ОБЕДНИЦА (Изобразительные). Неделя 32 по Пятидесятнице. Преподобнаго Антония Великаго. Глас 7.
30 января́ 2022 гóда. Недéля 32 по Пятидеся́тнице. Преподóбнаго Антóния Велúкаго. Глас 7. Воскрéсная прáздничная слýжба для домáшнего (келéйного) совершéния. Слýжба мирскúм чúном.
Прéжде глагóли часы
ЧИН ОБЕДНИЦЫ
Глагóли сúце: Благослови, душé моя, Гóспода,/ благословéн еси Гóсподи.
Псалом 102
Благослови, душé моя, Гóспода,/ и вся внýтренняя моя имя святóе Егó./ Благослови, душé моя, Гóспода,/ и не забывáй всех воздаяний Егó,/ очищáющаго вся беззакóния твоя,/ исцеляющаго вся недýги твоя,/ избавляющаго от истлéния живóт твой,/ венчáющаго тя милостию и щедрóтами,/ исполняющаго во благих желáние твоé:/ обновится яко óрля юность твоя./ Творяй милостыни Госпóдь,/ и судьбý всем обидимым./ Сказá пути Своя Моисéови,/ сыновóм Изрáилевым хотéния Своя:/ Щедр и Милостив Госпóдь,/ Долготерпелив и Многомилостив./ Не до концá прогнéвается,/ нижé во век враждует,/ не по беззакóнием нáшим сотворил есть нам,/ ниже по грехóм нáшым воздáл есть нам./ Яко по высотé небéсней от земли,/ утвердил есть Госпóдь милость Свою на боящихся Егó./ Елико отстоят востóцы от зáпад,/ удáлил есть от нас беззакóния нáша./ Якоже щéдрит отéц сыны,/ ущéдри Госпóдь боящихся Егó./ Яко Той познá создáние нáше,/ помянý, яко персть есмы./ Человéк, яко травá дние eгó,/ яко цвет сéльный, тако оцветéт,/ яко дух прóйде в нем,/ и не бýдет, и не познáет ктомý мéста своегó./ Милость же Госпóдня от вéка и до вéка на боящихся Егó,/ и прáвда Егó на сынéх сынóв, хранящих завéт Егó, и пóмнящих зáповеди Егó творити я./ Госпóдь на Небеси уготóва Престóл Свой,/ и Цáрство Егó всéми обладáет./ Благословите Гóспода вси Áнгели Егó,/ сильнии крéпостию, творящии слóво Егó, услышати глас словéс Егó./ Благословите Гóспода вся Силы Егó,/ слýги Егó, творящии вóлю Егó./ Благословите Гóспода вся делá Егó,/ на всяком мéсте владычества Егó.
Слáва Отцý и Сы́ну и Святóму Дýху, и ны́не и присно и во вéки векóв. Аминь.
Благослови, душé моя, Гóспода,/ и вся внýтренняя моя имя святóе Егó./ Благословéн еси, Гóсподи.
Слáва Отцý и Сыну и Святóму Дýху.
Псалом 145
Хвали, душé моя, Гóспода./ Восхвалю Гóспода в животé моéм,/ пою Бóгу моемý, дóндеже есмь./ Не надéйтеся на князи, на сы́ны человéческия,/ в нихже несть спасéния./ Изы́дет дух eгó/ и возвратится в зéмлю свою./ В той день погибнут вся помышлéния eгó./ Блажéн, eмуже Бог Иáковль Помóщник егó,/ уповáние eгó на Гóспода Бóга своегó,/ сотвóршаго нéбо и зéмлю,/ мóре и вся, яже в них,/ хранящаго истину в век,/ творящаго суд обидимым,/ дающаго пищу áлчущим./ Госпóдь решит оковáнныя./ Госпóдь умудряет слепцы́./ Госпóдь возвóдит низвéрженныя./ Госпóдь любит прáведники./ Госпóдь хранит пришéльцы,/ сира и вдову приимет/ и путь грéшных погубит./ Воцарится Госпóдь во век,/ Бог твой, Сиóне, в род и род.
И ныне и прúсно и во вéки векóв. Амúнь.
