Крестопокло́нная. Неде́ля тре́тья Вели́кого поста́, Глас 2. ОБЕДНИЦА (изобразительные)
4 апреля 2021 г. Неделя третья Великаго поста, Крестопоклонная. Глас 2. Последование часов и изобразительных для домашнего (келейного) совершения. Служба мирским чином.
Прежде глаголи часы.
Часы и обе́дницу с ударе́дниями скачать в формате doc, в формате pdf
Глаголи сице: Благослови, душе моя, Гóспода,/ благословен еси Господи.
Псалом 102
Благослови, душе моя, Господа,/ и вся внутренняя моя имя святое Его./ Благослови, душе моя, Господа,/ и не забывай всех воздаяний Его,/ очищающаго вся беззакония твоя,/ исцеляющаго вся недуги твоя,/ избавляющаго от истления живот твой,/ венчающаго тя милостию и щедротами,/ исполняющаго во благих желание твое:/ обновится яко орля юность твоя./ Творяй милостыни Господь,/ и судьбу всем обидимым./ Сказа пути Своя Моисеови,/ сыновóм Израилевым хотения Своя:/ Щедр и Милостив Господь,/ Долготерпелив и Многомилостив./ Не до конца прогневается,/ ниже во век враждует,/ не по беззаконием нашим сотворил есть нам,/ ниже по грехом нашым воздал есть нам./ Яко по высоте небесней от земли,/ утвердил есть Госпóдь милость Свою на боящихся Егó./ Елико отстоят востóцы от запад,/ удалил есть от нас беззакóния наша./ Якоже щедрит отец сыны,/ ущедри Госпóдь боящихся Егó./ Яко Той позна создание наше,/ помяну, яко персть есмы./ Человек, яко трава дние eгó,/ яко цвет сельный, тако оцветет,/ яко дух прóйде в нем,/ и не будет, и не познает ктому места своегó./ Милость же Госпóдня от века и до века на боящихся Егó,/ и правда Его на сынéх сынóв, хранящих завéт Егó, и пóмнящих заповеди Егó творити я./ Госпóдь на Небеси уготóва Престóл Свой,/ и Царство Егó всеми обладает./ Благословите Гóспода вси Ангели Егó,/ сильнии крепостию, творящии слóво Егó, услышати глас словес Егó./ Благословите Гóспода вся Силы Егó,/ слуги Егó, творящии вóлю Егó./ Благословите Гóспода вся дела Егó,/ на всяком месте владычества Егó.
Слáва Отцу и Сыну и Святóму Духу, и ныне и присно и во вéки векóв. Аминь.
Благослови, душе моя, Гóспода,/ и вся внутренняя моя имя святóе Егó./ Благословен еси, Гóсподи.
Слáва Отцу и Сыну и Святóму Духу.
Псалом 145
Хвали, душе моя, Гóспода./ Восхвалю Гóспода в животé моéм,/ пою Бóгу моему, дóндеже есмь./ Не надéйтеся на князи, на сыны человéческия,/ в нихже несть спасéния./ Изыдет дух eгó/ и возвратится в землю свою./ В той день погибнут вся помышлéния eгó./ Блажен, eмуже Бог Иáковль Помóщник егó,/ упование eгó на Гóспода Бóга своегó,/ сотвóршаго нéбо и зéмлю,/ мóре и вся, яже в них,/ хранящаго истину в век,/ творящаго суд обидимым,/ дающаго пищу áлчущим./ Госпóдь решит оковáнныя./ Госпóдь умудряет слепцы./ Госпóдь возвóдит низвéрженныя./ Госпóдь любит прáведники./ Госпóдь хранит пришéльцы,/ сира и вдову приимет/ и путь грéшных погубит./ Воцарится Госпóдь во век,/ Бог твой, Сиóне, в род и род.
И ныне и присно и во вéки векóв. Аминь.
Единорóдный Сыне и Слóве Бóжий, Безсмéртен Сый/ и извóливый спасéния нáшего рáди/ воплотитися от Святыя Богорóдицы и Приснодéвы Марии,/ непрелóжно вочеловéчивыйся,/ распныйся же, Христé Бóже, смéртию смерть попрáвый,/ Един Сый Святыя Трóицы,/ спрославляемый Отцу и Святóму Духу, спаси нас.
