ОБЕДНИЦА (Изобразительные). Глас 1. Неделя о мытаре и фарисее. Начало Постной Триоди. 13 февраля
13 февраля́ 2022 гóда. Недéля о мытарé и фарисéе. Начáло Пóстной Триóди. Глас 1. Воскрéсная прáздничная слýжба для домáшнего (келéйного) совершéния. Слýжба мирскúм чúном.
Прéжде глагóли часы
ЧИН ОБЕДНИЦЫ
Глагóли сúце: Благослови, душé моя, Гóспода,/ благословéн еси Гóсподи.
Псалом 102
Благослови́, душé моя, Гóспода,/ и вся внýтренняя моя имя святóе Егó./ Благослови́, душé моя, Гóспода,/ и не забывáй всех воздаяний Егó,/ очищáющаго вся беззакóния твоя,/ исцеляющаго вся недýги твоя,/ избавляющаго от истлéния живóт твой,/ венчáющаго тя ми́лостию и щедрóтами,/ исполняющаго во благих желáние твоé:/ обновится яко óрля юность твоя./ Творяй милостыни Госпóдь,/ и судьбý всем обидимым./ Сказá пути Своя Моисéови,/ сыновóм Изрáилевым хотéния Своя:/ Щедр и Милостив Госпóдь,/ Долготерпелив и Многомилостив./ Не до концá прогнéвается,/ нижé во век враждýет,/ не по беззакóнием нáшим сотворил есть нам,/ ниже по грехóм нáшым воздáл есть нам./ Яко по высотé небéсней от земли,/ утвердил есть Госпóдь милость Свою на боящихся Егó./ Елико отстоят востóцы от зáпад,/ удáлил есть от нас беззакóния нáша./ Якоже щéдрит отéц сыны,/ ущéдри Госпóдь боящихся Егó./ Яко Той познá создáние нáше,/ помянý, яко персть есмы./ Человéк, яко травá дние eгó,/ яко цвет сéльный, тако оцветéт,/ яко дух прóйде в нем,/ и не бýдет, и не познáет ктомý мéста своегó./ Милость же Госпóдня от вéка и до вéка на боящихся Егó,/ и прáвда Егó на сынéх сынóв, хранящих завéт Егó, и пóмнящих зáповеди Егó твори́ти я./ Госпóдь на Небеси́ уготóва Престóл Свой,/ и Цáрство Егó всéми обладáет./ Благословите Гóспода вси Áнгели Егó,/ сильнии крéпостию, творящии слóво Егó, услышати глас словéс Егó./ Благослови́те Гóспода вся Си́лы Егó,/ слýги Егó, творящии вóлю Егó./ Благословите Гóспода вся делá Егó,/ на всяком мéсте владычества Егó.
Слáва Отцý и Сы́ну и Святóму Дýху, и ны́не и при́сно и во вéки векóв. Аминь.
Благослови́, душé моя, Гóспода,/ и вся внýтренняя моя и́мя святóе Егó./ Благословéн еси, Гóсподи.
Слáва Отцý и Сыну и Святóму Дýху.
Псалом 145
Хвали, душé моя, Гóспода./ Восхвалю Гóспода в животé моéм,/ пою Бóгу моемý, дóндеже есмь./ Не надéйтеся на князи, на сы́ны человéческия,/ в нихже несть спасéния./ Изы́дет дух eгó/ и возврати́тся в зéмлю свою./ В той день погибнут вся помышлéния eгó./ Блажéн, eмýже Бог Иáковль Помóщник егó,/ уповáние eгó на Гóспода Бóга своегó,/ сотвóршаго нéбо и зéмлю,/ мóре и вся, яже в них,/ хранящаго и́стину в век,/ творящаго суд оби́димым,/ дающаго пи́щу áлчущим./ Госпóдь решит оковáнныя./ Госпóдь умудряет слепцы́./ Госпóдь возвóдит низвéрженныя./ Госпóдь любит прáведники./ Госпóдь хранит пришéльцы,/ си́ра и вдову прии́мет/ и путь грéшных погуби́т./ Воцари́тся Госпóдь во век,/ Бог твой, Сиóне, в род и род.
