НЕДЕЛЯ 5-я по ПАСХЕ, о самаряныне. ВСЕНОЩНОЕ БДЕНИЕ. УТРЕНЯ. Глас 4. Служба мирским чином.
30 мая 2021 года. Неделя 5 по Пасхе, о самаряныне. Глас 4. Всенощное бдение праздника состоит из великой вечерни с литией, утрени и 1-го часа. Служба воскресная, для домашнего (келейного) совершения Преполовения и самаряныне совершается по Триоди. Служба мирским чином.
УТРЕНЯ
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды)
Начало зри здесь (великая вечерня)
ШЕСТОПСАЛМИЕ
Слáва в вышних Бóгу, и на земли мир, в человéцех благоволéние. (трижды) Гóсподи, устнé мои отвéрзеши, и устá моя возвестят хвалу Твою. (дважды)
Псалом 3
Гóсподи, что ся умнóжиша стужáющии ми? Мнóзи востают на мя, мнóзи глагóлют души моéй: несть спасéния eму в Бóзе eгó. Ты же, Гóсподи, Заступник мой еси, слáва моя и возносяй главу мою. Глáсом моим ко Гóсподу воззвáх, и услыша мя от горы святыя Своея. Аз уснух, и спах, востáх, яко Госпóдь заступит мя. Не убоюся от тем людéй, óкрест напáдающих на мя. Воскресни, Гóсподи, спаси мя, Бóже мой, яко Ты поразил еси вся враждующыя ми всуе: зубы грéшников сокрушил еси. Госпóдне есть спасéние, и на людех Твоих благословéние Твоé.
Аз уснух, и спах, востáх, яко Госпóдь заступит мя.
Псалом 37
Гóсподи, да не яростию Твоéю обличиши менé, нижé гнéвом Твоим накáжеши менé. Яко стрéлы Твоя унзóша во мне, и утвердил еси на мне руку Твою. Несть исцелéния в плóти моéй от лицá гнéва Твоегó, несть мира в костéх моих от лицá грех моих. Яко беззакóния моя превзыдóша главу мою, яко брéмя тяжкое отяготéша на мне. Возсмердéша и согниша рáны моя от лицá безумия моегó. Пострадáх и слякóхся до концá, весь день сéтуя хождáх. Яко лядвия моя напóлнишася поругáний, и несть исцелéния в плóти моéй. Озлóблен бых и смирихся до зелá, рыкáх от воздыхáния сéрдца моегó. Гóсподи, пред Тобóю все желáние моé и воздыхáние моé от Тебé не утаися. Сéрдце моé смятéся, остáви мя сила моя, и свет óчию моéю, и той несть со мнóю. Друзи мои и искреннии мои прямо мне приближишася и стáша, и ближнии мои отдалéче менé стáша и нуждáхуся ищущии душу мою, и ищущии злáя мне глагóлаху суетная и льстивным весь день поучáхуся. Аз же яко глух не слышах и яко нем не отверзáяй уст своих. И бых яко человéк не слышай и не имый во устéх своих обличéния. Яко на Тя, Гóсподи, уповáх, Ты услышиши, Гóсподи Бóже мой. Яко рех: да не когдá порáдуют ми ся врази мои: и внегдá подвижáтися ногáм моим, на мя велерéчеваша. Яко аз на рáны готóв, и болéзнь моя предо мнóю есть выну. Яко беззакóние моé аз возвещу и попекуся о гресé моéм. Врази же мои живут и укрепишася пáче менé, и умнóжишася ненавидящии мя без прáвды. Воздающии ми злáя возблагáя оболгáху мя, занé гонях благостыню. Не остáви менé, Гóсподи Бóже мой, не отступи от менé. Вонми в пóмощь мою, Гóсподи спасéния моегó.
Не остáви менé, Гóсподи Бóже мой, не отступи от менé. Вонми в пóмощь мою, Гóсподи спасéния моегó.
