Рождество Господа и Бога и Спаса нашего Иисуса Христа. ОБЕДНИЦА (Изобразительные)
7 января́ 2024 гóда. Рождествò Гóспода и Бóга и Спáса нáшего Iисýса Хрїстà. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе изобразúтельных.
Прежде глагóли часы. Аще имаши произволéнiе, то чти ýтреню с канóном и пéрвым чáсом, áще же ни, тóкмо часы.
ЧИН ОБЕДНИЦЫ
ПЕРВЫЙ АНТИФОН, глас 2
Стiх 1: Исповéмся Тебè Гóсподи всем сéрдцем мои́м,/ повéм вся чудесà Твоя́.(Пс.9:2)
Хор: Молúтвами Богорóдицы, Спáсе, спасù нас.
Стiх 2: В совéте прáвых и сóнме, вéлiя делà Госпóдня.(Пс.110:1Б-2А)
Хор: Молúтвами Богорóдицы, Спáсе, спасù нас.
Стiх 3: Изы́скана во всех вóлях Егò.(Пс.110:2Б)
Хор: Молúтвами Богорóдицы, Спáсе, спасù нас.
Стiх 4: Исповéданiе и великолéпiе дéло Егò, и прáвда Егò пребывáет в век вéка.(Пс.110:3)
Хор: Молúтвами Богорóдицы, Спáсе, спасù нас.
Чтец: Слáва Ѻтцý и Сы́ну и Святóму Дýху, и ны́не и при́сно и во вéки векóв, ами́нь.
Хор: Молúтвами Богорóдицы, Спáсе, спасù нас.
ВТОРОЙ АНТИФОН, глас 2
Стiх 1: Блажéн муж боя́йся Гóспода, в зáповедех Егò восхóщет зелò.(Пс.111:1)
Хор: Спасù ны, Сы́не Бóжiй,/ рождéйся от Дéвы, пою́щiя Ти:// аллилýїа.
Стiх 2: Си́льно на землѝ бýдет сéмя егò, род прáвых благослови́тся.(Пс.111:2)
Хор: Спасù ны, Сы́не Бóжiй,/ рождéйся от Дéвы, пою́щiя Ти:// аллилýїа.
Стiх 3: Слáва и богáтство в домý Егò, и прáвда Егò пребывáет в век вéка.(Пс.111:3)
Хор: Спасù ны, Сы́не Бóжiй,/ рождéйся от Дéвы, пою́щiя Ти:// аллилýїа.
Стiх 4: Возсiя во тьме свет прáвым, ми́лостив и щедр, и прáведен.(Пс.111:4)
Хор: Спасù ны, Сы́не Бóжiй,/ рождéйся от Дéвы, пою́щiя Ти:// аллилýїа.
Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
ЕДИНОРОДНЫЙ СЫНЕ
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстè Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
ТРЕТИЙ АНТИФОН глас 4
Стiх 1: Речè Госпóдь Гóсподеви моемý: седѝ одеснýю Менè.(Пс.109:1А)
Хор (тропáрь прáздника, глас 4): Рождествò Твоè, Хрїстè Бóже наш,/ возсiя́ мíрови свет рáзума,/ в нем бо звездáм служáщiи/ звездóю учáхуся/ Тебè клáнятися, Сóлнцу Прáвды,/ и Тебè вéдети с высоты̀ востóка.// Гóсподи, слáва Тебè!
Стiх 2: Дóндеже положý врагѝ Твоя́ поднóжiе ног Твои́х. (Пс.109:1Б)
Хор: Рождествò Твоè, Хрїстè Бóже наш,/ возсiя́ мíрови свет рáзума,/ в нем бо звездáм служáщiи/ звездóю учáхуся/ Тебè клáнятися, Сóлнцу Прáвды,/ и Тебè вéдети с высоты̀ востóка.// Гóсподи, слáва Тебè!
