Покров Пресвятой Владычицы нашей Богородицы и Приснодевы Марии. ВСЕНОЩНОЕ БДЕНИЕ. УТРЕНЯ
14 октября́ 2024 гóда. Понедéльник 17-й седмúцы по Пятидеся́тнице. Покрóв Пресвяты́я Влады́чицы нáшея Богорóдицы и Приснодéвы Марíи. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени.
УТРЕНЯ
Начáло зри здесь ( великая вечéрня)
ШЕСТОПСАЛМИЕ
Слáва в вы́шних Бóгу, и на землѝ мир, в человéцех благоволéнiе. (трúжды) Гóсподи, устнè моѝ отвéрзеши, и устà моя́ возвестя́т хвалý Твою́. (двáжды)
Псалом 3
Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгò. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы̀ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоè.
Аз уснýх, и спах, востáх, я́ко Госпóдь застýпит мя.
Псалом 37
Гóсподи, да не я́ростiю Твоéю обличи́ши менè, нижè гнéвом Твои́м накáжеши менè. Яко стрéлы Твоя́ унзóша во мне, и утверди́л есѝ на мне рýку Твою́. Несть исцелéнiя в плóти моéй от лицà гнéва Твоегò, несть ми́ра в костéх мои́х от лицà грех мои́х. Яко беззакóнiя моя́ превзыдóша главý мою́, я́ко брéмя тя́жкое отяготéша на мне. Возсмердéша и согни́ша рáны моя́ от лицà безýмiя моегò. Пострадáх и слякóхся до концà, весь день сéтуя хождáх. Яко ля́двiя моя́ напóлнишася поругáнiй, и несть исцелéнiя в плóти моéй. Озлóблен бых и смири́хся до зелà, рыкáх от воздыхáнiя сéрдца моегò. Гóсподи, пред Тобóю все желáнiе моè и воздыхáнiе моè от Тебè не утаи́ся. Сéрдце моè смятéся, остáви мя си́ла моя́, и свет óчiю моéю, и той несть со мнóю. Дрýзи моѝ и и҆́скреннiи моѝ пря́мо мне прибли́жишася и стáша, и бли́жнiи моѝ отдалéче менè стáша и нуждáхуся и҆́щущiи дýшу мою́, и и҆́щущiи злáя мне глагóлаху сýетная и льсти́вным весь день поучáхуся. Аз же я́ко глух не слы́шах и я́ко нем не отверзáяй уст свои́х. И бых я́ко человéк не слы́шай и не имы́й во устéх свои́х обличéнiя. Яко на Тя, Гóсподи, уповáх, Ты услы́шиши, Гóсподи Бóже мой. Яко рех: да не когдà порáдуют ми ся вразѝ моѝ: и внегдà подвижáтися ногáм мои́м, на мя велерéчеваша. Яко аз на рáны готóв, и болéзнь моя́ предо мнóю есть вы́ну. Яко беззакóнiе моè аз возвещý и попекýся о гресè моéм. Вразѝ же моѝ живýт и укрепи́шася пáче менè, и умнóжишася ненави́дящiи мя без прáвды. Воздаю́щiи ми злáя возблагáя оболгáху мя, занè гоня́х благосты́ню. Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Псалом 62
Бóже, Бóже мой, к Тебè ýтренюю, возжадà Тебè душà моя́, коль мнóжицею Тебè плоть моя́, в землѝ пýсте и непрохóдне, и безвóдне. Тáко во святéм яви́хся Тебè, ви́дети си́лу Твою́ и слáву Твою́. Я́ко лýчши ми́лость Твоя́ пáче живóт, устнè моѝ похвали́те Тя. Тáко благословлю́ Тя в животè моéм, о и҆́мени Твоéм воздежý рýце моѝ. Я́ко от тýка и мáсти да испóлнится душà моя́, и устнáма рáдости восхвáлят Тя устà моя́. Áще поминáх Тя на постéли моéй, на ýтренних поучáхся в Тя. Я́ко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́. Тíи же всýе искáша дýшу мою́, вни́дут в преиспóдняя землѝ, предадя́тся в рýки орýжiя, чáсти ли́совом бýдут. Царь же возвесели́тся о Бóзе, похвáлится всяк клены́йся И҆м, я́ко загради́шася устà глагóлющих непрáведная.
На ýтренних поучáхся в Тя. Яко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́.