Псалом 62
Бóже, Бóже мой, к Тебé утренюю, возжадá Тебé душá моя, коль мнóжицею Тебé плоть моя, в земли пусте и непрохóдне, и безвóдне. Тáко во святéм явихся Тебé, видети силу Твою и слáву Твою. Яко лучши милость Твоя пáче живóт, устнé мои похвалите Тя. Тáко благословлю Тя в животé моéм, о имени Твоéм воздежу руце мои. Яко от тука и мáсти да испóлнится душá моя, и устнáма рáдости восхвáлят Тя устá моя. Аще поминáх Тя на постéли моéй, на утренних поучáхся в Тя. Яко был еси Помóщник мой, и в крóве крилу Твоéю возрáдуюся. Прильпé душá моя по Тебé, менé же прият десница Твоя. Тии же всуе искáша душу мою, внидут в преиспóдняя земли, предадятся в руки оружия, чáсти лисовом будут. Царь же возвеселится о Бóзе, похвáлится всяк кленыйся Им, яко заградишася устá глагóлющих непрáведная.
На утренних поучáхся в Тя. Яко был еси Помóщник мой, и в крóве крилу Твоéю возрáдуюся. Прильпé душá моя по Тебé, менé же прият десница Твоя.
Слáва Отцу и Сыну и Святóму Духу, и ныне и присно и во вéки векóв, аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Псалом 87
Гóсподи Бóже спасéния моегó, во дни воззвáх, и в нощи пред Тобóю. Да внидет пред Тя молитва моя: приклони ухо Твоé к молéнию моему, яко испóлнися зол душá моя, и живóт мой аду приближися. Привменéн бых с низходящими в ров, бых яко человéк без пóмощи, в мéртвых свобóдь, яко язвеннии спящии во грóбе, ихже не помянул еси ктому, и тии от руки Твоея отриновéни быша. Положиша мя в рóве преиспóднем, в тéмных и сéни смéртней. На мне утвердися ярость Твоя, и вся вóлны Твоя навéл еси на мя. Удáлил еси знáемых моих от менé, положиша мя мéрзость себé: прéдан бых и не исхождáх. Очи мои изнемогóсте от нищеты, воззвáх к Тебé, Гóсподи, весь день, воздéх к Тебé руце мои. Едá мéртвыми твориши чудесá? Или врáчеве воскресят, и исповéдятся Тебé? Едá повéсть кто во грóбе милость Твою, и истину Твою в погибели? Едá познáна будут во тьме чудесá Твоя, и прáвда Твоя в земли забвéнней? И аз к Тебé, Гóсподи, воззвáх и утро молитва моя предварит Тя. Вскую, Гóсподи, отрéеши душу мою, отвращáеши лицé Твоé от менé? Нищ есмь аз, и в трудéх от юности моея; вознéс же ся, смирихся, и изнемогóх. На мне преидóша гнéви Твои, устрашéния Твоя возмутиша мя, обыдóша мя яко водá, весь день одержáша мя вкупе. Удáлил еси от менé друга и искренняго, и знáемых моих от страстéй.
Гóсподи Бóже спасéния моегó, во дни воззвáх, и в нощи пред Тобóю. Да внидет пред Тя молитва моя: приклони ухо Твоé к молéнию моему.
Псалом 102
Благослови, душе моя, Гóспода, и вся внутренняя моя имя святóе Егó. Благослови, душе моя, Гóспода, и не забывáй всех воздаяний Егó, очищáющаго вся беззакóния твоя, исцеляющаго вся недуги твоя, избавляющаго от истлéния живóт твой, венчáющаго тя милостию и щедрóтами, исполняющаго во благих желáние твоé: обновится яко óрля юность твоя. Творяй милостыни Госпóдь, и судьбу всем обидимым. Сказá пути Своя Моисéови, сыновóм Изрáилевым хотéния Своя: Щедр и Милостив Госпóдь, Долготерпелив и Многомилостив. Не до концá прогнéвается, нижé во век враждует, не по беззакóнием нáшим сотворил есть нам, нижé по грехóм нáшым воздáл есть нам. Яко по высотé небéсней от земли, утвердил есть Госпóдь милость Свою на боящихся Егó. Елико отстоят востóцы от зáпад, удáлил есть от нас беззакóния нáша. Якоже щéдрит отéц сыны, ущéдри Госпóдь боящихся Егó. Яко Той познá создáние нáше, помяну, яко персть есмы. Человéк, яко травá дние eгó, яко цвет сéльный, тáко оцветéт, яко дух прóйде в нем, и не будет, и не познáет ктому мéста своегó. Милость же Госпóдня от вéка и до вéка на боящихся Егó, и прáвда Его на сынéх сынóв, хранящих завéт Егó, и пóмнящих зáповеди Егó творити я. Госпóдь на Небеси уготóва Престóл Свой, и Цáрство Егó всéми обладáет. Благословите Гóспода вси Ангели Егó, сильнии крéпостию, творящии слóво Егó, услышати глас словéс Егó. Благословите Гóспода вся Силы Егó, слуги Егó, творящии вóлю Егó. Благословите Гóспода вся делá Егó, на всяком мéсте владычества Егó, благослови, душе моя, Гóспода.
