Святых славных и всехвальных первоверховных апостолов ПЕТРА И ПАВЛА.ВСЕНОЩНОЕ БДЕНИЕ ВЕЛИКАЯ ВЕЧЕРНЯ
12 ию́ля 2023 гóда. Святы́х слáвных и всехвáльных первоверхóвных апóстолов Петрá и Пáвла. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Слáва Тебè, Бóже наш, слáва Тебè.
Царю́ Небéсный, Утéшителю, Дýше И҆́стины, И҆́же вездé сый и вся исполня́яй, Сокрóвище благи́х и жи́зни Подáтелю, прiиди́ и всели́ся в ны, и очи́сти ны от вся́кiя сквéрны, и спаси́, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинáтельный
Стiхù избрáннiи: Благословѝ, душè моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благословѝ, душè моя, Гóспода. Гóсподи, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Лiвáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поéм стiхù избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 3
Хор: Гóсподи, воззвáх к Тебè, услы́ши мя./ Услы́ши мя, Гóсподи./ Гóсподи, воззвáх к Тебè, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
[Пропускается до стихир]Изведи́ из темни́цы дýшу мою́, исповéдатися и҆́мени Твоемý. Менé ждут прáведницы, дóндеже воздáси мне.
На 8. Стiх: Из глубины́ воззвáх к Тебè, Гóсподи,// Гóсподи, услы́ши глас мой.
Стiхúры апóстолов, самоподóбен, глас 2 (Андрéя Пúрскаго): Кíими похвáльными венцы́/ увязéм Петрá и Пáвла,/ разделéнныя телесы́/ и совокýпленныя дýхом,/ Богопроповéдников первостоя́тели?/ Óваго ýбо я́ко апóстолов предначáльника,/ óваго же я́ко пáче инéх труди́вшася./ Сих бо вои́стинну достóйно безсмéртныя слáвы венцы́/ венчáет Хрїстóс Бог наш,// имéяй вéлiю ми́лость.
Да бýдут ýши Твоù// внéмлюще глáсу молéнiя моегó.
Стiхúра: Кíими похвáльными венцы́/ увязéм Петрá и Пáвла,/ разделéнныя телесы́/ и совокýпленныя дýхом,/ Богопроповéдников первостоя́тели?/ Óваго ýбо я́ко апóстолов предначáльника,/ óваго же я́ко пáче инéх труди́вшася./ Сих бо вои́стинну достóйно безсмéртныя слáвы венцы́/ венчáет Хрїстóс Бог наш,// имéяй вéлiю ми́лость.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúра: Кíими похвáльными венцы́/ увязéм Петрá и Пáвла,/ разделéнныя телесы́/ и совокýпленныя дýхом,/ Богопроповéдников первостоя́тели?/ Óваго ýбо я́ко апóстолов предначáльника,/ óваго же я́ко пáче инéх труди́вшася./ Сих бо вои́стинну достóйно безсмéртныя слáвы венцы́/ венчáет Хрїстóс Бог наш,// имéяй вéлiю ми́лость.
И҆́мене рáди Твоегó потерпéх Тя, Гóсподи, потерпè душá моя́ в слóво Твоè,// уповá душá моя на Гóспода.