И ныне и прúсно и во вéки векóв. Амúнь.
Единорóдный Сыне и Слóве Бóжий, Безсмéртен Сый/ и извóливый спасéния нáшего рáди/ воплоти́тися от Святы́я Богорóдицы и Приснодéвы Мари́и,/ непрелóжно вочеловéчивыйся,/ распны́йся же, Христé Бóже, смéртию смерть попрáвый,/ Един Сый Святыя Трóицы,/ спрославляемый Отцý и Святóму Дýху, спаси́ нас.
И поем Блаженны с тропарями из Октоиха
Хор: Во Цáрствии Твоéм помянú нас, Гóсподи,/ егдá приúдеши, во Цáрствии Твоéм.
Хор: Блажéни нúщии дýхом,/ яко тех есть Цáрство Небéсное.
Хор: Блажéни плáчущии,/ яко тúи утéшатся.
На 10. Хор: Блажéни крóтции,/ яко тúи наслéдят зéмлю.
Чтец (воскрéсные, глас 1): Снéдию изведé из рая́ враг Адáма: Крестом же разбойника введé Христос вонь, помяни́ мя, зовýща, егдá прии́деши во Цáрствии Твоéм.
Хор: Блажéни áлчущии и жáждущии прáвды,/ яко тúи насытятся.
Чтец: Покланя́юся страстéм Твои́м,/ славослóвлю и Воскресéние со Адáмом и разбóйником,/ со глáсом свéтлым вопию́ Ти:/ помяни́ мя Гóсподи,// егдá прии́деши во Цáрствии Твоéм.
На 8. Хор: Блажéни мúлостивии,/ яко тúи помúловани бýдут.
Чтец: Распя́лся еси безгрéшне, и во гробе положи́лся еси́ волею, но воскрéсл еси яко Бог, совоздви́гнувый Себé Адáма, помяни́ мя, зовýща, егдá прии́деши во Цáрствии Твоéм.
Хор: Блажéни чúстии сéрдцем,/ яко тúи Бóга ýзрят.
Чтец: Храм Твой телéсный триднéвным Воскреси́вый погребéнием, со Адáмом, и и́же от Адáма, воскреси́л еси́ Христé Бóже: помяни́ нас зовущих, егдá прии́деши во Цáрствии Твоéм.
Хор: Блажéни миротвóрцы,/ яко тúи сынове Бóжии нарекýтся.
На 6. Чтец: Мvронóсицы приидóша плачуща, на гроб Твой Христé Бóже, зелó рано: и в белых ризах обретóша Ангела седя́ща, что и́щете; зовýща. Воскрéсе Христóс, не рыдайте прóчее.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Апóстоли Твои Гóсподи на гóру, аможе повелéл еси им, пришéдше Спáсе, и Тя ви́девше поклони́шася. Ихже и послáл еси во язы́ки учи́ти и крести́ти я.
Хор: Блажéни естé, егдá понóсят вам,/ и изженýт, и рекýт всяк зол глагóл на вы лжýще Менé рáди.
На 4.Чтец (Триóди, глас 6): Жития́ пóприще мытáрь вкýпе и фарисéй течáста:/ но ов ýбо высокоýмием содержи́мь, срáмне утонý,// ов же смирéнием спасéся.
Хор: Рáдуйтеся и веселúтеся,/ яко мзда вáша мнóга на небесéх.
Чтец: Жития́ бéдное преминýюще мы течéние,/ подражáим мытарéво ýбо мудровáние ревни́тельно:// бежи́м же кичéния мéрзкаго фарисéя, и жи́ви бýдем.
Хор: Слáва Отцý и Сыну и Святóму Дýху.
