Недeля 18 по Пятидесятнице. ОБЕДНИЦА (Изобразительные). Глас 1. Память святых отцов
24 октября́ 2021 гóда. Недéля 18 по Пятидеся́тнице. Пáмять святы́х отцóв VII Вселéнского Собóра. Глас 1. Служба прáздника для домáшнего (келéйного) совершéния. Служба мирски́м чи́ном.
Прéжде глагóли часы
ЧИН ОБЕДНИЦЫ
Глагóли сице: Благослови, душе моя, Гóспода,/ благословен еси Гóсподи.
Псалом 102
Благослови, душе моя, Гóспода,/ и вся внутренняя моя имя святое Егó./ Благослови, душе моя, Гóспода,/ и не забывай всех воздаяний Егó,/ очищающаго вся беззакóния твоя,/ исцеляющаго вся недуги твоя,/ избавляющаго от истления живóт твой,/ венчающаго тя милостию и щедрóтами,/ исполняющаго во благих желание твое:/ обновится яко óрля юность твоя./ Творяй милостыни Господь,/ и судьбу всем обидимым./ Сказа пути Своя Моисеови,/ сыновóм Израилевым хотения Своя:/ Щедр и Милостив Госпóдь,/ Долготерпелив и Многомилостив./ Не до конца прогневается,/ ниже во век враждует,/ не по беззаконием нашим сотворил есть нам,/ ниже по грехом нашым воздал есть нам./ Яко по высоте небесней от земли,/ утвердил есть Госпóдь милость Свою на боящихся Егó./ Елико отстоят востóцы от запад,/ удалил есть от нас беззакóния наша./ Якоже щедрит отец сыны,/ ущедри Госпóдь боящихся Егó./ Яко Той позна создание наше,/ помяну, яко персть есмы./ Человек, яко трава дние eгó,/ яко цвет сельный, тако оцветет,/ яко дух прóйде в нем,/ и не будет, и не познает ктому места своегó./ Милость же Госпóдня от века и до века на боящихся Егó,/ и правда Его на сынéх сынóв, хранящих завéт Егó, и пóмнящих заповеди Егó творити я./ Госпóдь на Небеси уготóва Престóл Свой,/ и Царство Егó всеми обладает./ Благословите Гóспода вси Ангели Егó,/ сильнии крепостию, творящии слóво Егó, услышати глас словес Егó./ Благословите Гóспода вся Силы Егó,/ слуги Егó, творящии вóлю Егó./ Благословите Гóспода вся дела Егó,/ на всяком месте владычества Егó.
Слáва Отцу и Сыну и Святóму Духу, и ныне и присно и во вéки векóв. Аминь.
Благослови, душе моя, Гóспода,/ и вся внутренняя моя имя святóе Егó./ Благословен еси, Гóсподи.
Слáва Отцу и Сыну и Святóму Духу.
Псалом 145
Хвали, душе моя, Гóспода./ Восхвалю Гóспода в животé моéм,/ пою Бóгу моему, дóндеже есмь./ Не надéйтеся на князи, на сыны человéческия,/ в нихже несть спасéния./ Изыдет дух eгó/ и возвратится в землю свою./ В той день погибнут вся помышлéния eгó./ Блажен, eмуже Бог Иáковль Помóщник егó,/ упование eгó на Гóспода Бóга своегó,/ сотвóршаго нéбо и зéмлю,/ мóре и вся, яже в них,/ хранящаго истину в век,/ творящаго суд обидимым,/ дающаго пищу áлчущим./ Госпóдь решит оковáнныя./ Госпóдь умудряет слепцы./ Госпóдь возвóдит низвéрженныя./ Госпóдь любит прáведники./ Госпóдь хранит пришéльцы,/ сира и вдову приимет/ и путь грéшных погубит./ Воцарится Госпóдь во век,/ Бог твой, Сиóне, в род и род.
И ныне и присно и во вéки векóв. Аминь.
