Сретение Господа Бога и Спаса нашего Иисуса Христа. ВСЕНОЩНОЕ БДЕНИЕ УТРЕНЯ. Служба мирским чином
15 февраля́ 2024 гóда. Четвéрг 37 седмúцы по Пятидеся́тнице. Срéтенiе Гóспода Бóга и Спáса нáшего Iисýса Хрїстà. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени.
УТРЕНЯ
Начáло зри здесь ( великая вечéрня)
ШЕСТОПСАЛМИЕ
Слáва в вы́шних Бóгу, и на землѝ мир, в человéцех благоволéнiе. (трúжды) Гóсподи, устнè моѝ отвéрзеши, и устà моя́ возвестя́т хвалý Твою́. (двáжды)
Псалом 3
Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгò. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы̀ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоè.
Аз уснýх, и спах, востáх, я́ко Госпóдь застýпит мя.
Псалом 37
Гóсподи, да не я́ростiю Твоéю обличи́ши менè, нижè гнéвом Твои́м накáжеши менè. Яко стрéлы Твоя́ унзóша во мне, и утверди́л есѝ на мне рýку Твою́. Несть исцелéнiя в плóти моéй от лицà гнéва Твоегò, несть ми́ра в костéх мои́х от лицà грех мои́х. Яко беззакóнiя моя́ превзыдóша главý мою́, я́ко брéмя тя́жкое отяготéша на мне. Возсмердéша и согни́ша рáны моя́ от лицà безýмiя моегò. Пострадáх и слякóхся до концà, весь день сéтуя хождáх. Яко ля́двiя моя́ напóлнишася поругáнiй, и несть исцелéнiя в плóти моéй. Озлóблен бых и смири́хся до зелà, рыкáх от воздыхáнiя сéрдца моегò. Гóсподи, пред Тобóю все желáнiе моè и воздыхáнiе моè от Тебè не утаи́ся. Сéрдце моè смятéся, остáви мя си́ла моя́, и свет óчiю моéю, и той несть со мнóю. Дрýзи моѝ и и҆́скреннiи моѝ пря́мо мне прибли́жишася и стáша, и бли́жнiи моѝ отдалéче менè стáша и нуждáхуся и҆́щущiи дýшу мою́, и и҆́щущiи злáя мне глагóлаху сýетная и льсти́вным весь день поучáхуся. Аз же я́ко глух не слы́шах и я́ко нем не отверзáяй уст свои́х. И бых я́ко человéк не слы́шай и не имы́й во устéх свои́х обличéнiя. Яко на Тя, Гóсподи, уповáх, Ты услы́шиши, Гóсподи Бóже мой. Яко рех: да не когдà порáдуют ми ся вразѝ моѝ: и внегдà подвижáтися ногáм мои́м, на мя велерéчеваша. Яко аз на рáны готóв, и болéзнь моя́ предо мнóю есть вы́ну. Яко беззакóнiе моè аз возвещý и попекýся о гресè моéм. Вразѝ же моѝ живýт и укрепи́шася пáче менè, и умнóжишася ненави́дящiи мя без прáвды. Воздаю́щiи ми злáя возблагáя оболгáху мя, занè гоня́х благосты́ню. Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Псалом 62
Бóже, Бóже мой, к Тебè ýтренюю, возжадà Тебè душà моя́, коль мнóжицею Тебè плоть моя́, в земли́ пýсте и непрохóдне, и безвóдне. Тáко во святéм яви́хся Тебè, ви́дети си́лу Твою́ и слáву Твою́. Я́ко лýчши ми́лость Твоя́ пáче живóт, устнè мои́ похвали́те Тя. Тáко благословлю́ Тя в животè моéм, о и҆́мени Твоéм воздежý рýце моѝ. Я́ко от тýка и мáсти да испóлнится душà моя́, и устнáма рáдости восхвáлят Тя устà моя́. Áще поминáх Тя на постéли моéй, на ýтренних поучáхся в Тя. Я́ко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́. Тíи же всýе искáша дýшу мою́, вни́дут в преиспóдняя землѝ, предадя́тся в рýки орýжiя, чáсти ли́совом бýдут. Царь же возвесели́тся о Бóзе, похвáлится всяк клены́йся И҆м, я́ко загради́шася устà глагóлющих непрáведная.
На ýтренних поучáхся в Тя. Яко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́.
