Неделя 32 по Пятидесятнице,перед Богоявлением, глас 7 ОБРЕЗАНИЕ ГОСПОДНЕ. ОБЕДНИЦА (Изобразительные)
14 января́ 2024 гóда. Недéля 32 по Пятидеся́тнице, пéред Богоявлéнiем, Обрéзанiе Госпóда нáшего Iисýса Хрїстà. Святúтеля Васíлiя Велúкаго, архiепúскопа Кесарíи Каппадокíйскiя. Глас 7. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе изобразúтельных.
Прежде глагóли часы. Аще имаши произволéнiе, то чти ýтреню с канóном и пéрвым чáсом, áще же ни, тóкмо часы.
ЧИН ОБЕДНИЦЫ
Глагóли сúце: Благословѝ, душè моя́, Гóспода,/ благословéн есѝ Гóсподи.
Псалом 102
Благословѝ, душè моя́, Гóспода,/ и вся внýтренняя моя и҆́мя святóе Егò./ Благословѝ, душè моя, Гóспода,/ и не забывáй всех воздая́нїй Егò,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоè:/ обновится я́ко óрля юность твоя́./ Творя́й ми́лостыни Госпóдь,/ и судьбý всем оби́димым./ Сказà путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концà прогнéвается,/ нижè во век враждýет,/ не по беззакóнїем нáшим сотвори́л есть нам,/ нижè по грехóм нáшым воздáл есть нам./ Я́ко по высотè небéсней от землѝ,/ утверди́л есть Госпóдь ми́лость Свою́ на боя́щихся Егò./ Ели́ко отстоят востóцы от зáпад,/ удáлил есть от нас беззакóнїя нáша./ Я́коже щéдрит отéц сы́ны,/ ущéдри Госпóдь боя́щихся Егò./ Я́ко Той познá создáнїе нáше,/ помянý, яко персть есмы́./ Человéк, яко травà днíе eгò,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегò./ Ми́лость же Госпóдня от вéка и до вéка на боя́щихся Егò,/ и прáвда Егò на сынéх сынóв, храня́щих завéт Егò, и пóмнящих зáповеди Егò твори́ти я./ Госпóдь на Небесѝ уготóва Престóл Свой,/ и Цáрство Егò всéми обладáет./ Благослови́те Гóспода вси Áнгели Егò,/ си́льнїи крéпостїю, творя́щїи слóво Егò, услышати глас словéс Егò./ Благослови́те Гóспода вся Си́лы Егò,/ слýги Егò, творя́щїи вóлю Егò./ Благослови́те Гóспода вся делà Егò,/ на всяком мéсте влады́чества Егò.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Благословѝ, душè моя, Гóспода,/ и вся внýтренняя моя и҆́мя святóе Егò./ Благословéн есѝ, Гóсподи.
Слáва Ѻтцý и Сы́ну и Святóму Дýху.
Псалом 145
Хвалѝ, душè моя, Гóспода./ Восхвалю́ Гóспода в животè моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгò/ и возврати́тся в зéмлю свою́./ В той день поги́бнут вся помышлéнїя eгò./ Блажéн, eмýже Бог Iáковль Помóщник егò,/ уповáнiе eгò на Гóспода Бóга своегò,/ сотвóршаго нéбо и зéмлю,/ мóре и вся, я́же в них,/ храня́щаго и҆́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы̀./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
ЕДИНОРОДНЫЙ СЫНЕ
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстè Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями из Октоиха
Хор: Во Цáрствiи Твоéм помянù нас, Гóсподи,/ егдà прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Чтец (стiхúры воскрéсные, глас 7): Красéн бе и добр в снедь, и҆́же менè умертви́вый плод:/ Хрїстóс есть Дрéво живóтное,/ от Негóже яды́й не умирáю,/ но вопiю́ с разбóйником:// помянѝ мя Гóсподи, во Цáрствiи Твоéм.
Хор: Блажéни плáчущiи,/ я́ко тíи утéшатся.
Чтец: На Крест вознéсся Щéдре,/ Адáмово рукописáнiе дрéвняго грехá заглáдил есѝ,/ и спасл есѝ от прéлести весь род человéческiй.// Тéмже воспевáем Тя, благодéтелю Гóсподи.
На 10. Хор: Блажéни крóтцыи,/ я́ко тíи наслéдят зéмлю.