Чтец: Житиé проидóста фарисéй добродéтельми, и мытáрь прегрешéньми./ Но ов ýбо от гóрдости умоврéдныя, отступи́ смирéния:// ов же возношáется, смиренномýдр я́влься.
Хор: И ныне и прúсно и во вéки векóв. Амúнь.
Чтец (Богорóдичен): Нáга простотóю, нехи́тростною же жи́знию создáна,/ преступлéния лéстию одéя мя враг, и плóти дебельствóм:// ны́не же Твои́м ходáтайством Отрокови́це, спасáюся.
Тропари и кондаки
Тропáрь воскрéсный, глас 1: Кáмени запечáтану от иудéй/ и вóином стрегýщим Пречи́стое Тéло Твоé,/ воскрéсл еси триднéвный, Спáсе,/ дáруяй ми́рови жизнь./ Сегó рáди си́лы небéсныя вопия́ху Ти, Жизнодáвче:/ слáва Воскресéнию Твоемý, Христé,/ слáва Цáрствию Твоемý,// слáва смотрéнию Твоемý, еди́не Человеколю́бче.
Слáва Отцý и Сыну и Святóму Дýху и ныне и прúсно и во вéки векóв. Амúнь.
Кондáк Триóди, глас 3: Воздыхáния принесéм мытáрская Гóсподеви,/ и к Немý пристýпим грéшнии я́ко Влады́це:/ хóщет бо спасéния всех человéков,/ оставлéние подаéт всем кáющимся./ Нас бо рáди воплоти́ся,// Бог сый Отцý собезначáльный.
Трисвятое
Хор: Святы́й Бóже,/ Святы́й Крéпкий,/ Святы́й Безсмéртный, помилуй нас. (Трúжды)
Хор: Слáва Отцý и Сыну и Святóму Дýху, и ныне и присно и во вéки векóв, аминь.
Хор: Святы́й Безсмéртный, помилуй нас.
Хор: Святы́й Бóже,/ Святы́й Крéпкий,/ Святы́й Безсмéртный, помилуй нас.
Прокимен воскресный, глас 1
Чтец: Прокимен, глас пéрвый, псалóм Дави́дов: Бýди, Гóсподи, ми́лость Твоя́ на нас, я́коже уповáхом на Тя. (Пс.32:22)
Хор: Бýди, Гóсподи, мúлость Твоя́ на нас,/ я́коже уповáхом на Тя.
Чтец:Рáдуйтеся, прáведнии, о Гóсподе, прáвым подобáет похвалá. (Пс.32:1)
Хор: Бýди, Гóсподи, мúлость Твоя́ на нас,/ я́коже уповáхом на Тя.
Чтец: Бýди, Гóсподи, ми́лость Твоя́ на нас.
Хор: Я́коже уповáхом на Тя.
АПОСТОЛ
Чтец: К Тимофéю послáния святáго апóстола Пáвла чтéние.
(2Тим.зач.296): Чáдо Тимофéе, ты послéдовал еси́ моемý учéнию, житию́, привéту, вéре, долготерпéнию, любви́, терпéнию, изгнáнием, страдáнием, яковá ми бы́ша во Антиохи́и, и во Икони́и, и в Ли́стрех, яковá изгнáния прия́х, и от всех мя избáвил есть Госпóдь. И вси же хотя́щии благочéстно жи́ти о Христé Иисýсе гони́ми бýдут. Лукáвии же человéцы и чародéи преуспéют на гóршее, прельщáюще и прельщáеми. Ты же пребывáй в ни́хже научéн еси́ и я́же ввéрена суть тебé, вéдый, от когó научи́лся еси́. И я́ко из млáда свящéнная писáния умéеши, могýщая тя умудри́ти во спасéние вéрою, я́же о Христé Иисýсе.