На всяком мéсте владычества Егó, благослови, душе моя, Гóспода.
Псалом 142
Гóсподи, услыши молитву мою, внуши молéние моé во истине Твоéй, услыши мя в прáвде Твоéй и не вниди в суд с рабóм Твоим, яко не оправдится пред Тобóю всяк живый. Яко погнá враг душу мою, смирил есть в зéмлю живóт мой, посадил мя есть в тéмных, яко мéртвыя вéка. И уны во мне дух мой, во мне смятéся сéрдце моé. Помянух дни дрéвния, поучихся во всех дéлех Твоих, в творéниих руку Твоéю поучáхся. Воздéх к Тебé руце мои, душá моя, яко земля безвóдная Тебé. Скóро услыши мя, Гóсподи, исчезé дух мой, не отврати лицá Твоегó от менé, и уподóблюся низходящым в ров. Слышану сотвори мне заутра милость Твою, яко на Тя уповáх. Скажи мне, Гóсподи, путь вóньже пойду, яко к Тебé взях душу мою. Изми мя от враг моих, Гóсподи, к Тебé прибегóх. Научи мя творити вóлю Твою, яко Ты еси Бог мой. Дух Твой Благий настáвит мя на зéмлю прáву. Имене Твоегó рáди, Гóсподи, живиши мя, прáвдою Твоéю изведéши от печáли душу мою. И милостию Твоéю потребиши враги моя и погубиши вся стужáющыя души моéй, яко аз раб Твой есмь.
Услыши мя, Гóсподи, в прáвде Твоéй и не вниди в суд с рабóм Твоим. Услыши мя, Гóсподи, в прáвде Твоéй и не вниди в суд с рабóм Твоим.
Дух Твой Благий настáвит мя на зéмлю прáву.
Слáва Отцу и Сыну и Святóму Духу, и ныне и присно и во вéки векóв, аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (12 раз)
Слáва Отцу и Сыну и Святóму Духу, и ныне и присно и во вéки векóв, аминь.
БОГ ГОСПОДЬ, глас 3
Чтец: Бог Госпóдь, и явися нам, благословéн Грядый во Имя Госпóдне.
Чтец: Исповéдайтеся Гóсподеви, яко благ, яко в век милость Егó.
Хор: Бог Госпóдь, и явися нам, благословéн Грядый во Имя Госпóдне.
Чтец: Обышéдше обыдóша мя и именем Госпóдним противляхся им.
Хор: Бог Госпóдь, и явися нам, благословéн Грядый во Имя Госпóдне.
Чтец: Не умру, но жив буду и повéм делá Госпóдня.
Хор: Бог Госпóдь, и явися нам, благословéн Грядый во Имя Госпóдне.
Чтец: Кáмень, Егóже небрегóша зиждущии, Сей бысть во главу угла, от Гóспода бысть Сей, и есть дивен во очесéх нáших.
Хор: Бог Госпóдь, и явися нам, благословéн Грядый во Имя Госпóдне.
ТРОПАРИ
Тропáрь воскрéсный, глас 4: Све́тлую Воскресе́ния про́поведь/ от А́нгела уве́девша Госпо́дни учени́цы/ и пра́деднее осужде́ние отве́ргша,/ апо́столом хва́лящася глаго́лаху:/ испрове́ржеся смерть,/ воскре́се Христо́с Бог,// да́руяй ми́рови ве́лию ми́лость. (Дважды)
Слáва Отцу и Сыну и Святóму Духу и ныне и присно и во вéки векóв. Аминь.