Единорóдный Сыне и Слóве Бóжий, Безсмéртен Сый/ и извóливый спасéния нáшего рáди/ воплотитися от Святыя Богорóдицы и Приснодéвы Марии,/ непрелóжно вочеловéчивыйся,/ распныйся же, Христé Бóже, смéртию смерть попрáвый,/ Един Сый Святыя Трóицы,/ спрославляемый Отцу и Святóму Духу, спаси нас.
И поем Блаженны с тропарями из Октоиха
Хор: Во Цáрствии Твоéм помяни нас, Гóсподи,/ егда приидеши, во Цáрствии Твоéм.
Хор: Блажéни нищии духом,/ яко тех есть Цáрство Небéсное.
Хор: Блажéни плáчущии,/ яко тии утéшатся.
На 10. Хор: Блажéни крóтции,/ яко тии наслéдят зéмлю.
Чтец (воскрéсные, глас 1): Снéдию изведé из рая́ враг Адáма: Крестом же разбойника введé Христос вонь, помяни́ мя, зовуща, егдá прии́деши во Цáрствии Твоéм.
Хор: Блажéни áлчущии и жáждущии прáвды,/ яко тии насытятся.
Чтец: Покланяюся страстéм Твоим, славословлю и Воскресéние со Адáмом и разбойником, со гласом свéтлым вопию Ти: помяни мя Господи, егдá прии́деши во Цáрствии Твоéм.
На 8. Хор: Блажéни милостивии,/ яко тии помиловани будут.
Чтец: Распя́лся еси безгрéшне, и во гробе положи́лся еси́ волею, но воскрéсл еси яко Бог, совоздви́гнувый Себé Адáма, помяни́ мя, зову́ща, егдá прии́деши во Цáрствии Твоéм.
Хор: Блажéни чистии сéрдцем,/ яко тии Бóга узрят.
Чтец: Храм Твой телéсный триднéвным Воскреси́вый погребéнием, со Адáмом, и и́же от Адáма, воскреси́л еси́ Христé Бóже: помяни́ нас зовущих, егдá прии́деши во Цáрствии Твоéм.
Хор: Блажéни миротвóрцы,/ яко тии сынове Бóжии нарекутся.
На 6. Чтец: Мvронóсицы приидóша плачуща, на гроб Твой Христé Бóже, зелó рано: и в белых ризах обретóша Ангела седя́ща, что и́щете; зовуща. Воскрéсе Христóс, не рыдайте прóчее.
Хор: Блажéни изгнáни прáвды рáди,/ яко тех есть Цáрство Небéсное.
Чтец: Апóстоли Твои Гóсподи на гóру, аможе повелéл еси им, пришéдше Спáсе, и Тя ви́девше поклони́шася. Ихже и послáл еси во язы́ки учи́ти и крести́ти я.
Хор: Блажéни естé, егда понóсят вам,/ и изженут, и рекут всяк зол глагóл на вы лжуще Менé рáди.
На 4.Чтец(святы́х отцéв, глас 8): Не поколебáтися Христóве неруши́мей Цéркви, от Негó тайнонаучáеми, Божéственнии пастыреначáльницы, и́же сию́ поколебáти хотя́щия, я́коже анти́христовы чáсти, от благочести́вых отри́нуша.
Хор: Рáдуйтеся и веселитеся,/ яко мзда вáша мнóга на небесéх.
Чтец: Очищáет му́тныя и ти́нный потóки, от истóчник спасéния почéрп, и жáждущия лю́ди Христóвы насыщáет учéний струя́ми отцéв сослóвие.
Хор: Слáва Отцу и Сыну и Святóму Духу.
Чтец: На ненави́дящих и́стинно и христианооглагóльников Собрáние христолю́бных Седмóе в свéтлем грáде Никéйстем бысть, егóже цáрие Ири́на и Константи́н защи́тницы.
Хор: И ныне и присно и во вéки векóв. Аминь.
Чтец (Богорóдичен): Всяк да отсту́пит нечести́вый, не почитáяй икóну честну́ю Богорóдицы и Сию́ не проповéдуяй, Христá Богому́жно рóждшую, и во огнь да отшлéтся сгарáти несожжéнно.