[Русский синодальный перевод](А ты последовал мне в учении, житии, расположении, вере, великодушии, любви, терпении, в гонениях, страданиях, постигших меня в Антиохии, Иконии, Листрах; каковые гонения я перенес, и от всех избавил меня Господь. Да и все, желающие жить благочестиво во Христе Иисусе, будут гонимы. Злые же люди и обманщики будут преуспевать во зле, вводя в заблуждение и заблуждаясь. А ты пребывай в том, чему научен и что тебе вверено, зная, кем ты научен. Притом же ты из детства знаешь священные писания, которые могут умудрить тебя во спасение верою во Христа Иисуса.(2Тим.3:10-15)
Аллилуиарий воскресный, глас 1
Чтец: Чтец: Аллилýиа, аллилýиа, аллилýиа, глас пéрвый.
Хор: Аллилýиа, аллилýиа, аллилýиа.
Чтец: Бог дая́й отмщéние мне, и покори́вый лю́ди под мя. (Пс.17:48)
Хор: Аллилýиа, аллилýиа, аллилýиа.
Чтец: Величáяй спасéния царéва и творя́й ми́лость христý Своемý Дави́ду и сéмени егó до вéка. (Пс.17:51)
Хор: Аллилýиа, аллилýиа, аллилýиа.
ЕВАНГЕЛИЕ
От Луки́ Святáго Евáнгелия чтéние.
Хор: Слáва Тебé, Гóсподи, слáва Тебé.
(Лк.зач.89): Речé Госпóдь при́тчу сию́: человéка два внидóста в цéрковь помоли́тися, еди́н фарисéй, а други́й мытáрь. Фарисéй же став, си́це в себé моля́шеся: Бóже, хвалý Тебé воздаю́, я́ко несмь я́коже прóчии человéцы, хи́щницы, непрáведницы, прелюбодéе, или́ я́коже сей мытáрь. Пощýся двакрáты в суббóту, десяти́ну даю́ всегó ели́ко притяжý. Мытáрь же издалéча стоя́, не хотя́ше ни óчию возвести́ на нéбо, но бия́ше пéрси своя́, глагóля: Бóже, ми́лостив бýди мне грéшнику. Глагóлю вам, я́ко сни́де сей оправдáн в дом свой пáче óнаго, я́ко всяк вознося́йся смири́тся, смиря́яй же себé вознесéтся.
[Русский синодальный перевод](Два человека вошли в храм помолиться: один фарисей, а другой мытарь. Фарисей, став, молился сам в себе так: Боже! благодарю Тебя, что я не таков, как прочие люди, грабители, обидчики, прелюбодеи, или как этот мытарь: пощусь два раза в неделю, даю десятую часть из всего, что приобретаю. Мытарь же, стоя вдали, не смел даже поднять глаз на небо; но, ударяя себя в грудь, говорил: Боже! будь милостив ко мне грешнику! Сказываю вам, что сей пошел оправданным в дом свой более, нежели тот: ибо всякий, возвышающий сам себя, унижен будет, а унижающий себя возвысится. (18:10-14)
Хор: Слáва Тебé, Гóсподи, слáва Тебé.
Помяни нас, Гóсподи, егдá прии́деши во Цáрствии Твоéм.
Помяни нас, Владыко, егдá прии́деши во Цáрствии Твоéм.
Помяни нас, Святый, егдá прии́деши во Цáрствии Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стих: Приступи́те к Немý и просвети́теся, и лицá вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Отцý и Сыну и Святóму Дýху.
Лик святых Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ныне и прúсно и во вéки векóв. Амúнь.
