Неделя 26 по Пятидесятнице. Святителя Николая (Никола зимний). ВСЕНОЩНОЕ БДЕНИЕ. УТРЕНЯ. КАНОН
19 декабря́ 2021 г. Недéля 26 по Пятидеся́тнице. Святи́теля Николáя, архиепи́скопа Мир Лики́йских, чудотвóрца. Глас 1.
Канон утрени. Начало здесь (великая вечерня), здесь (утреня) и здесь ( продолжение утрени)
КАНОН ВОСКРЕСНЫЙ, ГЛАС 1 (совмещенный с каноном Бородицы(глас 1) и первыйм и вторым каноном Свят. Николая, гласы 1 и 2)
ПЕСНЬ 1
Ирмóс: Твоя́ победи́тельная десни́ца/ Боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,// Изра́ильтяном путь глубины́ новосоде́лавшая.
Хор (припéв): Слáва, Гóсподи, Святóму Воскресéнию Твоему.
Чтец (тропáрь): И́же рука́ма пречи́стыма от пе́рсти/ богоде́тельне испе́рва созда́в мя,/ ру́це распросте́рл еси́ на кресте́,/ от земли́ взыва́я тле́нное мое́ те́ло,// е́же от Де́вы прия́л еси́.
Хор: Слáва, Гóсподи, Святóму Воскресéнию Твоему.
Чтец: Умерщвле́ние подъя́л еси́ мене́ ра́ди,/ и ду́шу сме́рти пре́дал еси́,/ И́же вдохнове́нием боже́ственным ду́шу ми вложи́вый,/ и отреши́в ве́чных уз, и совоскреси́в// нетле́нием просла́вил еси́.
Хор: Пресвятáя Богорóдице, спаси нас.
Богорóдичен: Ра́дуйся, благода́ти исто́чниче,/ ра́дуйся ле́ствице, и две́ре небе́сная,/ ра́дуйся све́щнице, и ру́чко злата́я, и горо́ несеко́мая,// Я́же Жизнода́вца Христа́ ми́рови ро́ждшая.
Канон Богородицы, глас 1
Хор: Пресвятáя Богорóдице, спаси нас.
Чтец: Ку́ю Ти досто́йную песнь на́ше принесе́т неможе́ние?/ то́чию обра́довательную,/ е́йже нас Гаврии́л та́йно научи́л есть:// ра́дуйся, Богоро́дице Де́во, Ма́ти Неневе́стная.
Хор: Пресвятáя Богорóдице, спаси нас.
Чтец: Присноде́ве и Ма́тери Царя́ вы́шних сил,/ от чисте́йша се́рдца, ве́рнии, духо́вне возопии́м:// ра́дуйся, Богоро́дице Де́во, Ма́ти Неневе́стная.
Первый канон св. Николая, глас 2
Хор: Святи́телю отче Никóлае, моли Бóга о нас.
Чтец: Венцено́сец престо́лу Христо́ву, прему́дре Нико́лае,/ предстоя́ со А́нгельскими во́инствы,/ просвеще́ние ми да́руй, озаря́ющее души́ моея́ омраче́ние,// я́ко да восхвалю́, ра́дуяся, твою́, всеблаже́нне, па́мять.
Хор: Святи́телю отче Никóлае, моли Бóга о нас.
Чтец: Прославля́яй вся Госпо́дь Того́ сла́вящия,/ тя ве́рным прибе́жище даде́,/ напа́стей избавля́юща притека́ющия к твоему́ кро́ву, Нико́лае,// и призыва́ющия тя ве́рою и любо́вию, пресла́вне.
Хор: Пресвятáя Богорóдице, спаси нас.
Богорóдичен: Сравни́тися жела́ние ми вложи́в змий вселука́вый, Соде́телю,/ я́ко пле́нника, восхи́ти./ Тобо́ю же, Всечи́стая, воззва́н бых,/ обожи́вся и́стиннейше:/ Ты бо, о Богома́ти,// мене́ обожи́вшаго родила́ еси́.
Второй канон св. Николая, глас 1
Хор: Святи́телю отче Никóлае, моли Бóга о нас.
Чтец: Недоуме́нным язы́ком и устна́ми, похвале́ние ма́лое и моле́ние/ принести́ твоему́, Нико́лае, приидо́х Богоподража́нному преизя́ществу;// но, я́ко богатода́вец, Спа́са и Бо́га ми́лостива пода́ждь ми.
Хор: Святи́телю отче Никóлае, моли Бóга о нас.
Чтец: Челове́к сый Небе́сный, равноа́нгелен на земли́ яви́лся еси́,/ вдов защи́тник гото́вый, и утружда́емых отмсти́тель,// и всем скорбя́щим в беда́х помо́щник, о́тче Нико́лае.
Хор: Святи́телю отче Никóлае, моли Бóга о нас.
Чтец: Сказу́ет вся подсо́лнечная, Нико́лае треблаже́нне,/ чуде́с твои́х доброде́телей пучи́ну:/ ни́щии предста́теля, и сироты́ и вдовы́ пита́теля,// и слепи́и путевожда́, вси же побо́рника.
Хор: Слáва Отцу и Сыну и Святóму Духу.
Трóичен: Тро́ицу честву́ю Несозда́нную,/ Отца́ и Сы́на со Ду́хом, Существо́ Про́сто, Божество́,/ Естество́ Несеко́мое суще́ственне, Три Ипоста́си,// разделя́я Ли́чно и по Ипоста́си.
Хор: И ныне и присно и во вéки векóв. Аминь.
Богорóдичен: Безсеме́нно Сло́во зачала́ еси́,/ Еди́наго от Тро́ицы, Всенепоро́чная,/ и Сего́ пло́тию родила́ еси́,/ пребы́вши по рождестве́ Де́ва, я́ко и пре́жде./ Сего́, я́ко Сы́на Твоего́ и Бо́га,// о нас при́сно моли́.
