. Яко ми́лость и и́стину любит Госпóдь, Бог благодáть и слáву даст, Госпóдь не лиши́т благих ходящих незлóбием. Гóсподи Бóже сил, Блажéн человéк уповáяй на Тя.
Псалом 84
Благоволил еси, Гóсподи, зéмлю Твою, возвратил еси плен Иáковль: остáвил еси беззакóния людéй Твоих, покрыл еси вся грехи их. Укротил еси весь гнев Твой, возвратился еси от гнéва ярости Твоея. Возврати нас, Бóже спасéний нáших, и отврати ярость Твою от нас. Едá во вéки прогнéваешися на ны? Или прострéши гнев Твой от рóда в род? Бóже, Ты обрáщься оживиши ны, и людие Твои возвеселятся о Тебé. Яви нам, Гóсподи, милость Твою, и спасéние Твоé даждь нам. Услышу, что речéт о мне Госпóдь Бог: яко речéт мир на люди Своя, и на преподóбныя Своя, и на обращáющыя сердцá к Немý. Обáче близ боящихся Егó спасéние Егó, вселити слáву в зéмлю нáшу. Милость и истина сретóстеся, прáвда и мир облобызáстася. Истина от земли возсия, и прáвда с Небесé приниче, ибо Госпóдь даст блáгость, и земля нáша даст плод свой. Прáвда пред Ним предъидет, и положи́т в путь стопы своя.
Псалом 85
Приклони́, Господи, ýхо Твоé, и услыши мя, яко нищ и убóг есмь аз. Сохрани́ дýшу мою, яко преподóбен есмь: спаси́ рабá Твоегó, Бóже мой, уповáющаго на Тя. Поми́луй мя, Гóсподи, яко к Тебé воззовý весь день. Возвесели дýшу рабá Твоегó, яко к Тебé взях дýшу мою. Яко Ты, Гóсподи, Благ и Крóток, и Многомилостив всем призывáющым Тя. Внуши, Гóсподи, молитву мою, и вонми гласу молéния моегó. В день скóрби моея воззвáх к Тебé, яко услышал мя еси. Несть подóбен Тебé в бозéх, Гóсподи, и несть по делóм Твоим. Вси языцы, елики сотворил еси, приидут и поклóнятся пред Тобóю, Гóсподи, и прослáвят имя Твоé, яко Вéлий еси Ты, и творяй чудесá, Ты еси Бог един. Настáви мя, Гóсподи, на путь Твой, и пойдý во истине Твоéй; да возвеселится сéрдце моé боятися имене Твоегó. Исповéмся Тебé, Гóсподи Бóже мой, всем сéрдцем моим, и прослáвлю имя Твоé в век: яко милость Твоя вéлия на мне, и избáвил еси дýшу мою от áда преиспóднейшаго. Бóже, законопрестýпницы востáша на мя, и сонм держáвных взыскáша дýшу мою, и не предложиша Тебé пред собóю. И Ты, Гóсподи Бóже мой, Щéдрый и Милостивый, Долготерпеливый, и Многомилостивый и истинный, призри на мя и помилуй мя, даждь держáву Твою óтроку Твоемý, и спаси сына рабы Твоея. Сотвори со мнóю знáмение во блáго, и да видят ненавидящии мя, и постыдятся, яко Ты, Гóсподи, помóгл ми и утéшил мя еси.
И паки: Сотвори́ со мною знáмение во блáго, и да ви́дят ненави́дящии мя, и постыдятся, яко Ты, Гóсподи, помóгл ми и утéшил мя еси.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Слáва Отцý и Сыну и Святóму Дýху.
Тропáрь воскрéсный, глас 4: Свéтлую Воскресéния прóповедь от Áнгела увéдевша Госпóдни учени́цы и прáдеднее осуждение отвéргша, апóстолом хвáлящася глагóлаху: испровéржеся смерть, воскрéсе Христóс Бог, дáруяй ми́рови вéлию ми́лость.
И ныне и прúсно и во вéки векóв. Амúнь.
Богорóдичен: Иже нас рáди рождéйся от Дéвы и распятие претерпéв, Благи́й, испровéргий смéртию смерть и воскресéние явлéй яко Бог, не прéзри, яже создáл еси рукóю Твоéю. Яви́ человеколюбие Твоé, Ми́лостиве. Приими́ рóждшую Тя Богорóдицу, молящуюся за ны. И спаси́, Спáсе наш, люди отчáянныя.