Анатóлiя: Кíими пéсненными добрóтами/ воспоéм Петрá и Пáвла?/ Богоразýмiя крилé, прелетéвшыя концы́/ и к Небеси́ вознéсшыяся,/ рýце Евáнгелiя благодáти,/ нóзе и́стиннаго проповéданiя,/ рéки премýдрости,/ крéстныя рóги,/ и́миже дéмонов бровь Хрїстóс низложи́,// имéяй вéлiю ми́лость.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúра: Кíими пéсненными добрóтами/ воспоéм Петрá и Пáвла?/ Богоразýмiя крилé, прелетéвшыя концы́/ и к Небеси́ вознéсшыяся,/ рýце Евáнгелiя благодáти,/ нóзе и́стиннаго проповéданiя,/ рéки премýдрости,/ крéстныя рóги,/ и́миже дéмонов бровь Хрїстóс низложи́,// имéяй вéлiю ми́лость.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Кíими пéсненными добрóтами/ воспоéм Петрá и Пáвла?/ Богоразýмiя крилé, прелетéвшыя концы́/ и к Небеси́ вознéсшыяся,/ рýце Евáнгелiя благодáти,/ нóзе и́стиннаго проповéданiя,/ рéки премýдрости,/ крéстныя рóги,/ и́миже дéмонов бровь Хрїстóс низложи́,// имéяй вéлiю ми́лость.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра: Кíими духóвными пéсньми/ похвáлим Петрá и Пáвла?/ Безбóжiя заклáвшiя незатыкáемая устá,/ стрáшныя Дýха мечи́,/ Ри́ма свéтлая удобрéнiя,/ всея́ вселéнныя питáтели,/ Нóваго Завéта Богопи́санныя скрижáли мы́сленныя,/ я́же в Сióне Хрїстóс возгласи́,// имéяй вéлiю ми́лость.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Кíими духóвными пéсньми/ похвáлим Петрá и Пáвла?/ Безбóжiя заклáвшiя незатыкáемая устá,/ стрáшныя Дýха мечи́,/ Ри́ма свéтлая удобрéнiя,/ всея́ вселéнныя питáтели,/ Нóваго Завéта Богопи́санныя скрижáли мы́сленныя,/ я́же в Сióне Хрїстóс возгласи́,// имéяй вéлiю ми́лость.
Слáва Отцý и Сы́ну и Святóму Дýху.
Глас 4 (Iоáнна монáха): Трикрáтным вопрошéнiем,/ éже: Пéтре, лю́биши ли Мя?/ трикрáтное отвержéнiе Хрїстóс испрáвил есть./ Тéмже и к Тайновéдцу Сíмон:/ Гóсподи, вся вéси, вся знáеши,/ Ты вéси, я́ко люблю́ Тя./ Тéмже к немý Спас:/ паси́ óвцы Моя́, паси́ избрáнныя Моя́,/ паси́ áгнцы Моя́, я́же Моею́ крóвiю снабдéх во спасéнiе./ Тогó моли́, Богоблажéнне апóстоле,// даровáти нам вéлiю ми́лость.
И ны́не и прúсно и во вéки векóв, амúнь.
Догмáтик. Глас 4: И҆́же Тебé рáди, богоотéц прорóк Давíд,/ пéсненно о Тебé провозгласи́,/ вели́чiя Тебé сотвóршему:/ предстá Цари́ца одеснýю Тебé./ Тя бо Мáтерь, ходáтаицу животá показá,/ без Отцá из Тебé вочеловéчитися благоволи́вый Бог:/ да Свой пáки обнови́т óбраз, истлéвшiй страстьми́,/ и заблýждшее горохи́щное обрéт овчá,/ на рáмо воспрiи́м, ко Отцý принесéт,/ и Своемý хотéнiю, с небéсными совокупи́т си́лами,/ и спасéт Богорóдице мiр,// Хрїстóс имéяй вéлiю и богáтую ми́лость.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстé! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ВЕЧЕРНИЙ ПРОКИМЕН ДНЯ (ВЕЧЕРА ВТОРНИКА)
Чтец: Прокíмен, глас пéрвый: Ми́лость Твоя́, Гóсподи, поженéт мя вся дни животá моегó. (Пс.22:6А)
Хор: Мúлость Твоя́, Гóсподи,/ поженéт мя вся дни животá моегó.
Чтец: Госпóдь пасéт мя, и ничтóже мя лиши́т, на мéсте злáчне, тáмо всели́ мя. (Пс.22:1-2А)
Хор: Мúлость Твоя́, Гóсподи,/ поженéт мя вся дни животá моегó.
Чтец: Ми́лость Твоя́, Гóсподи.
Хор: Поженéт мя вся дни животá моегó.
ПАРИМИИ
Чтец: Собóрнаго послáнiя Петрóва чтéнiе.
