Усекновение главы Пророка, Предтечи и Крестителя Господня Иоанна. ОБЕДНИЦА (изобразительные)
11 сентября́ 2021 гóда. Усекновéние главы́ Прорóка, Предтéчи и Крести́теля Госпóдня Иоáнна. Служба прáздника для домáшнего (келéйного) совершéния. Служба мирски́м чи́ном.
Прéжде глагóли часы.
ЧИН ОБЕДНИЦЫ
Глагóли сице: Благослови, душе моя, Гóспода,/ благословен еси Гóсподи.
Псалом 102
Благослови, душé моя, Гóспода,/ и вся внутренняя моя имя святóе Егó./ Благослови, душé моя, Гóспода,/ и не забывай всех воздаяний Егó,/ очищающаго вся беззакóния твоя,/ исцеляющаго вся недуги твоя,/ избавляющаго от истлéния живóт твой,/ венчающаго тя милостию и щедрóтами,/ исполняющаго во благих желание твоé:/ обновится яко óрля юность твоя./ Творяй милостыни Господь,/ и судьбу всем обидимым./ Сказа пути Своя Моисéови,/ сыновóм Израилевым хотéния Своя:/ Щедр и Милостив Госпóдь,/ Долготерпелив и Многомилостив./ Не до конца прогнéвается,/ ниже во век враждует,/ не по беззаконием нашим сотворил есть нам,/ ниже по грехом нашым воздал есть нам./ Яко по высоте небéсней от земли,/ утвердил есть Госпóдь милость Свою на боящихся Егó./ Елико отстоят востóцы от запад,/ удалил есть от нас беззакóния наша./ Якоже щéдрит отец сыны,/ ущéдри Госпóдь боящихся Егó./ Яко Той позна создание наше,/ помяну, яко персть есмы./ Человéк, яко трава дние eгó,/ яко цвет сéльный, тако оцветéт,/ яко дух прóйде в нем,/ и не будет, и не познает ктому места своегó./ Милость же Госпóдня от вéка и до вéка на боящихся Егó,/ и правда Его на сынéх сынóв, хранящих завéт Егó, и пóмнящих заповеди Егó творити я./ Госпóдь на Небеси уготóва Престóл Свой,/ и Царство Егó всéми обладает./ Благословите Гóспода вси Ангели Егó,/ сильнии крéпостию, творящии слóво Егó, услышати глас словéс Егó./ Благословите Гóспода вся Силы Егó,/ слуги Егó, творящии вóлю Егó./ Благословите Гóспода вся дела Егó,/ на всяком мéсте владычества Егó.
Слáва Отцу и Сыну и Святóму Духу, и ныне и присно и во вéки векóв. Аминь.
Благослови, душé моя, Гóспода,/ и вся внутренняя моя имя святóе Егó./ Благословéн еси, Гóсподи.
Слáва Отцу и Сыну и Святóму Духу.
Псалом 145
Хвали, душé моя, Гóспода./ Восхвалю Гóспода в животé моéм,/ пою Бóгу моему, дóндеже есмь./ Не надéйтеся на князи, на сыны человéческия,/ в нихже несть спасéния./ Изыдет дух eгó/ и возвратится в землю свою./ В той день погибнут вся помышлéния eгó./ Блажен, eмуже Бог Иáковль Помóщник егó,/ упование eгó на Гóспода Бóга своегó,/ сотвóршаго нéбо и зéмлю,/ мóре и вся, яже в них,/ хранящаго истину в век,/ творящаго суд обидимым,/ дающаго пищу áлчущим./ Госпóдь решит оковáнныя./ Госпóдь умудряет слепцы./ Госпóдь возвóдит низвéрженныя./ Госпóдь любит прáведники./ Госпóдь хранит пришéльцы,/ сира и вдову приимет/ и путь грéшных погубит./ Воцарится Госпóдь во век,/ Бог твой, Сиóне, в род и род.
И ныне и присно и во вéки векóв. Аминь.
