ВСЕНОЩНОЕ БДЕНИЕ ВЕЛИКАЯ ВЕЧЕРНЯ. Неделя 3 по Пасхе, св. жен-мироносиц и Иосифа праведного. Глас 2
19 мáя 2024 гóда. Недéля трéтiя по Пáсхе, св. жен-миронóсиц и Ióсифа прáведнаго. Глас 2. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Слýжба совершáется по Трióди. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Хрїстóс воскрéсе из мéртвых,/ смéртiю смерть попрáв/ и сýщим во гробéх живóт даровáв. (Трúжды)
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинaтельный
Стiхù избрáннiи: Благословѝ, душè моя́, Гóспода./ Благословéн есѝ, Гóсподи./ Гóсподи, Бóже мой, возвели́чился есѝ зелò./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредè гор прóйдут вóды./ Ди́вна делà Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благословѝ, душè моя, Гóспода. Гóсподи, Бóже мой, возвеличился есѝ зелò. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своè, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегò побéгнут, от глáса грóма Твоегò убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижè обратя́тся покры́ти зéмлю. Посылáяй истóчники в дéбрех, посредè гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды̀ кáменiя дадя́т глас. Напая́яй гóры от превы́спренних Свои́х, от плодà дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винò весели́т сéрдце человéка, умáстити лицè елéем, и хлеб сéрдце человéка укрепи́т. Насы́тятся древà польскáя, кéдри Лiвáнстiи, и҆́хже есѝ насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временà, сóлнце познà зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себè. Возсiя́ сóлнце и собрáшася и в лóжах свои́х ля́гут. Изы́дет человéк на дéло своè и на дéланiе своè до вéчера. Яко возвели́чишася делà Твоя́, Гóсподи, вся премýдростiю сотвори́л есѝ, испóлнися земля́ твáри Твоея́. Сiè мóре вели́кое и прострáнное, тáмо гáди, и҆́мже несть числà, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебè чáют, дáти пи́щу им во блáго врéмя. Дáвшу Тебè им соберýт, отвéрзшу Тебè рýку вся́ческая испóлнятся блáгости, отврáщшу же Тебè лицè, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегò, и сози́ждутся, и обнови́ши лицè землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животè моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душè моя́, Гóспода. Сóлнце познà зáпад свой. Положи́л есѝ тму, и бысть нощь. Яко возвели́чишася делà Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
Читáем кафíсму 1-ю лúбо 1-ю cтатiю(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгò, и в закóне Егò поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своè, и лист eгò не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицà землѝ. Сегò рáди не воскрéснут нечести́вiи на суд, нижè грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстà Егò. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдà возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негò над Сióном, горóю святóю Егò, возвещáяй повелéнiе Госпóдне. Госпóдь речè ко Мне: Сын Мой еси Ты, Аз днесь роди́х Тя. Просѝ от Менè, и дам Ти язы́ки достоя́нiе Твоè, и одержáнiе Твоè концы̀ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдà прогнéвается Госпóдь и поги́бнете от путѝ прáведнаго, егдà возгори́тся вскóре я́рость Егò. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгò. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы̀ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоè.
Чтец: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
[Псалом 4]Внегдà призвáти ми, услы́ша мя Бог прáвды моея́, в скóрби распространи́л мя есѝ, ущéдри мя и услы́ши моли́тву мою́. Сы́нове человéчестiи, докóле тяжкосéрдiи? Вскýю лю́бите суетý и и́щете лжи? И увéдите, я́ко удивѝ Госпóдь преподóбнаго Своегò: Госпóдь услы́шит мя, внегдà воззвáти ми к Немý. Гнéвайтеся, и не согрешáйте, я́же глагóлете в сердцáх вáших, на лóжах вáших умили́теся. Пожри́те жéртву прáвды и уповáйте на Гóспода. Мнóзи глагóлют: кто яви́т нам благáя? Знáменася на нас свет лицà Твоегò, Гóсподи. Дал есѝ весéлiе в сéрдце моéм: от плодà пшени́цы, винà и елéа своегò умнóжишася. В ми́ре вкýпе уснý и почíю, я́ко Ты, Гóсподи, еди́наго на уповáнiи всели́л мя есѝ.