Тропари и кондаки
Тропáрь воскрéсный, глас 1: Кáмени запечáтану от иудéй/ и вóином стрегущим Пречистое Тéло Твоé,/ воскрéсл еси триднéвный, Спáсе,/ дáруяй мирови жизнь./ Сегó рáди силы небéсныя вопияху Ти, Жизнодáвче:/ слáва Воскресéнию Твоему, Христé,/ слáва Цáрствию Твоему,// слáва смотрéнию Твоему, едине Человеколюбче.
Тропáрь святы́х отцéв, глас 8: Препрослáвлен еси́, Христé Бóже наш,/ свети́ла на земли́ отцы́ нáши основáвый/ и тéми ко и́стинней вéре вся ны настáвивый,// Многоблагоутрóбне, слáва Тебé.
Кондáк воскрéсный, глас 1: Воскрéсл еси́, я́ко Бог, из грóба во слáве,/ и мир совоскреси́л еси́;/ и естествó человéческое я́ко Бóга воспевáет Тя, и смерть исчезé;/ Адáм же лику́ет, Влады́ко;/ Е́ва ны́не от уз избавля́ема рáдуется, зову́щи:// Ты еси́, И́же всем подая́, Христé, воскресéние.
Слáва Отцу и Сыну и Святóму Духу.
Кондáк святы́х отцéв, глас 6: И́же из Отцá возсия́в, Сын неизречéнно/ из Жены́ роди́ся, сугу́б естествóм,/ Егóже ви́дяще, не отметáемся зрáка изображéния,/ но, сиé благочéстно начертáюще,/ почитáем вéрно./ И сегó рáди и́стинную вéру Цéрковь держáщи,// лобызáет икóну вочеловéчения Христóва.
И ныне и присно и во вéки векóв. Аминь.
Кондáк Богорóдицы, глас 6: Предстáтельство христиáн непосты́дное,/ ходáтайство ко Творцу́ непрелóжное,/ не прéзри грéшных молéний глáсы,/ но предвари́, я́ко Благáя,/ на пóмощь нас, вéрно зову́щих Ти;/ ускори́ на моли́тву и потщи́ся на умолéние,// предстáтельствующи при́сно, Богорóдице, чту́щих Тя.
Трисвятое
Хор: Святы́й Бóже,/ Святы́й Крéпкий,/ Святы́й Безсмéртный, помилуй нас. (3 раза)
Хор: Слáва Отцу и Сыну и Святóму Духу, и ныне и присно и во вéки векóв, аминь.
Хор: Святы́й Безсмéртный, помилуй нас.
Хор: Святы́й Бóже,/ Святы́й Крéпкий,/ Святы́й Безсмéртный, помилуй нас.
Прокимен воскресный, глас 1
Чтец: Прокимен, глас пéрвый: Бу́ди, Гóсподи, ми́лость Твоя́ на нас, я́коже уповáхом на Тя.
Хор: Бу́ди, Гóсподи, ми́лость Твоя́ на нас,/ я́коже уповáхом на Тя.
Чтец:Рáдуйтеся, прáведнии, о Гóсподе, прáвым подобáет похвалá.
Хор: Бу́ди, Гóсподи, ми́лость Твоя́ на нас,/ я́коже уповáхом на Тя.
Прокимен отцев, глас 4
Чтец: Проки́мен, глас четвéртый: Благословéн еси́, Гóсподи Бóже отéц нáших, и хвáльно и прослáвлено И́мя Твоé во вéки.
Хор:Благословéн еси́, Гóсподи Бóже отéц нáших,/ и хвáльно и прослáвлено И́мя Твоé во вéки. .
АПОСТОЛ
Чтец: К Кори́нфяном послáния святáго апóстола Пáвла чтéние.
(2Корф.зач.188): Брáтие, сéяй ску́достию, ску́достию и пóжнет, а сéяй о благословéнии, о благословéнии и пóжнет. Кóждо я́коже изволéние и́мать сéрдцем, не от скóрби, ни от ну́жды: доброхóтна бо дáтеля лю́бит Бог. Си́лен же Бог вся́ку благодáть изоби́ловати в вас, да о всем всегдá вся́ко довóльство иму́ще, избы́точествуете во вся́ко дéло блáго, я́коже есть пи́сано: расточи́, дадé убóгим, прáвда егó пребывáет во вéки. Дая́й же сéмя сéющему и хлеб в снедь, да подáст и умнóжит сéмя вáше, и да возрасти́т жи́та прáвды вáшея, да о всем богатя́щеся во вся́ку простоту́, я́же содевáет нáми благодарéние Бóгу.