Тропарь Преполовения, глас 8: Преполови́вшуся пра́зднику,/ жа́ждущую ду́шу мою́ благоче́стия напо́й вода́ми,/ я́ко всем, Спа́се, возопи́л еси́:/ жа́ждай да гряде́т ко Мне и да пие́т.// Исто́чниче жи́зни на́шея, Христе́ Бо́же, сла́ва Тебе́.
Гóсподи, помилуй. (3 раза)
Слáва Отцу и Сыну и Святóму Духу.
Чтец: И ныне и присно и во вéки векóв. Аминь.
КАФИЗМЫ И СЕДАЛЬНЫ
КАФИЗМА ВТОРАЯ
И чтем кафисму 2-ю ( или один псалом, или до 1-й Славы)
[Псалом 9]Исповéмся Тебé, Гóсподи, всем сéрдцем моим, повéм вся чудесá Твоя. Возвеселюся и возрáдуюся о Тебé, пою имени Твоему, Вышний. Внегдá возвратитися врагу моему вспять, изнемóгут и погибнут от лицá Твоегó. Яко сотворил eси суд мой и прю мою, сел eси на Престóле, судяй прáвду. Запретил eси языком, и погибе нечестивый, имя eгó потребил eси в век и в век вéка. Врагу оскудéша oружия в конéц, и грáды разрушил eси, погибе пáмять eгó с шумом. И Госпóдь во век пребывáет, уготóва на суд Престóл Свой, и Той судити имать вселéнней в прáвду, судити имать людем в правотé. И бысть Госпóдь прибе́жище убóгому, помóщник во благоврéмениих, в скóрбех. И да уповáют на Тя знáющии имя Твоé, яко не остáвил eси взыскáющих Тя, Гóсподи. Пóйте Гóсподеви, живущему в Сиóне, возвестите во языцех начинáния Егó, яко взыскáяй крóви их помяну, не забы звáния убóгих. Помилуй мя, Гóсподи, виждь смирéние моé от враг моих, возносяй мя от врат смéртных, Яко да возвещу вся хвалы Твоя во вратéх дщéре Сиóни, возрáдуемся о спасéнии Твоéм. Углебóша языцы в па́губе, юже сотвориша, в сéти сей, юже скрыша, увязé ногá их. Знáемь eсть Госпóдь судьбы творяй, в дéлех руку своéю увязé грéшник. Да возвратятся грéшницы во ад, вси языцы забывáющии Бóга. Яко не до концá забвéн будет нищий, терпéние убóгих не погибнет до концá. Воскресни, Гóсподи, да не крепится человéк, да судятся языцы пред Тобóю. Постáви, Гóсподи, законоположителя над ними, да разумéют языцы, яко человéцы суть. Вскую, Гóсподи, отстоя далéче, презирáеши во благоврéмениих, в скóрбех? Внегдá гордитися нечестивому, возгарáется нищий, увязáют в совéтех, яже помышляют. Яко хвалимь eсть грéшный в пóхотех души своея, и обидяй благословимь eсть. Раздражи Гóспода грéшный, по мнóжеству гнéва своегó не взыщет, несть Бóга пред ним. Оскверняются путие eгó на всяко врéмя, отъéмлются судьбы Твоя от лицá eгó, всéми враги своими обладáет. Речé бо в сéрдце своéм, не подвижуся от рóда в род без зла, eгóже клятвы устá eгó пóлна суть, и гóрести и льсти, под языком eгó труд и болéзнь. Приседит в ловительстве с богáтыми в тáйных, éже убити неповиннаго, óчи eгó на нищаго призирáете. Ловит в тáйне яко лев во огрáде своéй, ловит éже восхитити нищаго, восхитити нищаго, внегдá привлещи и в сéти своéй. Смирит eгó, преклонится и падéт, внегдá eму обладáти убóгими. Речé бо в сéрдце своéм: забы Бог, отврати лицé Своé, да не видит до концá. Воскресни, Гóсподи Бóже мой, да вознесéтся рукá Твоя, не забуди убóгих Твоих до концá. Чесó рáди прогнéва нечестивый Бóга? Речé бо в сéрдце своéм: не взыщет. Видиши, яко Ты болéзнь и ярость смотряеши, да прéдан будет в руце Твои, Тебé остáвлен eсть нищий, сиру Ты буди помóщник. Сокруши мышцу грéшному и лукáвому, взыщется грех eгó и не обрящется. Госпóдь Царь во век и в век вéка, погибнете, языцы, от земли Егó. Желáние убóгих услышал eси, Гóсподи, уготóванию сéрдца их внят ухо Твоé. Суди сиру и смирéну, да не приложит ктому величáтися человéк на земли.