Символ веры
Вéрую во Еди́наго Бóга Отцá, Вседержителя, Творцá нéбу и земли, ви́димым же всем и неви́димым. И во Еди́наго Гóспода Иисýса Христа, Сына Бóжия, Единорóднаго, Иже от Отцá Рождéннаго прéжде всех век; Свéта от Свéта, Бóга Истинна от Бóга Истинна, рождéнна, несотворéнна, единосýщна Отцý, Имже вся быша. Нас рáди человéк и нáшего рáди спасéния сшéдшаго с небéс и воплоти́вшагося от Дýха Свята и Мари́и Дéвы и вочеловéчшася. Распятаго же за ны при Понти́йстем Пилáте, и страдáвша и погребéнна. И воскрéсшаго в трéтий день по Писáнием, и возшéдшаго на небесá и седяща одеснýю Отцá. И пáки грядýщаго со слáвою суди́ти живым и мéртвым, Егóже Цáрствию не бýдет концá. И в Дýха Святáго, Гóспода, Животворя́щаго, Иже от Отцá исходя́щаго, Иже со Отцéм и Сыном спокланяема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéние во оставлéние грехóв. Чáю воскресéния мéртвых, и жи́зни бýдущаго вéка. Аминь.
Ослáби, остáви, прости Бóже, прегрешéния нáша, вóльная, и невóльная, яже в слóве и в дéле, яже в вéдении и не в вéдении, яже во дни и в нощи́, яже во умé и помышлéнии, вся нам прости, яко Благ и Человеколюбец.
Óтче наш, Иже еси на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, яко на небеси́ и на земли́. Хлеб наш насýщный даждь нам днесь, и остáви нам дóлги нáша, якоже и мы оставляем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сы́не Бóжий, поми́луй нас. Аминь.
КОНДАК
Кондáк Триóди, глас 3: Воздыхáния принесéм мытáрская Гóсподеви,/ и к Немý пристýпим грéшнии я́ко Влады́це:/ хóщет бо спасéния всех человéков,/ оставлéние подаéт всем кáющимся./ Нас бо рáди воплоти́ся,// Бог сый Отцý собезначáльный.
Гóсподи, помилуй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благих Винá, благоволи же и о мне грéшнем, утверди, вразуми сéрдце моé, и всю мою отыми́ сквéрну, просвети мою мысль, да выну слáвлю, пою, покланя́юся и глагóлю: Един Свят, Един Госпóдь, Иисýс Христóс, во слáву Бóга Отцá, аминь.
Бýди имя Госпóдне благословéно от ны́не и до вéка. (3 раза)
Слáва Отцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю Гóспода на вся́кое врéмя,/ вы́ну хвалá Его во устéх моих./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм имя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щий воззвá, и Госпóдь услы́ша и,/ и от всех скорбéй егó спасé и./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, иже уповáет нань./ Бóйтеся Гóспода, вси святи́и Егó,/ яко несть лишéния боя́щымся Его./ Богáтии обнищáша и взалкáша,/ взыскáющии же Гóспода не лишáтся вся́каго блáга./ Прииди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержи́ язык твой от зла,/ и устнé твои́, éже не глагóлати льсти./ Уклони́ся от зла и сотвори́ блáго,/ взыщи́ ми́ра, и пожени́ и./ Очи Госпóдни на прáведныя,/ и ýши Егó в моли́тву их./ Лицé же Госпóдне на творя́щия злáя,/ еже потреби́ти от земли́ пáмять их./ Воззвáша прáведнии, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящии прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющии на Негó.
Достойно есть
Хор: Достóйно есть я́ко вои́стинну блажи́ти Тя, Богорóдицу,/Присноблажéнную и Пренепорóчную и Мáтерь Бóга нáшего./ Честнéйшую Херуви́м и слáвнeйшую без сравнéния Серафи́м,/ без истлéния Бóга Слóва рóждшую, сýщую Богорóдицу Тя величáем.
Слáва Отцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благослови́.
ОТПУСТ
Гóсподи, Иисусе Христé, Сыне Бóжий, молитвами Пречи́стыя Твоея Мáтере, святы́х слáвных и всехвáльных Апóстол, святых и прáведных богоотéц Иоаки́ма и Анны, и всех святых, поми́луй и спаси́ нас, яко Благ и Человеколюбец. Аминь.