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Псалом 87
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý, я́ко испóлнися зол душà моя́, и живóт мой áду прибли́жися. Привменéн бых с низходя́щими в ров, бых я́ко человéк без пóмощи, в мéртвых свобóдь, я́ко я́звеннiи спя́щiи во грóбе, и҆́хже не помянýл есѝ ктомý, и тíи от рукѝ Твоея́ отриновéни бы́ша. Положи́ша мя в рóве преиспóднем, в тéмных и сéни смéртней. На мне утверди́ся я́рость Твоя́, и вся вóлны Твоя́ навéл есѝ на мя. Удáлил есѝ знáемых мои́х от менè, положи́ша мя мéрзость себè: прéдан бых и не исхождáх. Óчи моѝ изнемогóсте от нищеты̀, воззвáх к Тебè, Гóсподи, весь день, воздéх к Тебè рýце моѝ. Едà мéртвыми твори́ши чудесà? Илѝ врáчеве воскреся́т, и исповéдятся Тебè? Едà повéсть кто во грóбе ми́лость Твою́, и и҆́стину Твою́ в поги́бели? Едà познáна бýдут во тьме чудесà Твоя́, и прáвда Твоя́ в землѝ забвéнней? И аз к Тебè, Гóсподи, воззвáх и ýтро моли́тва моя́ предвари́т Тя. Вскýю, Гóсподи, отрéеши дýшу мою́, отвращáеши лицè Твоè от менè? Нищ есмь аз, и в трудéх от ю́ности моея́; вознéс же ся, смири́хся, и изнемогóх. На мне преидóша гнéви Твоѝ, устрашéнiя Твоя́ возмути́ша мя, обыдóша мя я́ко водà, весь день одержáша мя вкýпе. Удáлил есѝ от менè дрýга и и҆́скренняго, и знáемых моих от страстéй.
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý.
Псалом 102
Благословѝ, душè моя, Гóспода, и вся внýтренняя моя и҆́мя святóе Егò. Благословѝ, душè моя, Гóспода, и не забывáй всех воздая́нїй Егò, очищáющаго вся беззакóнїя твоя́, исцеля́ющаго вся недýги твоя́, избавля́ющаго от истлéнiя живóт твой, венчáющаго тя ми́лостїю и щедрóтами, исполня́ющаго во благи́х желáнїе твоè: обновится я́ко óрля юность твоя́. Творя́й ми́лостыни Госпóдь, и судьбý всем оби́димым. Сказà путѝ Своя́ Моисéови, сыновóм Iзрáилевым хотéнїя Своя́: Щедр и Ми́лостив Госпóдь, Долготерпели́в и Многоми́лостив. Не до концà прогнéвается, нижè во век враждýет, не по беззакóнїем нáшим сотвори́л есть нам, нижè по грехóм нáшым воздáл есть нам. Я́ко по высотè небéсней от землѝ, утверди́л есть Госпóдь ми́лость Свою́ на боя́щихся Егò. Ели́ко отстоят востóцы от зáпад, удáлил есть от нас беззакóнїя нáша. Я́коже щéдрит отéц сы́ны, ущéдри Госпóдь боя́щихся Егò. Я́ко Той познà создáнїе нáше, помянý, яко персть есмы̀. Человéк, яко травà днíе eгò, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегò. Ми́лость же Госпóдня от вéка и до вéка на боя́щихся Егò, и прáвда Егò на сынéх сынóв, храня́щих завéт Егò, и пóмнящих зáповеди Егò твори́ти я. Госпóдь на Небесѝ уготóва Престóл Свой, и Цáрство Егò всéми обладáет. Благослови́те Гóспода вси Áнгели Егò, си́льнїи крéпостїю, творя́щїи слóво Егò, услышати глас словéс Егò. Благослови́те Гóспода вся Си́лы Егò, слýги Егò, творя́щїи вóлю Егò. Благослови́те Гóспода вся делá Егò, на вся́ком мéсте влады́чества Егò, благословѝ, душè моя́, Гóспода.
На вся́ком мéсте влады́чества Егò, благословѝ, душè моя́, Гóспода.
Псалом 142
Гóсподи, услы́ши моли́тву мою́, внушѝ молéнiе моè во и҆́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнà враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И уны̀ во мне дух мой, во мне смятéся сéрдце моè. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебè рýце моѝ, душà моя́, я́ко земля́ безвóдная Тебè. Скóро услы́ши мя, Гóсподи, исчезè дух мой, не отвратѝ лицà Твоегò от менè, и уподóблюся низходя́щым в ров. Слы́шану сотворѝ мне заýтра ми́лость Твою́, я́ко на Тя уповáх. Скажѝ мне, Гóсподи, путь вóньже пойдý, я́ко к Тебè взях дýшу мою́. Измѝ мя от враг мои́х, Гóсподи, к Тебè прибегóх. Научѝ мя твори́ти вóлю Твою́, я́ко Ты есѝ Бог мой. Дух Твой Благíй настáвит мя на зéмлю прáву. И҆́мене Твоегò рáди, Гóсподи, живи́ши мя, прáвдою Твоéю изведéши от печáли дýшу мою́. И ми́лостiю Твоéю потреби́ши врагѝ моя́ и погуби́ши вся стужáющыя души́ моéй, я́ко аз раб Твой есмь.
