СВЯТОЕ БОГОЯВЛЕНИЕ. КРЕЩЕНИЕ Господа Бога и Спаса нашего Иисуса Христа. УТРЕНЯ Служба мирским чином
19 января́ 2023 гóда. Святóе Богоявлéнiе. Крещéнiе Гóспода и Бóга и Спáса нáшего Iисýса Хрїстá. Прáздничная слýжба для домáшнего (келéйнаго) совершéнiя. Послéдованiе ýтрени.
УТРЕНЯ
Начáло зри здесь ( великое повечерие)
ШЕСТОПСАЛМИЕ
Слáва в вы́шних Бóгу, и на землѝ мир, в человéцех благоволéнiе. (трúжды) Гóсподи, устнé моѝ отвéрзеши, и устá моя́ возвестя́т хвалý Твою́. (двáжды)
Псалом 3
Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Аз уснýх, и спах, востáх, я́ко Госпóдь застýпит мя.
Псалом 37
Гóсподи, да не я́ростiю Твоéю обличи́ши менé, нижé гнéвом Твои́м накáжеши менé. Яко стрéлы Твоя́ унзóша во мне, и утверди́л есѝ на мне рýку Твою́. Несть исцелéнiя в плóти моéй от лицá гнéва Твоегó, несть ми́ра в костéх мои́х от лицá грех мои́х. Яко беззакóнiя моя́ превзыдóша главý мою́, я́ко брéмя тя́жкое отяготéша на мне. Возсмердéша и согни́ша рáны моя́ от лицá безýмiя моегó. Пострадáх и слякóхся до концá, весь день сéтуя хождáх. Яко ля́двiя моя́ напóлнишася поругáнiй, и несть исцелéнiя в плóти моéй. Озлóблен бых и смири́хся до зелá, рыкáх от воздыхáнiя сéрдца моегó. Гóсподи, пред Тобóю все желáнiе моé и воздыхáнiе моé от Тебé не утаи́ся. Сéрдце моé смятéся, остáви мя си́ла моя́, и свет óчiю моéю, и той несть со мнóю. Дрýзи моѝ и и҆́скреннiи моѝ пря́мо мне прибли́жишася и стáша, и бли́жнiи моѝ отдалéче менé стáша и нуждáхуся и҆́щущiи дýшу мою́, и и҆́щущiи злáя мне глагóлаху сýетная и льсти́вным весь день поучáхуся. Аз же я́ко глух не слы́шах и я́ко нем не отверзáяй уст свои́х. И҆ бых я́ко человéк не слы́шай и не имы́й во устéх свои́х обличéнiя. Яко на Тя, Гóсподи, уповáх, Ты услы́шиши, Гóсподи Бóже мой. Яко рех: да не когдá порáдуют ми ся вразѝ моѝ: и внегдá подвижáтися ногáм мои́м, на мя велерéчеваша. Яко аз на рáны готóв, и болéзнь моя́ предо мнóю есть вы́ну. Яко беззакóнiе моé аз возвещý и попекýся о гресé моéм. Вразѝ же моѝ живýт и укрепи́шася пáче менé, и умнóжишася ненави́дящiи мя без прáвды. Воздаю́щiи ми злáя возблагáя оболгáху мя, занé гоня́х благосты́ню. Не остáви менé, Гóсподи Бóже мой, не отступѝ от менé. Вонмѝ в пóмощь мою́, Гóсподи спасéнiя моегó.
Не остáви менé, Гóсподи Бóже мой, не отступѝ от менé. Вонмѝ в пóмощь мою́, Гóсподи спасéнiя моегó.