Чтец: Пригвозди́л есѝ на Крестè Щéдре, грехѝ нáша Хрїстè,/ и Твоéю смéртiю смерть умертви́л есѝ/ воздви́гнувый умéршiя из мéртвых:// тéмже покланя́емся Твоемý святóму воскресéнiю.
Хор: Блажéни áлчущiи и жáждущiи прáвды,/ я́ко тíи насы́тятся.
Чтец: Излiя́ яд змiй в слýхи Éвины иногдá:/ Хрїстóс же на Дрéве крéстнем источи́л есть мíрови жи́зни слáдость./ Тéмже взывáем:// помянѝ нас Гóсподи, во Цáрствiи Твоéм.
На 8. Хор: Блажéни мúлостивiи,/ я́ко тíи помúловани бýдут.
Чтец (стiхúры Обрéзанія, глас 2): Слóво воплóщшееся Пресýщественное в престáтiе закóна обрéзася,// начáток же Божéственныя благодáти и жи́зни нетлéнныя нам подадè.
Хор: Блажéни чúстiи сéрдцем,/ я́ко тíи Бóга ýзрят.
Чтец: Слóво воплóщшееся Пресýщественное в престáтiе закóна обрéзася,// начáток же Божéственныя благодáти и жи́зни нетлéнныя нам подадè.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: Закóна исполни́тель, не я́ко сопроти́вен Бóгу сый, Хрїстóс воплоти́выйся показáся// и сподóбися вóлею обрéзатися осмоднéвен.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Закóна исполни́тель, не я́ко сопроти́вен Бóгу сый, Хрїстóс воплоти́выйся показáся// и сподóбися вóлею обрéзатися осмоднéвен.
На 4. Хор: Блажéни естè, егдà понóсят вам,/ и изженýт, и рекýт всяк зол глагóл на вы лжýще Менè рáди.
Чтец (стiхúры святúтеля, глас 2): Напитáл еси́ дýши, тáющiя глáдом, ни́щих оби́льно// и áлчущих сердцá вся́каго испóлнил еси́, Васíлiе, Божéственнаго весéлiя.
Хор: Рáдуйтеся и веселúтеся, я́ко мзда вáша мнóга на Небесéх.
Чтец: Напитáл еси́ богáтно áлчущiя пи́щею Небéсною:/ хлеб бо Áнгельскiй есть слóво твоé, Васíлiе,// и́мже изря́ден пшеницодáвец был еси́.
Хор: Слáва Ѻтцý и Сы́ну и Святóму Дýху.
Чтец: Потщáлся еси́ мíра отлучи́тися и с Бóгом пожи́ти,/ тéмже нестоя́тельная и тлéнная, всеблажéнне Васíлiе, остáвль,// пребывáющая, я́ко мудр, стяжáл еси́.
Хор: И ны́не и прúсно и во вéки векóв. Амúнь.
Богорóдичен: Спаси́ от бед рабы́ Твоя́, Богорóдице,/ я́ко вси по Бóзе к Тебé прибегáем,// я́ко к Неруши́мей Стенà и Предстáтельству.
Тропари и кондаки
Тропáрь воскрéсный, глас 7: Разруши́л есѝ Крестóм Твои́м смерть,/ отвéрзл есѝ разбóйнику рай;/ мvронóсицам плач преложи́л есѝ/ и Апóстолом проповéдати повелéл есѝ/, я́ко воскрéсл есѝ, Хрїстè Бóже,/ дáруяй мíрови// вéлiю ми́лость.
Тропáрь Обрéзанія, глас 1: На Престóле огнезрáчнем/ в Вы́шних седя́й со Отцéм Безначáльным и Божéственным Твои́м Дýхом,/ благоволи́л есѝ роди́тися на землѝ/ от Отрокови́цы Неискусомýжныя, Твоея́ Мáтере, Iисýсе,/ сегò рáди и обрéзан был есѝ, я́ко Человéк осмоднéвный./ Слáва всеблагóму Твоемý совéту,/ слáва смотрéнiю Твоемý,// слáва снизхождéнiю Твоемý, Еди́не Человеколю́бче.
Тропáрь Святúтеля, глас 1: Во всю зéмлю изы́де вещáнiе твоè,/ я́ко прiéмшую слóво твоè,/ и́мже боголéпно научи́л есѝ,/ естествò сýщих уясни́л есѝ,/ человéческiя обы́чаи украси́л есѝ,/ цáрское свящéнiе, óтче преподóбне,/ молѝ Хрїстá Бóга// спасти́ся душáм нáшим.