И поем Блаженны с тропарями из Октоиха
Хор: Во Царствии Твоем помяни нас, Господи,/ егда приидеши, во Царствии Твоем.
Блажени нищии духом,/ яко тех есть Царство Небесное.
Блажени плачущии,/ яко тии утешатся.
Блажени кротции,/ яко тии наследят землю.
Чтец (на 10, стихиры воскрéсные, глас 2): Глас Ти принóсим разбóйничь, и мóлимся: помяни нас, Спáсе, во Цáрствии Твоéм.
Хор: Блажени алчущии и жаждущии правды,/ яко тии насытятся.
Чтец: Крест Тебé принóсим в прощéние прегрешéний: егóже нас рáди приял еси, Человеколюбче
Хор: Блажени милостивии,/ яко тии помиловани будут.
Чтец: Покланяемся Твоему, Владыко, погребéнию и востáнию: имиже от тлéния избáвил еси мир, Человеколюбче.
Хор: Блажени чистии сердцем,/ яко тии Бога узрят.
Чтец: Смéртию Твоéю, Гóсподи, пожéрта бысть смерть: и Воскресéнием Твоим, Спáсе, мир спасл еси.
Хор: Блажени миротворцы,/ яко тии сынове Божии нарекутся.
На 6. Чтец: Мvронóсицы срéтил еси, воскрéс от грóба, и ученикóм возвестил еси, рещи Твоé востáние
Хор: Блажени изгнани правды ради,/ яко тех есть Царство Небесное.
Чтец: Иже во тьме спящии Тя, свет, видевше, в преиспóднейших áдовых, Христé, воскресóша.
Хор: Блажени есте, егда поносят вам,/ и изженут, и рекут всяк зол глагол на вы лжуще Мене ради.
Чтец (триóди, глас 1): Воскрéсл еси смерть упразднив Христé, якоже великий Царь, от áдовых сокрóвищ воззвáл еси нас в наслаждéние Цáрства Небéснаго, в зéмлю безсмéртия.
Хор: Радуйтеся и веселитеся,/ яко мзда ваша многа на небесех.
Чтец: Плéщуще пéсньми Божéственными вéрнии, воскликнем Бóгу, Крест Госпóдень целующе: освящéния бо источáет истóчник, всем сущим в мире.
Хор: Слáва Отцу и Сыну и Святóму Духу.
Чтец(трóичен): Единицу в трех начертáниих пою, и Трóицу во едином естествé покланяемую, Бóга трóе купно, Свет трисóлнечный, Отцá, и Сына, и Святáго Духа.
Хор: И ныне и присно и во вéки векóв. Аминь.
Чтец (Богорóдичен): Чудéс великое чудо в Тебé явися несквéрная Агнице, взéмлющаго бо мира грех, Агнца родилá еси: Егóже моли прилéжно о поющих Тя.
Тропари и кондаки
Тропáрь воскрéсный, глас 2: Егдá снизшéл еси к смéрти, Животé Безсмéртный,/ тогдá ад умертвил еси блистáнием Божествá./ Егдá же и умéршыя от преиспóдних воскресил еси,/ вся Силы Небéсныя взывáху:// Жизнодáвче, Христé Бóже наш, слáва Тебé.
Тропáрь Триóди (Креста), глас 1: Спаси Гóсподи люди Твоя,/ и благослови достояние Твоé, /побéды грядущему русскому Царю и правослáвным христиáнам на сопротивныя дáруя,// и Твоé сохраняя Крестóм Твоим жительство.
Слáва Отцу и Сыну и Святóму Духу, и ныне и присно и во вéки векóв. Аминь.
Кондáк Триóди, глас 7: Не ктому плáменное оружие/ хранит врат Едéмских:/ на тыя бо нáйде преслáвный соуз Дрéво крéстное,/ смéртное жáло, и áдова побéда прогнáся./ Предстáл бо еси Спáсе мой,/ вопия сущим во áде:// внидите пáки в рай.
Вме́сто Трисвято́го
Хор: Кресту Твоему покланяемся Владыко,/ и святóе Воскресéние Твоé слáвим. (Трижды)
Хор: Слáва Отцу и Сыну и Святóму Духу, и ныне и присно и во вéки векóв, аминь.