[Псалом 10]На Гóспода уповáх, кáко речéте души моéй: превитáй по горáм, яко птица? Яко се, грéшницы налякóша лук, уготóваша стрéлы в туле, состреляти во мрáце прáвыя сéрдцем. Занé яже Ты совершил eси, oни разрушиша, прáведник же что сотвори? Госпóдь во хрáме святéм Своéм. Госпóдь, на Небеси Престóл Егó, óчи Егó на нищаго призирáете, вéжди Егó испытáете сыны человéчeския. Госпóдь испытáет прáведнаго и нечестиваго, любяй же непрáвду ненавидит свою душу. Одождит на грéшники сéти, oгнь и жупел, и дух бурен часть чáши их. Яко прáведен Госпóдь, и прáвды возлюби, правоты виде лицé Егó.
Чтец: Слáва Отцу и Сыну и Святóму Духу.
Хор:И ныне и присно и во вéки векóв. Аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (3 раза)
Слáва Отцу и Сыну и Святóму Духу.
Чтец: И ныне и присно и во вéки векóв. Аминь.
[Псалом 11]Спаси мя, Гóсподи, яко оскудé преподóбный, яко умáлишася истины от сынóв человéческих. Суeтная глагóла кийждо ко искреннему своему, устнé льстивыя в сéрдце, и в сéрдце глагóлаша злáя. Потребит Госпóдь вся устны льстивыя, язык велерéчивый, рéкшыя: язык наш возвеличим, устны нáша при нас суть, кто нам Госпóдь eсть? Стрáсти рáди нищих и воздыхáния убóгих ныне воскресну, глагóлет Госпóдь, положуся во спасéние, не обинюся о нем. Словесá Госпóдня словесá чиста, сребрó разжжéно, искушéно земли, очищéно седмерицею. Ты, Гóсподи, сохраниши ны и соблюдéши ны от рóда сегó и во век. Окрест нечестивии хóдят, по высотé Твоéй умнóжил eси сыны человéчeския.
[Псалом 12]Докóле, Гóсподи, забудеши мя до концá? Докóле отвращáеши лицé Твоé от менé? Докóле положу совéты в души моéй, болéзни в сéрдце моéм день и нощь? Докóле вознесéтся враг мой на мя? Призри, услыши мя, Гóсподи Бóже мой, просвети óчи мои, да не когдá усну в смерть, да не когдá речéт враг мой, укрепихся на негó. Стужáющии ми возрáдуются, áще подвижуся. Аз же на милость Твою уповáх, возрáдуется сéрдце моé о спасéнии Твоéм, воспою Гóсподеви благодéявшему мне и пою имени Гóспода Вышняго.
[Псалом 13]Речé безумен в сéрдце своéм: несть Бог. Растлéша и омерзишася в начинáниих, несть творяй благостыню. Госпóдь с Небесé приниче на сыны человéчeския, видети, áще eсть разумевáяй или взыскáяй Бóга. Вси уклонишася, вкупе неключими быша: несть творяй благостыню, несть до eдинаго. Ни ли уразумéют вси дéлающии беззакóние, снедáющии люди моя в снедь хлéба? Гóспода не призвáша. Тáмо убояшася стрáха, идéже не бе страх, яко Госпóдь в рóде прáведных. Совéт нищаго посрамисте, Госпóдь же уповáние eгó eсть. Кто даст от Сиóна спасéние Изрáилево? Внегдá возвратит Госпóдь пленéние людéй Своих, возрадуется Иáков, и возвеселится Изрáиль.