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Псалом 87
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý, я́ко испóлнися зол душà моя́, и живóт мой áду прибли́жися. Привменéн бых с низходя́щими в ров, бых я́ко человéк без пóмощи, в мéртвых свобóдь, я́ко я́звеннiи спя́щiи во грóбе, и҆́хже не помянýл есѝ ктомý, и тíи от рукѝ Твоея́ отриновéни бы́ша. Положи́ша мя в рóве преиспóднем, в тéмных и сéни смéртней. На мне утверди́ся я́рость Твоя́, и вся вóлны Твоя́ навéл есѝ на мя. Удáлил есѝ знáемых мои́х от менè, положи́ша мя мéрзость себè: прéдан бых и не исхождáх. Óчи моѝ изнемогóсте от нищеты̀, воззвáх к Тебè, Гóсподи, весь день, воздéх к Тебè рýце моѝ. Едà мéртвыми твори́ши чудесà? Илѝ врáчеве воскреся́т, и исповéдятся Тебè? Едà повéсть кто во грóбе ми́лость Твою́, и и҆́стину Твою́ в поги́бели? Едà познáна бýдут во тьме чудесà Твоя́, и прáвда Твоя́ в землѝ забвéнней? И аз к Тебè, Гóсподи, воззвáх и ýтро моли́тва моя́ предвари́т Тя. Вскýю, Гóсподи, отрéеши дýшу мою́, отвращáеши лицè Твоè от менè? Нищ есмь аз, и в трудéх от ю́ности моея́; вознéс же ся, смири́хся, и изнемогóх. На мне преидóша гнéви Твоѝ, устрашéнiя Твоя́ возмути́ша мя, обыдóша мя я́ко водà, весь день одержáша мя вкýпе. Удáлил есѝ от менè дрýга и и҆́скренняго, и знáемых моих от страстéй.
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý.
Псалом 102
Благословѝ, душè моя, Гóспода, и вся внýтренняя моя и҆́мя святóе Егò. Благословѝ, душè моя, Гóспода, и не забывáй всех воздая́ній Егò, очищáющаго вся беззакóнїя твоя́, исцеля́ющаго вся недýги твоя́, избавля́ющаго от истлéнiя живóт твой, венчáющаго тя ми́лостію и щедрóтами, исполня́ющаго во благи́х желáнїе твоè: обновится я́ко óрля юность твоя́. Творя́й ми́лостыни Госпóдь, и судьбý всем оби́димым. Сказà путѝ Своя́ Моисéови, сыновóм Iзрáилевым хотéнїя Своя́: Щедр и Ми́лостив Госпóдь, Долготерпели́в и Многоми́лостив. Не до концà прогнéвается, нижè во век враждýет, не по беззакóнїем нáшим сотвори́л есть нам, нижè по грехóм нáшым воздáл есть нам. Я́ко по высотè небéсней от землѝ, утверди́л есть Госпóдь ми́лость Свою́ на боя́щихся Егò. Ели́ко отстоят востóцы от зáпад, удáлил есть от нас беззакóнїя нáша. Я́коже щéдрит отéц сы́ны, ущéдри Госпóдь боя́щихся Егò. Я́ко Той познà создáнїе нáше, помянý, яко персть есмы̀. Человéк, яко травà днíе eгò, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегò. Ми́лость же Госпóдня от вéка и до вéка на боя́щихся Егò, и прáвда Егò на сынéх сынóв, храня́щих завéт Егò, и пóмнящих зáповеди Егò твори́ти я. Госпóдь на Небесѝ уготóва Престóл Свой, и Цáрство Егò всéми обладáет. Благослови́те Гóспода вси Áнгели Егò, си́льнїи крéпостїю, творя́щїи слóво Егò, услышати глас словéс Егò. Благослови́те Гóспода вся Си́лы Егò, слýги Егò, творя́щїи вóлю Егò. Благослови́те Гóспода вся делà Егò, на вся́ком мéсте влады́чества Егò, благословѝ, душè моя́, Гóспода.
На вся́ком мéсте влады́чества Егò, благословѝ, душè моя́, Гóспода.
Псалом 142
Гóсподи, услы́ши моли́тву мою́, внушѝ молéнiе моè во и҆́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнà враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И уны̀ во мне дух мой, во мне смятéся сéрдце моè. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебè рýце моѝ, душà моя́, я́ко земля́ безвóдная Тебè. Скóро услы́ши мя, Гóсподи, исчезè дух мой, не отвратѝ лицà Твоегò от менè, и уподóблюся низходя́щым в ров. Слы́шану сотворѝ мне заýтра ми́лость Твою́, я́ко на Тя уповáх. Скажѝ мне, Гóсподи, путь вóньже пойдý, я́ко к Тебè взях дýшу мою́. Измѝ мя от враг мои́х, Гóсподи, к Тебè прибегóх. Научѝ мя твори́ти вóлю Твою́, я́ко Ты есѝ Бог мой. Дух Твой Благíй настáвит мя на зéмлю прáву. И҆́мене Твоегò рáди, Гóсподи, живи́ши мя, прáвдою Твоéю изведéши от печáли дýшу мою́. И ми́лостiю Твоéю потреби́ши врагѝ моя́ и погуби́ши вся стужáющыя душѝ моéй, я́ко аз раб Твой есмь.
Услы́ши мя, Гóсподи, в прáвде Твоéй и не вни́ди в суд с рабóм Твои́м. Услы́ши мя, Гóсподи, в прáвде Твоéй и не вни́ди в суд с рабóм Твои́м.
Дух Твой Благíй настáвит мя на зéмлю прáву.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
БОГ ГОСПОДЬ, глас 4
Чтец: Бог Госпóдь, и яви́ся нам, благословéн Гряды́й во И҆́мя Госпóдне.(Пс.117:27А,26А)
Чтец: И҆сповéдайтеся Гóсподеви, я́ко благ, я́ко в век ми́лость Егò.(Пс.117:1)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Обышéдше обыдóша мя и и҆́менем Госпóдним противля́хся им.(Пс.117:11)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Не умрý, но жив бýду и повéм делà Госпóдня.(Пс.117:17)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Кáмень, Егóже небрегóша зи́ждущiи, Сей бысть во главý ýгла, от Гóспода бысть Сей, и есть ди́вен во очесéх нáших. (Пс.117:22-23)
Хор: Бог Госпóдь, и явúся нам, благословéн Гряды́й во И҆́мя Госпóдне.