Катавáсия Рождествá (глас 4): Христóс раждáется - слáвите,/ Христóс с Небéс - сря́щите./ Христóс на земли́ - возноси́теся./ Пóйте Гóсподеви, вся земля́,/ и весéлием воспóйте, лю́дие,/ я́ко прослáвися.
ПЕСНЬ 3
Ирмóс: Еди́не ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме// неизрече́нныя сла́вы Твоея́, Человеколю́бче.
Хор: Слáва, Гóсподи, Святóму Воскресéнию Твоему.
Чтец: Бог Сый мне, Бла́же, па́дшаго уще́дрил еси́,/ и сни́ти ко мне благоволи́в, возне́сл мя еси́ распя́тием,/ е́же вопи́ти Тебе́, Святы́й:// Хра́ме одушевле́нный неизрече́нныя Твоея́ сла́вы, Человеколю́бче.
Хор: Слáва, Гóсподи, Святóму Воскресéнию Твоему.
Чтец: Живо́т ипоста́сный Христе́ сый,/ в истле́вша мя, я́ко Милосе́рдый Бог, обо́лкся,/ в персть сме́ртную соше́д, Влады́ко,/ сме́ртную держа́ву разруши́л еси́,/ и мертв тридне́вен воскре́с,// в нетле́ние мя обле́кл еси́.
Хор: Пресвятáя Богорóдице, спаси нас.
Богорóдичен: Бо́га заче́нши во чре́ве, Де́во, Ду́хом Пресвяты́м,/ пребыла́ еси́ неопали́ма,/ поне́же Тя купина́ законополо́жнику Моисе́ю,/ пали́мую нежего́мо, я́ве предвозвести́,// огнь нестерпи́мый прие́мшую.
Глас 1
Хор: Пресвятáя Богорóдице, спаси нас.
Чтец: О́блак Тя ле́гкий нело́жно, Де́во, имену́ем,/ проро́ческим возсле́дующе рече́нием:/ прии́де бо на Тебе́ Госпо́дь/ низложи́ти еги́петския пре́лести рукотворе́ния,// и просвети́ти сим служа́щия.
Хор: Пресвятáя Богорóдице, спаси нас.
Чтец: Тя запеча́танный вои́стинну лик проро́ческий исто́чник,/ и заключе́нную дверь именова́, де́вства Твоего́, Всепе́тая,/ я́вственне зна́мения нам пи́шуще:// е́же сохрани́ла еси́ и по рождестве́.
Глас 2
Хор: Святи́телю отче Никóлае, моли Бóга о нас.
Чтец: Никóлае блажéнне, Влады́ки и́скренний учени́к ты быв,// спасáеши к тебé притекáющия от лю́тых бед и смéрти гóрькия.
Хор: Святи́телю отче Никóлае, моли Бóга о нас.
Чтец: Очи́сти рабы́ Твоя́, грехóв оставлéние, я́ко благ,/ дáруя, Николáя, Твоегó угóдника,// я́же к Тебé ходáтайствы, Многоми́лостиве.
Хор: Пресвятáя Богорóдице, спаси нас.
Богорóдичен: Утоли́ смуще́ние души́ моея́, Пречи́стая,/ и жизнь окорми́, Всесвята́я, Бо́га ро́ждшая,// в Не́мже утверди́ся се́рдце мое́.
Глас 1
Хор: Святи́телю отче Никóлае, моли Бóга о нас.
Чтец: Скрижа́ль в се́рдцы стяжа́в, Богому́дре, мно́гих доброде́телей,/ напи́сану безсме́ртным и пречи́стым пе́рстом Христа́ Бо́га, Нико́лае,// па́че ме́да и со́та сла́дость то́чиши из усте́н твои́х.
Хор: Святи́телю отче Никóлае, моли Бóга о нас.
Чтец: Показа́ благода́ть на тебе́ пресла́вне чудеса́, Нико́лае:/ чи́стое бо житие́ твое́, вои́стинну зла́та светле́йши,// облиста́ет мра́чныя ду́ши заре́ю Боже́ственнаго Ду́ха.
Хор: Святи́телю отче Никóлае, моли Бóга о нас.
Чтец: Живе́ши и по сме́рти, во снех я́ве явля́яся,/ и ю́ноши от сме́рти пресла́вно изба́вил еси́, вопия́ я́ве царю́:// не оби́ди муже́й, су́етною за́вистию оклевета́нных.
Хор: Слáва Отцу и Сыну и Святóму Духу.
Трóичен: Ми́лостива бу́ди мне, Всесвятáя Трóице, Бóже наш,/ безмéрными прегрешéнии оскверни́вшему житиé,/ О́тче, Сы́не и Ду́ше Живы́й,// соблюдáющи мя отвсю́ду, и при́сно неуя́звленна от скóрби.
Хор: И ныне и присно и во вéки векóв. Аминь.
Богорóдичен: Даéши, Богорóдице, спасéния надéжду рабóм Твои́м/ и в ну́ждах, и напáстех скоротéчными моли́твами соблюдáти и помогáти предстáни:// Ты бо еси́ похвалá нам, вéрным, Приснодéво.
Катавáсия Рождествá (глас 4): Прéжде век от Отцá рождéнному нетлéнно Сы́ну/ и в послéдняя от Дéвы/ воплощéнному безсéменно,/ Христу́ Бóгу возопии́м:/ вознесы́й рог наш,// свят еси́, Гóсподи.
Гóсподи, поми́луй. (Трижды)
Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.