Слáва Ѻтцý и Сы́ну и Святóму Дýху.
Кондáк Васíлiя Велúкаго, глас 4: Яви́лся еси́ основáнiе непоколеби́мое Цéркве,/ подая́ всем некрадóмое госпóдьство человéком,/ запечатлéя твои́ми велéньми,// небоявлéнне Васíлiе преподóбне.
И ны́не и прúсно и во вéки векóв, амúнь.
Кондáк прáздника, глас 3: Всех Госпóдь обрéзанiе терпи́т/ и человéческая прегрешéнiя, я́ко Благ, обрéзует,/ даéт спасéнiе днесь мíру./ Рáдуется же в Вы́шних и Создáтелев iерáрх,// и светонóсный, Божéственный таи́нник Хрїстóв Васíлiй.
Трисвятое
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас. (3 рáза)
Хор: Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас.
Прокимен недели перед Богоявлением, глас 6
Чтец: Прокíмен, глас шесты́й, псалóм Давíдов. Спасѝ, Гóсподи, лю́ди Твоя́, и благословѝ достоя́нiе Твоè. (Пс.27:9А)
Хор: Спасù, Гóсподи, лю́ди Твоя́, и благословù достоя́нiе Твоè.
Чтец: К Тебè, Гóсподи, воззовý, Бóже мой, да не премолчи́ши от менè. (Пс.27:1А)
Хор: Спасù, Гóсподи, лю́ди Твоя́, и благословù достоя́нiе Твоè.
Прокимен святителя, глас 1
Чтец: Прокíмен, глас пéрвый, псалóм Давíдов: Устá моя́ возглагóлют премýдрость,/ и поучéнiе сéрдца моегó рáзум. (Пс.48:4)
Хор: Устá моя́ возглагóлют премýдрость,/ и поучéнiе сéрдца моегó рáзум.
АПОСТОЛ
Чтец: К Тiмофéю послáнiя святáго апóстола Пáвла чтéнiе.
(2Тим.зач.298): Чáдо Тiмофéе, трезви́ся о всем, злопостражди́, дéло сотвори́ благовéстника, служéнiе твоé извéстно сотвори́. Аз бо ужé жрен бывáю, и врéмя моегò отшéствiя настà. Пóдвигом дóбрым подвизáхся, течéнiе скончáх, вéру соблюдóх, прóчее ýбо соблюдáется ми венéц прáвды, егóже воздáст ми Госпóдь в день он, прáведный Судiя́, не тóкмо же мне, но и всем возлю́бльшым явлéнiе Егò.
[Синодальный перевод]Сын мой Тимофей, будь бдителен во всем, переноси скорби, совершай дело благовестника, исполняй служение твое. Ибо я уже становлюсь жертвою, и время моего отшествия настало. Подвигом добрым я подвизался, течение совершил, веру сохранил; а теперь готовится мне венец правды, который даст мне Господь, праведный Судия, в день оный; и не только мне, но и всем, возлюбившим явление Его. (2Тим.4:5-8)
(Кол.зач.254(под зачáло): Брáтiе, блюди́теся, да никтóже вас бýдет прельщáя филосóфiею и тщéтною лéстiю, по предáнiю человéческому, по стихíам мíра, а не по Хрїстé. Я́ко в том живéт вся́ко исполнéнiе Божествà телéсне. И да бýдете в Нем испóлнени, и́же есть главà вся́кому начáлу и влáсти; о Нéмже и обрéзани бы́сте обрéзанiем нерукотворéнным, в совлечéнiи тéла грехóвнаго плóти, во обрéзанiи Хрїстóве, спогрéбшеся Емý крещéнiем; о Нéмже и совостáсте вéрою, дéйством Бóга, воскреси́вшаго Егò из мéртвых.