(Из главы 1): Брáтiе, благословéн Бог и Отéц Гóспода нáшего Iисýса Хрїстá, И́же по мнóзей Своéй ми́лости порождéй нас во уповáнiе жи́во воскресéнiем Iисýс Хрїстóвым от мéртвых, в наслéдiе нетлéнно, и несквéрно, и неувядáемо, соблюдéно на Небесéх вас рáди, и́же си́лою Бóжiею соблюдéни вéрою во спасéнiе, готóвое яви́тися во врéмя послéднее. О нéмже рáдуйтеся, мáло ны́не, áще лéпо есть, прискóрбни бы́вше в разли́чных напáстех, да искушéнiе вáшея вéры многочестнéйше злáта ги́бнуща, огнéм же искушéна, обря́щется в похвалý и честь и слáву, во откровéнiи Iисýс Хрїстóве, Егóже не ви́девше, лю́бите, и на Негóже ны́не не зря́ще, вéрующе же, рáдуетеся рáдостiю неизглагóланною и прослáвленною, прiéмлюще кончи́ну вéре вáшей, спасéнiе душáм.
[Русский синодальный перевод]Братья, благословен Бог и Отец Господа нашего Иисуса Христа, по великой Своей милости возродивший нас к надежде живой чрез воскресение Иисуса Христа из мертвых, к наследству нетленному и непорочному и неувядающему, сохраняемому на небесах для вас, силой Божией чрез веру соблюдаемых ко спасению, готовому открыться в последнее время. Об этом ликуйте, немного теперь поскорбев, если нужно, в различных искушениях, чтобы испытание веры вашей, которое драгоценнее золота гибнущего, хотя огнем испытываемого, было к похвале и славе и чести в откровении Иисуса Христа, Которого вы, не видев, любите, в Которого вы, хотя теперь еще не видя Его, веруете, и ликуете радостью неизреченной и прославленной, достигая цели вашей веры, спасения душ. (1 Петр.1:3-9)
Чтец: Собóрнаго послáнiя Петрóва чтéнiе.
(Из главы 1): Возлю́бленнiи, препоя́савше чрéсла помышлéнiя вáшего, трезвя́щеся совершéнне, уповáйте на приноси́мую вам благодáть откровéнiем Iисýс Хрїстóвым. Я́ко чáда послушáнiя, не преобразýющеся пéрвыми невéденiя вáшего похотéнiи, но по звáвшему вы Святóму, и сáми свя́ти во всем житiи́ бýдите. Занé пи́сано есть: свя́ти бýдите, я́ко Аз Свят есмь. И áще Отцá назывáете, нелицемéрно судя́ща комýждо по дéлу, со стрáхом житiя́ вáшего врéмя жи́тельствуйте, вéдяще, я́ко не истлéнным сребрóм или́ злáтом избáвистеся от сýетнаго вáшего житiя́, отцы́ прéданнаго, но честнóю крóвiю, я́ко Áгнца непорóчна и Пречи́ста, Хрїстá.
[Русский синодальный перевод]Возлюбленные, препоясав чресла ума вашего, трезвясь, возложите совершенную надежду на благодать, подаваемую вам в откровении Иисуса Христа. Как послушные дети, не применяйтесь к прежним похотям, бывшим в неведении вашем, но, подобно призвавшему вас Святому, и сами будьте святы во всем поведении, ибо написано: будьте святы, потому что Я свят. И, если вы призываете как Отца Того, Кто нелицеприятно судит каждого по делам, - то со страхом проводите время странствования вашего, зная, что не тленным серебром или золотом вы были искуплены от суетной вашей жизни, унаследованной от отцов, но драгоценной кровью Христа, как непорочного и чистого Агнца. (1Петр.1:13-19)
Чтец: Собóрнаго послáнiя Петрóва чтéнiе.