Единорóдный Сыне и Слóве Бóжий, Безсмéртен Сый/ и извóливый спасéния нáшего рáди/ воплотитися от Святыя Богорóдицы и Приснодéвы Марии,/ непрелóжно вочеловéчивыйся,/ распныйся же, Христé Бóже, смéртию смерть попрáвый,/ Един Сый Святыя Трóицы,/ спрославляемый Отцу и Святóму Духу, спаси нас.
И поем Блаженны с тропарями из Октоиха
Хор: Во Цáрствии Твоéм помяни нас, Гóсподи,/ егда приидеши, во Цáрствии Твоéм.
Хор: Блажéни нищии духом,/ яко тех есть Цáрство Небéсное.
Хор: Блажéни плáчущии,/ яко тии утéшатся.
На 10. Хор: Блажéни крóтции,/ яко тии наслéдят зéмлю.
Хор: Блажéни áлчущии и жáждущии прáвды,/ яко тии насытятся.
На 8. Хор: Блажéни милостивии,/ яко тии помиловани будут.
Чтец (Предтéчи, глас 8): Небéснаго круга Верхотвóрче, Гóсподи, и Цéркве Зижди́телю, Ты менé утверди́ в любви́ Твоéй, желáнiй крáю, вéрных утверждéнiе, Еди́не Человеколю́бче.
Хор: Блажéни чистии сéрдцем,/ яко тии Бóга узрят.
Чтец: Дрéвних я́ко ходáтай и нóвых, Предтéче, Евáнгельских проповéданiй ты, предстáв, смешéнiе беззакóнное мучи́тельское обличи́л еси́, слáвную смерть, рáдуяся, прiя́л еси́.
Хор: Блажéни миротвóрцы,/ яко тии сынове Бóжии нарекутся.
На 6. Чтец: От мáтере беззакóнныя преднаученá отрокови́ца, объюродéвшу пiя́нством И҆́родови речé: даждь на блю́де главý Iоáннову, мáтери да подáм дар возжелéнен.
Хор: Блажéни изгнáни прáвды рáди,/ яко тех есть Цáрство Небéсное.
Чтец: Обличéнiя не терпя́ безстýдный мучи́тель богонóснаго твоегó язы́ка, слáвне Предтéче, отрокови́це предаéт, жéнским плясáнiем, честнýю твою́ страдáльную главý, преслáвне.
Хор: Блажéни естé, егда понóсят вам,/ и изженут, и рекут всяк зол глагóл на вы лжуще Менé рáди.
На 4.Чтец: Усечéнiе честны́я и всехвáльныя твоея́ главы́, Предтéче Хрiстóв, почитáюще, слáвим твою́ приснохвáльную и всемíрную пáмять, преблажéнне.
Хор: Рáдуйтеся и веселитеся,/ яко мзда вáша мнóга на небесéх.
Чтец: О, сквéрнаго гощéнiя! О, гóрькаго рождéнiя! О, пiя́нства сквéрнаго И҆́рода беззакóннаго! Содержи́м бысть к беззакóнiю и обличáемь, Прорóка уби́ти поучавáется.
Хор: Слáва Отцу и Сыну и Святóму Духу.
Чтец: Плясáвши нóвая еги́птяныня посреди́ пи́ра сквéрнено, главý испроси́, сея́ обличи́вшую роди́тельницу и И҆́родову налóжницу.
Хор: И ныне и присно и во вéки векóв. Аминь.
Чтец: И҆́же ны́не Сын Дéвы, пéрвее Сын Отéч показáся, не ин разумевáемь, от ви́димаго, áще и пребы́сть еди́н во обою́ совершéн.
Тропари и кондаки
Тропáрь Предтéчи, глас 2: Пáмять прáведнаго с похвалáми,/ тебé же довлéет свидéтельство Госпóдне, Предтéче:/ показáл бо ся еси́ вои́стинну и прорóков честнéйшiй,/ я́ко и в струя́х крести́ти сподóбился еси́ Проповéданнаго./ Тéмже за и҆́стину пострадáв, рáдуяся,/ благовести́л еси́ и сýщим во áде Бóга, я́вльшагося плóтiю,/ взéмлющаго грех мíра// и подаю́щаго нам вéлiю ми́лость.
Слáва Отцу и Сыну и Святóму Духу и ныне и присно и во вéки векóв. Аминь.