Стiх 3: Жезл си́лы пóслет Ти Госпóдь от Сióна, и госпóдьствуй посредè врагóв Твои́х. (Пс.109:2)
Хор: Рождествò Твоè, Хрїстè Бóже наш,/ возсiя́ мíрови свет рáзума,/ в нем бо звездáм служáщiи/ звездóю учáхуся/ Тебè клáнятися, Сóлнцу Прáвды,/ и Тебè вéдети с высоты̀ востóка.// Гóсподи, слáва Тебè!
Стiх 4: С Тобóю начáло в день си́лы Твоея́ во свéтлостех святы́х Твои́х.(Пс.109:3А)
Хор: Рождествò Твоè, Хрїстè Бóже наш,/ возсiя́ мíрови свет рáзума,/ в нем бо звездáм служáщiи/ звездóю учáхуся/ Тебè клáнятися, Сóлнцу Прáвды,/ и Тебè вéдети с высоты̀ востóка.// Гóсподи, слáва Тебè!
Тропари и кондаки
Тропáрь прáздника, глас 4: Рождествò Твоè, Хрїстè Бóже наш,/ возсiя́ мíрови свет рáзума,/ в нем бо звездáм служáщiи/ звездóю учáхуся/ Тебè клáнятися, Сóлнцу Прáвды,/ и Тебè вéдети с высоты̀ востóка.// Гóсподи, слáва Тебè!
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Кондáк прáздника, глас 3: Дéва днесь Пресýщественнаго раждáет,/ и земля́ вертéп Непристýпному принóсит./ Áнгели с пáстырьми славослóвят,/ волсвù же со звездóю путешéствуют:/ нас бо рáди родúся// Oтрочà Млáдо, Превéчный Бог.
Вместо Трисвятого
Хор: Елúцы во Хрїстà крестúстеся,/ во Хрїстà облекóстеся.// Аллилýїа. (Трúжды)
Хор: Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
Хор: Во Хрїстà облекóстеся.// Аллилýїа.
Хор: Елúцы во Хрїстà крестúстеся,/ во Хрїстà облекóстеся.// Аллилýїа.(Гал.3:27)
Прокимен Рождества
Чтец: Прокíмен, глас осьмы́й, псалóм Давíдов: Вся земля́ да поклóнится Тебè и поéт Тебè, да поéт же И҆́мени Твоемý Вы́шнiй. (Пс.65:4)
Хор: Вся земля́ да поклóнится Тебè и поéт Тебè,/ да поéт же И҆́мени Твоемý Вы́шнiй.
Чтец: Воскли́кните Гóсподеви, вся земля́, пóйте же И҆́мени Егò, дади́те слáву хвалè Егò.(Пс.65:2)
Хор: Вся земля́ да поклóнится Тебè и поéт Тебè,/ да поéт же И҆́мени Твоемý Вы́шнiй.
Чтец: Вся земля́ да поклóнится Тебè и поéт Тебè.
Хор: Да поéт же И҆́мени Твоемý Вы́шнiй.
АПОСТОЛ
Чтец: К Галáтом послáнiя святáго апóстола Пáвла чтéнiе.
(Гал.зач.209): Брáтiе, егдà прiи́де кончи́на лéта, послà Бог Сы́на Своегò Eдинорóднаго, раждáемаго от жены̀, бывáема под закóном, да подзакóнныя искýпит, да всыновлéнiе воспрiи́мем. Да я́ко eстè сы́нове, послà Бог Дýха Сы́на Своегò в сердцà вáша, вопiю́ща: Áвва, Óтче. Тéмже ужè нéси раб, но сын: áще ли же сын, и наслéдник Бóжїй Iисýс Хрїстóм.
[Синодальный перевод]Братья, когда пришла полнота времени, Бог послал Сына Своего Единородного, Который родился от жены, подчинился закону, чтобы искупить подзаконных, дабы нам получить усыновление. А как вы - сыны, то Бог послал в сердца ваши Духа Сына Своего, вопиющего: «Авва, Отче!» Посему ты уже не раб, но сын; а если сын, то и наследник Божий через Иисуса Христа. (Гал. 4:4-7)
Аллилуиарий
Чтец: Аллилýїа, аллилýїа, аллилýїа, глас пéрвый, псалóм Давíдов:
Хор: Аллилýїа, аллилýїа, аллилýїа.