Кондáк Святителя Николáя, глас 3: В Ми́рех, свя́те, священнодéйствитель показáлся еси́,/ Христóво бо, преподóбне, Евáнгелие испóлнив,/ положи́л еси́ ду́шу твою́ о лю́дех твои́х/ и спасл еси́ непови́нныя от смéрти./ Сегó рáди освяти́лся еси́,// я́ко вели́кий таи́нник Бóжия благодáти.
И́кос: Воспои́м ны́не святи́теля пе́сньми,/ ми́рским лю́дем па́стыря и учи́теля,/ да моли́твами его́ просвети́мся:/ се бо яви́ся чист весь, нетле́нен ду́хом,/ Христу́ принося́ же́ртву непоро́чну, чи́сту, Бо́гу благоприя́тну,/ я́ко святи́тель, очище́н и душе́ю и те́лом,/ те́мже сый и́стинно Це́ркве предста́тель и побо́рник сея́,// я́ко вели́кий таи́нник Бо́жия благода́ти.
Седальны Святителя Николáя, глас 8: Возше́д на высоту́ доброде́телей/ и Боже́ственными отту́ду, о́тче, озари́вся сия́нии чуде́с,/ пресве́тел вои́стинну яви́лся еси́ мирови па́стырь,/ нам в напа́стех сый предста́тель непобеди́мь;/ те́мже, пресла́вно врага́ победи́в, лжу отгна́л еси́/ и челове́ки спасл еси́ от сме́рти, Нико́лае,/ моли́ Христа́ Бо́га грехо́в оставле́ние дарова́ти// чту́щим любо́вию святу́ю па́мять твою́.
Слáва Отцу и Сыну и Святóму Духу.
Реку́ исцеле́ний, оби́льне излива́ющую,/ и исто́чник тя чуде́с неоску́дный показа́, Нико́лае, ми́лости бе́здна:/ тя́жкими бо неду́гами го́рце дручи́мии/ и злоключе́ньми жития́ лю́те му́чимии/ вся́кия ско́рби целе́бную вои́стинну обрета́ют лечбу́,/ те́плое твое́ защище́ние./ Сего́ ра́ди вопие́м ти:/ моли́ся Христу́ Бо́гу прегреше́ний оставле́ние дарова́ти// пра́зднующим любо́вию святу́ю па́мять твою́.
И ныне и присно и во вéки векóв. Аминь.
Богорóдичен из Минéи, глас 8: Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию, вси ублажа́ем, ро́ди челове́честии:/ огнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е Рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти// покланя́ющимся ве́рою пресвято́му Рождеству́ Твоему́.
ПЕСНЬ 4
Ирмóс: Го́ру Тя благода́тию Бо́жиею приосене́нную,/ прозорли́выма Авваку́м/ усмотри́в очи́ма,/ из Тебе́ изы́ти Изра́илеву провозглаша́ше Свято́му,/ во Спасе́ние на́ше// и обновле́ние.
Хор: Слáва, Гóсподи, Святóму Воскресéнию Твоему.
Чтец: Кто сей Спас и́же из Едо́ма исходя́, вене́ц нося́ терно́вен,/ очервле́нну ри́зу имы́й, на дре́ве ви́ся;/ Изра́илев есть Сей Святы́й,// во Спасе́ние на́ше и обновле́ние.
Хор: Слáва, Гóсподи, Святóму Воскресéнию Твоему.
Чтец: Ви́дите лю́дие непокори́вии, и устыди́теся:/ Его́же бо я́ко злоде́я вы вознести́ на крест у Пила́та испроси́сте умовре́дне,// сме́рти разруши́в си́лу, боголе́пно воскре́с из гро́ба.
Хор: Пресвятáя Богорóдице, спаси нас.
Богорóдичен: Дре́во Тя, Де́во, жи́зни ве́мы:/ не бо сне́ди плод смертоно́сный челове́ком из Тебе́ прозябе́,/ но живота́ присносу́щнаго наслажде́ние,// во Спасе́ние нас пою́щих Тя.
Глас 1
Хор: Пресвятáя Богорóдице, спаси нас.
Чтец: Слы́ши чуде́с не́бо, и внуша́й земле́,/ я́ко Дщи пе́рстнаго у́бо па́дшаго Ада́ма, Бо́гу нарече́на бысть,/ и Своему́ Соде́телю Роди́тельница,// на Спасе́ние на́ше и обновле́ние.
Хор: Пресвятáя Богорóдице, спаси нас.
Чтец: Пое́м вели́кое и стра́шное Твое́ та́инство,/ преми́рных бо утаи́вся чинонача́лий,/ на Тя И́же сый сни́де я́ко дождь на руно́, Всепе́тая,// на Спасе́ние нас пою́щих Тя.
Глас 2
Хор: Святи́телю отче Никóлае, моли Бóга о нас.
Чтец:Прибли́жився чи́сте заря́м духо́вным,/ светоно́сец был еси́, мира просвеща́я концы́,// всем предста́тельствуя и вся спаса́я ве́рою, к тебе́ притека́ющия.
Хор: Святи́телю отче Никóлае, моли Бóга о нас.
Чтец: Избавля́я от сме́рти, я́ко яви́лся еси́ пе́рвее, Нико́лае,/ ю́ноши, преподо́бне./ Та́ко и ны́не мя спаси́ от вся́каго обстоя́ния,// и напа́стей, и бед, всеблаже́нне.
Хор: Святи́телю отче Никóлае, моли Бóга о нас.
Чтец: Облиста́л еси́ доброде́телей сия́ньми, всеблаже́нне,/ подража́тель преизря́днейший Твоего́ Влады́ки быв,/ спаса́еши же, призыва́емь,// благогове́нием и любо́вию тя сла́вящия.
Хор: Пресвятáя Богорóдице, спаси нас.