Услы́ши мя, Гóсподи, в прáвде Твоéй и не вни́ди в суд с рабóм Твои́м. Услы́ши мя, Гóсподи, в прáвде Твоéй и не вни́ди в суд с рабóм Твои́м.
Дух Твой Благíй настáвит мя на зéмлю прáву.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
БОГ ГОСПОДЬ, глас 1
Чтец: Бог Госпóдь, и яви́ся нам, благословéн Гряды́й во И҆́мя Госпóдне.(Пс.117:27А,26А)
Чтец: И҆сповéдайтеся Гóсподеви, я́ко благ, я́ко в век ми́лость Егò.(Пс.117:1)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Обышéдше обыдóша мя и и҆́менем Госпóдним противля́хся им.(Пс.117:11)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Не умрý, но жив бýду и повéм делà Госпóдня.(Пс.117:17)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Кáмень, Егóже небрегóша зи́ждущiи, Сей бысть во главý ýгла, от Гóспода бысть Сей, и есть ди́вен во очесéх нáших. (Пс.117:22-23)
Хор: Бог Госпóдь, и явúся нам, благословéн Гряды́й во И҆́мя Госпóдне.
ТРОПАРИ
Тропáрь Cрéтенiя, глас 1: Рáдуйся, Благодáтная Богорóдице Дéво,/ из Тебè бо возсiя́ Сóлнце Прáвды - Хрїстóс, Бог наш,/ просвещáяй сýщiя во тьме./ Веселúся и ты, стáрче прáведный,/ прiéмый во объя́тiя Свободúтеля душ нáших,// дáрующаго нам воскресéнiе. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Рáдуйся, Благодáтная Богорóдице Дéво,/ из Тебè бо возсiя́ Сóлнце Прáвды - Хрїстóс, Бог наш,/ просвещáяй сýщiя во тьме./ Веселúся и ты, стáрче прáведный,/ прiéмый во объя́тiя Свободúтеля душ нáших,// дáрующаго нам воскресéнiе.
Гóсподи, помúлуй. (трúжды)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМЫ И СЕДАЛЬНЫ
КАФИЗМА ТРИНАДЦАТАЯ
И чтем кафíсму 13-ю ( или одúн псалóм, или до 1-й Слáвы)
[Псалом 91]Блáго есть исповéдатися Гóсподеви, и пéти и́мени Твоемý, Вы́шнiй: возвещáти заýтра ми́лость Твою́ и и́стину Твою́ на вся́ку нощь, в десятострýннем псалти́ри с пéснiю в гýслех. Я́ко возвесели́л мя еси́, Гóсподи, в творéнiи Твоéм, и в дéлех рукý Твоéю возрáдуюся. Я́ко возвели́чишася делá Твоя́, Гóсподи, зелó углуби́шася помышлéнiя Твоя́. Муж безýмен не познáет, и неразýмив не разумéет сих. Внегдá прозябóша грéшницы я́ко травá, и проникóша вси дéлающiи беззакóнiе: я́ко да потребя́тся в век вéка. Ты же Вы́шний во век, Гóсподи. Я́ко се врази́ Твои́, Гóсподи, я́ко се врази́ Твои́ поги́бнут, и разы́дутся вси дéлающiи беззакóнiе. И вознесéтся я́ко единорóга рог мой, и стáрость моя́ в елéи масти́те. И воззрé óко моé на враги́ моя́, и востаю́щiя на мя лукáвнующiя услы́шит ýхо моé. Прáведник я́ко фи́нiкс процветéт, я́ко кедр, и́же в Лiвáне, умнóжится. Насаждéни в домý Госпóдни, во двóрех Бóга нáшего процветýт, ещé умнóжатся в стáрости масти́те, и благопрiéмлюще бýдут. Да возвестя́т, я́ко прав Госпóдь Бог наш, и несть непрáвды в Нем.
[Псалом 92]Госпóдь воцари́ся, в лéпоту облечéся: облечéся Госпóдь в си́лу и препоя́сася, и́бо утверди́ вселéнную, я́же не подви́жится. Готóв Престóл Твой оттóле: от вéка Ты еси́. Воздвигóша рéки, Гóсподи, воздвигóша рéки глáсы своя́. Вóзмут рéки сотрéнiя своя́, от гласóв вод мнóгих. Ди́вны высоты́ морскíя, ди́вен в высóких Госпóдь. Свидéнiя Твоя́ увéришася зелó, дóму Твоемý подобáет святы́ня, Гóсподи, в долготý днiй.