ТРОПАРИ
Тропáрь Покровà Богорóдицы, глас 4: Днесь благовéрнiи лю́дiе свéтло прáзднуем, осеня́еми Твоúм, Богомáти, пришéствiем, и к Твоемý взирáюще пречúстому óбразу, умúльно глагóлем: покры́й нас честны́м Твоúм Покрóвом и избáви нас от вся́каго зла, моля́щи Сы́на Твоегò, Хрїстà Бóга нáшего, спастù дýшы нáшя.(Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Днесь благовéрнiи лю́дiе свéтло прáзднуем, осеня́еми Твоúм, Богомáти, пришéствiем, и к Твоемý взирáюще пречúстому óбразу, умúльно глагóлем: покры́й нас честны́м Твоúм Покрóвом и избáви нас от вся́каго зла, моля́щи Сы́на Твоегò, Хрїстà Бóга нáшего, спастù дýшы нáшя.
Гóсподи, помúлуй. (трúжды)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМЫ И СЕДАЛЬНЫ
КАФИЗМА ЧЕТВЕРТАЯ
И чтем кафíсму 4-ю ( илù одúн псалóм, илù до 1-й Слáвы)
Псалом 24
К Тебè, Гóсподи, воздвигóх дýшу мою́, Бóже мой, на Тя уповáх, да не постыжýся во век, нижè да посмею́т ми ся вразѝ моѝ; И҆́бо вси терпящiи Тя не постыдя́тся. Да постыдя́тся беззакóннующiи вотщè. Путѝ Твоя, Гóсподи, скажѝ ми, и стезя́м Твоим научѝ мя. Настáви мя на и҆́стину Твою́ и научѝ мя, яко Ты есѝ Бог Спас мой, и Тебè терпéх весь день. Помянѝ щедрóты Твоя, Гóсподи, и ми́лости Твоя, я́ко от вéка суть. Грех юности моея́ и невéденiя моегó не помянѝ, по ми́лости Твоéй помянѝ мя Ты рáди блáгости Твоея́, Гóсподи. Благ и прав Госпóдь, сегó рáди законоположи́т согрешáющим на путѝ. Настáвит крóткiя на суд, научи́т крóткiя путéм Свои́м. Вси путiè Госпóдни ми́лость и и҆́стина, взыскáющым завéта Егó и свидéнiя Егó. Рáди и҆́мене Твоегó, Гóсподи, и очи́сти грех мой, мног бо есть. Кто есть человéк боя́йся Гóспода; законоположи́т емý на путѝ, егóже извóли. Душá егó во благи́х водвори́тся, и сéмя егó наслéдит зéмлю. Держáва Госпóдь боя́щихся Егó и завéт Егó яви́т им. Óчи моѝ выну ко Гóсподу, яко Той истóргнет от сéти нóзе моѝ. При́зри на мя и поми́луй мя, яко единорóд и нищ есмь аз. Скóрби сéрдца моегó умнóжишася, от нужд мои́х изведѝ мя. Виждь смирéнiе моè и труд мой, и остáви вся грехѝ моя́. Виждь враги́ моя́, я́ко умнóжишася, и ненавидéнiем непрáведным возненави́деша мя. Сохранѝ дýшу мою́ и избáви мя, да не постыжýся, я́ко уповáх на Тя. Незлóбивiи и прáвiи прилепля́хуся мне, я́ко потерпéх Тя, Гóсподи. Избáви, Бóже, Iзрáиля от всех скорбéй егó.
Псалом 25
Суди́ ми, Гóсподи, я́ко аз незлóбою моéю ходи́х, и на Гóспода уповáя, не изнемогý. Искуси́ мя, Гóсподи, и испытáй мя, разжзи́ утрóбы моя́, и сéрдце моè. Я́ко ми́лость Твоя́ пред очи́ма мои́ма есть, и благоугоди́х во и́стине Твоéй. Не седóх с сóнмом сýетным, и со законопрестýпными не вни́ду. Возненави́дех цéрковь лукáвнующих, и с нечести́выми не ся́ду. Умы́ю в непови́нных рýце мои́, и обы́ду жéртвенник Твой, Гóсподи. Éже услы́шати ми глас хвалы́ Твоея́, и повéдати вся чудесá Твоя́. Гóсподи, возлюби́х благолéпiе дóму Твоегó и мéсто селéнiя слáвы Твоея́. Да не погуби́ши с нечести́выми дýшу мою́, и с мýжи кровéй живóт мой. И́хже в рукý беззакóнiя, десни́ца их испóлнися мзды. Аз же незлóбою моéю ходи́х, избáви мя, Гóсподи, и поми́луй мя. Ногá моя́ ста на правотè: в цéрквах благословлю́ Тя, Гóсподи.