Богорóдичен: На́йде на Тя Влады́ка тва́ри воплоща́емь,/ и спаса́я, я́ко благоутро́бен, всего́ мя челове́ка:// те́мже, ве́рнии, Богоро́дицу Тя сла́вим.
Глас 1
Хор: Святи́телю отче Никóлае, моли Бóга о нас.
Чтец: Именова́ние твое́, еди́но вои́стинну призыва́емо,/ от всех вра́жиих сове́т ско́ро избавля́ет зову́щия тебе́ те́пле, свяще́нне Нико́лае:/ я́ко пе́рвее воево́ды изба́вил еси́,// спаси́ и нас от вся́каго лю́таго обстоя́ния.
Хор: Святи́телю отче Никóлае, моли Бóга о нас.
Чтец: Престо́лу предстоя́ Бо́жию, моли́ти приле́жно, му́дре,/ не преста́й о всех нас, твои́х ве́рных рабе́х, чу́дне Нико́лае,/ да огня́ ве́чнаго изба́вимся и от враго́в,// язы́ка лука́ваго и озлобле́ния.
Хор: Слáва Отцу и Сыну и Святóму Духу.
Трóичен:Безнача́льнаго Божества́ нача́ло Отца́ и Сы́на чту и Ду́ха почита́ю Всесвята́го,/ вся́ческих Вседе́тельное, Еди́нственное, Несеко́мое,/ Треми́ Характи́ры и Ли́цы разделя́емое при́сно,// еди́но Ца́рство Неразде́льное.
Хор: И ныне и присно и во вéки векóв. Аминь.
Богорóдичен: Ты вои́стинну па́че земны́х и Небе́сных честне́йши Еди́на еси́, Богороди́тельнице:/ всех бо Творца́ во утро́бе зачала́ еси́,/ пло́тию ве́щною оде́яна, ро́ждши без се́мене.// О, новоле́пнаго зре́ния́!
Катавáсия Рождествá (глас 4): Жезл из кóрене Иессéева/ и цвет от негó, Христé,/ от Дéвы прозя́бл еси́,/ из горы́, Хвáльный, приосенéнныя чáщи,/ пришéл еси́, воплóщся от Неискусому́жныя,/ Невещéственный и Бóже:// слáва си́ле Твоéй, Гóсподи.
ПЕСНЬ 5
Ирмóс: Просвети́вый сия́нием прише́ствия Твоего́, Христе́,/ и освети́вый Кресто́м Твои́м/ ми́ра концы́,/ сердца́ просвети́/ све́том Твоего́ Богоразу́мия,// правосла́вно пою́щих Тя.
Хор: Слáва, Гóсподи, Святóму Воскресéнию Твоему.
Чтец: Па́стыря овца́м вели́каго и Го́спода,/ иуде́и дре́вом кре́стным умертви́ша:/ но Той я́ко о́вцы, ме́ртвыя, во а́де погребе́нныя,// держа́вы сме́ртныя изба́ви.
Хор: Слáва, Гóсподи, Святóму Воскресéнию Твоему.
Чтец: Кресто́м Твои́м мир благовести́в,/ и пропове́дав пле́нным, Спа́се мой, оставле́ние,/ держа́ву иму́щаго посрами́л еси́, Христе́:// на́га, обнища́вша показа́вый Боже́ственным воста́нием Твои́м.
Хор: Пресвятáя Богорóдице, спаси нас.
Богорóдичен: Проше́ния ве́рно прося́щих, Всепе́тая, не пре́зри:/ но приими́, и сия́ доноша́й Сы́ну Твоему́, Пречи́стая,/ Бо́гу Еди́ному Благоде́телю,// Тебе́ бо Предста́тельницу стяжа́хом.
Глас 1
Хор: Пресвятáя Богорóдице, спаси нас.
Чтец: Веселя́тся небе́сныя си́лы зря́ще Тя:/ ра́дуются с ни́ми челове́ков собра́ния:/ Рождество́м бо Твои́м совокупи́шася, Де́во Богоро́дице,// е́же досто́йно сла́вим.
Хор: Пресвятáя Богорóдице, спаси нас.
Чтец: Да дви́жатся вси язы́цы челове́честии и мы́сли,/ к похвале́ челове́ческаго вои́стинну удобре́ния,/ Де́ва предстои́т я́ве сла́вящи,// ве́рою Тоя́ пою́щих чудеса́.
Глас 2
Хор: Святи́телю отче Никóлае, моли Бóга о нас.
Чтец: Боголе́пным житие́м, треблаже́нне, просвеща́емь,/ осужде́нныя непра́ведным изрече́нием умре́ти, предста́в, изба́вил еси́,/ Влады́це Христу́ зову́щия:// ино́го бо, ра́зве Тебе́, бо́га не зна́ем.
Хор: Святи́телю отче Никóлае, моли Бóга о нас.
Чтец: На Небесе́х присносу́щную сла́ву ны́не зря, и неизглаго́ланныя и Боже́ственныя зари́ светле́йшими наслажда́яся сия́нии,/ покры́й мя предста́тельством твои́м, преподо́бне,// уго́дниче Христо́в всече́стне.
Хор: Пресвятáя Богорóдице, спаси нас.
Богорóдичен: Да Твой взы́щеши о́браз, погребе́нный страстьми́, Спа́се,/ Небе́сных утаи́вся сил, вопло́щься из Де́вы,/ яви́лся еси́ Тебе́ зову́щим:// ино́го, ра́зве Тебе́, бо́га не зна́ем.
Глас 1
Хор: Святи́телю отче Никóлае, моли Бóга о нас.