Единорóдный Сыне и Слóве Бóжий, Безсмéртен Сый/ и извóливый спасéния нáшего рáди/ воплотитися от Святы́я Богорóдицы и Приснодéвы Марии,/ непрелóжно вочеловéчивыйся,/ распны́йся же, Христé Бóже, смéртию смерть попрáвый,/ Един Сый Святыя Трóицы,/ спрославляемый Отцý и Святóму Дýху, спаси нас.
И поем Блаженны с тропарями из Октоиха
Хор: Во Цáрствии Твоéм помянú нас, Гóсподи,/ егдá приúдеши, во Цáрствии Твоéм.
Хор: Блажéни нúщии дýхом,/ яко тех есть Цáрство Небéсное.
Хор: Блажéни плáчущии,/ яко тúи утéшатся.
На 10. Хор: Блажéни крóтции,/ яко тúи наслéдят зéмлю.
Чтец (воскрéсные, глас 7): Красéн бе и добр в снедь, и́же менé умертви́вый плод:/ Христóс есть Дрéво живóтное,/ от Негóже яды́й не умирáю,/ но вопию́ с разбóйником:// помяни́ мя Гóсподи, во Цáрствии Твоéм.
Хор: Блажéни áлчущии и жáждущии прáвды,/ яко тúи насытятся.
Чтец: На Крест вознéсся Щéдре,/ Адáмово рукописáние дрéвняго грехá заглáдил еси́,/ и спасл еси́ от прéлести весь род человéческий.// Тéмже воспевáем Тя, благодéтелю Гóсподи.
На 8. Хор: Блажéни мúлостивии,/ яко тúи помúловани бýдут.
Чтец: Пригвозди́л еси́ на Крестé Щéдре, грехи́ нáша Христé,/ и Твоéю смéртию смерть умертви́л еси́/ воздви́гнувый умéршия из мéртвых:// тéмже покланя́емся Твоемý святóму воскресéнию.
Хор: Блажéни чúстии сéрдцем,/ яко тúи Бóга ýзрят.
Чтец: Излия́ яд змий в слýхи Éвины иногдá:/ Христóс же на Дрéве крéстнем источи́л есть ми́рови жи́зни слáдость./ Тéмже взывáем:// помяни́ нас Гóсподи, во Цáрствии Твоéм.
Хор: Блажéни миротвóрцы,/ яко тúи сынове Бóжии нарекýтся.
На 6. Чтец: Во грóбе я́ко смéртен положéн был еси́, Животé всех Христé:/ и вереи́ áдовы сломи́л еси́:/ и воскрéс во слáве триднéвен я́ко си́лен, всех просвети́л еси́:// слáва Твоемý востáнию.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Госпóдь воскрéс триднéвен из мéртвых,/ даровá мир Свой ученикóм,/ и сих благослови́в послá, рек:// вся приведи́те во Цáрствие Моé.
Хор: Блажéни естé, егдá понóсят вам,/ и изженýт, и рекýт всяк зол глагóл на вы лжýще Менé рáди.
На 4.Чтец (Прп. Антóния Велúкаго, глас 8): Утверждéнным пóмыслом и крéпким терпéнием страстéй увяди́л еси́ плáмень,/ в безстрáстия свéтлую одéжду, Антóние, одéялся еси́, óтче, и спасéния ри́зу.
Хор: Рáдуйтеся и веселúтеся,/ яко мзда вáша мнóга на небесéх.
Чтец: Крепчáйшия прилóги дéмонов дерзáющих/ и звéрскими óбразы подóбящихся,/ пренебрéгл еси́ тех немощнýю си́лу,/ крéпкаго бо имéл еси́ во бранéх Спомóщника.
Хор: Слáва Отцý и Сыну и Святóму Дýху.
Чтец: Богонóсец, начáла тьмы и влáсти обличи́в воздержáнием крéпким,/ дóблественный победи́тель, Антóние, был еси́,/ пóстников слáва, монáшествующих похвалá.
Хор: И ныне и прúсно и во вéки векóв. Амúнь.
Чтец (Богорóдичен): Умерщвлéнный мой ум живóтным дéйством,/ из Тебé я́вльшимся ми́ру, воздви́гни, Чи́стая, и к жи́зни настáви,/ я́же смéрти двéри разóршая еди́на Рождествóм Твои́м.