(Из главы 2): Возлю́бленнiи, молю́, я́ко пришéльцы и стрáнники, огребáтися от плотски́х похотéй, я́же вою́ют на дýшу, житié вáше имýще добрó во язы́цех, да о нéмже клевéщут вас, áки злодéев, от дóбрых дел ви́девше, прослáвят Бóга в день просвещéнiя. Повини́теся ýбо вся́кому человéчу создáнiю, Гóспода рáди: áще царю́, я́ко преобладáющу, áще ли же князéм, я́ко от Негó пóсланным, во отмщéнiе ýбо злодéем, в похвалý же благотвóрцем. Я́ко тáко есть вóля Бóжiя, благотворя́щим обуздовáти безýмных человéк невéжество, я́ко свобóдни, а не я́ко прикровéнiе имýще злóбы свобóду, но я́ко раби́ Бóжiи. Всех почитáйте, брáтство возлюби́те, Бóга бóйтеся, царя́ чти́те. Раби́, повинýйтеся во вся́ком стрáсе влады́кам, не тóкмо благи́м и крóтким, но и стропти́вым. Се бо есть угóдно пред Бóгом, áще сóвести рáди Бóжiя терпи́т кто скóрби, страждá без прáвды. Кáя бо похвалá, áще согрешáюще, мýчими, терпитé? Но, áще добрó творя́ще и стрáждуще, терпитé, сié угóдно пред Бóгом. На сié бо и звáни бы́сте, занé и Хрїстóс пострадá по нас, нам остáвль óбраз, да послéдуем стопáм Егó. И́же грехá не сотвори́, ни обрéтеся лесть во устéх Егó. И́же укоря́емь, проти́ву не укоря́ше, страждá, не прещáше, предая́ше же судя́щему прáведно. И́же грехи́ нáша Сам вознесé на тéле Своéм на дрéво, да, от грех избы́вше, прáвдою поживéм.
[Русский синодальный перевод]Возлюбленные, прошу вас, как странников и пришельцев, удаляться от плотских похотей, воюющих против души, проводя добрую жизнь вашу между язычниками, чтобы они за то, за что злословят вас, как делающих злое, увидя добрые дела ваши, прославили Бога в день посещения. Подчиняйтесь ради Господа всякому человеческому установлению: царю ли, как верховной власти, правителям ли, как от него посылаемым для наказания делающих злое и для похвалы делающим доброе, потому что такова воля Божия, чтобы вы, делая добро, заграждали уста невежеству безумных людей, как свободные, а не как прикрывающие свободою зло, но как Божии рабы. Всех почитайте, братство любите, Бога бойтесь, царя почитайте. Слуги, подчиняйтесь со всяким страхом господам не только добрым и снисходительным, но и суровым. Ибо это благодать, если кто по совести ради Бога переносит скорби, страдая несправедливо. Ибо какая слава, если вы будете терпеть, подвергаясь ударам за проступки? Но, если делая добро и страдая, вы будете терпеть, это благодать пред Богом. Ибо на то вы были призваны, потому что и Христос пострадал за вас, оставив вам пример, чтобы вы следовали по стопам Его: Он греха не сотворил и не было найдено лукавства в устах Его; будучи злословим, Он не злословил в ответ; страдая не угрожал, но предавал Судящему праведно; Он грехи наши Сам вознес телом Своим на древо, чтобы мы, умерши для грехов, жили для праведности.(1Петр.2:11-24)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебè слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры апóстолов, самоглáсны, глас 2 (Андрéя Iерусалимúты): Гряди́те, собóри днесь вéрных,/ благохвáльное и крáсное собрáнiе,/ благодáти избрáнныя хитрецы́,/ Петрá и Пáвла, подóбными хвалáми венчáем,/ я́ко незави́стно всем слóво всéявше,/ с си́ми и благодáть Дýха обогати́ша,/ и, и́стиннаго виногрáда сýще лóзiе,/ грозд зрел нам воздéлаша,/ веселя́щ сердцá нáша./ К ни́мже откровéнным лицéм и чи́стою сóвестiю возопiéм, глагóлюще:/ рáдуйтеся, разори́тели безсловéсных и служи́телiе словéсных./ Рáдуйтеся, всех Творцá и Строи́теля избрáнiя крáсная./ Рáдуйтеся, ходáтаи благи́х и отгони́телiе лéстных,/ и́хже да умóлим:/ моли́теся при́сно к Зижди́телю и Учи́телю/ мир крепкостоя́телен мíру даровáти// и душáм нáшим вéлiю ми́лость.