Кондáк Предтéчи, глас 5: Предтéчево слáвное усекновéнiе/ смотрéнiе бысть нéкое Божéственное,/ да и сýщим во áде Спáсово проповéсть пришéствiе./ Да рыдáет ýбо Иродíя,/ беззакóнное убíйство испроси́вши:/ не закóн бо Бóжiй, ни живы́й век возлюби́,// но притвóрный, приврéменный.
Трисвятое
Хор: Святый Бóже,/ Святый Крéпкий,/ Святый Безсмéртный, помилуй нас. (3 раза)
Хор: Слáва Отцý и Сыну и Святóму Дýху, и ныне и присно и во вéки векóв, аминь.
Хор: Святый Безсмéртный, помилуй нас.
Хор: Святый Бóже,/ Святый Крéпкий,/ Святый Безсмéртный, помилуй нас.
Прокимен
Чтец: Проки́мен, глас седьмы́й: Возвесели́тся прáведник о Гóсподе и уповáет на Негó.
Хор: Возвесели́тся прáведник о Гóсподе/ и уповáет на Негó.
Чтец: Наказýя наказá мя Госпóдь, смéрти же не предадé мя.
Хор: Возвесели́тся прáведник о Гóсподе/ и уповáет на Негó.
Чтец: Возвесели́тся прáведник о Гóсподе.
Хор: И уповáет на Негó.
АПОСТОЛ
Чтец: Дея́нiй святы́х апóстол чтéнiе.
(Деян.зач.33): Во дни óны, я́коже скончавáше Iоáнн течéнiе, глагóлаше: когó мя непщýете бы́ти, несмь аз, но се грядéт по мне, Емýже несмь достóин разреши́ти ремéнь сапогý Егó. Мýжiе, брáтiе, сы́нове рóда Авраáмля, и и҆́же в вас, боя́щiися Бóга, вам слóво спасéнiя Сегó послáся: Живýщiи бо во Iерусали́ме и кня́зи их сегó не разумéвше, и глáсы прорóческiя, по вся суббóты чтóмыя, осуди́вше Егó, испóлниша. И ни еди́ныя вины́ смéртныя обрéтше, проси́ша у Пiлáта уби́ти Егó. Я́коже скончáша вся, я́же о Нем пи́сана, снéмше со Дрéва, положи́ша во грóбе. Бог же воскреси́ Его́ от мéртвых. И҆́же яви́ся на дни мнóги совозшéдшим с Ним от Галiлéи во Iерусали́м, и҆́же ны́не суть свидéтелiе Егó к лю́дем. И мы вам благовествýем обетовáнiе, бы́вшее ко отцéм, я́ко сié Бог испóлнил есть нам, чáдом их, воздви́г Iисýса.
синодальный перевод
Аллилуиарий, глас 2
Чтец: Аллилýiа, аллилýiа, аллилýiа, глас четвéртый.
Хор: Аллилу́иа, аллилу́иа, аллилу́иа.
Чтец: Прáведник, я́ко фи́никс, процветéт, я́ко кедр, и҆́же в Ливáне, умно́жится.
Хор: Аллилу́иа, аллилу́иа, аллилу́иа.
Чтец: Насаждéни в домý Госпóдни во двóрех дóму Бóга нáшего процветýт.
Хор: Аллилу́иа, аллилу́иа, аллилу́иа.