[Псалом 93]Бог отмщéнiй Госпóдь, Бог отмщéнiй не обинýлся есть. Вознеси́ся Судя́й земли́, воздáждь воздая́нiе гóрдым. Докóле грéшницы, Гóсподи, докóле грéшницы восхвáлятся? Провещáют и возглагóлют непрáвду, возглагóлют вси дéлающiи беззакóнiе? Лю́ди Твоя́, Гóсподи, смири́ша и достоя́нiе Твоé озлóбиша. Вдови́цу и си́ра умори́ша и пришéльца уби́ша, и рéша: не ýзрит Госпóдь, нижé уразумéет Бог Iáковль. Разумéйте же безýмнiи в лю́дех и бýiи нéкогда умудри́теся. Насаждéй ýхо, не слы́шит ли? Или́ создáвый óко, не сматря́ет ли? Наказýяй язы́ки, не обличи́т ли, учáй человéка рáзуму? Госпóдь весть помышлéнiя человéческая, я́ко суть сýетна. Блажéн человéк, eгóже áще накáжеши, Гóсподи, и от закóна Твоегó научи́ши eгó, укроти́ти eгó от дней лю́тых, дóндеже изры́ется грéшному я́ма. Я́ко не отри́нет Госпóдь людéй Свои́х, и достоя́нiя Своегó не остáвит, дóндеже прáвда обрати́тся на суд, и держáщiися ея́ вси прáвiи сéрдцем. Кто востáнет ми на лукáвнующiя? Или́ кто спредстáнет ми на дéлающiя беззакóнiе? Áще не Госпóдь помóгл бы ми, вмáле всели́лася бы во ад душá моя́. Áще глагóлах, подви́жеся ногá моя́, ми́лость Твоя́, Гóсподи, помогáше ми. По мнóжеству болéзней мои́х в сéрдце моéм, утешéнiя Твоя́ возвесели́ша дýшу мою́. Да не прибýдет Тебé престóл беззакóнiя, созидáяй труд на повелéнiе. Уловя́т на дýшу прáведничу, и кровь непови́нную осýдят. И бысть мне Госпóдь в прибéжище, и Бог мой в пóмошь уповáнiя моегó. И воздáст им Госпóдь беззакóнiе их и по лукáвствiю их погуби́т я́ Госпóдь Бог (наш).
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 94]Прiиди́те, возрáдуемся Гóсподеви, воскли́кнем Бóгу Спаси́телю нáшему: предвари́м лицé Егó во исповéданiи, и во псалмéх воскли́кнем Емý. Я́ко Бог Вéлiй Госпóдь, и Царь Вéлiй по всей земли́, я́ко в руцé Егó вси концы́ земли́, и высоты́ гор Тогó суть. Я́ко Тогó есть мóре, и Той сотвори́ é, и сýшу рýце Егó создáсте. Прiиди́те, поклони́мся и припадéм Емý, и восплáчемся пред Гóсподем сотвóршим нас: я́ко Той есть Бог наш, и мы лю́дiе пáжити Его́, и óвцы руки́ Егó. Днесь áще глас Егó услы́шите, не ожесточи́те сердéц вáших, я́ко в прогнéванiи, по дни искушéнiя в пусты́ни, вóньже искуси́ша Мя отцы́ вáши, искуси́ша Мя, и ви́деша делá Моя́. Четы́редесять лет негодовáх рóда тогó, и рех, при́сно заблуждáют сéрдцем, тíи же не познáша путéй Мои́х, я́ко кля́хся во гнéве Моéм, áще вни́дут в покóй Мой.
[Псалом 95]Воспóйте Гóсподеви песнь нóву, воспóйте Гóсподеви вся земля́, воспóйте Гóсподеви, благослови́те и́мя Егó, благовести́те день от дне спасéнiе Егó. Возвести́те во язы́цех слáву Егó, во всех лю́дех чудесá Егó. Я́ко Вéлiй Госпóдь и хвáлен зелó, стрáшен есть над всéми бóги. Я́ко вси бóзи язы́к бéсове: Госпóдь же небесá сотвори́. Исповéданiе и красотá пред Ним, святы́ня и великолéпiе во святи́ле Егó. Принеси́те Гóсподеви отéчествiя язы́к, принеси́те Гóсподеви слáву и честь. Принеси́те Гóсподеви слáву и́мени Егó, возми́те жéртвы, и входи́те во дворы́ Егó. Поклони́теся Гóсподеви во дворé святéм Егó, да подви́жится от лицá Егó вся земля́. Рцы́те во язы́цех, я́ко Госпóдь воцари́ся, и́бо испрáви вселéнную, я́же не подви́жится: су́дит лю́дем прáвостiю. Да возвеселя́тся небесá, и рáдуется земля́, да подви́жится мóре и исполнéнiе eгó. Возрáдуются поля́, и вся я́же на них: тогдá возрáдуются вся древá дубрáвная от лицá Госпóдня, я́ко грядéт, я́ко грядéт суди́ти земли́, суди́ти вселéнней в прáвду, и лю́дем и́стиною Своéю.