Чтец: Слáва Отцу и Сыну и Святóму Духу.
Хор:И ныне и присно и во вéки векóв. Аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (3 раза)
Слáва Отцу и Сыну и Святóму Духу.
Чтец: И ныне и присно и во вéки векóв. Аминь.
[Псалом 14]Гóсподи, кто обитáет в жилищи Твоéм? Или кто вселится во святую гóру Твою? Ходяй непорóчен и дéлаяй прáвду, глагóляй истину в сéрдце своéм. Иже не ульсти языком своим и не сотвори искреннему своему зла, и поношéния не прият на ближния своя. Уничижéн eсть пред ним лукáвнуяй, боящыя же ся Гóспода слáвит, кленыйся искреннему своéму и не отметáяся. Сребрá своегó не дадé в лихву и мзды на неповинных не прият. Творяй сия не подвижится во век.
[Псалом 15]Сохрани мя, Гóсподи, яко на Тя уповáх. Рех Гóсподеви: Госпóдь мой eси Ты, яко благих моих не трéбуеши. Святым, иже суть на земли Егó, удиви Госпóдь вся хотéния Своя в них. Умнóжишася нéмощи их, по сих ускориша: не соберу собóры их от кровéй, ни помяну же имéн их устнáма моима. Госпóдь часть достояния моегó и чáши моея, Ты eси устрояяй достояние моé мне. Ужя нападóша ми в держáвных моих, ибо достояние моé держáвно eсть мне. Благословлю Гóспода, вразумившаго мя, eщé же и до нóщи наказáша мя утрóбы моя. Предзрéх Гóспода предо мнóю выну, яко одесную менé eсть, да не подвижуся. Сегó рáди возвеселися сéрдце моé, и возрáдовася язык мой, eщé же и плоть моя вселится на уповáнии. Яко не остáвиши душу мою во áде, нижé дáси преподóбному Твоему видети истле́ния. Сказáл ми eси пути животá, испóлниши мя весéлия с лицéм Твоим, красотá в деснице Твоéй в конéц.
[Псалом 16]Услыши, Гóсподи, прáвду мою, вонми молéнию моему, внуши молитву мою не во устнáх льстивых. От лицá Твоегó судьбá моя изыдет, óчи мои да видита правоты. Искусил eси сéрдце моé, посетил eси нóщию, искусил мя eси, и не обрéтеся во мне непрáвда. Яко да не возглагóлют устá моя дел человéческих, за словесá устéн Твоих аз сохраних пути жéстоки. Соверши стопы моя во стезях Твоих, да не подвижутся стопы моя. Аз воззвáх, яко услышал мя eси, Бóже, приклони ухо Твоé мне и услыши глагóлы моя. Удиви милости Твоя, спасáяй уповáющыя на Тя от противящихся деснице Твоéй. Сохрани мя, Гóсподи, яко зéницу óка, в крóве крилу Твоéю покрыеши мя. От лицá нечестивых острáстших мя, врази мои душу мою одержáша. Тук свой затвориша, устá их глагóлаша гордыню. Изгонящии мя ныне обыдóша мя, óчи свои возложиша уклонити на зéмлю. Объяша мя яко лев готóв на лов и яко скимен обитáяй в тáйных. Воскресни, Гóсподи, предвари я и запни им, избáви душу мою от нечестиваго, оружие Твоé от враг руки Твоея, Гóсподи, от мáлых от земли, раздели я в животé их, и сокровéнных Твоих испóлнися чрéво их, насытишася сынóв, и остáвиша остáнки младéнцeм своим. Аз же прáвдою явлюся лицу Твоему, насыщуся, внегдá явити ми ся слáве Твоéй.
Чтец: Слáва Отцу и Сыну и Святóму Духу, и ныне и присно и во вéки векóв, аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (12 раз)
СЕДАЛЬНЫ
Хор (по кафисме седальны воскрéсные , глас 4): Воззре́вше на гро́бный вход,/ и пла́мене а́нгельскаго не терпя́ще мироно́сицы,/ с тре́петом дивля́хуся, глаго́люще:/ еда́ укра́деся, отве́рзый разбо́йнику рай?/ Еда́ ли воста́, И́же и пре́жде стра́сти пропове́давый воста́ние?/ Вои́стинну воскре́се Христо́с,// су́щим во а́де подая́ живо́т и воскресе́ние.