Чтец: Небесà повéдают слáву Бóжiю, творéнiе же рукý Егò возвещáет твердь.(Пс.18:2)
Хор: Аллилýїа, аллилýїа, аллилýїа.
Чтец: День дни отрыгáет глагóл, и нощь нóщи возвещáет рáзум. (Пс.18:3)
Хор: Аллилýїа, аллилýїа, аллилýїа.
ЕВАНГЕЛИЕ
От Матфéя Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мф.зач.3): Iисýсу рóждшуся в Вифлеéме Iудéйстем во дни И́рода царя́, се волсвѝ от востóк прiидóша во Iерусали́м, глагóлюще: где есть рождéйся Царь Iудéйскiй? Ви́дехом бо звездý Егò на востóце и прiидóхом поклони́тися Емý. Слы́шав же, И́род царь смути́ся, и весь Iерусали́м с ним. И собрáв вся первосвящéнники и кни́жники людскíя, вопрошáше от них: где Хрїстóс раждáется? Онѝ же рекóша емý: в Вифлеéме Iудéйстем; тáко бо пи́сано есть прорóком: и ты, Вифлеéме, землè Iýдова, ничи́мже мéньши есѝ во влады́ках Iýдовых, из тебè бо изы́дет Вождь, и́же упасéт лю́ди Моя́ Iзрáиля. Тогдà И́род тай призвà волхвы̀ и испы́товаше от них врéмя я́вльшiяся звезды̀. И, послáв их в Вифлеéм, речè: шéдше, испытáйте извéстно о Отрочáти; егдà же обря́щете, возвести́те ми, я́ко да и аз, шед, поклоню́ся Емý. Онѝ же, послýшавше царя́, идóша. И сe звездà, ю́же ви́деша на востóце, идя́ше пред ни́ми, дóндеже, пришéдше, ста верхý, идéже бе Отрочà. Ви́девше же звездý, возрáдовашася рáдостiю вéлiею зелò. И, пришéдше в хрáмину, ви́деша Отрочà с Марíею, Мáтерiю Егò, и, пáдше, поклони́шася Емý, и, отвéрзше сокрóвища своя́, принесóша Емý дáры, злáто, и лiвáн, и сми́рну. И, весть прiéмше во сне, не возврати́тися ко И́роду, ины́м путéм отыдóша во странý свою́.
[Синодальный перевод]Когда Иисус родился в Вифлееме Иудейском во дни Ирода царя, вот, волхвы от восточных стран прибыли в Иерусалим и говорят: «Где родившийся Царь Иудейский? Ибо мы видели звезду Его на востоке и пришли поклониться Ему». Услышав же это, царь Ирод встревожился, и весь Иерусалим с ним. И собрав всех первосвященников и книжников народных, спрашивал у них: «Где родится Христос?» Они же сказали ему: в Вифлееме Иудейском, ибо так написано чрез пророка: «И ты, Вифлеем, земля Иудина, ничуть не меньший среди правителей Иудиных; ибо из тебя произойдет Вождь, Который будет пасти народ Мой, Израиля». Тогда Ирод, тайно призвав волхвов, точно выведал от них время появления звезды. И послав их в Вифлеем, сказал: «Пойдите, точно разведайте о Младенце, а когда найдете, возвестите мне, чтобы и я пришел поклониться Ему». Они же, выслушав царя, пошли. И вот, звезда, которую видели они на востоке, шла перед ними, пока не пришла и не стала над местом, где был Младенец. Увидев же звезду, они возрадовались радостью весьма великою. И войдя в дом, увидели Младенца с Марией, Матерью Его, и пав ниц, поклонились Ему; и открыв сокровища свои, принесли Ему дары: золото, ладан и смирну. И получив во сне откровение не возвращаться к Ироду, иным путем удалились в страну свою. (Мф 2:1-12)
Хор: Слáва Тебè, Гóсподи, слáва Тебè.