[Синодальный перевод]Братия, смотрите, чтобы кто не увлек вас философиею и пустым обольщением, по преданию человеческому, по стихиям мира, а не по Христу; ибо в Нем обитает вся полнота Божества телесно, и вы имеете полноту в Нем, Который есть глава всякого начальства и власти. В Нем вы и обрезаны обрезанием нерукотворенным, совлечением греховного тела плоти, обрезанием Христовым; быв погребены с Ним в крещении, в Нем вы и совоскресли верою в силу Бога, Который воскресил Его из мертвых. (Кол 2:8-12)
(Евр.зач.318А): Брáтiе, такóв нам подобáше Архiерéй, преподóбен, незлóбив, безсквéрнен, отлучéн от грéшник и вы́шше Небéс быв. Иже не и́мать по вся дни нýжды, я́коже первосвящéнницы, прéжде о свои́х гресéх жéртвы приноси́ти, потóм же о людски́х: сiè бо сотвори́ еди́ною, Себè принéс. Закóн бо человéки поставля́ет первосвящéнники, имýщыя нéмощь, слóво же кля́твенное, éже по закóне, Сына во вéки совершéнна. Главà же о глагóлемых: таковà и́мамы Первосвящéнника, и́же сéде одеснýю Престóла Вели́чествiя на Небесéх, святы́м служи́тель и ски́нiи и́стинней, ю́же водрузи́ Госпóдь, а не человéк.
[Синодальный перевод]Братия, таков и должен быть у нас Первосвященник: святой, непричастный злу, непорочный, отделенный от грешников и превознесенный выше небес, Который не имеет нужды ежедневно, как те первосвященники, приносить жертвы сперва за свои грехи, потом за грехи народа, ибо Он совершил это однажды, принеся в жертву Себя Самого. Ибо закон поставляет первосвященниками людей, имеющих немощи; а слово клятвенное, после закона, поставило Сына, на веки совершенного. Главное же в том, о чем говорим, есть то: мы имеем такого Первосвященника, Который воссел одесную престола величия на небесах и есть служитель святилища и скинии истинной, которую воздвиг Господь, а не человек. (Евр.7:26-8:2)
Аллилуиарий воскресный, глас 8
Чтец: Аллилýїа, аллилýїа, аллилýїа, глас осьмы́й, псалóм Давíдов.
Хор: Аллилýїа, аллилýїа, аллилýїа.
Чтец: Бóже, ущéдри ны и благослови ны, просвети лицé Твоé на ны и помилуй ны. (Пс.66:2)
Хор: Аллилýїа, аллилýїа, аллилýїа.
Чтец: Познáти на земли путь Твой, во всех языцех спасéнiе Твоé. (Пс.66:3)
Хор: Аллилýїа, аллилýїа, аллилýїа.
Аллилуарий обрезания, глас 8
Чтец: Аллилýїа, глас тóйже: Пасы́й Iзрáиля вонми́, наставля́яй я́ко овчá Ióсифа. (Пс.79:2А)
Хор: Аллилýїа, аллилýїа, аллилýїа.
Чтец: Устá прáведнаго поучáтся премýдрости, и язы́к егó возглагóлет суд. (Пс.36:30)
Хор: Аллилýїа, аллилýїа, аллилýїа.
ЕВАНГЕЛИЕ
От Мáрка Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мк.зач.1): Зачáло Евáнгелiя Iисýса Хрїстá, Сы́на Бóжiя, я́коже есть пи́сано во прорóцех: се Аз посылáю Áнгела Моегó пред лицéм Твои́м, и́же уготóвит путь Твой пред Тобóю. Глас вопiю́щаго в пусты́ни: уготóвайте путь Госпóдень, прáвы твори́те стези́ Егó. Бысть Iоáнн, крестя́й в пусты́ни, и проповéдая крещéнiе покая́нiя во отпущéнiе грехóв. И исхождáше к немý вся Iудéйская странá и iерусали́мляне, и крещáхуся вси во Iордáне рецé от негó, исповéдающе грехи́ своя́. Бе же Iоáнн оболчéн власы́ вельблýжди, и пóяс усмéн о чреслéх егó, и яды́й акрíды, и мед ди́вiй. И проповéдаше, глагóля: грядéт Крéплiй менé, во след менé, Емýже несмь достóин, преклóнься, разреши́ти ремéнь сапóг Егó. Аз ýбо крести́х вы в водé, Той же крести́т вы Дýхом Святы́м.