[Псалом 5]Глагóлы моя́ внуши́, Гóсподи, разумéй звáнiе моè. Вонми́ глáсу молéнiя моегò, Царю́ мой и Бóже мой, я́ко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Я́ко Бог не хотя́й беззакóнiя, Ты еси́: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси́ вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг мои́х рáди испрáви пред Тобóю путь мой. Я́ко несть во устéх их и́стины, сéрдце их сýетно, гроб отвéрст гортáнь их: язы́ки свои́ми льщáху. Суди́ им, Бóже, да отпадýт от мы́слей свои́х, по мнóжеству нечéстiя их изри́ни я́, я́ко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи и́мя Твоè. Я́ко Ты благослови́ши прáведника, Гóсподи: я́ко орýжiем благоволéнiя венчáл еси́ нас.
[Псалом 6]Гóсподи, да не яростiю Твоéю обличи́ши менè, нижè гнéвом Твои́м накáжеши менè. Поми́луй мя, Гóсподи, яко нéмощен есмь, исцелѝ мя, Гóсподи, я́ко смятóшася кóсти моя́. И душà моя́ смятéся зелò: и Ты, Гóсподи, докóле? Обрати́ся, Гóсподи, избáви дýшу мою́: спасѝ мя рáди ми́лости Твоея́. Яко несть в смéрти поминáяй Тебè: во áде же кто исповéстся Тебè? Утруди́хся воздыхáнiем мои́м, измы́ю на вся́ку нощь лóже моè, слезáми мои́ми постéлю мою́ омочý. Смятéся от я́рости óко моè, обетшáх во всех вразéх моих. Отступи́те от менè, вси дéлающiи беззакóнiе, я́ко услы́ша Госпóдь глас плáча моегò: услы́ша Госпóдь молéнiе моè, Госпóдь моли́тву мою́ прiя́т. Да постыдя́тся и смятýтся вси вразѝ моѝ, да возвратя́тся и устыдя́тся зелò вскóре.
Чтец: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
[Псалом 7]Гóсподи Бóже мой, на Тя уповáх, спасѝ мя от всех гоня́щих мя и избáви мя: да не когдà похи́тит я́ко лев дýшу мою́, не сýщу избавля́ющу, нижè спасáющу. Гóсподи Бóже мой, áще сотвори́х сiè, áще есть непрáвда в рукý моéю, áще воздáх воздаю́щим ми зла, да отпадý ýбо от враг мои́х тощ. Да поженéт ýбо враг дýшу мою́ и да пости́гнет, и поперéт в зéмлю живóт мой, и слáву мою́ в персть всели́т. Воскреснѝ, Гóсподи, гнéвом Твои́м, вознеси́ся в концáх враг Твои́х, и востáни, Гóсподи Бóже мой, повелéнiем, и́мже заповéдал есѝ. И сонм людéй обы́дет Тя, и о том на высотý обрати́ся. Госпóдь сýдит лю́дем: судѝ ми, Гóсподи, по прáвде моéй, и по незлóбе моéй на мя. Да скончáется злóба грéшных, и испрáвиши прáведнаго, испытáяй сердцà и утрóбы, Бóже, прáведно. Пóмощь моя́ от Бóга, спасáющаго прáвыя сéрдцем. Бог суди́тель прáведен и крéпок, и долготерпели́в, и не гнев наводя́й на всяк день. Áще не обратитéся, орýжiе Своè очи́стит, лук Свой напряжè и уготóва и́ и в нем уготóва сосýды смéртныя, стрéлы Своя́ сгарáемым содéла. Се болè непрáвдою, зачáт болéзнь, и роди́ беззакóнiе: ров изры̀, и ископà и҆̀, и падéт в я́му, ю́же содéла. Обрати́тся болéзнь eгò на главý eгò, и на верх eгò непрáвда eгò сни́дет. Исповéмся Гóсподеви по прáвде Егò и пою́ и́мени Гóспода Вы́шняго.
