Неделя 32 по Пятидесятнице, по Богоявлении, глас 7. ОБЕДНИЦА (Изобразительные). Свт. Филиппа
22 января́ 2023 г. Недéля 32 по Пятидеся́тнице, по Богоявлéнiи. Попрáзднство Богоявлéнiя. Святúтеля Фiлíппа, митрополíта Москóвского и всея́ Россíи, чудотвóрца. Глас 7. Воскрéсная прáздничная слýжба для домáшнего (келéйнаго) совершéнiя. Послéдованiе изобразúтельных.
Прежде глаголи часы. Аще имаши произволенiе то чти ýтреню с канóном и пéрвым чáсом, аще же ни, токмо часы.
ЧИН ОБЕДНИЦЫ
Глагóли сúце: Благословѝ, душé моя́, Гóспода,/ благословéн есѝ Гóсподи.
Псалом 102
Благословѝ, душé моя́, Гóспода,/ и вся внýтренняя моя и҆́мя святóе Егó./ Благословѝ, душé моя, Гóспода,/ и не забывáй всех воздая́нїй Егó,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоé:/ обновится я́ко óрля юность твоя́./ Творя́й ми́лостыни Госпóдь,/ и судьбý всем оби́димым./ Сказá путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концá прогнéвается,/ нижé во век враждýет,/ не по беззакóнїем нáшим сотвори́л есть нам,/ нижé по грехóм нáшым воздáл есть нам./ Я́ко по высотé небéсней от землѝ,/ утверди́л есть Госпóдь ми́лость Свою́ на боя́щихся Егó./ Ели́ко отстоят востóцы от зáпад,/ удáлил есть от нас беззакóнїя нáша./ Я́коже щéдрит отéц сы́ны,/ ущéдри Госпóдь боя́щихся Егó./ Я́ко Той познá создáнїе нáше,/ помянý, яко персть есмы́./ Человéк, яко травá днíе eгó,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегó./ Ми́лость же Госпóдня от вéка и до вéка на боя́щихся Егó,/ и прáвда Егó на сынéх сынóв, храня́щих завéт Егó, и пóмнящих зáповеди Егó твори́ти я./ Госпóдь на Небесѝ уготóва Престóл Свой,/ и Цáрство Егó всéми обладáет./ Благослови́те Гóспода вси Áнгели Егó,/ си́льнїи крéпостїю, творя́щїи слóво Егó, услышати глас словéс Егó./ Благослови́те Гóспода вся Си́лы Егó,/ слýги Егó, творя́щїи вóлю Егó./ Благослови́те Гóспода вся делá Егó,/ на всяком мéсте влады́чества Егó.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Благослови́, душé моя, Гóспода,/ и вся внýтренняя моя и҆́мя святóе Егó./ Благословéн еси, Гóсподи.
Слáва Ѻтцý и Сы́ну и Святóму Дýху.
Псалом 145
Хвали́, душé моя, Гóспода./ Восхвалю́ Гóспода в животé моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгó/ и возврати́тся в зéмлю свою́./ В той день поги́бнут вся помышлéнїя eгó./ Блажéн, eмýже Бог Iáковль Помóщник егó,/ уповáнiе eгó на Гóспода Бóга своегó,/ сотвóршаго нéбо и зéмлю,/ мóре и вся, я́же в них,/ храня́щаго и҆́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы́./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстé Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями из Октоиха
Хор: Во Цáрствiи Твоéм помянú нас, Гóсподи,/ егдá прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Чтец (стiхúры воскрéсные, глас 7): Красéн бе и добр в снедь, и҆́же менé умертви́вый плод:/ Хрїстóс есть Дрéво живóтное,/ от Негóже яды́й не умирáю,/ но вопiю́ с разбóйником:// помяни́ мя Гóсподи, во Цáрствiи Твоéм.
Хор: Блажéни плáчущiи,/ я́ко тíи утéшатся.
Чтец: На Крест вознéсся Щéдре,/ Адáмово рукописáнiе дрéвняго грехá заглáдил еси́,/ и спасл еси́ от прéлести весь род человéческiй.// Тéмже воспевáем Тя, благодéтелю Гóсподи.
На 10. Хор: Блажéни крóтцыи,/ я́ко тíи наслéдят зéмлю.
Чтец: Пригвозди́л еси́ на Крестé Щéдре, грехи́ нáша Хрїстé,/ и Твоéю смéртiю смерть умертви́л еси́/ воздви́гнувый умéршiя из мéртвых:// тéмже покланя́емся Твоемý святóму воскресéнiю.