[Руссский синодальный перевод]Братья, кто сеет скупо, тот скупо и пожнет; а кто сеет щедро, тот щедро и пожнет. Каждый уделяй по расположению сердца, не с огорчением и не с принуждением; ибо доброхотно дающего любит Бог. Бог же силен обогатить вас всякою благодатью, чтобы вы, всегда и во всем имея всякое довольство, были богаты на всякое доброе дело, как написано: расточил, раздал нищим; правда его пребывает в век. Дающий же семя сеющему и хлеб в пищу подаст обилие посеянному вами и умножит плоды правды вашей, так чтобы вы всем богаты были на всякую щедрость, которая через нас производит благодарение Богу.
(под зача́ло: Евр.зач.334): Брáтие, поминáйте настáвники вáша, и́же глагóлаша вам слóво Бóжие, и́хже взирáюще на скончáние жи́тельства, подражáйте вéре их. Иису́с Христóс вчерá и днесь тóйже, и во вéки. В научéния стрáнна и разли́чна не прилагáйтеся, добрó бо благодáтию утверждáти сердцá, а не брáшны, от ни́хже не прия́ша пóльзы ходи́вшии в них. И́мамы же олтáрь, от негóже не и́мут влáсти я́сти служáщии сéни. И́хже бо кровь живóтных внóсится во святáя за грехи́ первосвящéнником, сих телесá сжигáются вне стáна. Тéмже Иису́с, да освяти́т лю́ди своéю крóвию, вне врат пострадáти извóлил. Тéмже у́бо да исхóдим к нему́ вне стáна, поношéние егó нося́ще. Не и́мамы бо зде пребывáющаго грáда, но гряду́щаго взыску́ем. Тем у́бо принóсим жéртву хвалéния вы́ну Бóгу, си́речь плод устéн исповéдающихся и́мени Егó. Благотворéния же и общéния не забывáйте, таковы́ми бо жéртвами благоугождáется Бог.
[Русский синодальный перевод]Братья, поминайте наставников ваших, которые проповедовали вам слово Божие, и, взирая на кончину их жизни, подражайте вере их. Иисус Христос вчера и сегодня и во веки Тот же. Учениями различными и чуждыми не увлекайтесь; ибо хорошо благодатью укреплять сердца, а не яствами, от которых не получили пользы занимающиеся ими. Мы имеем жертвенник, от которого не имеют права питаться служащие скинии. Так как тела животных, которых кровь для очищения греха вносится первосвященником во святилище, сжигаются вне стана, - то и Иисус, дабы освятить людей Кровию Своею, пострадал вне врат. Итак выйдем к Нему за стан, нося Его поругание; ибо не имеем здесь постоянного града, но ищем будущего. Итак будем через Него непрестанно приносить Богу жертву хвалы, то есть плод уст, прославляющих имя Его. Не забывайте также благотворения и общительности, ибо таковые жертвы благоугодны Богу.(13:7-16)
Аллилуиарий
Чтец: Аллилу́иа, аллилу́иа, аллилу́иа, глас пéрвый.
Хор: Аллилу́иа, аллилу́иа, аллилу́иа.
Чтец: Бог дая́й отмщéние мне, и покори́вый лю́ди под мя.
Хор: Аллилу́иа, аллилу́иа, аллилу́иа.
Чтец: Величáяй спасéния царéва и творя́й ми́лость христу́ Своему́ Дави́ду и сéмени его́ до вéка.
Хор: Аллилу́иа, аллилу́иа, аллилу́иа.
Аллилуиарий св. отцев
Чтец: Аллилу́иа, аллилу́иа, аллилу́иа, глас пéрвый. Бог богóв Госпóдь глагóла, и призвá зéмлю от востóк сóлнца до зáпад.