Псалом 26
Госпóдь просвещéнiе моè и Спаси́тель мой, когó убою́ся? Госпóдь Защи́титель животá моегó, от когó устрашýся? Внегдá приближáтися на мя злóбующим, éже снéсти плóти моя́, оскорбля́ющiи мя, и врази́ мои́, тíи изнемóгоша и падóша. Áще ополчи́тся на мя полк, не убои́тся сéрдце моé, áще востáнет на мя брань, на Негó аз уповáю. Еди́но проси́х от Гóспода, то взыщý: éже жи́ти ми в домý Госпóдни вся дни животá моегó, зрéти ми красотý Госпóдню и посещáти храм святы́й Егó. Я́ко скры мя в селéнiи Своéм в день зол мои́х, покры́ мя в тáйне селéнiя Своегó, на кáмень вознесé мя. И ны́не се вознесé главý мою́, на враги́ моя́: обыдóх и пожрóх в селéнiи Егó жéртву хвалéнiя и воскликновéнiя, пою́ и воспою́ Гóсподеви. Услы́ши, Гóсподи, глас мой, и́мже воззвáх: поми́луй мя и услы́ши мя. Тебé речé сéрдце моé, Гóспода взыщý. Взыскá Тебé лицé моé, лицá Твоегó, Гóсподи, взыщý. Не отврати́ лицá Твоегó от менé и не уклони́ся гнéвом от рабá Твоегó: помóщник мой бýди, не отри́ни менé, и не остáви менé, Бóже Спаси́телю мой. Я́ко отéц мой и мáти моя́ остáвиста мя, Госпóдь же воспрiя́т мя. Законоположи́ ми, Гóсподи, в пути́ Твоéм и настáви мя на стезю́ прáвую враг мои́х рáди. Не предáждь менé в дýши стужáющих ми, я́ко востáша на мя свидéтеле непрáведнiи и солгá непрáвда себé. Вéрую ви́дети благáя Госпóдня на земли́ живы́х. Потерпи́ Гóспода, мужáйся и да крепи́тся сéрдце твоé, и потерпи́ Гóспода.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 27
К Тебé, Гóсподи, воззовý, Бóже мой, да не премолчи́ши от менé, да не когдá премолчи́ши от менé: и уподóблюся низходя́щим в ров. Услы́ши, Гóсподи, глас молéнiя моегó, внегдá моли́ти ми ся к Тебé, внегдá воздéти ми рýце мои́ ко хрáму святóму Твоемý. Не привлецы́ менé со грéшники и с дéлающими непрáвду не погуби́ менé, глагóлющими мир с бли́жними свои́ми, злáя же в сердцáх свои́х. Даждь им, Гóсподи, по делóм их, и по лукáвству начинáнiй их: по делóм рукý их даждь им: воздáждь воздая́нiе их им. Я́ко не разумéша в делá Госпóдня и в делá рукý Егó: разори́ши я́, и не сози́ждеши я́. Благословéн Госпóдь, я́ко услы́ша глас молéнiя моегó. Госпóдь Помóщник мой, и Защи́титель мой: на Негó уповá сéрдце моé, и помóже ми, и процветé плоть моя́, и вóлею моéю исповéмся Емý. Госпóдь утверждéнiе людéй Свои́х, и Защи́титель спасéнiй хрiстá Своегó есть. Спаси́ лю́ди Твоя́ и благослови́ достоя́нiе Твоé, и упаси́ я́, и возми́ я́ до вéка.
Псалом 28
Принеси́те Гóсподеви сы́нове Бóжiи, принеси́те Гóсподеви, сы́ны óвни, принеси́те Гóсподеви слáву и честь. Принеси́те Гóсподеви слáву и́мени Егó, поклони́теся Гóсподеви во дворé святéм Егó. Глас Госпóдень на водáх, Бог слáвы возгремé, Госпóдь на водáх мнóгих. Глас Госпóдень в крéпости, глас Госпóдень в великолéпiи. Глас Гóспода, сокрушáющаго кéдры, и стры́ет Госпóдь кéдры Лiвáнскiя: и истни́т я́ я́ко тельцá Лiвáнска, и возлю́бленный я́ко сын единорóжь. Глас Гóспода, пресецáющаго плáмень огня́. Глас Гóспода, стрясáющаго пусты́ню, и стрясéт Госпóдь пусты́ню Каддíйскую. Глас Госпóдень свершáющiй елéни, и откры́ет дубрáвы, и в хрáме Егó вся́кiй глагóлет слáву. Госпóдь потóп населя́ет, и ся́дет Госпóдь Царь в век. Госпóдь крéпость лю́дем Свои́м даст, Госпóдь благослови́т лю́ди Своя́ ми́ром.