Тропари и кондаки
Тропáрь воскрéсный, глас 7: Разруши́л еси́ Крестóм Твои́м смерть,/ отвéрзл еси́ разбóйнику рай;/ миронóсицам плач преложи́л еси́/ и Апóстолом проповéдати повелéл еси́/, я́ко воскрéсл еси́, Христé Бóже,/ дáруяй ми́рови// вéлию ми́лость.
Тропáрь Прп. Антóния Велúкаго, глас 4: Ревни́теля Илию́ нрáвы подражáя,/ Крести́телю прáвыми стезя́ми послéдуя,/ óтче Антóние,/ пусты́ни был еси́ жи́тель/ и вселéнную утверди́л еси́ моли́твами твои́ми./ Тéмже моли́ Христá Бóга// спасти́ся душáм нáшим.
Слáва Отцý и Сыну и Святóму Дýху.
Кондáк Прп. Антóния Велúкаго, глас 2: Житéйския молвы́ отри́нув,/ безмóлвно житиé скончáл еси́,/ Крести́теля подражáяй вся́ким óбразом, преподóбнейший,/ с ним ýбо тя почитáем,// отцéв начáльниче, Антóние.
И ныне и прúсно и во вéки векóв. Амúнь.
Кондáк воскрéсный, глас 7: Не ктомý держáва смéртная/ возмóжет держáти человéки:/ Христóс бо сни́де, сокрушáя и разоря́я си́лы ея́./ Связýем бывáет ад,/ прорóцы соглáсно рáдуются:/ предстá, глагóлюще, Спас сýщим в вéре,// изыди́те, вéрнии, в воскресéние.
Трисвятое
Хор: Святы́й Бóже,/ Святы́й Крéпкий,/ Святы́й Безсмéртный, помилуй нас. (Трúжды)
Хор: Слáва Отцý и Сыну и Святóму Дýху, и ныне и присно и во вéки векóв, аминь.
Хор: Святы́й Безсмéртный, помилуй нас.
Хор: Святы́й Бóже,/ Святы́й Крéпкий,/ Святы́й Безсмéртный, помилуй нас.
Прокимен воскресный, глас 7
Чтец: Прокимен, глас седьмы́й, псалóм Дави́дов: Госпóдь крéпость лю́дем Свои́м даст, Госпóдь благослови́т лю́ди Своя́ ми́ром.
Хор: Госпóдь крéпость лю́дем Своúм даст,/ Госпóдь благословúт лю́ди Своя́ мúром.
Чтец: Принеси́те Гóсподеви, сы́нове Бóжии, принеси́те Гóсподеви сы́ны óвни.
Хор:Госпóдь крéпость лю́дем Своúм даст,/ Госпóдь благословúт лю́ди Своя́ мúром.
Прокимен преподобнаго, глaс 7
Чтец: Глас седьмы́й: Честнá пред Гóсподем/ смерть преподóбных Егó.
Хор: Честнá пред Гóсподем/ смерть преподóбных Егó.
АПОСТОЛ
Чтец: К Тимофéю послáния святáго апóстола Пáвла чтéние.
(1Тим.зач.280Б): Чáдо Тимофéе, вéрно слóво и вся́каго прия́тия достóйно, я́ко Христóс Иисýс прии́де в мир грéшники спасти́, от ни́хже пéрвый есмь аз. Но сегó рáди поми́лован бых, да во мне пéрвом покáжет Иисýс Христóс все долготерпéние, за óбраз хотя́щих вéровати Емý в жизнь вéчную. Царю́ же векóв нетлéнному, неви́димому, еди́ному премýдрому Бóгу, честь и слáва во вéки векóв. Ами́нь
[Русский синодальный перевод]Верно и всякого принятия достойно слово, что Христос Иисус пришел в мир спасти грешников, из которых я первый. Но для того я и помилован, чтобы Иисус Христос во мне первом показал все долготерпение, в пример тем, которые будут веровать в Него к жизни вечной. Царю же веков нетленному, невидимому, единому премудрому Богу честь и слава во веки веков. Аминь.(1:15-17)
(Евр.зач.335) Брáтие, повинýйтеся настáвником вáшым и покаря́йтеся: тíи бо бдя́т о душáх вáших, я́ко слóво воздáти хотя́ще: да с рáдостiю сié творя́т, а не воздыхáюще, нѣ́сть бо полéзно вáм сié. Моли́теся о нáс: уповáем бо, я́ко добрý сóвѣсть и́мамы, во всѣ́х дóбре хотя́ще жи́ти. Ли́шше же молю́, сié твори́те, да вскóрѣ устрóюся вáм (возвращýся к вáм). Бóг же ми́ра, возведы́й из мéртвых пáстыря овцáм вели́каго крóвiю завѣ́та вѣ́чнаго, Гóспода нáшего Иисýса Христá, да соверши́т вы́ во вся́цѣм дѣ́лѣ блáзѣ, сотвори́ти вóлю егó, творя́ в вáс благоугóдное пред ни́м Иисýс Христóм: емýже слáва во вѣ́ки вѣкóв. Ами́нь.