Хор: Аллилу́иа, аллилу́иа, аллилу́иа.
Чтец: Собери́те Ему́ преподóбныя Егó, завещáющия завéт Егó о жéртвах.
Хор: Аллилу́иа, аллилу́иа, аллилу́иа.
ЕВАНГЕЛИЕ
От Луки́ Святáго Евáнгелия чтéние.
Хор: Слáва Тебé, Гóсподи, слáва Тебé.
(Лк.зач.30): Во врéмя óно, идя́ше Иису́с во град, нарицáемый Наи́н, и с Ним идя́ху ученицы́ Егó мнóзи и нарóд мног. Я́коже прибли́жися ко вратóм грáда, и се изношáху умéрша, сы́на единорóдна мáтери своéй, и та бе вдовá, и нарóд от грáда мног с нéю. И ви́дев ю́ Госпóдь, милосéрдова о ней, и речé ей: не плáчи. И присту́пль косну́ся во одр, нося́щии же стáша. И речé: ю́ноше, тебé глагóлю, востáни. И сéде мéртвый, и начáт глагóлати, и дадé егó мáтери егó. Прия́т же страх вся, и слáвляху Бóга, глагóлюще: я́ко прорóк вéлий востá в нас, и я́ко посети́ Бог людéй Свои́х.
[Русский синодальный перевод]Во время оно, Иисус пошел в город, называемый Наин; и с Ним шли многие из учеников Его и множество народа. Когда же Он приблизился к городским воротам, тут выносили умершего, единственного сына у матери, а она была вдова; и много народа шло с нею из города. Увидев ее, Господь сжалился над нею и сказал ей: не плачь. И, подойдя, прикоснулся к одру; несшие остановились, и Он сказал: юноша! тебе говорю, встань! Мертвый, поднявшись, сел и стал говорить; и отдал его Иисус матери его. И всех объял страх, и славили Бога, говоря: великий пророк восстал между нами, и Бог посетил народ Свой.
(под зачáло: Ин.зач.56): Во врéмя óно, возведé Иису́с óчи Свои́ на нéбо и речé: О́тче, прии́де час, прослáви Сы́на Твоегó, да и Сын Твой прослáвит Тя. Я́коже дал еси́ Ему́ власть вся́кия плóти, да вся́ко, éже дал еси́ Ему́, даст им живóт вéчный: Се же есть живóт вéчный, да знáют Тебé еди́наго и́стиннаго Бóга, и Егóже послáл еси́ Иису́с Христá. Аз прослáвих Тя на земли́, дéло соверши́х, éже дал еси́ Мне да сотворю́. И ны́не прослáви Мя Ты, О́тче, у Тебé Самогó слáвою, ю́же имéх у Тебé прéжде мир не бысть. Яви́х и́мя Твоé человéком, и́хже дал еси́ Мне от ми́ра: Твои́ бéша, и Мне их дал еси́, и слóво Твоé сохрани́ша: Ны́не разумéша, я́ко вся, ели́ка дал еси́ Мне, от Тебé суть. Я́ко глагóлы, и́хже дал еси́ Мне, дах им, и ти́и прия́ша, и разумéша вои́стинну, я́ко от Тебé изыдóх, и вéроваша, я́ко Ты Мя послá. Аз о сих молю́: не о всем ми́ре молю́, но о тех, и́хже дал еси́ Мне, я́ко Твои́ суть: И Моя́ вся Твоя́ суть, и Твоя́ Моя́, и прослáвихся в них: И ктому́ несмь в ми́ре, и си́и в ми́ре суть, и Аз к Тебé гряду́. О́тче Святы́й, соблюди́ их во и́мя Твоé, и́хже дал еси́ Мне, да бу́дут еди́но, я́коже и Мы. Егдá бех с ни́ми в ми́ре, Аз соблюдáх их во и́мя Твоé: и́хже дал еси́ Мне, сохрани́х, и никтóже от них поги́бе, тóкмо сын поги́бельный, да сбу́дется Писáние. Ны́не же к Тебé гряду́, и сия́ глагóлю в ми́ре, да и́мут рáдость Мою́ испóлнену в себé.