ЕВАНГЕЛИЕ
От Мáрка Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Мк.зач.24): Во врéмя óно, слы́ша И́род царь слух Iисýсов [я́ве бо бысть и҆́мя егó,] и глагóлаше, я́ко Iоáнн Крестя́й от мéртвых востá, и сегó рáди си́лы дéются о нем. Инíи глагóлаху, я́ко Iлíя есть, инíи же глагóлаху, я́ко прорóк есть, или́ я́ко еди́н от прорóк. Слы́шав же И́род речé, я́ко, егóже аз усéкнух Iоáнна, той есть: той востá от мéртвых. Той бо И́род послáв, ят Iоáнна и связá егó в темни́це, Иродiáды рáди, жены́ Фiлíппа, брáта своегó, я́ко ожени́ся éю. Глагóлаше бо Иоáнн И́родови: не достóит тебé имéти женý (Фiлíппа), брáта твоегó. Иродíя же гнéвашеся на негó и хотя́ше егó уби́ти, и не можáше. И́род бо боя́шеся Iоáнна, вéдый егó мýжа прáведна и свя́та, и соблюдáше егó, и послýшав егó, мнóга творя́ше, и в слáдость егó послýшаше. И приклю́чшуся дни потрéбну, егдá И́род рождествý своемý вéчерю творя́ше, князéм свои́м, ты́сящником, и старéйшинам галiлéйским. И вшéдши дщерь тоя́ Иродiáды, и плясáвши, и угóждши И́родови и возлежáщым с ним. Речé царь деви́це: проси́ у менé, éже áще хóщеши, и дам ти. И кля́тся ей: я́ко áще попрóсиши у менé, дам ти, и до полцáрствiя моегó. Онá же изшéдши речé мáтери своéй: чесó прошý? Онá же речé: главý Iоáнна Крести́теля. И вшéдши áбiе со тщáнiем к царю́, проси́, глагóлющи: хощý, да ми дáси от негó на блю́де главý Iоáнна Крести́теля. И прискóрбен быв царь, кля́твы же рáди, и за возлежáщих с ним, не восхотé отрещи́ся ея́. И áбiе послáв царь спекулáтора, повелé принести́ главý егó. Он же шед усéкну егó в темни́це. И принесé главý егó на блю́де, и дадé ю деви́це: и деви́ца дадé ю мáтери своéй. И слы́шавше ученицы́ егó, приидóша и взя́ша труп егó, и положи́ша егó во грóбе. И собрáшася апóстоли ко Iисýсу, и возвести́ша Емý вся, и ели́ка сотвори́ша, и научи́ша.
Хор: Слáва Тебé, Гóсподи, слáва Тебé.
Помяни нас, Гóсподи, егда приидеши во Цáрствии Твоéм.
Помяни нас, Владыко, егда приидеши во Цáрствии Твоéм.
Помяни нас, Святый, егда приидеши во Цáрствии Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
Стих: Приступите к Нему и просветитеся, и лицá вáша не постыдятся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
Слáва Отцу и Сыну и Святóму Духу.
Лик святых Ангел и Архáнгел со всéми Небéсными силами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
И ныне и присно и во вéки векóв. Аминь.
Символ веры
Вéрую во Единаго Бога Отца, Вседержителя, Творца небу и земли, видимым же всем и невидимым. И во Единаго Господа Иисуса Христа, Сына Божия, Единороднаго, Иже от Отца Рождéннаго прéжде всех век; Свéта от Свéта, Бога Истинна от Бога Истинна, рождéнна, несотворéнна, единосущна Отцу, Имже вся быша. Нас ради человек и нашего ради спасéния сшéдшаго с небéс и воплотившагося от Духа Свята и Марии Дéвы и вочеловечшася. Распятаго же за ны при Понтийстем Пилáте, и страдáвша и погребéнна. И воскрéсшаго в трéтий день по Писáнием, и возшéдшаго на небесá и седяща одесную Отцá. И пáки грядущаго со слáвою судити живым и мéртвым, Егоже Цáрствию не будет концá. И в Духа Святáго, Господа, Животворящаго, Иже от Отцá исходящаго, Иже со Отцéм и Сыном спокланяема и сслáвима, Глаголавшего пророки. Во едину Святую, Соборную и Апостольскую Цéрковь. Исповéдую едино крещéние во оставлéние грехов. Чáю воскресéния мéртвых, и жизни будущаго вéка. Аминь.
Ослáби, остáви, прости Боже, прегрешения наша, вольная, и невольная, яже в слове и в деле, яже в ведении и не в ведении, яже во дни и в нощи, яже во уме и помышлении, вся нам прости, яко Благ и Человеколюбец.
Отче наш, Иже еси на небесéх. Да святится Имя Твоé, да приидет Цáрствие Твоé, да будет вóля Твоя, яко на небеси и на земли. Хлеб наш насущный даждь нам днесь, и остáви нам дóлги нáша, якоже и мы оставляем должникóм нáшим. И не введи нас во искушéние, но избáви нас от лукáваго.