[Псалом 96]Госпóдь воцари́ся, да рáдуется земля́, да веселя́тся óстрови мнóзи. Óблак и мрак óкрест Eгó, прáвда и судьбá исправлéнiе Престóла Егó. Огнь пред Ним предъи́дет, и попали́т óкрест враги́ Егó. Освети́ша мóлнiя Егó вселéнную: ви́де, и подви́жеся земля́. Гóры я́ко воск растáяша от лицá Госпóдня, от лицá Гóспода всея́ земли́. Возвести́ша небесá прáвду Егó, и ви́деша вси лю́дiе слáву Егó. Да постыдя́тся вси клáняющiися истукáнным, хвáлящiися о и́долех свои́х, поклони́теся Емý вси Áнгели Егó. Слы́ша и возвесели́ся Сióн, и возрáдовашася дщéри Iудéйскiя, судéб рáди Твои́х, Гóсподи, я́ко Ты Госпóдь Вы́шнiй над всéю землéю, зелó превознéслся еси́ над всéми бóги. Лю́бящiи Гóспода, ненави́дите злáя, храни́т Госпóдь дýши преподóбных Свои́х, из рýки грéшничи избáвит я́. Свет возсiя́ прáведнику, и прáвым сéрдцем весéлiе. Весели́теся, прáведнiи, о Гóсподе и исповéдайте пáмять Святы́ни Егó.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 97]Воспóйте Гóсподеви песнь нóву, я́ко ди́вна сотвори́ Госпóдь. Спасè Егó десни́ца Егó, и мы́шца святáя Егó. Сказá Госпóдь спасéнiе Своé, пред язы́ки откры́ прáвду Свою́. Помянý ми́лость Свою́ Iáкову, и и́стину Свою́ дóму Iзрáилеву, ви́деша вси концы́ земли́ спасéнiе Бóга нáшего. Воскли́кните Бóгови вся земля́, воспóйте, и рáдуйтеся, и пóйте. Пóйте Гóсподеви в гýслех, в гýслех и глáсе псалóмсте. В трубáх кóваных и глáсом трубы́ рóжаны воструби́те пред Царéм Гóсподем. Да подви́жится мóре и исполнéнiе eгó, вселéнная и вси живýщiи на ней. Рéки восплéщут рукóю вкýпе, гóры возрáдуются. От лицá Госпóдня, я́ко грядéт, я́ко и́дет суди́ти земли́, суди́ти вселéнней в прáвду, и лю́дем прáвостiю.
[Псалом 98]Госпóдь воцари́ся, да гнéваются лю́дiе: седя́й на Херуви́мех, да подви́жится земля́. Госпóдь в Сióне вели́к, и высóк есть над всéми людьми́. Да исповéдятся и́мени Твоемý вели́кому, я́ко стрáшно и свя́то есть. И честь царéва суд лю́бит: Ты уготóвал еси́ правоты́, суд и прáвду во Iáкове Ты сотвори́л еси́. Возноси́те Гóспода Бóга нáшего, и покланя́йтеся поднóжiю нóгу Егó, я́ко свя́то есть. Моисéй и Аарóн во iерéех Егó, и Самуи́л в призывáющих и́мя Егó: призывáху Гóспода, и Той послýшаше их. В столпè óблачне глагóлаше к ним: я́ко храня́ху свидéнiя Егó и повелéнiя Егó, я́же дадè им. Гóсподи Бóже наш, Ты послýшал еси́ их: Бóже, ты ми́лостив бывáл еси́ им, и мщáя на вся начинáнiя их. Возноси́те Гóспода Бóга нáшего, и покланя́йтеся в горé святéй Егó, я́ко Свят Госпóдь Бог наш.
[Псалом 99]Воскли́кните Бóгови вся земля́, рабóтайте Гóсподеви в весéлiи, вни́дите пред Ним в рáдости. Увéдите, я́ко Госпóдь той есть Бог наш: Той сотвори́ нас, а не мы, мы же лю́дiе Егó и óвцы пáжити Егò. Вни́дите во вратà Егò во исповéданiи, во дворы̀ Егò в пéнiих: исповéдайтеся Емý, хвали́те и́мя Егò. Я́ко благ Госпóдь, в век ми́лость Егò, и дáже до рóда и рóда и́стина Егò.
[Псалом 100]Ми́лость и суд воспою́ Тебè, Гóсподи. Пою́ и разумéю в путѝ непорóчне, когдà прiи́деши ко мне? Прехождáх в незлóбiи сéрдца моегò посредè дóму моегò. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и́скренняго своегò, сегò изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегò творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Чтец: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
СЕДАЛЬНЫ
Хор (по кафíсме седáлен Cрéтенiя, самоподóбен, глас 1): Лик Áнгельскiй да удиви́тся чудесѝ,/ земнíи же глáсы, возопiéм пéнiе,/ зря́ще неизречéнное Бóжiе снизхождéнiе,/ Егóже бо трепéщут Небéсныя си́лы,// ны́не стáрчи объéмлют рýце Еди́наго Человеколю́бца.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Лик Áнгельскiй да удиви́тся чудесѝ,/ земнíи же глáсы, возопiéм пéнiе,/ зря́ще неизречéнное Бóжiе снизхождéнiе,/ Егóже бо трепéщут Небéсныя си́лы,// ны́не стáрчи объéмлют рýце Еди́наго Человеколю́бца.