[Псалом 8]Гóсподи, Госпóдь наш, я́ко чýдно и́мя Твоè по всей землѝ, я́ко взя́тся великолéпiе Твоè превы́ше небéс. Из уст младéнец и ссýщих соверши́л есѝ хвалý, враг Твои́х рáди, éже разруши́ти врагà и мéстника. Я́ко узрю́ небесà, делà перст Твои́х, лунý и звéзды, я́же Ты основáл есѝ. Что есть человéк, я́ко пóмниши eгò? илѝ сын человéчь, я́ко посещáеши eгò? Умáлил есѝ eгò мáлым чим от áнгел, слáвою и чéстiю венчáл есѝ eгò. И постáвил есѝ eгò над дéлы рукý Твоéю, вся покори́л есѝ под нóзе eгò. О́вцы и волы̀ вся, ещè же и скоты̀ польскíя, пти́цы небéсныя, и ры́бы морскíя, преходя́щiя стезѝ морскíя. Гóсподи, Госпóдь наш, я́ко чýдно и́мя Твоè по всей землѝ.
Лúбо поéм стiхù избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоè.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебè Бóже. (трúжды)
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 2
Хор: Гóсподи, воззвáх к Тебè, услы́ши мя./ Услы́ши мя, Гóсподи./ Гóсподи, воззвáх к Тебè, услы́ши мя:/ вонмѝ глáсу молéнія моегò,/ внегдà воззвáти ми к Тебè./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моè в словесà лукáвствiя, непщевáти вины̀ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы̀ моея́, я́ко ещè и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебè, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моè, печáль мою́ пред Ним возвещý. Внегдà исчезáти от менè дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менè: поги́бе бéгство от менè, и несть взыскáяй дýшу мою́. Воззвáх к Тебè, Гóсподи, рех: Ты есѝ уповáнiе моè, часть моя́ есѝ на землѝ живы́х. Вонмѝ молéнiю моемý, я́ко смири́хся зелò, избáви мя от гоня́щих мя, я́ко укрепи́шася пáче менè.
На 10 Чтец: Изведù из темнúцы дýшу мою́,// исповéдатися úмени Твоемý.
Стiхúры воскрéсные, глас 2: Прéжде век от Ѻтцà Рóждшемуся Бóжiю Слóву,/ Воплóщшемуся от Дéвы Марíи,/ прiиди́те, поклони́мся: крест бо претерпéв,/ погребéнiю предадéся, яко Сам восхотè:/ и воскрéсе из мéртвых,// спасè мя заблуждáющаго человéка.
Менè ждут прáведницы,// дóндеже воздáси мне.
Стiхúра: Хрїстóс Спас наш,/ éже на ны рукописáнiе пригвозди́в на Крестè заглáди,/ и смéртную держáву упразднѝ:// поклоня́емся Егò Триднéвному Воскресéнiю.
На 8. Стiх: Из глубины̀ воззвáх к Тебè, Гóсподи,// Гóсподи, услы́ши глас мой.
Стiхúра: Со Архáнгелы воспои́м Хрїстóво Воскресéнiе: Той бо есть Избáвитель и Спас душ нáших, и в слáве стрáшней и крéпцей си́ле, пáки грядéт суди́ти мíру, егóже создà.
Да бýдут ýши Твоù// внéмлюще глáсу молéнiя моегò.
И҆́ны востóчны Трióди (анатóлiевы), глас 2: Тебè Распéншагося и Погребéннаго,/ Áнгел проповéда Влады́ку, и глагóлаше женáм:/ прiиди́те ви́дите, идéже лежáше Госпóдь:/ воскрéсе бо, я́коже речè, я́ко Всеси́лен./ Тéмже Тебè поклоня́емся, Еди́ному Безсмéртному:// Жизнодáвче Хрїстè, поми́луй нас.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúра: Крестóм Твои́м упраздни́л есѝ,/ ю́же от дрéва кля́тву,/ погребéнiем Твои́м умертви́л есѝ смéрти держáву:/ востáнiем же Твои́м просвети́л есѝ род человéческiй./ Сегò рáди вопiéм Ти:// Благодéтелю Хрїстè Бóже наш, слáва Тебè.