[Синодальный перевод]Начало Евангелия Иисуса Христа, Сына Божия, как написано у пророков: вот, Я посылаю Ангела Моего пред лицом Твоим, который приготовит путь Твой пред Тобою. Глас вопиющего в пустыне: приготовьте путь Господу, прямыми сделайте стези Ему. Явился Иоанн, крестя в пустыне и проповедуя крещение покаяния для прощения грехов. И выходили к нему вся страна Иудейская и Иерусалимляне, и крестились от него все в реке Иордане, исповедуя грехи свои. Иоанн же носил одежду из верблюжьего волоса и пояс кожаный на чреслах своих, и ел акриды и дикий мед. И проповедовал, говоря: идет за мною Сильнейший меня, у Которого я недостоин, наклонившись, развязать ремень обуви Его; я крестил вас водою, а Он будет крестить вас Духом Святым.(Мк.1:1-8)
(Лк.зач.6(под зачáло): И возврати́шася пáстырiе, слáвяще и хвáляще Бóга о всех, я́же слы́шаша и ви́деша, я́коже глагóлано бысть к ним. И егдá испóлнишася осмь днiй, да обрéжут Егó, и нарекóша и́мя Емý Iисýс, наречéнное Áнгелом прéжде дáже не зачáтся во чрéве. Отрочá же растя́ше, и крепля́шеся дýхом, исполня́яся премýдрости, и благодáть Бóжiя бе на Нем. И хождáста роди́теля Егó на вся́ко лéто во Iерусали́м в прáздник пáсхи. И егдá бысть двоюнáдесяте лéту, восходя́щым им во Iерусали́м по обы́чаю прáздника. И скончáвшым дни, и возвращáющимся им, остá óтрок Iисýс во Iерусали́ме. И не разумé Ióсиф и Мáти Егó. Мнéвша же Егó во дружи́не сýща, преидóста дне путь, и искáста Егó во срóдницех, и в знáемых. И не обрéтша Егó, возврати́стася во Iерусали́м, взыскáюща Егó. И бысть, по трiéх днех, обретóста Егó в цéркви, седя́ща посредé учи́телей, и послýшающа их, и вопрошáюща их. Ужасáхуся же вси послýшающiи Егó о рáзуме и о отвéтех Егó. И ви́девша Егó, диви́стася, и к Немý Мáти Егó речé: Чáдо, что сотвори́ нáма тáко? Се, отéц Твой и Аз боля́ща искáхома Тебé. И речé к ни́ма: что я́ко искáста Менé? Не вéста ли, я́ко в тех, я́же Отцá Моегó, достóит бы́ти Ми? И та не разумéста глагóла, и́же глагóла и́ма. И сни́де с ни́ма, и прiи́де в Назарéт, и бе повинýяся и́ма. И Мáти Егó соблюдáше вся глагóлы сiя́ в сéрдцы Своéм. И Iисýс преспевáше премýдростiю и вóзрастом, и благодáтiю от Бóга и человéк.
[Синодальный перевод]И возвратились пастухи, славя и хваля Бога за всё то, что слышали и видели, как им сказано было. По прошествии восьми дней, когда надлежало обрезать Младенца, дали Ему имя Иисус, нареченное Ангелом прежде зачатия Его во чреве. Младенец же возрастал и укреплялся духом, исполняясь премудрости, и благодать Божия была на Нем. Каждый год родители Его ходили в Иерусалим на праздник Пасхи. И когда Он был двенадцати лет, пришли они также по обычаю в Иерусалим на праздник. Когда же, по окончании дней праздника, возвращались, остался Отрок Иисус в Иерусалиме; и не заметили того Иосиф и Матерь Его,но думали, что Он идет с другими. Пройдя же дневной путь, стали искать Его между родственниками и знакомыми и, не найдя Его, возвратились в Иерусалим, ища Его. Через три дня нашли Его в храме, сидящего посреди учителей, слушающего их и спрашивающего их; все слушавшие Его дивились разуму и ответам Его. И, увидев Его, удивились; и Матерь Его сказала Ему: Чадо! что Ты сделал с нами? Вот, отец Твой и Я с великою скорбью искали Тебя. Он сказал им: зачем было вам искать Меня? или вы не знали, что Мне должно быть в том, что принадлежит Отцу Моему? Но они не поняли сказанных Им слов. И Он пошел с ними и пришел в Назарет; и был в повиновении у них. И Матерь Его сохраняла все слова сии в сердце Своем. Иисус же преуспевал в премудрости и возрасте и в любви у Бога и человеков. (Лк.2:20-21,40-52)
(Лк.зач.24): Во врéмя óно, ста Iисýс на мéсте рáвне, и нарóд учени́к Егó, и мнóжество мнóго людéй от всея́ Iудéи и Iерусали́ма, и помóрiя Ти́рска и Сiдóнска, и́же прiидóша послýшати Егó и исцели́тися от недýг свои́х, и стрáждущiи от дух нечи́стых, и исцеля́хуся. И весь нарóд искáше прикасáтися Емý, я́ко си́ла от Негó исхождáше, и исцеля́ше вся. И той возвéд óчи своѝ на ученики́ своя́, глагóлаше: блажéни ни́щiи дýхом, я́ко вáше есть Цáрствiе Бóжiе. Блажéни, áлчущiи ны́не, я́ко насы́титеся. Блажéни, плáчущiи ны́не, я́ко возсмеéтеся. Блажéни бýдете, егдá возненави́дят вас человéцы, и егдá разлучáт вы и понóсят, и пронесýт и́мя вáше я́ко зло, Сы́на Человéческаго рáди. Возрáдуйтеся в той день и взыгрáйте: се бо мзда вáша мнóга на небесѝ.