Хор: Блажéни áлчущiи и жáждущiи прáвды,/ я́ко тíи насы́тятся.
Чтец: Излiя́ яд змiй в слýхи Éвины иногдá:/ Хрїстóс же на Дрéве крéстнем источи́л есть ми́рови жи́зни слáдость./ Тéмже взывáем:// помяни́ нас Гóсподи, во Цáрствiи Твоéм.
На 8. Хор: Блажéни мúлостивiи,/ я́ко тíи помúловани бýдут.
Чтец (стiхúры попрáзднства, глас 2): Очищáемо со́лнце кто ви́де, -/ пропове́дник вопiе́т, - пресве́тлое естество́м?/ Да Тебе́ водáми, сiя́нiе Слáвы, Отцá о́браз Присносу́щнаго, омы́ю/ и, се́но сый, Огню́ прикосну́ся Твоего́ Божествá?// Ты бо еси́ Хрїсто́с, Бо́жiя му́дрость и си́ла.
Хор: Блажéни чúстiи сéрдцем,/ я́ко тíи Бóга ýзрят.
Чтец: Яви́ Боже́ственное, е́же име́, благогове́нiе Моисе́й, прилучи́вся Тебе́,/ я́ко бо из купины́ Тя, возгласи́вша, разуме́, áбiе отврати́ лице́./ Аз же кáко Тя уви́жу я́сно?/ Или́ кáко руку́ положу́ на Тя?// Ты бо еси́ Хрїсто́с, Бо́жiя му́дрость и си́ла.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: По́слан от Отцá, всесве́тлое Сло́во, но́щи отгнáти зломрáчное стремле́нiе,/ и искорени́ти гряде́ши челове́ков грехи́,/ сы́ны же привлещи́, Твои́м Креще́нiем, Блáже,// све́тлы от струй Iордáнских.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Сáмое прови́дев нарече́нное Сло́во, я́сно пропове́дник вопiе́т твáри:/ Сей пре́жде мене́, вторы́й пло́тiю сообрáзен,// просiя́ Боже́ственною си́лою вражде́бный наш отъя́ти грех.
На 4. Хор: Блажéни естé, егдá понóсят вам,/ и изженýт, и рекýт всяк зол глагóл на вы лжýще Менé рáди.
Чтец (стiхúры свт. Фiлíппа, глас 8): Промышле́нiе о́бщее творя́ о пасо́мых тобо́ю,/ е́же бы́ти им душе́ю и се́рдцем еди́но, слáвне, во Хрїсто́ве еди́ней ве́ре пребывáющим,/ язы́ческiя же отревáл еси́ обы́чаи// и разделе́нiя бежáти, му́дре, научи́л еси́.
Хор: Рáдуйтеся и веселúтеся, я́ко мзда вáша мнóга на Небесéх.
Чтец: Ре́вностiю Хрїсто́вою поостри́вся,/ я́рость самодержáвнаго на кро́тость преложи́ти тщáлся еси́/ и к преще́нiем царе́вым непрекло́нен отню́д был еси́,/ я́ко Хрїсто́вых зáповедей де́латель,/ и показáлся еси́ я́ко кре́пок хрáбрник,// за пáству твою́ пострадáв дáже до сме́рти, рáдуяся.
Хор: Слáва Ѻтцý и Сы́ну и Святóму Дýху.
Чтец: Светоно́сную лучу́,/ сiя́ющу во мрáце житiя́ су́щим, святи́телю Фiли́ппе, ви́дим тя,/ и я́ко свещу́ неугаси́мую, Невеще́ственному прiобщи́вшагося Све́ту,// и вся освещáюща концы́, и тьму неразу́мiя отъе́млюща.
Хор: И ны́не и прúсно и во вéки векóв. Амúнь.
Богорóдичен: Тя иногдá написá скрижáль, Богообрáзне во проро́цех Моисе́й,/ све́щник же Све́та, и сень, и жезл процве́тшiй, Всенепоро́чная,/ и стáмну, мáнну нося́щую,// и ле́ствицу, е́юже возведо́хомся от земли́ к Высоте́.
Тропари и кондаки
Тропáрь воскрéсный, глас 7: Разруши́л еси́ Крестóм Твои́м смерть,/ отвéрзл еси́ разбóйнику рай;/ мvронóсицам плач преложи́л еси́/ и Апóстолом проповéдати повелéл еси́/, я́ко воскрéсл еси́, Хрїстé Бóже,/ дáруяй мíрови// вéлiю ми́лость.