И҆́мене рáди Твоегò потерпéх Тя, Гóсподи, потерпè душà моя́ в слóво Твоè,// уповà душà моя на Гóспода.
Стiхúра: Ѻтверзóшася Тебè, Гóсподи,/ стрáхом вратà смéртная,/ врáтницы же áдовы ви́девше Тя, убоя́шася:/ вратà бо мéдная сокруши́л есѝ,/ и вереѝ желéзныя стерл есѝ,/ и извéл есѝ нас от тмы и сéни смéртныя,// и ýзы нáша растерзáл есѝ.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúра :Спаси́тельную песнь пою́ще, от уст возслéм:/ прiиди́те вси, в домý Госпóднем припадéм, глагóлюще:/ на дрéве Распны́йся, и из мéртвых Воскресы́й,/ и Сый в нéдрех Óтчих,// очи́сти грехѝ нáша.
Яко у Гóспода мúлость, и мнóгое у Негò избавлéнiе,// и Той избáвит Iзрáиля от всех беззакóнiй eгò.
Стiхúры самоглáсны Трióди, глас 2, миронóсиц (Анатóлiа): Миронóсицы жены́, ýтру глубокý,/ аромáты взéмша, Госпóдня грóба достигóша,/ я́же не надéяхуся обрéтша/ помышля́ху благоговéюще кáменному отвалéнiю,/ и другà ко друзéй глагóлаху:/ где суть печáти грóба?/ Где есть Пiлáтова кустодíа, и опáсное утвержéнiе?/ Бысть же возвести́тель не разумевáющим женáм,/ блистáяйся Áнгел, и глагóляй к ним:/ что с рыдáнiем и́щете живáго и оживотвори́вшаго род человéческiй?/ Востà Хрїстóс Бог наш из мéртвых я́ко всеси́лен,/ подая́й всем нам нетлéнiе и жизнь,// просвещéнiе и вéлiю ми́лость.
На 2. Стiх: Хвалúте Гóспода вси язы́цы, похвалúте Егò вси лю́дiе.
Стiхúра: Почтò ми́ра со слезáми, о учени́цы растворя́ете?/ Кáмень отвали́ся, гроб истощи́ся:/ ви́дите тлю животóм попрáнную,/ печáти свидéтельствующа я́вственно,/ спя́щiя лю́те стрáжники непокори́вых,/ смéртное спасéся плóтiю Бóжiею, ад рыдáет./ Тéкша рáдостiю рцы́те апóстолом:/ умертви́вый смерть Хрїстóс, перворождéн из мéртвых,// вас предваря́ет в Галiлéи.
Яко утвердúся мúлость Егò на нас,// и и҆́стина Госпóдня пребывáет во век.
Стiхúра: Миронóсицы рáно бы́вшя,/ и гроб Твой со тщáнiем дости́гша,/ искáху Тебè Хрїстè, во éже помáзати пречи́стое тéло Твоè./ И áнгеловыми глагóлы огласи́вшеся,/ радостотвóрныя óбразы апóстолом проповéдаху,/ я́ко воскрéсе Начáльник спасéнiя нáшего, плени́вый смерть,/ мíрови же дáруяй живóт вéчный// и вéлiю ми́лость.
Слáва Отцý и Сы́ну и Святóму Дýху.