[Синодальный перевод]В те дни стал Иисус на ровном месте, и множество учеников Его, и много народа из всей Иудеи и Иерусалима и приморских мест Тирских и Сидонских, которые пришли послушать Его и исцелиться от болезней своих, также и страждущие от нечистых духов; и исцелялись. И весь народ искал прикасаться к Нему, потому что от Него исходила сила и исцеляла всех. И Он, возведя очи Свои на учеников Своих, говорил: Блаженны алчущие ныне, ибо насытитесь. Блаженны вы, когда возненавидят вас люди и когда отлучат вас, и будут поносить, и пронесут имя ваше, как бесчестное, за Сына Человеческого. Возрадуйтесь в тот день и возвеселитесь, ибо велика вам награда на небесах. (Лк.6:17-23А)
Хор: Слáва Тебè, Гóсподи, слáва Тебè.
Помянѝ нас, Гóсподи, егдà прїи́деши во Цáрствiи Твоéм.
Помянѝ нас, Влады́ко, егдà прїи́деши во Цáрствiи Твоéм.
Помянѝ нас, Святы́й, егдà прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стiх: Приступи́те к Немý и просвети́теся, и лицà вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцà, Вседержи́теля, Творцà нéбу и землѝ, ви́димым же всем и неви́димым. И во Еди́наго Гóспода Iисýса Хрїстà, Сы́на Бóжiя, Единорóднаго, И҆́же от Ѻтцà Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пiлáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесà и седя́ща одеснýю Ѻтцà. И пáки грядýщаго со слáвою суди́ти живы́м и мéртвым, Егóже Цáрствiю не бýдет концà. И в Дýха Святáго, Гóспода, Животворя́щаго, И҆́же от Ѻтцà исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, простѝ Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умè и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
КОНДАК
Кондáк прáздника, глас 3: Всех Госпóдь обрéзанiе терпи́т/ и человéческая прегрешéнiя, я́ко Благ, обрéзует,/ даéт спасéнiе днесь мíру./ Рáдуется же в Вы́шних и Создáтелев iерáрх,// и светонóсный, Божéственный таи́нник Хрїстóв Васíлiй.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винà, благоволѝ же и о мне грéшнем, утвердѝ, вразумѝ сéрдце моè, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 рáза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалà Егò во устéх мои́х./ О Гóсподе похвáлится душà моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егò вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицà вáша не постыдя́тся./ Сей ни́щiй воззвà, и Госпóдь услы́ша и҆̀,/ и от всех скорбéй егò спасè и҆̀./ Ополчи́тся Áнгел Госпóдень óкрест боя́щихся Егò,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егò,/ яко несть лишéнiя боя́щымся Егò./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./ Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егò в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютà,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негò.
Вместо Достойно есть
Хор: О Тебé рáдуется, Благодáтная вся́кая тварь,/ Áнгельский собóр и человéческiй род,/ освящéнный хрáме и раю́ словéсный,/ дéвственная похвалó,/ из Нея́же Бог воплоти́ся,/ и Младéнец бысть, прéжде век Сый Бог наш:/ ложеснá бо Твоя престóл сотвори́/ и чрéво Твоé прострáннее Небéс содéла.// О Тебé рáдуется, Благодáтная, вся́кая тварь, слáва Тебé.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи, помúлуй. (3 рáза)
Гóсподи, благословᴎ́.
ОТПУСТ
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и́же во святы́х отцà нáшего Васíлiя Вели́каго, архiепи́скопа Кесарíи Каппадокíйскiя, и всех святы́х, поми́лует и спасéт нас, я́ко Благ и Человеколю́бец.