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМА ЧЕТЫРНАДЦАТАЯ
И чтем кафíсму 14-ю (или одúн псалóм, или до 1-й Слáвы)
[Псалом 101]Гóсподи, услы́ши моли́тву мою́, и вопль мой к Тебé да прiи́дет. Не отвратѝ лицá Твоегó от менé: вóньже áще день скорблю́, приклонѝ ко мне ýхо Твоé: вóньже áще день призовý Тя, скóро услы́ши мя. Яко исчезóша я́ко дым днíе моѝ, и кóсти моя́ я́ко суши́ло сосхóшася. Уя́звен бых я́ко травá, и и́зсше сéрдце моé, я́ко забы́х снéсти хлеб мой. От глáса воздыхáнiя моегó прильпé кость моя́ плóти моéй. Уподóбихся нея́сыти пусты́нней, бых я́ко нощны́й вран на ны́рищи. Бдех и бых я́ко пти́ца осóбящаяся на зде. Весь день поношáху ми вразѝ моѝ, и хвáлящiи мя мнóю кленя́хуся. Занé пéпел я́ко хлеб ядя́х, и питié моé с плáчем растворя́х. От лицá гнéва Твоегó и я́рости Твоея́: я́ко вознéс низвéргл мя есѝ. Днíе моѝ я́ко сень уклони́шася, и аз я́ко сéно изсхóх. Ты же, Гóсподи, во век пребывáеши, и пáмять Твоя́ в род и род. Ты воскрéс ущéдриши Сióна, я́ко врéмя ущéдрити eгó, я́ко прiи́де врéмя. Яко благоволи́ша рабѝ Твоѝ кáменiе eгó, и персть eгó ущéдрят. И убоя́тся язы́цы и́мене Госпóдня, и вси цáрiе зéмстiи слáвы Твоея́. Яко сози́ждет Госпóдь Сióна, и яви́тся во слáве Своéй. Призрé на моли́тву смирéнных, и не уничижѝ молéнiя их. Да напи́шется сié в род ин, и лю́дiе зи́ждемiи восхвáлят Гóспода. Яко прини́че с высоты́ святы́я Своея́, Госпóдь с Небесé на зéмлю призрé, услы́шати воздыхáнiе оковáнных, разреши́ти сы́ны умерщвлéнных, возвести́ти в Сióне И҆́мя Госпóдне, и хвалý Егó во Iерусали́ме. Внегдá собрáтися лю́дем вкýпе, и царéм, éже рабóтати Гóсподеви. Отвещá eмý на путѝ крéпости eгó: умалéнiе дней мои́х возвестѝ ми. Не возведѝ менé в преполовéнiе дней мои́х: в рóде родóв лéта Твоя́. В начáлех Ты, Гóсподи, зéмлю основáл есѝ, и делá рукý Твоéю суть небесá. Та поги́бнут, Ты же пребывáеши: и вся, я́ко ри́за обетшáют, и я́ко одéжду свiéши я́ и изменя́тся. Ты же тóйжде есѝ, и лéта Твоя́ не оскудéют. Сы́нове раб Твои́х вселя́тся, и сéмя их во век испрáвится.