[Русский синодальный перевод]В то время возвел Иисус очи Свои на небо и сказал: Отче! пришел час, прославь Сына Твоего, да и Сын Твой прославит Тебя, так как Ты дал Ему власть над всякою плотью, да всему, что Ты дал Ему, даст Он жизнь вечную. Сия же есть жизнь вечная, да знают Тебя, единого истинного Бога, и посланного Тобою Иисуса Христа. Я прославил Тебя на земле, совершил дело, которое Ты поручил Мне исполнить. И ныне прославь Меня Ты, Отче, у Тебя Самого славою, которую Я имел у Тебя прежде бытия мира. Я открыл имя Твое человекам, которых Ты дал Мне от мира; они были Твои, и Ты дал их Мне, и они сохранили слово Твое. Ныне уразумели они, что все, что Ты дал Мне, от Тебя есть, ибо слова, которые Ты дал Мне, Я передал им, и они приняли, и уразумели истинно, что Я исшел от Тебя, и уверовали, что Ты послал Меня. Я о них молю: не о всем мире молю, но о тех, которых Ты дал Мне, потому что они Твои. И все Мое Твое, и Твое Мое; и Я прославился в них. Я уже не в мире, но они в мире, а Я к Тебе иду. Отче Святой! соблюди их во имя Твое, тех, которых Ты Мне дал, чтобы они были едино, как и Мы. Когда Я был с ними в мире, Я соблюдал их во имя Твое; тех, которых Ты дал Мне, Я сохранил, и никто из них не погиб, кроме сына погибели, да сбудется Писание. Ныне же к Тебе иду, и это говорю в мире, чтобы они имели в себе радость Мою совершенную. (17:1-13)
Хор: Слáва Тебé, Гóсподи, слáва Тебé.
Помяни нас, Гóсподи, егдá приидеши во Цáрствии Твоéм.
Помяни нас, Владыко, егдá приидеши во Цáрствии Твоéм.
Помяни нас, Святый, егдá приидеши во Цáрствии Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
Стих: Приступите к Нему и просветитеся, и лицá вáша не постыдятся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
Слáва Отцу и Сыну и Святóму Духу.
Лик святых Ангел и Архáнгел со всéми Небéсными силами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
И ныне и присно и во вéки векóв. Аминь.
Символ веры
Вéрую во Единаго Бóга Отцá, Вседержителя, Творцá нéбу и земли, видимым же всем и невидимым. И во Единаго Гóспода Иисуса Христа, Сына Бóжия, Единорóднаго, Иже от Отца Рождéннаго прéжде всех век; Свéта от Свéта, Бóга Истинна от Бóга Истинна, рождéнна, несотворéнна, единосущна Отцу, Имже вся быша. Нас рáди человéк и нáшего рáди спасéния сшéдшаго с небéс и воплотившагося от Духа Свята и Марии Дéвы и вочеловéчшася. Распятаго же за ны при Понтийстем Пилáте, и страдáвша и погребéнна. И воскрéсшаго в трéтий день по Писáнием, и возшéдшаго на небесá и седяща одесную Отцá. И пáки грядущаго со слáвою судити живым и мéртвым, Егóже Цáрствию не будет концá. И в Духа Святáго, Гóспода, Животворящаго, Иже от Отцá исходящаго, Иже со Отцéм и Сыном спокланяема и сслáвима, Глагóлавшего прорóки. Во едину Святую, Собóрную и Апóстольскую Церковь. Исповéдую едино крещéние во оставлéние грехóв. Чáю воскресéния мéртвых, и жизни будущаго вéка. Аминь.
Ослáби, остáви, прости Бóже, прегрешéния нáша, вóльная, и невóльная, яже в слóве и в дéле, яже в вéдении и не в вéдении, яже во дни и в нощи, яже во умé и помышлéнии, вся нам прости, яко Благ и Человеколюбец.
Отче наш, Иже еси на небесéх. Да святится Имя Твоé, да приидет Цáрствие Твоé, да будет вóля Твоя, яко на небеси и на земли. Хлеб наш насущный даждь нам днесь, и остáви нам дóлги нáша, якоже и мы оставляем должникóм нáшим. И не введи нас во искушéние, но избáви нас от лукáваго.