[Русский синодальный перевод]Повинуйтесь наставникам вашим и будьте покорны, ибо они неусыпно пекутся о душах ваших, как обязанные дать отчет; чтобы они делали это с радостью, а не воздыхая, ибо это для вас неполезно. Молитесь о нас; ибо мы уверены, что имеем добрую совесть, потому что во всем желаем вести себя честно. Особенно же прошу делать это, дабы я скорее возвращен был вам. Бог же мира, воздвигший из мертвых Пастыря овец великого Кровию завета вечного, Господа нашего Иисуса Христа, да усовершит вас во всяком добром деле, к исполнению воли Его, производя в вас благоугодное Ему через Иисуса Христа. Ему слава во веки веков! Аминь. (Евр.13:17-21)
Аллилуиарий воскресный, глас 7
Чтец: Аллилýиа, аллилýиа, аллилýиа, глас седьмы́й.
Хор: Аллилýиа, аллилýиа, аллилýиа.
Чтец: Блáго есть исповéдатися Гóсподеви, и пéти и́мени Твоемý Вы́шний.
Хор: Аллилýиа, аллилýиа, аллилýиа.
Чтец: Возвеща́ти заýтра ми́лость Твою́, и и́стину Твою́ на вся́ку нощь.
Хор: Аллилýиа, аллилýиа, аллилýиа.
Аллилуиарий преподобнаго, глас 6
Чтец: Глас шесты́й: Блажен муж, боя́йся Гóспода,/ в зáповедех Егó восхóщет зелó.
Хор: Аллилýиа, аллилýиа, аллилýиа.
Чтец: Си́льно на земли́ бýдет сéмя егó.
Хор: Аллилýиа, аллилýиа, аллилýиа.
ЕВАНГЕЛИЕ
От Луки́ Святáго Евáнгелия чтéние.
Хор: Слáва Тебé, Гóсподи, слáва Тебé.
(Лк.зач.93): Во врéмя óно, егдá прибли́жися Iисýс во Iерихóн, слепéц нéкiй седя́ше при пути́ прося́. Слы́шав же нарóд мимоходя́щь, вопрошáше: что ýбо есть сié? Повéдаша же емý, я́ко Iисýс Назаряни́н мимохóдит. И возопи́, глагóля: Iисýсе Сы́не Давíдов, поми́луй мя. И предидýщiи прещáху емý, да умолчи́т, он же пáче мнóжае вопiя́ше: Сы́не Давíдов, поми́луй мя. Став же Iисýс повелé привести́ егó к Себé. Прибли́жшу же ся емý к Немý, вопроси́ егó, глагóля: что хóщеши, да ти сотворю́? Он же речé: Гóсподи, да прозрю́. Iисýс же речé емý: прозри́, вéра твоя́ спасé тя. И áбiе прозрé, и во след Егó идя́ше, слáвя Бóга. И вси лю́дiе ви́девше воздáша хвалý Бóгови.