Хор: И святóе Воскресéние Твоé слáвим.
Хор: Кресту Твоему покланяемся Владыко,/ и святóе Воскресéние Твоé слáвим.
Проки́мен Неде́ли Крестопокло́нной, глас 6
Чтец: Прокимен, глас шестый: Спаси Гóсподи люди Твоя, и благослови достояние Твоé.
Хор: Спаси Гóсподи люди Твоя,/ и благослови достояние Твоé.
Чтец: К Тебé, Гóсподи, воззову, Бóже мой, да не премолчиши от менé.
Хор: Спаси Гóсподи люди Твоя,/ и благослови достояние Твоé.
Чтец: Спаси Гóсподи люди Твоя.
Хор: И благослови достояние Твоé.
Ко Еврéем послáния святáго апóстола Пáвла чтéние.
АПОСТОЛ
(Чтение третьей (Крестопоклонной) недели Великаго поста: Евр.зач.311): Брáтие, имуще убо Архиерéа велика, прошéдшаго небесá, Иисуса Сына Бóжия, да держимся исповéдания. Не имамы бо архиерéа не могуща спострадáти нéмощем нáшим, но искушéна по всяческим по подóбию, рáзве грехá. Да приступáем убо с дерзновéнием к престóлу благодáти, яко да приимем милость и благодáть обрящем во благоврéменну пóмощь. Всяк бо первосвящéнник, от человéк приéмлемь, за человéки поставляется на службы яже к Бóгу, да принóсит дáры же и жéртвы о гресéх. Спострадáти могий невéжствующим и заблуждáющим: понéже и той нéмощию обложéн eсть. И сегó рáди дóлжен eсть якоже о людех, тáкоже и о себé приносити за грехи. И никтóже сам о себé приéмлет честь, но звáнный от Бóга, якоже и Аарóн. Тáко и Христóс не Себе прослáви быти первосвящéнника, но Глагóлавый к Нему: Сын Мой eси Ты, Аз днесь родих Тя. Якоже и инде глагóлет: Ты eси свящéнник во век по чину Мелхиседéкову.
(Братья, имея Первосвященника великого, прошедшего небеса, Иисуса Сына Божия, будем твердо держаться исповедания нашего. Ибо мы имеем не такого первосвященника, который не может сострадать нам в немощах наших, но Который, подобно нам, искушен во всем, кроме греха. Посему да приступаем с дерзновением к престолу благодати, чтобы получить милость и обрести благодать для благовременной помощи. Ибо всякий первосвященник, из человеков избираемый, для человеков поставляется на служение Богу, чтобы приносить дары и жертвы за грехи, могущий снисходить невежествующим и заблуждающим, потому что и сам обложен немощью, и посему он должен как за народ, так и за себя приносить жертвы о грехах. И никто сам собою не приемлет этой чести, но призываемый Богом, как и Аарон. Так и Христос не Сам Себе присвоил славу быть первосвященником, но Тот, Кто сказал Ему: Ты Сын Мой, Я ныне родил Тебя; как и в другом месте говорит: Ты священник вовек по чину Мелхиседека. (Евр.4:14-5:6)
АЛЛИЛУА́РИЙ НЕДЕ́ЛИ КРЕСТОПОКЛО́ННОЙ, ГЛАС 1
Чтец: Аллилуиа, аллилуиа, аллилуиа, глас пéрвый .
Хор: Аллилуиа, аллилуиа, аллилуиа.
Чтец: Помяни сонм Твой, егóже стяжáл еси испéрва.
Хор: Аллилуиа, аллилуиа, аллилуиа.
Чтец: Бог же Царь наш прéжде вéка, содéла спасéние посредé земли.
Хор: Аллилуиа, аллилуиа, аллилуиа.
Евангелие
От Мáрка Святáго Евáнгелия чтéние
Хор: Слáва Тебé, Гóсподи, слáва Тебé.