Тропáрь Богоявлéнiя, глас 1: Во Ioрдáне крещáющуся Тебé, Гóсподи,/ Трóйческое яви́ся поклонéнiе:/ Роди́телев бо глас свидéтельствоваше Тебé,/ возлю́бленнаго Тя Сы́на именýя,/ и Дух в ви́де голуби́не/ извéствоваше словесé утверждéнiе./ Явлéйся Хрїстé Бóже// и мiр просвещéй, слáва Тебé.
Тропáрь свт. Фiлíппа, глас 8: Первопрестóльников преéмниче,/ стóлпе Правослáвiя, и́стины побóрниче,/ нóвый исповéдниче, святи́телю Фiлíппе,/ положи́вый дýшу за пáству твою́,/ тéмже, я́ко имéя дерзновéнiе ко Хрїстý,/ моли́ за град же и лю́ди,// чтýщiя достóйно святýю пáмять твою́.
Кондáк воскрéсный, глас 7: Не ктомý держáва смéртная/ возмóжет держáти человéки:/ Хрїстóс бо сни́де, сокрушáя и разоря́я си́лы ея́./ Связýем бывáет ад,/ прорóцы соглáсно рáдуются:/ предстá, глагóлюще, Спас сýщим в вéре,// изыди́те, вéрнiи, в воскресéнiе.
Слáва Отцý и Сы́ну и Святóму Дýху.
Кондáк cвятúтеля, глас 3: Правосла́вiя наста́вника и и́стины провозве́стника,/ Златоу́стаго ревни́теля,/ Россíйскаго свети́льника, Фiлíппа прему́драго восхва́лим,/ пи́щею слове́с свои́х разу́мно ча́да своя́ пита́юща,/ той бо язы́ком хвале́нiе поя́ше,/ устна́ма же пе́нiе веща́ше,// я́ко таи́нник Бо́жiя благода́ти.
И ны́не и прúсно и во вéки векóв. Амúнь.
Кондáк попрáзднства, глас 4: Яви́лся еси́ днесь вселéнней,/ и свет Твой, Гóсподи, знáменася на нас,/ в рáзуме пою́щих Тя:/ пришéл еси́ и яви́лся еси́,// Свет Непристýпный.
Трисвятое
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас. (3 раза)
Хор: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас.
Прокимен недели по Богоявлении, глас 1
Чтец: Прокíмен, глас пéрвый, псалóм Давíдов: Бýди, Гóсподи, ми́лость Твоя́ на нас, я́коже уповáхом на Тя. (Пс.32:22)
Хор: Бýди, Гóсподи, мúлость Твоя́ на нас,/ я́коже уповáхом на Тя.
Чтец:Рáдуйтеся, прáведнiи, о Гóсподе, прáвым подобáет похвалá. (Пс.32:1)
Хор: Бýди, Гóсподи, мúлость Твоя́ на нас,/ я́коже уповáхом на Тя.
Прокимен святителя, глас 1
Чтец: Прокíмен, глас тóйже, псалóм Давíдов: Устá моя́ возглагóлют премýдрость,/ и поучéнiе сéрдца моегó рáзум. (Пс.48:4)
Хор: Устá моя́ возглагóлют премýдрость,/ и поучéнiе сéрдца моегó рáзум.
АПОСТОЛ
Чтец: Ко Ефесéем послáнiя святáго апóстола Пáвла чтéнiе.
(Еф.зач.224Б): Брáтiе, еди́ному комýждо нас дадéся благодáть по мéре даровáнiя Хрiстóва. Тéмже глагóлет: возшéд на высотý, плени́л еси́ плен, и дадé дая́нiя человéком. А éже взы́де, что есть, тóчiю я́ко и сни́де прéжде в дóльнейшiя страны́ земли́? Сшéдый, Той есть и возшéдый превы́ше всех небéс, да испóлнит вся́ческая. И Той дал есть óвы ýбо Апóстолы, óвы же прорóки, óвы же Благовéстники, óвы же пáстыри и учи́тели, к совершéнiю святы́х, в дéло служéнiя, в созидáнiе Тéла Хрїстóва, дóндеже дости́гнем вси во единéнiе вéры и познáнiя Сы́на Бóжiя, в мýжа совершéнна, в мéру вóзраста исполнéнiя Хрїстóва.
[Русский синодальный перевод]Каждому же из нас дана благодать по мере дара Христова. Посему и сказано: восшед на высоту, пленил плен и дал дары человекам. А «восшел» чтó означает, как не то, что Он и нисходил прежде в преисподние места земли? Нисшедший, Он же есть и восшедший превыше всех небес, дабы наполнить все. И Он поставил одних Апостолами, других пророками, иных Евангелистами, иных пастырями и учителями, к совершению святых, на дело служения, для созидания Тела Христова, доколе все придем в единство веры и познания Сына Божия, в мужа совершенного, в меру полного возраста Христова.(гл.4:7-13)
Чтец:Ко Еврéем послáнiя святáго апóстола Пáвла чтéнiе.