Чтец: Пропове́дует твоя́, о́тче, чудеса́, ны́не Мир,/ велича́йшая митропо́лия и Лики́йская епа́рхия,/ и вся оте́чествия твоя́ чудоде́йства,// и́миже вся от боле́зней и скорбе́й избавля́еши, Богоблаже́нне Нико́лае.
Хор: Святи́телю отче Никóлае, моли Бóга о нас.
Чтец: Пита́тель вдов и оте́ц сиро́т,/ помо́щник су́щим в ско́рбех всеизря́днейший,/ пла́чущим утеше́ние, па́стырь и путево́ждь всех блудя́щих, Нико́лае, сый,// и нас твои́ми моли́твами от бед изба́ви.
Хор: Святи́телю отче Никóлае, моли Бóга о нас.
Чтец: Преста́вился еси́ от земли́ к невеще́ственным оби́телем,/ иде́же зри́ши добро́ту неизрече́нную Христо́ву,/ и А́нгельским во́инством собесе́дник яви́лся еси́./ Те́мже, со апо́столы и с му́ченики лику́я,// приле́жно Влады́це всех, о́тче Нико́лае, о нас моли́ся.
Хор: Слáва Отцу и Сыну и Святóму Духу.
Трóичен: Собезнача́льная Три, Единопресто́льная, Неразде́льнаго же Еди́наго Божества́ сла́влю Самовла́стная Ли́ца я́ве,/ И́мже из не су́щаго приведо́хся во е́же бы́ти, со А́нгелы зовы́й:// свят, свят, свят еси́, Го́споди.
Хор: И ныне и присно и во вéки векóв. Аминь.
Богорóдичен: Челове́ком спасе́ние всем и упова́ние,/ я́же предваря́ющи еди́на и спаса́ющи,/ помози́ и ны́не нам, вопию́щим Тебе́, Чи́стая,// и призыва́ющим Тя при́сно во обстоя́нии лю́тых:/ Предста́тельницы бо ины́я, ра́зве Тебе́, по Бо́зе не и́мамы.
Катавáсия Рождествá (глас 4): Бог сый ми́ра, Отéц щедрóт,/ Вели́каго Совéта Твоегó А́нгела,/ мир подавáюща, послáл еси́ нам:/ тем, Богоразу́мия к свéту настáвльшеся,/ от нóщи у́тренююще,// славослóвим Тя, Человеколю́бче.
ПЕСНЬ 6
Ирмóс: Обы́де нас после́дняя бе́здна,/ несть избавля́яй,/ вмени́хомся,/ я́ко о́вцы заколе́ния,/ спаси́ лю́ди Твоя́, Бо́же наш,// Ты бо кре́пость немощству́ющих и исправле́ние.
Хор: Слáва, Гóсподи, Святóму Воскресéнию Твоему.
Чтец: Согреше́нием первозда́ннаго, Го́споди, лю́те уязви́хомся,/ ра́ною же исцели́хомся Твое́ю,/ е́юже за ны уязви́лся еси́, Христе́:// Ты бо кре́пость немощству́ющих и исправле́ние.
Хор: Слáва, Гóсподи, Святóму Воскресéнию Твоему.
Чтец: Возве́л ны еси́ из а́да, Го́споди,/ ки́та уби́в всея́дца, Всеси́льне,/ Твое́ю держа́вою низложи́в того́ си́лу:// Ты бо Живо́т, и Свет еси́, и Воскресе́ние.
Хор: Пресвятáя Богорóдице, спаси нас.
Богорóдичен: Веселя́тся о Тебе́, Де́во Пречи́стая,/ ро́да на́шего пра́отцы, Еде́м восприе́мше Тобо́ю,/ его́же преступле́нием погуби́ша:// Ты бо, Чи́стая, и пре́жде Рождества́, и по Рождестве́ еси́.
Глас 1
Хор: Пресвятáя Богорóдице, спаси нас.
Чтец: Предстоя́т раболе́пне Рождеству́ Твоему́ чи́ни небе́снии,/ дивя́щеся досто́йно Твоему́ безсе́менному Рождеству́, Присноде́во:// Ты бо, Чи́стая, и пре́жде Рождества́, и по Рождестве́ еси́.
Хор: Пресвятáя Богорóдице, спаси нас.
Чтец: Воплоти́ся пре́жде сый Безпло́тен, Сло́во из Тебе́, Пречи́стая,/ вся́ческая во́лею творя́й,// безтеле́сных во́инства приведы́й от небытия́, я́ко Всеси́лен.
Глас 2
Хор: Святи́телю отче Никóлае, моли Бóга о нас.
Чтец: И́же побе́ды, Нико́лае, вене́ц на твое́м версе́ досто́йно положи́ся,// я́ко победи́тель у́бо изря́днейший тя призыва́ющия спаси́.
Хор: Святи́телю отче Никóлае, моли Бóга о нас.
Чтец: Умерщвле́на мя, блаже́нне, прегреше́ньми/ и страсте́й треволне́ньми погружа́ема, яви́вся,// спаси́ ко приста́нищу Боже́ственныя во́ли.
Хор: Пресвятáя Богорóдице, спаси нас.
Богорóдичен: На Тя наде́жды возложи́х, Ма́ти Присноде́во, спасе́ния моего́// и Тя предста́тельницу полага́ю жи́зни, тве́рду же и непоколеби́му.
Глас 1
Хор: Святи́телю отче Никóлае, моли Бóга о нас.
Чтец: Но́вый яви́лся еси́ Авраа́м, Нико́лае,/ я́ко единоро́дна бо ны́не приве́л еси́ сы́на Влады́це твоему́,/ безкро́вныя же́ртвы принося́ при́сно./ Отону́дуже благослови́лся еси́, я́ко страннолю́бец, о́тче,// и Тро́ицы был еси́ оби́тель Боже́ственна и непоро́чна.