Псалом 29
Вознесý Тя, Гóсподи, я́ко подъя́л мя еси́, и не возвесели́л еси́ врагóв мои́х о мне. Гóсподи Бóже мой, воззвáх к Тебé, и исцели́л мя еси́. Гóсподи, возвéл еси́ от áда дýшу мою́, спасл мя еси́ от низходя́щих в ров. Пóйте Гóсподеви, преподóбнiи Егó, и исповéдайте пáмять святы́ни Егó. Я́ко гнев в я́рости Егó, и живóт в вóли Егó: вéчер водвори́тся плачь, и заýтра рáдость. Аз же рех во оби́лiи моéм: не подви́жуся во век. Гóсподи, вóлею Твоéю подáждь добрóте моéй си́лу. Отврати́л же еси́ лицé Твоé, и бых смущéн. К Тебé, Гóсподи, воззовý, и к Бóгу моемý помолю́ся. Кáя пóльза в крóви моéй, внегдá сходи́ти ми во истлéнiе? Едá исповéстся Тебé персть, или́ возвести́т и́стину Твою́? Слы́ша Госпóдь и поми́лова мя: Госпóдь бысть Помóщник мой. Обрати́л еси́ плачь мой в рáдость мне: растерзáл еси́ врéтище моé, и препоя́сал мя еси́ весéлiем. Я́ко да воспоéт Тебé слáва моя́, и не умилю́ся: Гóсподи Бóже мой, во век исповéмся Тебé.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 30
На Тя, Гóсподи, уповáх, да не постыжýся во век: прáвдою Твоéю избáви мя и изми́ мя. Приклони́ ко мне ýхо Твоé, ускори́ изъя́ти мя, бýди ми в Бóга Защи́тителя, и в дом прибéжища, éже спасти́ мя. Яко держáва моя́ и прибéжище моé еси́ Ты, и и́мене Твоегó рáди настáвиши мя, и препитáеши мя. Изведéши мя от сéти сея́, ю́же скры́ша ми, я́ко Ты еси́ Защи́титель мой, Гóсподи. В рýце Твои́ предложý дух мой: избáвил мя еси́, Гóсподи Бóже и́стины. Возненави́дел еси́ храня́щiя суеты́ вотщé: аз же на Гóспода уповáх. Возрáдуюся и возвеселю́ся о ми́лости Твоéй, я́ко призрéл еси́ на смирéнiе моé, спасл еси́ от нужд дýшу мою́, и нéси менé затвори́л в рукáх врáжiих, постáвил еси́ на прострáнне нóзе мои́. Поми́луй мя, Гóсподи, я́ко скорблю́: смятéся я́ростiю óко моé, душá моя́ и утрóба моя́. Яко исчезé в болéзни живóт мой и лéта моя́ в воздыхáнiих, изнемóже нищетóю крéпость моя́ и кóсти моя́ смятóшася. От всех враг мои́х бых поношéнiе, и сосéдом мои́м зелó, и страх знáемым мои́м: ви́дящiи мя вон бежáша от менé. Забвéн бых я́ко мертв от сéрдца, бых я́ко сосýд погублéн. Яко слы́шах гаждéнiе мнóгих, живýщих óкрест, внегдá собрáтися им вкýпе на мя, прiя́ти дýшу мою́ совещáша. Аз же на Тя, Гóсподи, уповáх, рех: Ты еси́ Бог мой. В рукý Твоéю жрéбiи мои́: избáви мя из руки́ враг мои́х и от гоня́щих мя. Просвети́ лицé Твоé на рабá Твоегó, спаси́ мя ми́лостiю Твоéю. Гóсподи, да не постыжýся, я́ко призвáх Тя: да постыдя́тся нечести́вiи и сни́дут во ад. Нéмы да бýдут устны́ льсти́выя, глагóлющiя на прáведнаго беззакóнiе, горды́нею и уничижéнiем. Коль мнóгое мнóжество блáгости Твоея́, Гóсподи, ю́же скрыл еси́ боя́щимся Тебé, содéлал еси́ уповáющим на Тя пред сы́ны человéческими. Скры́еши их в тáйне лицá Твоегó от мятéжа человéческа, покры́еши их в крóве от пререкáнiя язы́к. Благословéн Госпóдь, я́ко удиви́ ми́лость Свою́ во грáде ограждéнiя. Аз же рех во изступлéнiи моéм: отвéржен есмь от лицá óчiю Твоéю: сегó рáди услы́шал еси́ глас моли́твы моея́, внегдá воззвáх к Тебé. Возлюби́те Гóспода, вси преподóбнiи Егó, я́ко и́стины взыскáет Госпóдь, и воздаéт изли́ше творя́щым горды́ню. Мужáйтеся, и да крепи́тся сéрдце вáше, вси уповáющiи на Гóспода.
Псалом 31
Блажéни, и́хже остáвишася беззакóнiя и и́хже прикры́шася греси́. Блажéн муж, eмýже не вмени́т Госпóдь грехá, нижé есть во устéх eгó лесть. Я́ко умолчáх, обетшáша кóсти моя́, от éже звáти ми весь день. Я́ко день и нощь отяготé на мне рукá Твоя́, возврати́хся на страсть, егдá унзé ми терн. Беззакóнiе моé познáх и грехá моегó не покры́х, рех: исповéм на мя беззакóнiе моé Гóсподеви, и Ты остáвил еси́ нечéстiе сéрдца моегó. За то помóлится к Тебé всяк преподóбный во врéмя благопотрéбно: обáче в потóпе вод мнóгих к немý не прибли́жатся. Ты еси́ прибéжище моé от скóрби обдержáщiя мя: рáдосте моя́, избáви мя от обышéдших мя. Вразумлю́ тя и настáвлю тя на путь сей, вóньже пóйдеши, утвержý на тя óчи Мои́. Не бýдите я́ко конь и меск, и́мже несть рáзума: броздáми и уздóю чéлюсти их востя́гнеши, не приближáющихся к тебé. Мнóги рáны грéшному, уповáющаго же на Гóспода ми́лость обы́дет. Весели́теся о Гóсподе, и рáдуйтеся, прáведнiи, и хвали́теся, вси прáвiи сéрдцем.