Псалом 62
Бóже, Бóже мой, к Тебé ýтренюю, возжадá Тебé душá моя́, коль мнóжицею Тебé плоть моя́, в земли́ пýсте и непрохóдне, и безвóдне. Тáко во святéм яви́хся Тебé, ви́дети си́лу Твою́ и слáву Твою́. Я́ко лýчши ми́лость Твоя́ пáче живóт, устнé мои́ похвали́те Тя. Тáко благословлю́ Тя в животé моéм, о и҆́мени Твоéм воздежý рýце моѝ. Я́ко от тýка и мáсти да испóлнится душá моя́, и устнáма рáдости восхвáлят Тя устá моя́. Áще поминáх Тя на постéли моéй, на ýтренних поучáхся в Тя. Я́ко был есѝ Помóщник мой, и в крóве крилý Твоéю возрáдуюся. Прильпé душá моя́ по Тебé, менé же прiя́т десни́ца Твоя́. Тíи же всýе искáша дýшу мою́, вни́дут в преиспóдняя землѝ, предадя́тся в рýки орýжiя, чáсти ли́совом бýдут. Царь же возвесели́тся о Бóзе, похвáлится всяк клены́йся И҆м, я́ко загради́шася устá глагóлющих непрáведная.
На ýтренних поучáхся в Тя. Яко был есѝ Помóщник мой, и в крóве крилý Твоéю возрáдуюся. Прильпé душá моя́ по Тебé, менé же прiя́т десни́ца Твоя́.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Псалом 87
Гóсподи Бóже спасéнiя моегó, во дни воззвáх, и в нощи́ пред Тобóю. Да вни́дет пред Тя моли́тва моя́: приклони́ ýхо Твоé к молéнiю моемý, я́ко испóлнися зол душá моя́, и живóт мой аду прибли́жися. Привменéн бых с низходя́щими в ров, бых я́ко человéк без пóмощи, в мéртвых свобóдь, я́ко я́звеннiи спя́щiи во грóбе, и҆́хже не помянýл еси́ ктомý, и тíи от руки́ Твоея́ отриновéни бы́ша. Положи́ша мя в рóве преиспóднем, в тéмных и сéни смéртней. На мне утверди́ся я́рость Твоя́, и вся вóлны Твоя́ навéл еси́ на мя. Удáлил еси́ знáемых мои́х от менé, положи́ша мя мéрзость себé: прéдан бых и не исхождáх. Очи мои́ изнемогóсте от нищеты́, воззвáх к Тебé, Гóсподи, весь день, воздéх к Тебé рýце мои́. Едá мéртвыми твори́ши чудесá? И҆ли́ врáчеве воскреся́т, и исповéдятся Тебé? Едá повéсть кто во грóбе ми́лость Твою́, и и҆́стину Твою́ в поги́бели? Едá познáна бýдут во тьме чудесá Твоя́, и прáвда Твоя́ в земли́ забвéнней? И҆ аз к Тебé, Гóсподи, воззвáх и ýтро моли́тва моя́ предвари́т Тя. Вскýю, Гóсподи, отрéеши дýшу мою́, отвращáеши лицé Твоé от менé? Нищ есмь аз, и в трудéх от ю́ности моея́; вознéс же ся, смири́хся, и изнемогóх. На мне преидóша гнéви Твои́, устрашéнiя Твоя́ возмути́ша мя, обыдóша мя я́ко водá, весь день одержáша мя вкýпе. Удáлил еси́ от менé дрýга и и҆́скренняго, и знáемых моих от страстéй.
Гóсподи Бóже спасéнiя моегó, во дни воззвáх, и в нощи́ пред Тобóю. Да вни́дет пред Тя моли́тва моя́: приклони́ ýхо Твоé к молéнiю моемý.