(Евр.зач.335): Брáтiе, повинýйтеся настáвником вáшым и покаря́йтеся: тíи бо бдят о душáх вáших, я́ко слóво воздáти хотя́ще: да с рáдостiю сié творя́т, а не воздыхáюще, нѣ́сть бо полéзно вáм сié. Моли́теся о нáс: уповáем бо, я́ко добрý сóвѣсть и҆́мамы, во всѣх дóбре хотя́ще жи́ти. Ли́шше же молю́, сié твори́те, да вскóрѣ устрóюся вáм (возвращýся к вaм). Бóг же ми́ра, возведы́й из мéртвых пáстыря овцáм вели́каго крóвiю завѣ́та вѣ́чнаго, Гóспода нáшего Iисýса Хрїстá, да соверши́т вы во вся́цѣм дѣ́лѣ блáзѣ, сотвори́ти вóлю егó, творя́ в вaс благоугóдное пред ним Iисýс Хрїстóм: емýже слáва во вѣ́ки вѣкóв. Ами́нь.
[Русский синодальный перевод]Повинуйтесь наставникам вашим и будьте покорны, ибо они неусыпно пекутся о душах ваших, как обязанные дать отчет; чтобы они делали это с радостью, а не воздыхая, ибо это для вас неполезно. Молитесь о нас; ибо мы уверены, что имеем добрую совесть, потому что во всем желаем вести себя честно. Особенно же прошу делать это, дабы я скорее возвращен был вам. Бог же мира, воздвигший из мертвых Пастыря овец великого Кровию завета вечного, Господа нашего Иисуса Христа, да усовершит вас во всяком добром деле, к исполнению воли Его, производя в вас благоугодное Ему через Иисуса Христа. Ему слава во веки веков! Аминь. (Евр.13:17-21)
Аллилуиарий воскресный, глас 5
Чтец: Аллилýїа, аллилýїа, аллилýїа, глас пя́тый.
Хор: Аллилýїа, аллилýїа, аллилýїа.
Чтец: Ми́лости Твоя́, Гóсподи, во век воспою́, в род и род возвещý и҆́стину Твою́ усты́ мои́ми. (Пс.88:2)
Хор: Аллилýїа, аллилýїа, аллилýїа.
Чтец: Занé рекл еси́: во век ми́лость сози́ждется, на небесéх уготóвится и҆́стина Твоя́. (Пс.88:3)
Хор: Аллилýїа, аллилýїа, аллилýїа.
Аллилуарий недели по Рождестве, глас 4
Чтец: Аллилýїа, аллилýїа, аллилýїа, глас вторы́й. Устá прáведнаго поучáтся премýдрости, и язы́к егó возглагóлет суд. (Пс.36:30)
Хор: Аллилýїа, аллилýїа, аллилýїа.
Чтец: Закóн Бóга егó в сéрдце егó, и не зáпнутся стопы́ егó. (Пс.36:31)
Хор: Аллилýїа, аллилýїа, аллилýїа.
ЕВАНГЕЛИЕ
От Матфéя Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Мф.зач.8): Во врéмя óно, слы́шав Iисýс, я́ко Iоáнн прéдан бысть, оты́де в Галiлéю, и остáвль Назарéт, пришéд всели́ся в Капернаýм в помóрiе, в предéлех Завулóних и Неффалíмлих. Да сбýдется речéнное Исáiем прорóком, глагóлющим: земля́ Завулóня и земля́ Неффалíмля, путь мóря об он пол Iордáна, Галiлéа язы́к, лю́дiе седя́щiи во тме ви́деша свет вéлiй, и седя́щим в странé и сéни смéртней, свет возсiя́ им. Оттóле начáт Iисýс проповéдати и глагóлати: покáйтеся, прибли́жися бо Цáрство Небéсное.