Помянѝ нас, Гóсподи, егдà прїи́деши во Цáрствiи Твоéм.
Помянѝ нас, Влады́ко, егдà прїи́деши во Цáрствiи Твоéм.
Помянѝ нас, Святы́й, егдà прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стiх: Приступи́те к Немý и просвети́теся, и лицà вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцà, Вседержи́теля, Творцà нéбу и землѝ, ви́димым же всем и неви́димым. И во Еди́наго Гóспода Iисýса Хрїстà, Сы́на Бóжiя, Единорóднаго, И҆́же от Ѻтцà Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пiлáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесà и седя́ща одеснýю Ѻтцà. И пáки грядýщаго со слáвою суди́ти живы́м и мéртвым, Егóже Цáрствiю не бýдет концà. И в Дýха Святáго, Гóспода, Животворя́щаго, И҆́же от Ѻтцà исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, простѝ Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умè и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
КОНДАК
Кондáк прáздника, глас 3: Дéва днесь Пресýщественнаго раждáет,/ и земля́ вертéп Непристýпному принóсит./ Áнгели с пáстырьми славослóвят,/ волсвѝ же со звездóю путешéствуют:/ нас бо рáди роди́ся// Oтрочà Млáдо, Превéчный Бог.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винà, благоволѝ же и о мне грéшнем, утвердѝ, вразумѝ сéрдце моè, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 рáза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалà Егò во устéх мои́х./ О Гóсподе похвáлится душà моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егò вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицà вáша не постыдя́тся./ Сей ни́щiй воззвà, и Госпóдь услы́ша и҆̀,/ и от всех скорбéй егò спасè и҆̀./ Ополчи́тся Áнгел Госпóдень óкрест боя́щихся Егò,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егò,/ яко несть лишéнiя боя́щымся Егò./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./ Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егò в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютà,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негò.
Вместо Достойно есть (задостóйник прáздника)
Хор: Величáй, душè моя́,// Честнéйшую и Слáвнейшую Гóрних вóинств, Дéву Пречúстую, Богорóдицу.
Iрмóс (глас 1): Любúти ýбо нам, я́ко безбéдное стрáхом/ удóбее молчáнiе,/ любóвiю же, Дéво,/ пéсни ткáти, спротяжéнно сложéнныя, неудóбно есть;// но и, Мáти, сúлу, елúко есть произволéнiе, даждь.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи, помúлуй. (3 рáза)
Гóсподи, благословᴎ́.
ОТПУСТ
И҆́же в вертéпе Роди́выйся и в я́слех возлегíй, нáшего рáди спасéнiя, Хрїстóс, И҆́стинный Бог наш, моли́твами Пречи́стыя Своея́ Мáтере и всех святы́х, поми́лует и спасéт нас, я́ко Благ и Человеколю́бец.
(По традиции, по отпусте на середине храма перед праздничной иконой поют)
Хор (тропáрь прáздника, глас 4): Рождествò Твоè, Хрїстè Бóже наш,/ возсiя́ мíрови свет рáзума,/ в нем бо звездáм служáщiи/ звездóю учáхуся/ Тебè клáнятися, Сóлнцу Прáвды,/ и Тебè вéдети с высоты̀ востóка.// Гóсподи, слáва Тебè!
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Кондáк прáздника, глас 3: Дéва днесь Пресýщественнаго раждáет,/ и земля́ вертéп Непристýпному принóсит./ Áнгели с пáстырьми славослóвят,/ волсвù же со звездóю путешéствуют:/ нас бо рáди родúся// Oтрочà Млáдо, Превéчный Бог.
ВЕЛИЧАНИЕ ПРАЗДНИКА
Хор: Величáем Тя,/ Живодáвче Хрїстè,/ нас рáди ныне плóтiю рóждшагося// от Безневéстныя и Пречúстыя Дéвы Марíи.