[Русский синодальный перевод](Когда же подходил Он к Иерихону, один слепой сидел у дороги, прося милостыни, и, услышав, что мимо него проходит народ, спросил: что это такое? Ему сказали, что Иисус Назорей идет. Тогда он закричал: Иисус, Сын Давидов! помилуй меня. Шедшие впереди заставляли его молчать; но он еще громче кричал: Сын Давидов! помилуй меня. Иисус, остановившись, велел привести его к Себе: и, когда тот подошел к Нему, спросил его: чего ты хочешь от Меня? Он сказал: Господи! чтобы мне прозреть. Иисус сказал ему: прозри! вера твоя спасла тебя. И он тотчас прозрел и пошел за Ним, славя Бога; и весь народ, видя это, воздал хвалу Богу. (18:35-43)
(Лк.зач.24) Во врéмя óно, ста Иисýс на мéсте рáвне, и нарóд учени́к Егó, и мнóжество мнóго людéй от всея́ Иудéи и Иерусали́ма, и помóрия Ти́рска и Сидóнска, и́же приидóша послýшати Егó и исцели́тися от недýг свои́х, и стрáждущии от дух нечи́стых, и исцеля́хуся. И весь нарóд искáше прикасáтися Емý, я́ко си́ла от Негó исхождáше, и исцеля́ше вся. И той возвéд óчи свои́ на ученики́ своя́, глагóлаше: блажéни ни́щии дýхом, я́ко вáше есть Цáрствие Бóжие. Блажéни, áлчущии ны́не, я́ко насы́титеся. Блажéни, плáчущии ны́не, я́ко возсмеéтеся. Блажéни бýдете, егдá возненави́дят вас человéцы, и егдá разлучáт вы и понóсят, и пронесýт и́мя вáше я́ко зло, Сы́на Человéческаго рáди. Возрáдуйтеся в той день и взыгрáйте: се бо мзда вáша мнóга на небеси́.
[Русский синодальный перевод](И, сойдя с ними, стал Он на ровном месте, и множество учеников Его, и много народа из всей Иудеи и Иерусалима и приморских мест Тирских и Сидонских, которые пришли послушать Его и исцелиться от болезней своих, также и страждущие от нечистых духов; и исцелялись. И весь народ искал прикасаться к Нему, потому что от Него исходила сила и исцеляла всех. И Он, возведя очи Свои на учеников Своих, говорил: Блаженны нищие духом, ибо ваше есть Царствие Божие. Блаженны алчущие ныне, ибо насытитесь. Блаженны плачущие ныне, ибо воссмеетесь. Блаженны вы, когда возненавидят вас люди и когда отлучат вас, и будут поносить, и пронесут имя ваше, как бесчестное, за Сына Человеческого. Возрадуйтесь в тот день и возвеселитесь, ибо велика вам награда на небесах. Так поступали с пророками отцы их. (Лк.6:17-23)
Хор: Слáва Тебé, Гóсподи, слáва Тебé.
Помяни нас, Гóсподи, егдá прии́деши во Цáрствии Твоéм.
Помяни нас, Владыко, егдá прии́деши во Цáрствии Твоéм.
Помяни нас, Святый, егдá прии́деши во Цáрствии Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
Стих: Приступите к Немý и просветитеся, и лицá вáша не постыдятся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
Слáва Отцý и Сыну и Святóму Дýху.
Лик святых Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
И ныне и прúсно и во вéки векóв. Амúнь.
Символ веры
Вéрую во Еди́наго Бóга Отцá, Вседержителя, Творцá нéбу и земли, видимым же всем и невидимым. И во Единаго Гóспода Иисýса Христа, Сына Бóжия, Единорóднаго, Иже от Отцá Рождéннаго прéжде всех век; Свéта от Свéта, Бóга Истинна от Бóга Истинна, рождéнна, несотворéнна, единосýщна Отцý, Имже вся быша. Нас рáди человéк и нáшего рáди спасéния сшéдшаго с небéс и воплотившагося от Дýха Свята и Марíи Дéвы и вочеловéчшася. Распятаго же за ны при Понти́йстем Пилáте, и страдáвша и погребéнна. И воскрéсшаго в трéтий день по Писáнием, и возшéдшаго на небесá и седяща одеснýю Отцá. И пáки грядýщаго со слáвою судити живым и мéртвым, Егóже Цáрствию не бýдет концá. И в Дýха Святáго, Гóспода, Животворящаго, Иже от Отцá исходящаго, Иже со Отцéм и Сыном спокланяема и сслáвима, Глагóлавшего прорóки. Во едину Святýю, Собóрную и Апóстольскую Цéрковь. Исповéдую едино крещéние во оставлéние грехóв. Чáю воскресéния мéртвых, и жи́зни бýдущаго вéка. Аминь.