Арсéнiево: Ученики́ Хрiстóвы и основáнiя Цéркве,/ и́стинныя столпы́ и стéны/ и трýбы Божéственныя Хрiстóвых учéнiй и страдáнiй,/ верхóвныя Петрá и Пáвла,/ я́ко всегó мíра предстáтели, восхвáлим:/ сíи бо, обтéкше широту́ всея́ земли́,/ я́коже рáлом, всéяша вéру/ и всем Богоразýмiе всади́ша,/ Трóйческое явля́юще Слóво./ О, Пéтре, кáменю и основáнiе,/ и Пáвле, сосýде избрáнный!/ И́же и сопряжéннiи волы́ Хрїстóвы,/ вся привлекóша к Богоразýмiю язы́ки,/ грáды же и óстровы,/ еврéи же пáки ко Хрїстý возведóша,// и мóлят спасти́ся душáм нáшим.
Гéрманово: Пéтре, верхóвне слáвных апóстол, кáменю вéры,/ и Пáвле чýдне, Святы́х Церквéй вити́я и свети́льниче,/ Божéственному престóлу предстоя́ще,// о нас Хрїстý моли́теся.
Пáвле, устá Госпóдня, основáнiе учéнiй,/ иногдá ýбо гони́тель Iисýса Спáса,/ ны́не же и первопрестóльник апóстолов быв, блажéнне./ Тéмже неизглагóланная ви́дел еси́, мýдре,/ дáже до трéтiяго небесé возшéд, и взывáл еси́:// прiиди́те со мнóю, и благи́х не лиши́мся.
Глас 3 (Iоáнна монáха): Вы́шняго Iерусали́ма грáждане,/ кáмень вéры, витíя Цéркве Хрїстóвы,/ Трóйческая двóица, мíра ловцы́,/ остáвльше днесь я́же на земли́,/ отыдóша страдáнiем к Бóгу/ и мóлятся Емý со дерзновéнiем// спасти́ся душáм нáшим.
Слáва Ѻтцý и Сы́ну и Святóму Дýху.
Глас 5 (византíево): Премýдрость Бóжiя, Соприсносýщное Слóво Óтчее,/ я́коже в Евáнгелiях предречé, многоплóдныя лóзы/ вы естé, всехвáльнiи апóстоли,/ и́же грозд зрел и красéн в вéтвех вáших нося́щiи,/ егóже, вéрнiи, ядýще, услаждáем вкус к весéлiю./ Пéтре, кáменю вéры,/ и Пáвле, похвалó вселéнныя,// утверди́те стáдо, éже стяжáсте учéньми вáшими.
И ны́не и прúсно и во вéки векóв, амúнь.
Богорóдичен: Премýдрость Бóжiя, Соприсносýщное Слóво Óтчее,/ я́коже в Евáнгелiях предречé, многоплóдныя лóзы/ вы естé, всехвáльнiи апóстоли,/ и́же грозд зрел и красéн в вéтвех вáших нося́щiи,/ егóже, вéрнiи, ядýще, услаждáем вкус к весéлiю./ Пéтре, кáменю вéры,/ и Пáвле, похвалó вселéнныя,// утверди́те стáдо, éже стяжáсте учéньми вáшими.
Гóсподи, поми́луй. (40 раз)
Слáва Отцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры апóстолов, самоглáсны, глас 1, Андéря Крúтскаго): Я́же по вся грáды ýзы и скóрби твоя́,/ кто скáжет, слáвне апóстоле Пáвле?/ Труды́, болéзни и бдéнiя,/ я́же во áлчбе и жáжде злострáстiя,/ я́же в зимé и наготé, кóшницу и жезлобiéнiя,/ каменометáнiя и обхождéнiя, глубины́ истоплéнiя,/ позóр был еси́ Áнгелов и человéков./ Вся ýбо претерпéл еси́ о укрепля́ющем тя Хрїстé,/ да мiр приобря́щеши, о Хрїстé Iисýсе, Гóсподе твоéм./ Тéмже мóлим тя, творя́щiи пáмять твою́ вéрно:// непрестáнно моли́ спасти́ся душáм нáшим.