Гóсподи, Иисусе Христé, Сыне Бóжий, помилуй нас. Аминь.
КОНДАК
Кондáк Предтéчи, глас 5: Предтéчево слáвное усекновéние/ смотрéние бысть нéкое Божéственное,/ да и су́щим во áде Спáсово проповéсть пришéствие./ Да рыдáет у́бо Ироди́я,/ беззакóнное уби́йство испроси́вши:/ не закóн бо Бóжий, ни живы́й век возлюби́,// но притвóрный, приврéменный.
Гóсподи, помилуй. (12 раз)
И молитву: Всесвятая Троице, Единосущная Держáво, Нераздельное Цáрство, всех благих Винá, благоволи же и о мне грéшнем, утверди, вразуми сéрдце моé, и всю мою отыми сквéрну, просвети мою мысль, да выну слáвлю, пою, покланяюся и глаголю: Един Свят, Един Господь, Иисус Христос, во слáву Бога Отца, аминь.
Буди имя Господне благословено от ныне и до века. (3 раза)
Слáва Отцу и Сыну и Святому Духу, и ныне и присно и во вéки векóв, аминь.
Псалом 33
Благословлю Гóспода на всякое врéмя,/ выну хвалá Его во устéх моих./ О Гóсподе похвáлится душá моя,/ да услышат крóтцыи и возвеселятся./ Возвеличите Гóспода со мнóю,/ и вознесéм имя Егó вкупе./ Взыскáх Гóспода и услыша мя,/ и от всех скорбéй моих избáви мя./ Приступите к Нему и просветитеся,/ и лицá вáша не постыдятся./ Сей нищий воззвá, и Госпóдь услыша и,/ и от всех скорбéй его спасé и./ Ополчится Ангел Госпóдень óкрест боящихся Егó,/ и избáвит их./ Вкусите и видите, яко благ Госпóдь;/ блажéн муж, иже уповáет нань./ Бóйтеся Гóспода, вси святии Егó,/ яко несть лишéния боящымся Его./ Богáтии обнищáша и взалкáша,/ взыскáющии же Гóспода не лишáтся всякаго блáга./ Приидите, чáда, послушайте менé,/ стрáху Госпóдню научу вас./ Кто есть человéк хотяй живóт,/ любяй дни видети блáги;/ Удержи язык твой от зла,/ и устнé твои, éже не глагóлати льсти./ Уклонися от зла и сотвори блáго,/ взыщи мира, и пожени и./ Очи Госпóдни на прáведныя,/ и уши Егó в молитву их./ Лицé же Госпóдне на творящия злáя,/ еже потребити от земли пáмять их./ Воззвáша прáведнии, и Госпóдь услыша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя духом спасéт./ Мнóги скóрби прáведным,/ и от всех их избáвит я Госпóдь./ Хранит Госпóдь вся кóсти их,/ ни едина от них сокрушится./ Смерть грéшников лютá,/ и ненавидящии прáведнаго прегрешáт./ Избáвит Госпóдь души раб Своих,/ и не прегрешáт вси уповáющии на Негó.
Достойно есть
Хор: Достойно есть яко воистинну блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем.
Слáва Отцу и Сыну и Святóму Духу, и ныне и присно и во вéки векóв, аминь.
Гóсподи, помилуй. (3 раза)
Гóсподи, благослови.
ОТПУСТ
Гóсподи, Иисусе Христé, Сыне Бóжий, молитвами Пречистыя Твоея Мáтере, святáго прорóка, Предтéчи и Крестителя Иоáнна, святых и прáведных богоотéц Иоакима и Анны, и всех святых, помилуй и спаси нас, яко Благ и Человеколюбец. Аминь.
Таже, поем многолетие
Благочестивейшаго, Самодержáвнейшаго, Великаго грядущаго Госудáря нáшего Имперáтора (его имя Ты вем) святéйшыя вселéнския патриáрхи преосвящéнныя митрополиты, архиепископы и епископы православныя, иерéи и дьяконы и весь причет церкóвный и вся правослáвныя христиáны, Гóсподи, сохрани их на мнóгая лéта!