Чтец: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
СЕДАЛЬНЫ
Хор (по кафíсме седáльны Богорóдицы (Покрóва), глас 3): Божéственными сiя́нiи Áнгельских вóинств обступáема/ и с чи́нми прорóк и апóстол чéстно слýжбу прiéмлющи,/ я́ко Мáти Бóжiя,/ посети́ нас, Твои́х раб,/ моля́щи Хрiстá Бóга нáшего// даровáти нам вéлiю ми́лость.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Божéственными сiя́нiи Áнгельских вóинств обступáема/ и с чи́нми прорóк и апóстол чéстно слýжбу прiéмлющи,/ я́ко Мáти Бóжiя,/ посети́ нас, Твои́х раб,/ моля́щи Хрiстá Бóга нáшего// даровáти нам вéлiю ми́лость.
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМА ПЯТАЯ
И чтем кафíсму 5-ю ( илù одúн псалóм, илù до 1-й Слáвы)
Псалом 32
Рáдуйтеся, прáведнiи, о Гóсподе, прáвым подобáет похвалá. Исповéдайтеся Гóсподеви в гýслех, во псалти́ри десятострýннем пóйте Емý. Воспóйте Емý песнь нóву, дóбре пóйте Емý со восклицáнiем: я́ко прáво слóво Госпóдне, и вся дела́ Егó в вéре. Лю́бит ми́лостыню и суд Госпóдь, ми́лости Госпóдни испóлнь земля́. Слóвом Госпóдним небесá утверди́шася, и дýхом уст Егó вся си́ла их. Собирáяй я́ко мех вóды морскíя, полагáяй в сокрóвищах бéздны. Да убои́тся Гóспода вся земля́, от Негóже да подви́жутся вси живýщiи по вселéнней. Я́ко Той речé, и бы́ша, Той повелé, и создáшася. Госпóдь разоря́ет совéты язы́ков, отметáет же мы́сли людéй, и отметáет совéты князéй. Совéт же Госпóдень во век пребывáет, помышлéнiя сéрдца Егó в род и род. Блажéн язы́к, eмýже есть Госпóдь Бог eгó, лю́ди, я́же избрá в наслéдiе Себé. С Небесé призрé Госпóдь, ви́де вся сы́ны человéческiя. От готóваго жили́ща Своегó призрé на вся живýщiя на земли́. Создáвый на еди́не сердцá их, разумевáяй на вся делá их. Не спасáется царь мнóгою си́лою, и исполи́н не спасéтся мнóжеством крéпости своея́. Ложь конь во спасéнiе, во мнóжестве же си́лы своея́ не спасéтся. Се óчи Госпóдни на боя́щiяся Егó, уповáющiя на ми́лость Егó. Избáвити от смéрти дýши их, и препитáти я́ в глад. Душá же нáша чáет Гóспода, я́ко Помóщник и Защи́титель наш есть. Я́ко о Нем возвесели́тся сéрдце нáше, и во и́мя святóе Егó уповáхом. Бýди, Гóсподи, ми́лость Твоя́ на нас, я́коже уповáхом на Тя.
Псалом 33
Благословлю́ Гóспода на вся́кое врéмя,/ вы́ну хвалá Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасè и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./ Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я́ Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 34
Суди́, Гóсподи, оби́дящiя мя, побори́ борю́щiя мя. Прiими́ орýжiе и щит, и востáни в пóмощь мою́. Изсýни мечь, и заключи́ сопроти́в гоня́щих мя. Рцы души́ моéй: спасéнiе твоé есмь Аз. Да постыдя́тся и посрáмятся и́щущiи дýшу мою́, да возвратя́тся вспять и постыдя́тся мы́слящiи ми злáя. Да бýдут я́ко прах пред лицéм вéтра, и Áнгел Госпóдень оскорбля́я их. Да бýдет путь их тма и пóлзок, и Áнгел Госпóдень погоня́яй их: я́ко тýне скры́ша ми пáгубу сéти своея́, всýе поноси́ша души́ моéй. Да прiи́дет eмý сеть, ю́же не весть, и лови́тва, ю́же скры, да объи́мет и́, и в сеть да впадéт в ню. Душá же моя́ возрáдуется о Гóсподе, возвесели́тся о спасéнiи Егó. Вся кóсти моя́ рекýт: Гóсподи, Гóсподи, ктó подóбен Тебé? Избавля́яй ни́ща из руки́ крéпльших eгó, и ни́ща, и убóга от расхищáющих eгó. Востáвше на мя свидéтеле непрáведнiи, я́же не вéдях, вопрошáху мя. Воздáша ми лукáвая воз благáя, и безчáдiе души́ мое́й. Аз же, внегдá они́ стужáху ми, облачáхся во врéтище, и смиря́х постóм дýшу мою́, и моли́тва моя́ в нéдро моé возврати́тся. Я́ко бли́жнему, я́ко брáту нáшему, тáко угождáх, я́ко плáча и сéтуя, тáко смиря́хся. И на мя возвесели́шася