Ослáби, остáви, прости Бóже, прегрешéния нáша, вóльная, и невóльная, яже в слóве и в дéле, яже в вéдении и не в вéдении, яже во дни и в нощи, яже во умé и помышлéнии, вся нам прости, яко Благ и Человеколюбец.
Óтче наш, Иже еси на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, яко на небеси́ и на земли́. Хлеб наш насýщный даждь нам днесь, и остáви нам дóлги нáша, якоже и мы оставляем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сыне Бóжий, помилуй нас. Аминь.
КОНДАК
Кондáк воскрéсный, глас 7: Не ктомý держáва смéртная/ возмóжет держáти человéки:/ Христóс бо сни́де, сокрушáя и разоря́я си́лы ея́./ Связýем бывáет ад,/ прорóцы соглáсно рáдуются:/ предстá, глагóлюще, Спас сýщим в вéре,// изыди́те, вéрнии, в воскресéние.
Гóсподи, помилуй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благих Винá, благоволи же и о мне грéшнем, утверди, вразуми сéрдце моé, и всю мою отыми сквéрну, просвети мою мысль, да выну слáвлю, пою, покланяюся и глагóлю: Един Свят, Един Госпóдь, Иисýс Христóс, во слáву Бóга Отцá, аминь.
Бýди имя Госпóдне благословéно от ныне и до вéка. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Псалом 33
Благословлю Гóспода на всякое врéмя,/ вы́ну хвалá Его во устéх моих./ О Гóсподе похвáлится душá моя,/ да услы́шат крóтцыи и возвеселятся./ Возвеличите Гóспода со мнóю,/ и вознесéм имя Егó вкýпе./ Взыскáх Гóспода и услы́ша мя,/ и от всех скорбéй моих избáви мя./ Приступите к Немý и просветитеся,/ и лицá вáша не постыдятся./ Сей нищий воззвá, и Госпóдь услы́ша и,/ и от всех скорбéй егó спасé и./ Ополчится Áнгел Госпóдень óкрест боящихся Егó,/ и избáвит их./ Вкусите и видите, яко благ Госпóдь;/ блажéн муж, иже уповáет нань./ Бóйтеся Гóспода, вси святии Егó,/ яко несть лишéния боящымся Его./ Богáтии обнищáша и взалкáша,/ взыскáющии же Гóспода не лишáтся всякаго блáга./ Приидите, чáда, послýшайте менé,/ стрáху Госпóдню научý вас./ Кто есть человéк хотяй живóт,/ любяй дни видети блáги;/ Удержи язык твой от зла,/ и устнé твои, éже не глагóлати льсти./ Уклонися от зла и сотвори блáго,/ взыщи мира, и пожени и./ Очи Госпóдни на прáведныя,/ и ýши Егó в молитву их./ Лицé же Госпóдне на творящия злáя,/ еже потребити от земли пáмять их./ Воззвáша прáведнии, и Госпóдь услыша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Хранит Госпóдь вся кóсти их,/ ни едина от них сокрушится./ Смерть грéшников лютá,/ и ненавидящии прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющии на Негó.
Достойно есть
Хор: Достóйно есть я́ко вои́стинну блажи́ти Тя, Богорóдицу,/Присноблажéнную и Пренепорóчную и Мáтерь Бóга нáшего./ Честнéйшую Херуви́м и слáвнeйшую без сравнéния Серафи́м,/ без истлéния Бóга Слóва рóждшую, сýщую Богорóдицу Тя величáем.
Слáва Отцý и Сыну и Святóму Дýху, и ныне и присно и во вéки векóв, аминь.
Гóсподи, помилуй. (3 раза)
Гóсподи, благослови.
ОТПУСТ
Гóсподи, Иисусе Христé, Сыне Бóжий, молитвами Пречистыя Твоея Мáтере, святы́х слáвных и всехвáльных Апóстол, святых и прáведных богоотéц Иоакима и Анны, и всех святых, помилуй и спаси нас, яко Благ и Человеколюбец. Аминь.