Не предáждь нас до концá Имене Твоегó рáди, и не разори завéта Твоегó, и не отстáви ми́лости Твоея от нас Авраáма рáди, возлюбленнаго от Тебé, и за Исаáка, рабá Твоегó, и Изрáиля, святáго Твоегó.
Посем Трисвятое по Отче наш
Святы́й Бóже, Святый Крéпкий, Святый Безсмéртный, помилуй нас. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святый, посети и исцели нéмощи нáша имене Твоегó рáди.
Гóсподи, помилуй. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Óтче наш, Иже еси на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, яко на небеси́ и на земли́. Хлеб наш насýщный даждь нам днесь, и остáви нам дóлги нáша, якоже и мы оставляем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сыне Бóжий, помилуй нас. Аминь.
КОНДAК
Кондáк Триóди, глас 6: Премýдрости настáвниче, смы́сла подáтелю, немýдрых наказáтелю, и ни́щих защи́тителю, утверди́, вразуми́ сéрдце моé Влады́ко. Ты даждь ми слóво, Óтчее Слóво, се бо устнé мои́ не возбраню́, во éже звáти Тебé: Ми́лостиве, поми́луй мя пáдшаго.
Гóсподи, помúлуй. (40 раз)
Иже на вся́кое врéмя и на вся́кий час, на небеси́ и на земли́ покланя́емый и слáвимый Христé Бóже, долготерпели́ве, многоми́лостиве, многоблагоутрóбне, Иже прáведныя любя́й, и грéшныя ми́луяй, Иже вся зовы́й ко спасéнию обещáния рáди бýдущих благ; Сам, Гóсподи, приими́ и нáша в час сей моли́твы, и испрáви живóт наш к зáповедем Твои́м; дýши нáша освяти́, телесá очи́сти, помышлéния испрáви, мы́сли очи́сти, и избáви нас от вся́кия скóрби, зол и болéзней; огради́ нас святы́ми Твои́ми Áнгелы, да ополчéнием их соблюдáеми и наставля́еми, дости́гнем в соединéние вéры, и в рáзум непристýпныя Твоея́ слáвы, я́ко благословéн еси́ во вéки векóв, аминь.
Гóсподи, помилуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Честнéйшую Херувим и слáвнейшую без сравнéния Серафим, без истлéния Бóга Слóва рóждшую, сýщую Богорóдицу, Тя величáем.
Именем Госпóдним Гóсподи, благослови́.
Молитвами святых отéц нáших, Гóсподи Иисýсе Христé, Бóже наш, помилуй нас, аминь.
И молитву сию Великаго Василия
Владыко Гóсподи, Иисýсе Христé, Бóже наш, долготерпéвый о нáших согрешéниих и дáже до ны́нешняго часá привeды́й нас, вóньже, на Животворящем Дрéве ви́ся, благоразýмному разбóйнику иже в рай путесотвори́л еси́ вход и смéртию смерть разруши́л еси́: очи́сти нас, грéшных и недостóйных раб Твои́х, согреши́хом бо и беззакóнновахом и нéсмы достóйни возвести́ очесá нáша и воззрéти на высотý Небéсную, занé остáвихом путь прáвды Твоея и ходи́хом в вóлях сердéц нáших. Но мóлим Твою безмéрную блáгость: пощади́ нас, Гóсподи, по мнóжеству ми́лости Твоея, и спаси́ нас Имене Твоегó рáди святáго, яко исчезóша в суетé дни́е нáши, изми́ нас из руки́ сопроти́внаго, и остáви нам грехи́ нáша, и умертви́ плотскóе нáше мудровáние, да, вéтхаго отложи́вше человéка, в нóваго облецéмся и Тебé поживéм, нáшему Влады́це и Благодéтелю. И тáко, Твои́м послéдующе повелéнием, в вéчный покóй дости́гнем, идéже есть всех веселящихся жили́ще. Ты бо еси́ вои́стинну и́стинное весéлие и рáдость любящих Тя, Христé Бóже наш, и Тебé славу возсылáем со Безначáльным Твои́м Отцéм, и Пресвяты́м, и Благи́м, и Животворящим Твои́м Дýхом, ны́не, и при́сно и во вéки векóв, аминь.
И глагóли обéдницу