[Псалом 102]Благословѝ, душè моя, Гóспода, и вся внýтренняя моя и҆́мя святóе Егò. Благословѝ, душè моя, Гóспода, и не забывáй всех воздая́нїй Егò, очищáющаго вся беззакóнїя твоя́, исцеля́ющаго вся недýги твоя́, избавля́ющаго от истлéнiя живóт твой, венчáющаго тя ми́лостїю и щедрóтами, исполня́ющаго во благи́х желáнїе твоè: обновится я́ко óрля юность твоя́. Творя́й ми́лостыни Госпóдь, и судьбý всем оби́димым. Сказà путѝ Своя́ Моисéови, сыновóм Iзрáилевым хотéнїя Своя́: Щедр и Ми́лостив Госпóдь, Долготерпели́в и Многоми́лостив. Не до концà прогнéвается, нижè во век враждýет, не по беззакóнїем нáшим сотвори́л есть нам, нижè по грехóм нáшым воздáл есть нам. Я́ко по высотè небéсней от землѝ, утверди́л есть Госпóдь ми́лость Свою́ на боя́щихся Егò. Ели́ко отстоят востóцы от зáпад, удáлил есть от нас беззакóнїя нáша. Я́коже щéдрит отéц сы́ны, ущéдри Госпóдь боя́щихся Егò. Я́ко Той познà создáнїе нáше, помянý, яко персть есмы̀. Человéк, яко травà днíе eгò, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегò. Ми́лость же Госпóдня от вéка и до вéка на боя́щихся Егò, и прáвда Егò на сынéх сынóв, храня́щих завéт Егò, и пóмнящих зáповеди Егò твори́ти я. Госпóдь на Небесѝ уготóва Престóл Свой, и Цáрство Егò всéми обладáет. Благослови́те Гóспода вси Áнгели Егò, си́льнїи крéпостїю, творя́щїи слóво Егò, услышати глас словéс Егò. Благослови́те Гóспода вся Си́лы Егò, слýги Егò, творя́щїи вóлю Егò. Благослови́те Гóспода вся делá Егò, на вся́ком мéсте влады́чества Егò, благословѝ, душè моя́, Гóспода.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 103]Благословѝ, душè моя, Гóспода. Гóсподи, Бóже мой, возвеличился есѝ зелò. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своè, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегò побéгнут, от глáса грóма Твоегò убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижè обратя́тся покры́ти зéмлю. Посылáяй истóчники в дéбрех, посредè гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды̀ кáменiя дадя́т глас. Напая́яй гóры от превы́спренних Свои́х, от плодà дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винò весели́т сéрдце человéка, умáстити лицè елéем, и хлеб сéрдце человéка укрепи́т. Насы́тятся древà польскáя, кéдри Лiвáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временà, сóлнце познà зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себè. Возсiя́ сóлнце и собрáшася и в лóжах свои́х ля́гут. Изы́дет человéк на дéло своè и на дéланiе своè до вéчера. Яко возвели́чишася делà Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сiè мóре вели́кое и прострáнное, тáмо гáди, и҆́мже несть числà, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебè чáют, дáти пи́щу им во блáго врéмя. Дáвшу Тебè им соберýт, отвéрзшу Тебè рýку вся́ческая испóлнятся блáгости, отврáщшу же Тебè лицè, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегò, и сози́ждутся, и обнови́ши лицè землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животè моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душè моя́, Гóспода.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 104]Исповéдайтеся Гóсподеви, и призывáйте и́мя Егò, возвести́те во язы́цех делà Егò. Воспóйте Емý и пóйте Емý, повéдите вся чудесà Егò. Хвали́теся о и́мени святéм Егò, да возвесели́тся сéрдце и́щущих Гóспода. Взыщи́те Гóспода, и утверди́теся, взыщи́те лицà Егò вы́ну. Помяни́те чудесà Егò, я́же сотворѝ, чудесà Егò, и судьбы̀ уст Егò. Сéмя Аврáамле рабѝ Егò, сы́нове Iáковли избрáннiи Егò. Той Госпóдь Бог наш, по всей землѝ судьбы̀ Егò. Помянý в век завéт Свой, слóво, éже заповéда в ты́сящи родóв, éже завещà Авраáму, и кля́тву Свою́ Iсаáку. И постáви ю́ Iáкову в повелéнiе, и Iзрáилю в завéт вéчен, глагóля: тебè дам зéмлю Ханаáню, ýже достоя́нiя вáшего, внегдà бы́ти им мáлым числóм, малéйшим и пришéльцем в ней. И преидóша от язы́ка в язы́к, и от цáрствiя в лю́ди и́ны. Не остáви человéка оби́дети их, и обличѝ о них царѝ. Не прикасáйтеся помáзанным мои́м, и во прорóцех мои́х не лукáвнуйте. И призвà глад на зéмлю, вся́ко утвержéнiе хлéбное сотры̀. Послà пред ни́ми человéка: в рабà прóдан бысть Ióсиф. Смири́ша во окóвах нóзе eгò, желéзо прóйде душà eгò, дóндеже прiи́де слóво Егò, слóво Госпóдне разжжè eгò. Послà царь и разрешѝ eгò: князь людéй, и остáви eгò. Постáви eгò господи́на дóму своемý, и кня́зя всемý стяжáнiю своемý, наказáти кня́зи eгò я́ко себè, и стáрцы eгò умудри́ти. И вни́де Iзрáиль во Еги́пет, и Iáков пришéльствова в зéмлю Хáмову. И возрастѝ лю́ди своя́ зелó, и укрепѝ я́ пáче врагóв их. Превратѝ сéрдце их возненави́дети лю́ди Егò, лесть сотвори́ти в рабéх Егò. Послà Моисéа рабà Своегò, Аарóна, eгóже избрà Себè. Положѝ в них словесà знáменiй Свои́х, и чудéс Свои́х в землѝ Хáмове. Послà тму и помрачѝ, я́ко преогорчи́ша словесà Егò. Преложѝ вóды их в кровь, и изморѝ ры́бы их. Воскипè земля́ их жáбами в сокрóвищницах царéй их. Речè, и прiидóша пéсiя мýхи, и скни́пы во вся предéлы их. Положѝ дождѝ их грáды, огнь попаля́ющ в землѝ их, и поразѝ виногрáды их и смóквы их, и сотры̀ вся́кое дрéво предéл их. Речè, и прiидóша прýзи и гýсеницы, и́мже не бе числà. И снедóша вся́ку травý в землѝ их, и поядóша всяк плод землѝ их. И поразѝ вся́каго пéрвенца в землѝ их, начáток вся́каго трудà их, и изведè я́ с сребрóм и злáтом, и не бе в колéнах их боля́й. Возвесели́ся Еги́пет во исхождéнiи их, я́ко нападè страх их на ня. Распрострè óблак в покрóв им и огнь, éже просвети́ти им нóщiю. Проси́ша и прiидóша крáстели, и хлéба небéснаго насы́ти я́, развéрзе кáмень и потекóша вóды, потекóша в безвóдных рéки, я́ко помянý слóво святóе Своè, éже ко Авраáму, рабý Своемý. И изведè лю́ди Своя́ в рáдости, и избрáнныя Своя́ в весéлiи. И дадè им страны̀ язы́к, и труды̀ людéй наслéдоваша, я́ко да сохраня́т оправдáнiя Егò и закóна Егò взы́щут.