Хор: Святи́телю отче Никóлае, моли Бóга о нас.
Чтец: Стра́нна и ужа́сна содева́еши чудеса́, Нико́лае,/ по всей земли́ и в мо́ри дале́че бе́дствующим скороте́чными моли́твами предста́тельствуя,/ немощны́м врач и ни́щим пита́тель,// побе́ды на враги́ тезоимени́т лю́дем ве́рным явля́яся.
Хор: Святи́телю отче Никóлае, моли Бóга о нас.
Чтец: О́ком у́мным прови́дя бу́дущая,/ уче́ний пра́вых напо́лнил еси́ вся концы́:/ Единосу́щна Отцу́ Сы́на возвеща́я нам, А́риево неи́стовство потреби́л еси́,// столп правосла́вныя ве́ры, честна́я твоя́ предложи́в исправле́ния.
Хор: Слáва Отцу и Сыну и Святóму Духу.
Трóичен: Чту и почита́ю Тро́ицу Неразде́льную, Треми́ Ли́цы разделя́емую при́сно,/ соединя́емую же Существо́м и Естество́м, я́ко Еди́но Нача́ло,/ Отца́, и Сы́на, и Ду́ха Свята́го, все́ми держа́вно влады́чествующую// и вся соблюда́ющую, я́ко хо́щет.
Хор: И ныне и присно и во вéки векóв. Аминь.
Богорóдичен: Весь вопло́щься во утро́бе Твое́й, Пречи́стая,/ Христо́с Бог без се́мене роди́ся:/ не стерпе́ бо Свои́х рук созда́ние зре́ти, от льсти́ваго му́чимо,// прии́де рабозра́чным о́бразом челове́ческий род изба́вити.
Катавáсия Рождествá (глас 4): Из утрóбы Иóну младéнца изблевá морски́й зверь,/ яковá прия́т,/ в Дéву же всéльшееся Слóво/ и плоть приéмшее прóйде сохрáншее нетлéнну./ Егóже бо не пострадá истлéния,// Рóждшую сохрани́ невреждéнну.
Гóсподи, поми́луй. (Трижды)
Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.
Кондáк воскрéсный, глас 1: Воскрéсл еси́, я́ко Бог, из грóба во слáве,/ и мир совоскреси́л еси́;/ и естествó человéческое я́ко Бóга воспевáет Тя, и смерть исчезé;/ Адáм же лику́ет, Влады́ко;/ Е́ва ны́не от уз избавля́ема рáдуется, зову́щи:// Ты еси́, И́же всем подая́, Христé, воскресéние.
И́кос: Воскре́сшаго тридне́вно воспои́м я́ко Бо́га Всеси́льна,/ и врата́ а́дова сте́ршаго,/ и я́же от ве́ка из гро́ба воздви́гшаго,/ мироно́сицам я́вльшагося, я́коже благоизво́лил есть,/ пре́жде сим е́же ра́дуйтеся, реки́й:/ и апо́столом ра́дость возвеща́я, я́ко Еди́н Жизнода́вец./ Те́мже ве́рою жены́ ученико́м зна́мения побе́ды благовеству́ют,/ и ад стене́т, и смерть рыда́ет:/ мир же весели́тся, и вси с ним ра́дуются.// Ты бо по́дал еси́, Христе́, всем Воскресе́ние
ПЕСНЬ 7
Ирмóс: Тебе́ у́мную, Богоро́дице, пещь/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́,/ во чре́ве Твое́м всеце́л,// хва́льный отце́в Бог и препросла́влен.
Хор: Слáва, Гóсподи, Святóму Воскресéнию Твоему.
Чтец: Убоя́ся земля́, сокры́ся со́лнце, и поме́рче свет,/ раздра́ся церко́вная боже́ственная заве́са,/ ка́мение же разсе́деся:/ на кресте́ бо ви́сит Пра́ведный,// Хва́льный отце́в Бог, и препросла́влен.
Хор: Слáва, Гóсподи, Святóму Воскресéнию Твоему.
Чтец: Ты быв а́ки безпомо́щен,/ и уя́звен в ме́ртвых во́лею нас ра́ди/ превозноси́мый, вся свободи́л еси́,/ и держа́вною руко́ю совоскреси́л еси́,// хва́льный отце́в Бог, и препросла́влен.
Хор: Пресвятáя Богорóдице, спаси нас.
Богорóдичен: Ра́дуйся, исто́чниче присноживы́я воды́./ Ра́дуйся, раю́ пи́щный./ Ра́дуйся, стено́ ве́рных./ Ра́дуйся, Неискусобра́чная./ Ра́дуйся, всеми́рная Ра́досте,/ Е́юже нам возсия́// Хва́льный отце́в Бог, и препросла́влен.
Глас 1
Хор: Пресвятáя Богорóдице, спаси нас.
Чтец: Тя, Богоро́дице, ле́ствицу Иа́ков проро́чески разумева́ет:/ Тобо́ю бо Превозноси́мый на земли́ яви́ся,/ и с челове́ки поживе́, я́ко благоволи́,// Хва́льный отце́в Бог и Препросла́влен.
Хор: Пресвятáя Богорóдице, спаси нас.
Чтец: Ра́дуйся, Чи́стая, из Тебе́ про́йде Па́стырь,/ И́же во Ада́мову ко́жу обо́лкся вои́стинну Превозноси́мый,/ во всего́ мя челове́ка, за благоутро́бие непости́жное:// Хва́льный отце́в Бог и Препросла́влен.
Глас 2
Хор: Святи́телю отче Никóлае, моли Бóга о нас.
Чтец: О́строму искуше́нию впадо́х, лю́те пострека́емь,/ и ко врато́м а́да прибли́жихся, скорбьми́ поража́емь,/ спаси́ мя моли́твами твои́ми, блаже́нне, и возста́ви, пою́ща:// благослове́н еси́, Бо́же оте́ц на́ших.