Псалом 102
Благословѝ, душé моя, Гóспода, и вся внýтренняя моя и҆́мя святóе Егó. Благословѝ, душé моя, Гóспода, и не забывáй всех воздая́нїй Егó, очищáющаго вся беззакóнїя твоя́, исцеля́ющаго вся недýги твоя́, избавля́ющаго от истлéнiя живóт твой, венчáющаго тя ми́лостїю и щедрóтами, исполня́ющаго во благи́х желáнїе твоé: обновится я́ко óрля юность твоя́. Творя́й ми́лостыни Госпóдь, и судьбý всем оби́димым. Сказá путѝ Своя́ Моисéови, сыновóм Iзрáилевым хотéнїя Своя́: Щедр и Ми́лостив Госпóдь, Долготерпели́в и Многоми́лостив. Не до концá прогнéвается, нижé во век враждýет, не по беззакóнїем нáшим сотвори́л есть нам, нижé по грехóм нáшым воздáл есть нам. Я́ко по высотé небéсней от землѝ, утверди́л есть Госпóдь ми́лость Свою́ на боя́щихся Егó. Ели́ко отстоят востóцы от зáпад, удáлил есть от нас беззакóнїя нáша. Я́коже щéдрит отéц сы́ны, ущéдри Госпóдь боя́щихся Егó. Я́ко Той познá создáнїе нáше, помянý, яко персть есмы́. Человéк, яко травá днíе eгó, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегó. Ми́лость же Госпóдня от вéка и до вéка на боя́щихся Егó, и прáвда Егó на сынéх сынóв, храня́щих завéт Егó, и пóмнящих зáповеди Егó твори́ти я. Госпóдь на Небесѝ уготóва Престóл Свой, и Цáрство Егó всéми обладáет. Благослови́те Гóспода вси Áнгели Егó, си́льнїи крéпостїю, творя́щїи слóво Егó, услышати глас словéс Егó. Благослови́те Гóспода вся Си́лы Егó, слýги Егó, творя́щїи вóлю Егó. Благослови́те Гóспода вся делá Егó, на вся́ком мéсте влады́чества Егó, благослови́, душé моя́, Гóспода.
На вся́ком мéсте влады́чества Егó, благослови́, душé моя́, Гóспода.
Псалом 142
Гóсподи, услы́ши моли́тву мою́, внуши́ молéнiе моé во и҆́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнá враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И҆ уны́ во мне дух мой, во мне смятéся сéрдце моé. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебé рýце мои́, душá моя́, я́ко земля́ безвóдная Тебé. Скóро услы́ши мя, Гóсподи, исчезé дух мой, не отврати́ лицá Твоегó от менé, и уподóблюся низходя́щым в ров. Слы́шану сотвори́ мне заýтра ми́лость Твою́, я́ко на Тя уповáх. Скажи́ мне, Гóсподи, путь вóньже пойдý, я́ко к Тебé взях дýшу мою́. И҆зми́ мя от враг мои́х, Гóсподи, к Тебé прибегóх. Научи́ мя твори́ти вóлю Твою́, я́ко Ты еси́ Бог мой. Дух Твой Благíй настáвит мя на зéмлю прáву. И҆́мене Твоегó рáди, Гóсподи, живи́ши мя, прáвдою Твоéю изведéши от печáли дýшу мою́. И҆ ми́лостiю Твоéю потреби́ши враги́ моя́ и погуби́ши вся стужáющыя души́ моéй, я́ко аз раб Твой есмь.
Услы́ши мя, Гóсподи, в прáвде Твоéй и не вни́ди в суд с рабóм Твои́м. Услы́ши мя, Гóсподи, в прáвде Твоéй и не вни́ди в суд с рабóм Твои́м.
Дух Твой Благíй настáвит мя на зéмлю прáву.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
БОГ ГОСПОДЬ, глас 1
Чтец: Бог Госпóдь, и яви́ся нам, благословéн Гряды́й во И҆́мя Госпóдне.(Пс.117:27А,26А)
Чтец: И҆сповéдайтеся Гóсподеви, я́ко благ, я́ко в век ми́лость Егó.(Пс.135:1/106:1)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Обышéдше обыдóша мя и и҆́менем Госпóдним противля́хся и҆м.(Пс.117:11)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Не умрý, но жив бýду и повéм делá Госпóдня.(Пс.117:17)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Кáмень, Егóже небрегóша зи́ждущiи, Сей бысть во главý ýгла, от Гóспода бысть Сей, и есть ди́вен во очесéх нáших. (Пс.117:22-23)
Хор: Бог Госпóдь, и явúся нам, благословéн Гряды́й во И҆́мя Госпóдне.