(Чтение третьей (Крестопоклонной) недели Великаго поста.Мк.зач.37): Речé Госпóдь: и́же хóщет по Мне ити́, да отвéржется себé, и вóзмет крест свой, и по Мне грядéт. Иже бо áще хóщет дýшу свою́ спасти́, погуби́т ю, а и́же погуби́т дýшу свою́ Менé рáди и Евáнгелия, той спасéт ю. Кáя бо пóльза человéку, áще приобря́щет мир весь, и отщети́т дýшу свою́? Или́ что даст человéк измéну на души́ своéй? Иже бо áще постыди́тся Менé и Мои́х словéс в рóде сем прелюбодéйнем и грéшнем, и Сын Человéческий постыди́тся eгó, eгдá прии́дет во слáве Oтцá Своегó со áнгелы святы́ми. И глагóлаше им: ами́нь глагóлю вам, я́ко суть нéцыи от зде стоя́щих, и́же не и́мут вкуси́ти смéрти, дóндеже ви́дят Цáрствие Бóжие пришéдшее в си́ле.
(И, подозвав народ с учениками Своими, сказал им: кто хочет идти за Мною, отвергнись себя, и возьми крест свой, и следуй за Мною. Ибо кто хочет душу свою сберечь, тот потеряет ее, а кто потеряет душу свою ради Меня и Евангелия, тот сбережет ее. Ибо какая польза человеку, если он приобретет весь мир, а душе своей повредит? Или какой выкуп даст человек за душу свою? Ибо кто постыдится Меня и Моих слов в роде сем прелюбодейном и грешном, того постыдится и Сын Человеческий, когда приидет в славе Отца Своего со святыми Ангелами. И сказал им: истинно говорю вам: есть некоторые из стоящих здесь, которые не вкусят смерти, как уже увидят Царствие Божие, пришедшее в силе. (8:34-9:1)
Хор: Слáва Тебé, Гóсподи, слáва Тебé.
Помяни нас, Гóсподи, егда приидеши во Цáрствии Твоéм.
Помяни нас, Владыко, егда приидеши во Цáрствии Твоéм.
Помяни нас, Святый, егда приидеши во Цáрствии Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
Стих: Приступите к Нему и просветитеся, и лицá вáша не постыдятся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
Слáва Отцу и Сыну и Святóму Духу.
Лик святых Ангел и Архáнгел со всéми Небéсными силами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
И ныне и присно и во вéки векóв. Аминь.
Символ веры
Верую во Единаго Бога Отца, Вседержителя, Творца небу и земли, видимым же всем и невидимым. И во Единаго Господа Иисуса Христа, Сына Божия, Единороднаго, Иже от Отца Рожденнаго прежде всех век; Света от Света, Бога Истинна от Бога Истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Свята и Марии Девы и вочеловечшася. Распятаго же за ны при Понтийстем Пилáте, и страдáвша и погребенна. И воскресшаго в третий день по Писáнием, и возшедшаго на небесá и седяща одесную Отцá. И пáки грядущаго со слáвою судити живым и мертвым, Егоже Цáрствию не будет концá. И в Духа Святáго, Господа, Животворящаго, Иже от Отцá исходящаго, Иже со Отцем и Сыном спокланяема и сслáвима, Глаголавшего пророки. Во едину Святую, Соборную и Апостольскую Церковь. Исповедую едино крещение во оставление грехов. Чáю воскресения мертвых, и жизни будущаго века. Аминь.
Ослáби, остáви, прости Боже, прегрешения наша, вольная, и невольная, яже в слове и в деле, яже в ведении и не в ведении, яже во дни и в нощи, яже во уме и помышлении, вся нам прости, яко Благ и Человеколюбец.
Отче наш, Иже еси на небесéх. Да святится Имя Твоé, да приидет Цáрствие Твоé, да будет вóля Твоя, яко на небеси и на земли. Хлеб наш насущный даждь нам днесь, и остáви нам дóлги нáша, якоже и мы оставляем должникóм нáшим. И не введи нас во искушéние, но избáви нас от лукáваго.
Гóсподи, Иисусе Христé, Сыне Бóжий, помилуй нас. Аминь.
Кондáк Триóди, глас 7
Не ктому плáменное оружие/ хранит врат Едéмских:/ на тыя бо нáйде преслáвный соуз Дрéво крéстное,/ смéртное жáло, и áдова побéда прогнáся./ Предстáл бо еси Спáсе мой,/ вопия сущим во áде:// внидите пáки в рай.