Хор: Святи́телю отче Никóлае, моли Бóга о нас.
Чтец: Незаходи́маго све́та невеще́ственными луча́ми облиста́емь,/ су́щия во тьме скорбе́й озло́бленныя исхи́ти/ и к просвеще́нию весе́лия наста́ви, пою́щия:// благослове́н еси́, Бо́же оте́ц на́ших.
Хор: Пресвятáя Богорóдице, спаси нас.
Богорóдичен: Моли́ Христа́, Сы́на Твоего́ и Бо́га, Де́во Богороди́тельнице,/ прода́нныя лю́тыми прегреше́ньми и ле́стьми змии́ными/ кро́вию Его́ честно́ю изба́витися, пою́щим:// благослове́н еси́, Бо́же оте́ц на́ших.
Глас 1
Хор: Святи́телю отче Никóлае, моли Бóга о нас.
Чтец: Вся́ких лю́тых неду́г врач всеизря́днейший, о́тче Нико́лае, яви́вся,/ души́ моея́ не́мощь исцели́в, пода́ждь ми благоздра́вие, вопи́ти:// отце́в Бо́же, благослове́н еси́.
Хор: Святи́телю отче Никóлае, моли Бóга о нас.
Чтец: Изба́вив дре́вле воево́ды от сме́рти, свя́те,/ и ты́я воздви́гл еси́ пе́ти и сла́вити Спа́са Христа́ с ве́рою те́плою, и́же и взыва́ху:// отце́в Бо́же, благослове́н еси́.
Хор: Святи́телю отче Никóлае, моли Бóга о нас.
Чтец: Прему́дрости ча́ши прибли́жився та́инственно, устна́ми твои́ми, о́тче Нико́лае,/ ка́пли одожде́ния поче́рпл еси́,/ па́че ме́да и со́та, лю́дем повелева́я вопи́ти:// отце́в Бо́же, благослове́н еси́.
Хор: Слáва Отцу и Сыну и Святóму Духу.
Трóичен: Тро́ице, Тя воспева́ем, Еди́нице Трисия́тельнейшая, Единосу́щная, О́тче, Сы́не и Ду́ше Святы́й,/ в Ни́хже вси крести́вшеся, воспева́ем:// отце́в Бо́же, благослове́н еси́.
Хор: И ныне и присно и во вéки векóв. Аминь.
Богорóдичен: Я́ко всех тва́рей вы́шши еси́, Богоро́дице,/ моли́ся Твоему́ Сы́ну и Бо́гу,/ изба́витися му́ки честву́ющим Тя вои́стинну и сла́вящим:// отце́в Бо́же, благослове́н еси́.
Катавáсия Рождествá (глас 4): О́троцы, благочéстию совоспитáни,/ злочести́ваго велéния небрéгше,/ óгненнаго прещéния не убоя́шася,/ но, посредé плáмени стоя́ще, поя́ху:// отцéв Бóже, благословéн еси́.
ПЕСНЬ 8
Ирмóс: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,// по́йте и превозноси́те во вся ве́ки.
Хор: Слáва, Гóсподи, Святóму Воскресéнию Твоему.
Чтец: И́же во́лею вся творя́й, и претворя́яй,/ обраща́яй сень сме́ртную в ве́чную жизнь,/ стра́стию Твое́ю, Сло́ве Бо́жий,/ Тебе́ непреста́нно вся дела́ Госпо́дня,// Го́спода пои́м, и превозно́сим во вся ве́ки.
Хор: Слáва, Гóсподи, Святóму Воскресéнию Твоему.
Чтец: Ты разори́л еси́ сокруше́ние, Христе́, и окая́нство,/ во врате́х и тверды́нях а́довых,/ воскре́с из гро́ба тридне́вен./ Тебе́ непреста́нно вся дела́, я́ко Го́спода, пою́т,// и превозно́сят во вся ве́ки.
Хор: Пресвятáя Богорóдице, спаси нас.
Богорóдичен: Я́же без се́мене и преесте́ственне от облиста́ния Боже́ственнаго/ Ро́ждшую би́сера многоце́ннаго Христа́, воспои́м глаго́люще:/ благослови́те вся дела́ Госпо́дня, Го́спода,// по́йте и превозноси́те Его́ во вся ве́ки.
Глас 1
Хор: Пресвятáя Богорóдице, спаси нас.
Чтец: Черто́г светови́дный, из него́же всех Влады́ка,/ я́ко Жени́х произы́де Христо́с,/ воспои́м вси вопию́ще:/ вся дела́ Госпо́дня, Го́спода по́йте,// и превозноси́те во вся ве́ки.
Хор: Пресвятáя Богорóдице, спаси нас.
Чтец: Ра́дуйся, Престо́ле сла́вный Бо́жий,/ ра́дуйся, ве́рных стено́,/ Е́юже су́щим во тьме возсия́ свет Христо́с,/ Тебе́ блажа́щим, и вопию́щим:/ вся дела́ Госпо́дня, Го́спода по́йте,// и превозноси́те во вся ве́ки.
Глас 2
Хор: Святи́телю отче Никóлае, моли Бóга о нас.
Чтец: Я́ко благ и сострада́телен во глубине́ напа́стей лю́те содержи́мыя свободи́, блаже́нне Нико́лае,/ от содержа́щих лю́тых, разреше́ние подая́ моли́твами твои́ми// я́же ко Спа́су Христу́, священнотаи́нниче.
Хор: Святи́телю отче Никóлае, моли Бóга о нас.