Стих: Воскресни Гóсподи Бóже мой, да вознесéтся рукá Твоя,/ не забуди убóгих Твоих до концá.
Воскре́сл еси́ я́ко безсме́ртный, от гро́ба, Спа́се,/ совоздви́гл еси́ мир Твой си́лою Твое́ю, Христе́ Бо́же наш,/ сокруши́л еси́ в кре́пости сме́рти держа́ву,/ показа́л, Ми́лостиве, Воскресе́ние всем.// Те́мже Тя и сла́вим, еди́не Человеколю́бче.
Слáва Отцу и Сыну и Святóму Духу, и ныне и присно и во вéки векóв, аминь.
Богорóдичен: Е́же от ве́ка утае́ное,/ и а́нгелом несве́домое та́инство,/ Тобо́ю, Богоро́дице, су́щим на земли́ яви́ся Бог,/ в несли́тном соедине́нии воплоща́емь,/ и Крест во́лею нас ра́ди восприи́м,/ и́мже воскреси́в первозда́ннаго,// спасе́ от сме́рти ду́ши на́ша.
Гóсподи, помилуй. (3 раза)
Слáва Отцу и Сыну и Святóму Духу.
Чтец: И ныне и присно и во вéки векóв. Аминь.
КАФИЗМА ТРЕТЬЯ
И чтем кафисму 3-ю ( или один псалом, или до 1-й Славы)
[Псалом 17]Возлюблю Тя, Гóсподи, крéпосте моя. Госпóдь утверждéние моé, и прибéжище моé, и Избáвитель Moй, Бог мой, Помóщник мой, и уповáю на Негó, Защититель мой, и рог спасéния моегó, и Заступник мой. Хваля призову Гóспода и от враг моих спасуся. Одержáша мя болéзни смéртныя, и потóцы беззакóния смятóша мя, болéзни áдовы обыдóша мя, предвариша мя сéти смéртныя. И внегдá скорбéти ми, призвáх Гóспода, и к Бóгу моему воззвáх, услыша от хрáма Святáго Своегó глас мой, и вопль мой пред Ним внидет во уши Егó. И подвижеся, и трéпетна бысть земля, и основáния гор смятóшася и подвигóшася, яко прогнéвася на ня Бог. Взыде дым гнéвом Егó, и огнь от лицá Егó восплáменится, углие возгорéся от Негó. И приклони небесá, и сниде, и мрак под ногáма Егó. И взыде на Херувимы, и летé, летé на крилу вéтреню. И положи тму закрóв Свой, óкрест Егó селéние Егó, темнá водá во óблацех воздушных. От облистáния пред Ним óблацы проидóша, град и углие óгненное. И возгремé с Небесé Госпóдь и Вышний дадé глас Свой. Низпослá стрéлы и разгнá я, и мóлнии умнóжи и смятé я. И явишася истóчницы воднии, и открышася основáния вселéнныя, от запрещéния Твоегó, Гóсподи, от дохновéния духа гнéва Твоегó. Низпослá с высоты, и прият мя, восприят мя от вод мнóгих. Избáвит мя от врагóв моих сильных и от ненавидящих мя, яко утвердишася пáче менé. Предвариша мя в день озлоблéния моегó, и бысть Госпóдь утвержéние моé. И изведé мя на широту, избáвит мя, яко восхотé мя. И воздáст ми Госпóдь по прáвде моéй и по чистотé руку моéю воздáст ми. Яко сохраних пути Госпóдни и не нечéствовах от Бóга моегó. Яко вся судьбы Егó предо мнóю и оправдáния Егó не отступиша от менé. И буду непорóчен с Ним, и сохранюся от беззакóния моегó. И воздáст ми Госпóдь по прáвде моéй и по чистотé руку моéю пред очима Егó. С преподóбным преподóбен будеши, и с мужем неповинным неповинен будеши, и со избрáнным избрáн будеши, и со строптивым развратишися. Яко Ты люди смирéнныя спасéши и óчи гóрдых смириши. Яко Ты просветиши светильник мой, Гóсподи, Бóже мой, просветиши тму мою. Яко Тобóю