[Русский синодальный перевод]Услышав же Иисус, что Иоанн отдан под стражу, удалился в Галилею и, оставив Назарет, пришел и поселился в Капернауме приморском, в пределах Завулоновых и Неффалимовых. Да сбудется реченное чрез пророка Исайю, который говорит: земля Завулонова и земля Неффалимова, на пути приморском, за Иорданом, Галилея языческая, народ, сидящий во тьме, увидел свет великий, и сидящим в стране, и тени смертной воссиял свет.С того времени Иисус начал проповедовать и говорить. Покайтесь, ибо приблизилось Царство Небесное.(Мф.4:12-17)
(Ин.зач.36): Речé Госпóдь ко пришéдшим к Немý Iудéем: Аз eсмь дверь. Мнóю áще кто вни́дет, спасéтся; и вни́дет, и изы́дет, и пáжить обря́щет. Тать не прихóдит, рáзве да укрáдет и убиéт и погуби́т: Аз прiидóх, да живóт и́мут, и ли́шше и́мут. Аз eсмь пáстырь дóбрый: пáстырь дóбрый дýшу свою́ полагáет за óвцы: А наéмник, и́же несть пáстырь, eмýже не суть óвцы своя́, ви́дит вóлка грядýща, и оставля́ет óвцы, и бéгает. И волк расхи́тит их, и распýдит óвцы. А наéмник бежи́т, я́ко наéмник eсть, и неради́т о oвцáх. Аз eсмь пáстырь дóбрый, и знáю Моя́, и знáют Мя Моя́. Якоже знáет Мя Oтéц, и Аз знáю Oтцá, и дýшу Мою́ полагáю за óвцы. И и́ны óвцы и́мам, я́же не суть от дворá сегó, и ты́я Ми подобáет привести́, и глас Мой услы́шат, и бýдет eди́но стáдо, и eди́н Пáстырь.
[Русский синодальный перевод]Я есмь дверь: кто войдет Мною, тот спасется, и войдет, и выйдет, и пажить найдет. Вор приходит только для того, чтобы украсть, убить и пажить найдет. Вор приходит только для того, чтобы украсть, убить и погубить. Я пришел для того, чтобы имели жизнь и имели с избытком. Я есмь пастырь добрый: пастырь добрый полагает жизнь свою за овец. А наемник, не пастырь, которому овцы не свои, видит приходящего волка, и оставляет овец, и бежит; и волк расхищает овец, и разгоняет их. А наемник бежит, потому что наемник, и нерадит об овцах. Я есмь пастырь добрый; и знаю Моих, и Мои знают Меня. Как Отец знает Меня, так и Я знаю Отца; и жизнь Мою полагаю за овец. Есть у Меня и другие овцы, которые не сего двора, и тех надлежит Мне привести: и они услышат голос Мой, и будет одно стадо и один Пастырь.(Ин.10:9-16)
Хор: Слáва Тебé, Гóсподи, слáва Тебé.
Помяни́ нас, Гóсподи, егдá прїи́деши во Цáрствiи Твоéм.
Помяни́ нас, Влады́ко, егдá прїи́деши во Цáрствiи Твоéм.
Помяни́ нас, Святы́й, егдá прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стих: Приступи́те к Немý и просвети́теся, и лицá вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцá, Вседержи́теля, Творцá нéбу и землѝ, ви́димым же всем и неви́димым. И во Еди́наго Гóспода Iисýса Хрїстá, Сы́на Бóжiя, Единорóднаго, И҆́же от Ѻтцá Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пилáте, и страдáвша и погребéнна. И воскрéсшаго в трéтiй день по Писáнiем, и҆ возшéдшаго на небесá и седя́ща одеснýю Ѻтцá. И пáки грядýщаго со слáвою суди́ти живы́м и мéртвым, Егóже Цáрствiю не бýдет концá. И в Дýха Святáго, Гóспода, Животворя́щаго, И҆́же от Ѻтцá исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, прости Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умé и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжiй, поми́луй нас. Ами́нь.
КОНДАК
Кондáк попрáзднства, глас 4: Яви́лся еси́ днесь вселéнней,/ и свет Твой, Гóсподи, знáменася на нас,/ в рáзуме пою́щих Тя:/ пришéл еси́ и яви́лся еси́,// Свет Непристýпный.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винá, благоволи́ же и о мне грéшнем, утвердѝ, вразумѝ сéрдце моé, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 раза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Его./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негó.
Вместо Достойно есть (задостóйник Богоявлéнiя)
Хор: Величáй, душé моя́,// Честнéйшую Гóрних вóинств, Дéву Пречúстую, Богорóдицу.
Iрмóс (глас 2): Недоумéет всяк язы́к благохвали́ти по достоя́нiю,/ изумевáет же ум и премíрный пéти Тя, Богорóдице,/ обáче Благáя сýщи, вéру прiими́,/ и́бо любóвь вéси Божéственную нáшу:// Ты бо хрїстiáн еси́ Предстáтельница, Тя величáем.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
ОТПУСТ
Гóсподи, Iисýсе Хрїстé, Сыне Бóжїй, моли́твами пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.