Чтец: Тайново́ждь су́щих па́че ума́,/ святы́х служи́тель и Небе́сных сый, Богому́дре,// архиере́й же ве́рен, прегреше́ний оставле́ния проси́ от Спа́са на́шего, священноявле́нне.
Хор: Пресвятáя Богорóдице, спаси нас.
Богорóдичен: Изнемога́ет мой ны́не ум, во глубину́ впад безче́стия,// я́ко отвсю́ду разли́чными объя́т есмь злы́ми; но Ты, Де́во, исцели́, безстра́стия све́том одева́ющи.
Глас 1
Хор: Святи́телю отче Никóлае, моли Бóга о нас.
Чтец: Чи́ни патриа́рхов и апо́столов,/ и священному́чеников собо́ри, и проро́ков сосло́вие,/ весь собо́р по́стнический блажа́т Боже́ственное житие́ твое́,/ с ни́миже и мы вопие́м:// да благослови́т тварь вся Го́спода и превозно́сит Его́ во ве́ки.
Хор: Святи́телю отче Никóлае, моли Бóга о нас.
Чтец: Высоча́йший Всецарю́, великодержа́вне,/ моли́твами преподо́бнаго па́стыря жизнь умири́ всех, Сло́ве, христиа́н,/ побо́рствуя на ва́рвары, да Тебе́, Христу́, зове́м:// да благослови́т тварь вся Го́спода и превозно́сит во вся ве́ки.
Хор: Святи́телю отче Никóлае, моли Бóга о нас.
Чтец: Све́том просве́щся непристу́пным, о́тче,/ ду́ши су́щих в ско́рби озаря́еши,/ разоря́я всю мра́чную тьму напа́стей,/ облиста́в же весе́лием сердца́ на́ша./ И́миже далечесия́тельно просвеща́еми, вопие́м:// да благослови́т тварь вся Го́спода и превозно́сит во вся ве́ки.
Хор: Благослови́м Отца́, и Сы́на, и Свята́го Ду́ха, Го́спода.
Трóичен: Живо́т и Животы́ и Еди́н и Три све́ты, Тро́ицу ве́рно воспева́ем,/ - оте́ческим после́дующе Боже́ственным и́стинно уче́нием,/ - Отца́, и Сы́на, и Ду́ха Свята́го./ С ни́миже благоче́ствующе, воспои́м:// да благослови́т тварь вся Го́спода и превозно́сит во вся ве́ки.
Хор: И ныне и присно и во вéки векóв. Аминь.
Богорóдичен: Чу́до странноле́пно купина́ о́браз прообрази́, Чи́стая Отрокови́це,/ горя́щи неопа́льна дре́вле на горе́ Сина́йстей,/ та́йну Рождества́ Твоего́ пропису́ющи:/ огнь бо, в Тя Божества́ всели́выйся, невре́дну Тя соблюде́.// Его́же воспева́ем во вся ве́ки.
Хор: Хвáлим, благослови́м, покланя́емся Гóсподеви, пою́ще и превознося́ще во вся вéки.
Катавáсия Рождествá (глас 4): Чу́да преестéственнаго/ росодáтельная изобрази́ пещь óбраз:/ не бо, я́же прия́т, пали́т ю́ныя,/ я́ко нижé огнь Божествá Дéвы,/ в Ню́же вни́де утрóбу./ Тем воспевáюще, воспоéм:/ да благослови́т тварь вся Гóспода// и превознóсит во вся вéки.
Богоро́дицу и Ма́терь Све́та в пе́снех возвели́чим.
ПЕСНЬ 9
Ирмóс: О́браз чи́стаго рождества́ Твоего́,/ огнепали́мая купина́/ показа́ неопа́льная;/ и ны́не на нас/ напа́стей свире́пеющую угаси́ти, мо́лимся, пещь,/ да Тя, Богоро́дице,// непреста́нно велича́ем.
Хор: Слáва, Гóсподи, Святóму Воскресéнию Твоему.
Чтец: О ка́ко, лю́дие беззако́ннии и непокори́вии,/ лука́вая совеща́вше,/ го́рдаго и нечести́ваго оправди́ша:/ Пра́веднаго же на дре́ве осуди́ша Го́спода сла́вы,// Его́же досто́йно велича́ем!
Хор: Слáва, Гóсподи, Святóму Воскресéнию Твоему.
Чтец: Спа́се А́гнче Непоро́чне,/ И́же ми́ра грехи́ взе́мый,/ Тебе́ сла́вим воскре́сшаго тридне́вно,/ со Отце́м и Боже́ственным Твои́м Ду́хом,/ и Го́спода сла́вы:// Его́же богосло́вяще, велича́ем.
Хор: Пресвятáя Богорóдице, спаси нас.
Богорóдичен: Спаси́ лю́ди Твоя́, Го́споди,/ и́хже стяжа́л еси́ честно́ю Твое́ю кро́вию,/ це́рквам Твои́м подая́ мир, Человеколю́бче,// Богоро́дицы моли́твами.
Глас 1
Хор: Пресвятáя Богорóдице, спаси нас.
Чтец: Из ко́рене Дави́дова прозябла́ еси́ проро́ческаго, Де́во, и богооте́ческаго:/ но и Дави́да я́ко вои́стинну Ты просла́вила еси́,/ я́ко ро́ждши проро́чествованнаго Го́спода сла́вы:// Его́же досто́йно велича́ем.
Хор: Пресвятáя Богорóдице, спаси нас.
Чтец: Всяк похва́льный, Пречи́стая, зако́н/ побежда́ется вели́чеством сла́вы Твоея́./ Но о, Влады́чице, от раб Твои́х недосто́йных,/ от любве́ Тебе́ приноси́мое приими́, Богоро́дице,// со усе́рдием пе́ние похва́льное.
ПРОДОЛЖЕНИЕ