избáвлюся от искушéния и Бóгом моим прейду стéну. Бог мой, непорóчен путь Егó, словесá Госпóдня разжжéна, Защититель есть всех уповáющих на Негó. Яко кто бог, рáзве Гóспода? или кто бог, рáзве Бóга нáшего? Бог препоясуяй мя силою, и положи непорóчен путь мой. Совершáяй нóзе мои, яко елéни, и на высóких поставляяй мя. Научáяй руце мои на брань, и положил еси лук мéдян мышца моя. И дал ми еси защищéние спасéния, и десница Твоя восприят мя, и наказáние Твоé испрáвит мя в конéц, и наказáние Твоé то мя научит. Уширил еси стопы моя подо мнóю, и не изнемогóсте плеснé мои. Пожену враги моя, и постигну я, и не возвращуся, дóндеже скончáются. Оскорблю их, и не возмóгут стáти, падут под ногáма моима. И препоясал мя еси силою на брань, спял еси вся востающыя на мя под мя. И врагóв моих дал ми еси хребéт, и ненавидящыя мя потребил еси. Воззвáша, и не бе спасáяй: ко Гóсподу, и не услыша их. И истню я яко прах пред лицéм вéтра, яко брéние путéй поглáжду я. Избáвиши мя от пререкáния людéй, постáвиши мя во главу языков. Людие, ихже не вéдех, рабóташа ми. В слух уха послушаша мя. Сынове чуждии солгáша ми. Сынове чуждии обетшáша и охромóша от стезь своих. Жив Госпóдь, и благословéн Бог, и да вознесéтся Бог спасéния моегó. Бог даяй отмщéние мне и покоривый люди под мя. Избáвитель мой от враг моих гневливых, от востающих на мя вознесéши мя, от мужа непрáведна избáвиши мя. Сегó рáди исповéмся Тебé во языцех, Гóсподи, и имени Твоему пою: величáяй спасéния царéва, и творяй милость христу Своему Давиду, и сéмени eгó до вéка.
Чтец: Слáва Отцу и Сыну и Святóму Духу.
Хор:И ныне и присно и во вéки векóв. Аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (3 раза)
Слáва Отцу и Сыну и Святóму Духу.
Чтец: И ныне и присно и во вéки векóв. Аминь.
[Псалом 18]Небесá повéдают слáву Бóжию, творéние же руку Егó возвещáет твердь. День дни отрыгáет глагóл, и нощь нóщи возвещáет рáзум. Не суть рéчи, нижé словесá, ихже не слышатся глáси их. Во всю зéмлю изыде вещáние их и в концы вселéнныя глагóлы их. В сóлнце положи селéние Своé, и Той, яко Жених исходяй от чертóга Своегó, возрáдуется, яко Исполин тещи путь. От крáя небесé исхóд Егó, и срéтение Егó до крáя небесé, и несть иже укрыется теплоты Егó. Закóн Госпóдень непорóчен, обращáяй душы, свидéтельство Госпóдне вéрно, умудряющее младéнцы. Оправдáния Госпóдня прáва, веселящая сéрдце, зáповедь Госпóдня светлá, просвещáющая óчи. Страх Госпóдень чист, пребывáяй в век вéка: судьбы Госпóдни истинны, оправдáны вкупе, вожделéнны пáче злáта и кáмене чéстна мнóга, и слáждша пáче мéда и сóта. Ибо раб Твой хранит я, внегдá сохранити я, воздаяния мнóго. Грехопадéния кто разумéет? От тáйных моих очисти мя, и от чуждих пощади рабá Твоегó, аще не обладáют мнóю, тогдá непорóчен буду и очищуся от грехá велика. И будут во благоволéние словесá уст моих, и поучéние сéрдца моего пред Тобóю выну, Гóсподи, Помóщниче мой и Избáвителю мой.
(продолжение зри здесь)