Чтец: Слáва Ѻтцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Хор (по кафíсме седáлен Cрéтенiя, глас 1): Сый со Отцéм на Престóле святéм,/ пришéд на зéмлю, от Дéвы роди́ся/ и Младéнец бысть, лéты Сый неопи́сан,/ Егóже прiи́м Симеóн на рýки, рáдуяся глагóлаше:// ны́не отпущáеши, Щéдре, возвесели́в рабà Твоегò.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Сый со Отцéм на Престóле святéм,/ пришéд на зéмлю, от Дéвы роди́ся/ и Младéнец бысть, лéты Сый неопи́сан,/ Егóже прiи́м Симеóн на рýки, рáдуяся глагóлаше:// ны́не отпущáеши, Щéдре, возвесели́в рабà Твоегò.
ПОЛИЕЛЕЙ
Хор: Хвали́те И҆́мя Госпóдне, хвали́те, рабѝ Гóспода.
Аллилýїа (трúжды)
(И далее хор продолжает чередовать стiхи 134 псалма и Аллилуиа)
[Псалом 134 Аллилуиа]стоя́щiи во хрáме Госпóдни, во двóрех дóму Бóга нáшего./ Хвали́те Гóспода, я́ко Благ Госпóдь, пóйте и҆́мени Егò, я́ко добрò:/ я́ко Iáкова избрà Себè Госпóдь, Iзрáиля в достоя́нiе Себè./ Я́ко аз познáх, я́ко Вéлiй Госпóдь, и Госпóдь наш над всéми бóги./ Вся ели́ка восхотè Госпóдь, сотворѝ на небесѝ и на землѝ, в моря́х и во всех бéзднах./ Возводя́ óблаки от послéдних землѝ, мóлнiи в дождь сотворѝ, изводя́й вéтры от сокрóвищ Свои́х./ И҆́же поразѝ пéрвенцы Еги́петскiя, от человéка до скотà./ Послà знáменiя и чудесà посредè Тебè, Еги́пте, на фараóна и на вся рабы̀ eгò./ И҆́же поразѝ язы́ки мнóги и избѝ царѝ крéпки:/ Сиóна, царя Аморрéйска, и Óга, царя́ Васáнска, и вся цáрствiя Ханаáнска,/ и дадè зéмлю их достоя́нiе, достоя́нiе Iзрáилю, лю́дем Свои́м./ Гóсподи, и҆́мя Твоè в век и пáмять Твоя́ в род и род:/ я́ко суди́ти и҆́мать Госпóдь лю́дем Свои́м, и о рабéх Свои́х умóлится./ Íдоли язы́к, сребрò и злáто, делá рук человéческих/ Устà и҆́мут, и не возлагóлют, óчи и҆́мут, и не ýзрят,/ ýши и҆́мут, и не услы́шат, нижè бо есть дух во устéх их./ Подóбни им да бýдут творя́щiи я́, и вси надéющiися на ня./ Дóме Iзрáилев, благослови́те Гóспода, дóме Аарóнь, благослови́те Гóспода, дóме Левíин, благослови́те Гóспода./ Боя́щiися Гóспода, благослови́те Гóспода.
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егò.
Аллилýїа (трúжды)
(И далее хор продолжает чередовать стiхи 135 псалма и Аллилуиа)
[Псалом 135 Аллилуиа]Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды̀ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ВЕЛИЧАНИЕ СРЕТЕНИЯ
Величáем Тя,/ Живодáвче Хрїстè,/ и чтим Пречúстую Мáтерь Твою́,/ Éюже по закóну ны́не// принéслся есù в храм Госпóдень.
(И далее хор продолжает чередовать стiхи Избранного псалма и Величанiе)
Продолжéнiе здесь