Стiхúра, глас 6 (Космы̀ монáха): Миронóсицы жены́, грóба Твоегò дости́гша,/ и печáти грóбныя ви́девша,/ не обрéтша же пречи́стаго тéла Твоегò,/ рыдáюща со тщáнiем прiидóша, глагóлюща:/ кто укрáде нáше уповáнiе?/ Кто взят мéртва нáга сми́рною помáзана,/ Мáтери еди́но утешéнiе?/ О кáко мéртвыя оживи́вый умертви́ся?/ Ад плени́вый, кáко погребéся?/ Но воскреснѝ Спáсе самовлáстно,/ я́коже рекл есѝ,// триднéвен, спасáяй дýшы нáшя.
И ны́не и прúсно и во вéки векóв, амúнь.
Догмáтик. Глас 2: Прéйде сень закóнная,/ благодáти пришéдши:/ я́коже бо купинà не сгарáше опаля́ема,/ тáко Дéво родилà есѝ,/ и Дéва пребылà есѝ./ Вмéсто столпà óгненнаго, прáведное возсія Сóлнце:/ вмéсто Моисéя, Хрїстóс,// спасéніе душ нáших.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцà Небéснаго, Святáго, Блажéннаго, Iисýсе Хрїстè! Пришéдше на зáпад сóлнца, ви́девше свет вечéрнiй, поéм Ѻтцà, Сы́на и Святáго Дýха, Бóга. Достóин есѝ во вся временà пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утвердѝ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехà сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоè во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебè подобáет хвалà. Тебè подобáет пéнiе,/ Тебè слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Самоглáсны Трióди (жен-миронóсиц), глас 1: Миронóсицы жены̀, ко грóбу что прiидóсте?/ Что и́щете живáго в мéртвых?// Воскрéсе Госпóдь, дерзáйте, вопiéт Áнгел.
Со стрáхом прiидóша жены́ на гроб,/ аромáты тéло Твоé помáзати тщáщiяся:/ и сиé не обрéтше,/ недоумевáхуся другá ко друзéй, не вéдуще Воскресéнiя./ Но предстá им Áнгел, и речé:/ воскрéсе Хрiстóс,// дáруяй нам вéлiю ми́лость.
Прiидóша на гроб Магдали́на,/ и другáя Марíя и́щуще Гóспода,/ и Áнгела ви́деша яко мóлнiю/ седя́ща на кáмени, и глагóлюща им:/ что и́щете живáго с мéртвыми;/ воскрéсе, я́коже речé:/ в Галiлéи Егó обря́щете./ К Немý же возопiи́м:// воскресы́й из мéртвых, Гóсподи слáва Тебé.
Слáва Отцý и Сыну и Святóму Дýху.
Глас 6: Просѝ Ióсиф тéло Iисýсово,/ и положѝ é в нóвом своéм грóбе:/ подобáше бо Емý из грóба,/ яко от чертóга проитѝ./ Сокруши́вый держáву смéрти,/ и отвéрзый вратá рáйская человéком,// Гóсподи слáва Тебé.
И ны́не и прúсно и во вéки векóв, амúнь.
Богорóдичен воскрéсен, глас 6 (по глáсу «Слáвы»): Творéц и Избáвитель мой Пречи́стая,/ Хрїстóс Госпóдь из Твои́х ложeсн прошéд,/ в мя оболкíйся,/ пéрвыя кля́твы Адáма свободѝ./ Тéмже Ти Всечи́стая,/ я́ко Бóжiи Мáтери же и Дéве,/ вои́стинну вопiéм немóлчно:/ рáдуйся áнгельски, рáдуйся Влады́чице,/ предстáтельство и покрóве,// и спасéнiе душ нáших.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры воскрéсные, глас 2): Воскресéніе Твоè, Хрїстè Спáсе,/ всю просветѝ вселéнную,/ и призвáл есѝ Твоè создáніе,// Всеси́льне Гóсподи, слáва Тебè.
Да воскрéснет Бог,/ и расточáтся вразù Егò.
Стiхиры Пáсхи, глас 5: Пáсха/ свящéнная нам днесь показáся;/ Пáсха нóва святáя;/ Пáсха тáинственная;/ Пáсха всечестнáя./ Пáсха Хрїстóс Избáвитель;/ Пáсха непорóчная;/ Пáсха вели́кая;/ Пáсха вéрных./ Пáсха двéри рáйскiя нам отверзáющая.// Пáсха всех освящáющая вéрных.