и собрáшася: собрáшася на мя рáны, и не познáх, раздели́шася, и не умили́шася. Искуси́ша мя, подражни́ша мя подражнéнiем, поскрежетáша на мя зубы́ свои́ми. Гóсподи, когдá ýзриши? Устрóй дýшу мою́ от злодéйства их, от лев единорóдную мою́. Исповéмся Тебé в цéркви мнóзе, в лю́дех тя́жцех восхвалю́ Тя. Да не возрáдуются о мне враждýющiи ми непрáведно, ненави́дящiи мя тýне и помизáющiи очи́ма. Я́ко мне ýбо ми́рная глагóлаху и на гнев лéсти помышля́ху. Разшири́ша на мя устá своя́, рéша: блáгоже, блáгоже, ви́деша óчи нáши. Ви́дел еси́, Гóсподи, да не премолчи́ши. Гóсподи, не отступи́ от менé. Востáни, Гóсподи, и вонми́ судý моемý, Бóже мой и Гóсподи мой, на прю мою́. суди́ ми, Гóсподи, по прáвде Твоéй, Гóсподи Бóже мой, и да не возрáдуются о мне. Да не рекýт в сердцáх своих: блáгоже, блáгоже души́ нáшей, нижé да рекýт: пожрóхом eгó. Да постыдя́тся и посрáмятся вкýпе рáдующiися злом мои́м, да облекýтся в студ и срам велерéчующiи на мя. Да возрáдуются и возвеселя́тся хотя́щiи прáвды моея́, и да рекýт вы́ну: да возвели́чится Госпóдь, хотя́щiи ми́ра рабý Егó. И язы́к мой поучи́тся прáвде Твоéй, весь день хвалé Твоéй.
Псалом 35
Глагóлет пребеззакóнный согрешáти в себé: несть стрáха Бóжiя пред очи́ма eгó. Я́ко ульсти́ пред ним обрести́ беззакóнiе своé и возненави́дети. Глагóлы уст eгó беззакóнiе и лесть, не восхотé разумéти éже ублажи́ти. Беззакóнiе помы́сли на лóжи своéм: предстá вся́кому пути́ неблáгу, о злóбе же не негодовá. Гóсподи, на Небеси́ ми́лость Твоя́ и и́стина Твоя́ до óблак. Прáвда Твоя́, я́ко гóры Бóжiя, судьбы́ Твоя́ бéздна мнóга. Человéки и скоты́ спасéши, Гóсподи. Я́ко умнóжил еси́ ми́лость Твою́, Бóже, сы́нове же человéчестiи в крóве крилý Твоéю надéятися и́мут. Упiю́тся от тýка дóму Твоегó, и потóком слáдости Твоея́ напои́ши я́. Я́ко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя и прáвду Твою́ прáвым сéрдцем. Да не прiи́дет мне ногá горды́ни, и рукá грéшнича да не подви́жит менé. Тáмо падóша вси дéлающiи беззакóнiе: изриновéни бы́ша, и не возмóгут стáти.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 36
Не ревнýй лукáвнующим, нижé зави́ди творя́щим беззакóнiе. Занé я́ко травá скóро и́зсшут, и я́ко зéлiе злáка скóро отпадýт. Уповáй на Гóспода и твори́ благосты́ню, и насели́ зéмлю, и упасéшися в богáтстве ея́. Наслади́ся Гóсподеви, и даст ти прошéнiя сéрдца Твоегó. Откры́й ко Гóсподу путь твой и уповáй на Негó, и Той сотвори́т: и изведéт, я́ко свет, прáвду твою́ и судьбý твою́, я́ко полýдне. Повини́ся Гóсподеви и умоли́ Егó. Не ревнýй спéющему в пути́ своéм, человéку, творя́щему законопреступлéнiе. Престáни от гнéва и остáви я́рость, не ревнýй éже лукáвновати. Занé лукáвнующiи потребя́тся, терпя́щiи же Гóспода, тíи наслéдят зéмлю. И ещé мáло, и не бýдет грéшника, и взы́щеши мéсто eгó, и не обря́щеши. Крóтцiи же наслéдят зéмлю и насладя́тся о мнóжестве ми́ра. Назирáет грéшный прáведнаго и поскрежéщет нань зубы́ свои́ми. Госпóдь же посмеéтся eмý, занé прозирáет, я́ко прiи́дет день eгó. Мечь извлекóша грéшницы, напрягóша лук свой, низложи́ти убóга и ни́ща, заклáти прáвыя сéрдцем. Мечь их да вни́дет в сердцá их, и лýцы их да сокрушáтся. Лýчше мáлое прáведнику, пáче богáтства грéшных мнóга. Занé мы́шцы грéшных сокрушáтся, утверждáет же прáведныя Госпóдь. Весть Госпóдь пути́ непорóчных, и достоя́нiе их в век бýдет. Не постыдя́тся во врéмя лю́тое, и во днех глáда насы́тятся, я́ко грéшницы поги́бнут. Врази́ же Госпóдни, кýпно прослáвитися им и вознести́ся, исчезáюще я́ко дым исчезóша. Заéмлет грéшный и не возврати́т, прáведный же щéдрит и даéт. Я́ко благословя́щiи Егó наслéдят зéмлю, кленýщiи же Егó