Стiх: Во всю зéмлю изы́де вещáнiе их/ и в концы́ вселéнныя глагóлы их. (Пс.18:5А)
Я́же по вся грáды вязáнiя и скóрби твоя́/ кто исповéсть, слáвне апóстоле?/ Или́ кто предстáвит пóдвиги и труды́ твоя́,/ и́миже труди́лся еси́ во Евáнгелiи Хрїстóве,/ да вся приобря́щеши и Хрїстý приведéши Цéрковь?/ Но сiю́ проси́ сохрани́ти дóброе твоé исповéданiе,/ дáже до конéчнаго издыхáнiя,// Пáвле апóстоле и учи́телю Церквéй.
Стiх: Небесá повéдают слáву Бóжiю,/ творéнiе же рукý Егó возвещáет твердь. (Пс.18:2)
Свети́льники вели́кiя Цéркве,/ Петрá и Пáвла восхвáлим:/ пáче бо сóлнца возсiя́ша на твéрди вéры/ и язы́ки заря́ми проповéданiя от невéденiя возведóша./ Ов ýбо на крестé пригвóждься,/ к Небеси́ шéствiя творя́,/ идéже Цáрствiя ключи́ от Хрїстá прiя́т,/ ов же мечéм усéчен быв,/ ко Спáсу отшéд,/ по достоя́нiю ублажáются/ и óба Iзрáилю возвещáют,/ я́ко на Самагó Гóспода непрáведно рýце прострé./ Тéмже моли́твами их, Хрїстé Бóже наш,/ на ны шатáющыяся низложи́/ и правослáвных вéру утверди́,// я́ко Человеколю́бец.
Слáва Отцý и Сы́ну и Святóму Дýху.
Ефрéма Карúя, глас 6: Прáздник рáдостен возсiя́ концéм днесь:/ всечестнáя пáмять премýдрых апóстол и верхóвных/ Петрá и Пáвла,/ тéмже и Рим срáдуется, ликовствýя в пéснех и пéнiих./ Прáзднуем и мы, брáтiе,/ всечестны́й сей день соверши́вше./ Рáдуйся, Пéтре апóстоле,/ и́скреннiй дрýже твоегó Учи́теля,/ Хрїстá, Бóга нáшего;/ рáдуйся, Пáвле вселюбéзнейшiй,/ и проповéдниче вéры, и учи́телю вселéнныя;/ я́ко имéя дерзновéнiе,/ супрýже святоизбрáнный,/ Хрїстá, Бóга нáшего моли́те// спасти́ся душáм нáшим.
И ны́не и прúсно и во вéки векóв, амúнь.
Богорóдичен воскрéсен, глас 6 (по глáсу «Слáвы»): Творéц и Избáвитель мой Пречи́стая,/ Хрїстóс Госпóдь из Твои́х ложéсн прошéд,/ в мя оболкíйся,/ пéрвыя кля́твы Адáма свободи́./ Тéмже Ти Всечи́стая,/ я́ко Бóжiи Мáтери же и Дéве,/ вои́стинну вопiéм немóлчно:/ рáдуйся áнгельски, рáдуйся Влады́чице,/ предстáтельство и покрóве,// и спасéнiе душ нáших.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь апóстолов, глас 4: Апóстолов первопрестóльницы/ и вселéнныя учи́телiе,/ Влады́ку всех моли́те/ мир вселéнней даровáти// и душáм нáшим вéлiю ми́лость. (Двáжды)
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá есѝ душ нáших.
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасè и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[B приходской практитке пропускается]/ Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Ѻ́чи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я́ Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
И глаголи ýтреню