Яко исчезáет дым,/ да исчéзнут.
Прiиди́те/ от видéнiя жены̀ благовéстницы,/ и Сióну рцы́те:/ прiимѝ/ от нас рáдости благовéщенiя, Воскресéнiя Хрїстóва:/ красýйся, ликýй/ и рáдуйся, Iерусали́ме,/ Царя́ Хрїстà узрéв из грóба,// я́ко женихà происходя́ща.
Тáко да погúбнут грéшницы от Лицà Бóжiя,/ а прáведницы да возвеселя́тся.
Миронóсицы жены̀,/ ýтру глубокý,/ предстáвша грóбу Живодáвца,/ обретóша Áнгела/ на кáмени седя́ща,/ и той провещáв им,/ си́це глагóлаше:/ что и́щете Живáго с мéртвыми;/ что плáчете Нетлéннаго во тли?// Шéдше, проповéдите ученикóм Егò.
Сей день, егóже сотворù Госпóдь,/ возрáдуемся и возвеселúмся в онь.
Пáсха крáсная,/ Пáсха, Госпóдня Пáсха!/ Пáсха всечестнáя/ нам возсiя́. Пáсха,/ рáдостiю друг дрýга обы́мем./ О Пáсха!/ Избавлéнiе скóрби,/ ибо из грóба днесь,/ яко от чертóга/ возсія́в Хрїстóс,/ жены̀ рáдости испóлни, глагóля:/ проповéдите апóстолом.
Слáва Ѻтцý и Сы́ну и Святóму Дýху.
Стiхúра Прáздника, глас 5: Тебè, одéющагося свéтом я́ко ри́зою,/ снем Ióсиф с Дрéва с Нiкоди́мом,/ и ви́дев мéртва нáга непогребéнна,/ благосéрдный плач воспрiи́м,/ рыдáя глагóлаше:/ увы̀ мне, сладчáйшiй Iисýсе!/ Егóже вмáле сóлнце на Крестè ви́сима узрéвше,/ мрáком облагáшеся,/ и земля́ стрáхом колебáшеся,/ и раздирáшеся церкóвная завéса:/ но се ны́не ви́жду Тя,/ менè рáди вóлею подъéмша смерть./ Кáко погребý Тя Бóже мой?/ Илѝ кáко плащани́цею обвiю́?/ Кóима ли рукáма прикоснýся нетлéнному Твоемý Тéлу?/ Илѝ кíя пéсни воспою́ Твоемý исхóду, Щéдре?/ Величáю Стрáсти Твоя́,/ песнослóвлю и погребéнiе Твоè, со Воскресéнiем, зовы́й:// Гóсподи, слáва Тебè.
И ны́не и прúсно и во вéки векóв, амúнь.
Стiхúра Пáсхи, глас 5: Воскресéнiя день,/ и просвети́мся торжествóм,/ и друг дрýга обы́мем./ Рцем брáтiе,/ и ненави́дящим нас,/ прости́м вся Воскресéнiем,/ и тáко возопiи́м:/ Хрїстóс воскрéсе из мéртвых,/ смéртiю смерть попрáв,// и сýщим во гробéх живóт даровáв.
Молитва святаго Симеона Богоприимца
Ны́не отпущáеши рабà Твоегò, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоè,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегò,// яко Спáса родилà есù душ нáших. (Трúжды)
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалà Егò во устéх мои́х./ О Гóсподе похвáлится душà моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егò вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицà вáша не постыдя́тся./ Сей ни́щiй воззвà, и Госпóдь услы́ша и҆̀,/ и от всех скорбéй егò спасè и҆̀./ Ополчи́тся Áнгел Госпóдень óкрест боя́щихся Егò,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егò,/ яко несть лишéнiя боя́щымся Егò./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[В приходской практитке пропускается]/ Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егò в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютà,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негò.
И глаголи ýтреню