потребя́тся. От Гóспода стопы́ человéку исправля́ются, и пути́ eгó восхóщет зелó. Егдá падéт, не разбiéтся, я́ко Госпóдь подкрепля́ет рýку eгó. Юнéйший бых, и́бо состарéхся, и не ви́дех прáведника остáвлена, нижé сéмени eго́ прося́ща хлéбы. Весь день ми́лует и взаи́м даéт прáведный, и сéмя eгó во благословéнiе бýдет. Уклони́ся от зла и сотвори́ блáго, и всели́ся в век вéка. Я́ко Госпóдь лю́бит суд и не остáвит преподóбных Свои́х, во век сохраня́тся. Беззакóнницы же изженýтся, и сéмя нечести́вых потреби́тся. Прáведницы же наслéдят зéмлю и вселя́тся в век вéка на ней. Устá прáведнаго поучáтся премýдрости, и язы́к eгó возглагóлет суд. Закóн Бóга eгó в сéрдце eгó, и не зáпнутся стопы́ eгó. Сматря́ет грéшный прáведнаго и и́щет éже умертви́ти eгó. Госпóдь же не остáвит eгó в рукý eгó, нижé осýдит eгó, егдá сýдит eмý. Потерпи́ Гóспода и сохрани́ путь Егó, и вознесéт тя, éже наслéдити зéмлю, внегдá потребля́тися грéшником ýзриши. Ви́дех нечести́ваго превознося́щася и вы́сящася, я́ко кéдры Лiвáнскiя. И ми́мо идóх, и се не бé, и взыскáх eгó, и не обрéтеся мéсто eгó. Храни́ незлóбiе и виждь правотý, я́ко есть остáнок человéку ми́рну. Беззакóнницы же потребя́тся вкýпе: остáнцы же нечести́вых потребя́тся. Спасéнiе же прáведных от Гóспода, и Защи́титель их есть во врéмя скóрби. И помóжет им Госпóдь, и избáвит их, и измéт их от грéшник, и спасéт их, я́ко уповáша на Негó.
Чтец: Слáва Ѻтцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Хор (по кафíсме седáльны Богорóдицы (Покрóва), глас 6): Безпóмощным крéпость Ты вои́стинну,/ Пречи́стая Богомáти,/ отсю́ду, смирéннiи, Тобóю возвышáемся,/ о Тебé высóце держи́мся:/ всем Ты еси́ покрóв// и к Бóгу Ходáтаица.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Безпóмощным крéпость Ты вои́стинну,/ Пречи́стая Богомáти,/ отсю́ду, смирéннiи, Тобóю возвышáемся,/ о Тебé высóце держи́мся:/ всем Ты еси́ покрóв// и к Бóгу Ходáтаица.
ПОЛИЕЛЕЙ
Хор: Хвали́те И҆́мя Госпóдне, хвали́те, рабѝ Гóспода.
Аллилýїа (трúжды)
(И далее хор продолжает чередовать стiхи 134 псалма и Аллилуiа)
стоя́щiи во хрáме Госпóдни, во двóрех дóму Бóга нáшего./ Хвали́те Гóспода, я́ко Благ Госпóдь, пóйте и҆́мени Егò, я́ко добрò:/ я́ко Iáкова избрà Себè Госпóдь, Iзрáиля в достоя́нiе Себè./ Я́ко аз познáх, я́ко Вéлiй Госпóдь, и Госпóдь наш над всéми бóги./ Вся ели́ка восхотè Госпóдь, сотворѝ на небесѝ и на землѝ, в моря́х и во всех бéзднах./ Возводя́ óблаки от послéдних землѝ, мóлнiи в дождь сотворѝ, изводя́й вéтры от сокрóвищ Свои́х./ И҆́же поразѝ пéрвенцы Еги́петскiя, от человéка до скотà./ Послà знáменiя и чудесà посредè Тебè, Еги́пте, на фараóна и на вся рабы̀ eгò./ И҆́же поразѝ язы́ки мнóги и избѝ царѝ крéпки:/ Сиóна, царя Аморрéйска, и Óга, царя́ Васáнска, и вся цáрствiя Ханаáнска,/ и дадè зéмлю их достоя́нiе, достоя́нiе Iзрáилю, лю́дем Свои́м./ Гóсподи, и҆́мя Твоè в век и пáмять Твоя́ в род и род:/ я́ко суди́ти и҆́мать Госпóдь лю́дем Свои́м, и о рабéх Свои́х умóлится./ Íдоли язы́к, сребрò и злáто, делá рук человéческих/ Устà и҆́мут, и не возлагóлют, óчи и҆́мут, и не ýзрят,/ ýши и҆́мут, и не услы́шат, нижè бо есть дух во устéх их./ Подóбни им да бýдут творя́щiи я́, и вси надéющiися на ня./ Дóме Iзрáилев, благослови́те Гóспода, дóме Аарóнь, благослови́те Гóспода, дóме Левíин, благослови́те Гóспода./ Боя́щiися Гóспода, благослови́те Гóспода.
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егò.
Аллилýїа (трúжды)
(И далее хор продолжает чередовать стiхи 135 псалма и Аллилуiа)
Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды̀ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ВЕЛИЧАНИЕ ПОКРОВА
Продолжéнiе здесь