Гóсподи, Иисусе Христé, Сыне Бóжий, помилуй нас. Аминь.
КОНДАК
Кондáк воскрéсный, глас 1: Воскрéсл еси́, я́ко Бог, из грóба во слáве,/ и мир совоскреси́л еси́;/ и естествó человéческое я́ко Бóга воспевáет Тя, и смерть исчезé;/ Адáм же лику́ет, Влады́ко;/ Е́ва ны́не от уз избавля́ема рáдуется, зову́щи:// Ты еси́, И́же всем подая́, Христé, воскресéние.
Гóсподи, помилуй. (12 раз)
И молитву: Всесвятая Троице, Единосущная Держáво, Нераздельное Цáрство, всех благих Винá, благоволи же и о мне грéшнем, утверди, вразуми сéрдце моé, и всю мою отыми сквéрну, просвети мою мысль, да выну слáвлю, пою, покланяюся и глаголю: Един Свят, Един Господь, Иисус Христос, во слáву Бога Отца, аминь.
Буди имя Господне благословено от ныне и до века. (3 раза)
Слáва Отцу и Сыну и Святому Духу, и ныне и присно и во вéки векóв, аминь.
Псалом 33
Благословлю Гóспода на всякое врéмя,/ выну хвалá Его во устéх моих./ О Гóсподе похвáлится душá моя,/ да услышат крóтцыи и возвеселятся./ Возвеличите Гóспода со мнóю,/ и вознесéм имя Егó вкупе./ Взыскáх Гóспода и услыша мя,/ и от всех скорбéй моих избáви мя./ Приступите к Нему и просветитеся,/ и лицá вáша не постыдятся./ Сей нищий воззвá, и Госпóдь услыша и,/ и от всех скорбéй его спасé и./ Ополчится Ангел Госпóдень óкрест боящихся Егó,/ и избáвит их./ Вкусите и видите, яко благ Госпóдь;/ блажéн муж, иже уповáет нань./ Бóйтеся Гóспода, вси святии Егó,/ яко несть лишéния боящымся Его./ Богáтии обнищáша и взалкáша,/ взыскáющии же Гóспода не лишáтся всякаго блáга./ Приидите, чáда, послушайте менé,/ стрáху Госпóдню научу вас./ Кто есть человéк хотяй живóт,/ любяй дни видети блáги;/ Удержи язык твой от зла,/ и устнé твои, éже не глагóлати льсти./ Уклонися от зла и сотвори блáго,/ взыщи мира, и пожени и./ Очи Госпóдни на прáведныя,/ и уши Егó в молитву их./ Лицé же Госпóдне на творящия злáя,/ еже потребити от земли пáмять их./ Воззвáша прáведнии, и Госпóдь услыша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя духом спасéт./ Мнóги скóрби прáведным,/ и от всех их избáвит я Госпóдь./ Хранит Госпóдь вся кóсти их,/ ни едина от них сокрушится./ Смерть грéшников лютá,/ и ненавидящии прáведнаго прегрешáт./ Избáвит Госпóдь души раб Своих,/ и не прегрешáт вси уповáющии на Негó.
Достойно есть
Хор: Достóйно есть я́ко вои́стинну блажи́ти Тя, Богорóдицу,/Присноблажéнную и Пренепорóчную и Мáтерь Бóга нáшего./ Честнéйшую Херуви́м и слáвнeйшую без сравнéния Серафи́м,/ без истлéния Бóга Слóва рóждшую, су́щую Богорóдицу Тя величáем.
Слáва Отцу и Сыну и Святóму Духу, и ныне и присно и во вéки векóв, аминь.
Гóсподи, помилуй. (3 раза)
Гóсподи, благослови.
ОТПУСТ
Гóсподи, Иисусе Христé, Сыне Бóжий, молитвами Пречистыя Твоея Мáтере, святых слáвных и всехвáльных Апóстол, святых и прáведных богоотéц Иоакима и Анны, и всех святых, помилуй и спаси нас, яко Благ и Человеколюбец. Аминь.