Гóсподи, помилуй. (12 раз)
И молитву: Всесвятая Троице, Единосущная Держáво, Нераздельное Цáрство, всех благих Винá, благоволи же и о мне грéшнем, утверди, вразуми сéрдце моé, и всю мою отыми сквéрну, просвети мою мысль, да выну слáвлю, пою, покланяюся и глаголю: Един Свят, Един Господь, Иисус Христос, во слáву Бога Отца, аминь.
Буди имя Господне благословено от ныне и до века. (3 раза)
Слáва Отцу и Сыну и Святому Духу, и ныне и присно и во вéки векóв, аминь.
Псалом 33
Благословлю Гóспода на всякое время,/ выну хвалá Его во устéх моих./ О Гóсподе похвáлится душá моя,/ да услышат крóтцыи и возвеселятся./ Возвеличите Гóспода со мнóю,/ и вознесéм имя Егó вкупе./ Взыскáх Гóспода и услыша мя,/ и от всех скорбéй моих избáви мя./ Приступите к Нему и просветитеся,/ и лицá вáша не постыдятся./ Сей нищий воззвá, и Госпóдь услыша и,/ и от всех скорбéй его спасé и./ Ополчится Ангел Госпóдень óкрест боящихся Егó,/ и избáвит их./ Вкусите и видите, яко благ Госпóдь;/ блажéн муж, иже уповáет нань./ Бóйтеся Гóспода, вси святии Егó,/ яко несть лишéния боящымся Его./ Богáтии обнищáша и взалкáша,/ взыскáющии же Гóспода не лишáтся всякаго блáга./ Приидите, чáда, послушайте менé,/ стрáху Госпóдню научу вас./ Кто есть человéк хотяй живóт,/ любяй дни видети блáги;/ Удержи язык твой от зла,/ и устнé твои, éже не глагóлати льсти./ Уклонися от зла и сотвори блáго,/ взыщи мира, и пожени и./ Очи Госпóдни на прáведныя,/ и уши Егó в молитву их./ Лицé же Госпóдне на творящия злáя,/ еже потребити от земли пáмять их./ Воззвáша прáведнии, и Госпóдь услыша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя духом спасéт./ Мнóги скóрби прáведным,/ и от всех их избáвит я Госпóдь./ Хранит Госпóдь вся кóсти их,/ ни едина от них сокрушится./ Смерть грéшников лютá,/ и ненавидящии прáведнаго прегрешáт./ Избáвит Госпóдь души раб Своих,/ и не прегрешáт вси уповáющии на Негó.
Вместо Достойно есть
О Тебе радуется, Благодатная всякая тварь,/ Ангельский собор и человеческий род,/ освященный храме и раю словесный,/ девственная похвало,/ из Неяже Бог воплотися,/ и Младенец бысть, прежде век Сый Бог наш:/ ложесна бо Твоя престол сотвори/ и чрево Твое пространнее Небес содела.// О Тебе радуется, Благодатная, всякая тварь, слава Тебе.
Слáва Отцу и Сыну и Святóму Духу, и ныне и присно и во вéки векóв, аминь.
Гóсподи, помилуй. (3 раза)
Гóсподи, благослови.
Гóсподи, Иисусе Христé, Сыне Бóжий, воскрéсый из мéртвых, молитвами Пречистыя Твоея Мáтере, святых слáвных и всехвáльных Апóстол, преподóбных и богонóсных отéц нáших и всех святых, спаси нас, яко благ и человеколюбец.
Хор: Аминь. Гóсподи, помилуй. (3 раза)
Таже, поем многолетие
Благочестивейшаго, Самодержáвнейшаго, Великаго грядущаго Госудáря нáшего Имперáтора (его имя Ты вем) святéйшыя вселéнския патриáрхи преосвящéнныя митрополиты, архиепископы и епископы православныя, иерéи и дьяконы и весь причет церкóвный и вся правослáвныя христиáны, Гóсподи, сохрани их на мнóгая лета!
Использованы материалы с сайтов Азбука веры, Последование рф, Патриархия ру, моя библия онлайн