Тропáрь прáздника, глас 1: Во Ioрдáне крещáющуся Тебé, Гóсподи,/ Трóйческое яви́ся поклонéнiе:/ Роди́телев бо глас свидéтельствоваше Тебé,/ возлю́бленнаго Тя Сы́на именýя,/ и Дух в ви́де голуби́не/ извéствоваше словесé утверждéнiе./ Явлéйся Хрїстé Бóже// и мiр просвещéй, слáва Тебé.(Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Во Ioрдáне крещáющуся Тебé, Гóсподи,/ Трóйческое яви́ся поклонéнiе:/ Роди́телев бо глас свидéтельствоваше Тебé,/ возлю́бленнаго Тя Сы́на именýя,/ и Дух в ви́де голуби́не/ извéствоваше словесé утверждéнiе./ Явлéйся Хрїстé Бóже// и мiр просвещéй, слáва Тебé.
Хор: Гóсподи, поми́луй. (Трúжды)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМЫ И СЕДАЛЬНЫ
КАФИЗМА ТРИНАДЦАТАЯ
И чтем кафíсму 13-ю ( или одúн псалóм, или до 1-й Слáвы)
[Псалом 91]Блáго есть исповéдатися Гóсподеви, и пéти и́мени Твоемý, Вы́шнiй: возвещáти заýтра ми́лость Твою́ и и́стину Твою́ на вся́ку нощь, в десятострýннем псалти́ри с пéснiю в гýслех. Я́ко возвесели́л мя еси́, Гóсподи, в творéнiи Твоéм, и в дéлех рукý Твоéю возрáдуюся. Я́ко возвели́чишася делá Твоя́, Гóсподи, зелó углуби́шася помышлéнiя Твоя́. Муж безýмен не познáет, и неразýмив не разумéет сих. Внегдá прозябóша грéшницы я́ко травá, и проникóша вси дéлающiи беззакóнiе: я́ко да потребя́тся в век вéка. Ты же Вы́шний во век, Гóсподи. Я́ко се врази́ Твои́, Гóсподи, я́ко се врази́ Твои́ поги́бнут, и разы́дутся вси дéлающiи беззакóнiе. И вознесéтся я́ко единорóга рог мой, и стáрость моя́ в елéи масти́те. И воззрé óко моé на враги́ моя́, и востаю́щiя на мя лукáвнующiя услы́шит ýхо моé. Прáведник я́ко фи́никс процветéт, я́ко кедр, и́же в Ливáне, умнóжится. Насаждéни в домý Госпóдни, во двóрех Бóга нáшего процветýт, ещé умнóжатся в стáрости масти́те, и благопрiéмлюще бýдут. Да возвестя́т, я́ко прав Госпóдь Бог наш, и несть непрáвды в Нем.
[Псалом 92]Госпóдь воцари́ся, в лéпоту облечéся: облечéся Госпóдь в си́лу и препоя́сася, и́бо утверди́ вселéнную, я́же не подви́жится. Готóв Престóл Твой оттóле: от вéка Ты еси́. Воздвигóша рéки, Гóсподи, воздвигóша рéки глáсы своя́. Вóзмут рéки сотрéнiя своя́, от гласóв вод мнóгих. Ди́вны высоты́ морскíя, ди́вен в высóких Госпóдь. Свидéнiя Твоя́ увéришася зелó, дóму Твоемý подобáет святы́ня, Гóсподи, в долготý днiй.
[Псалом 93]Бог отмщéнiй Госпóдь, Бог отмщéнiй не обинýлся есть. Вознеси́ся Судя́й земли́, воздáждь воздая́нiе гóрдым. Докóле грéшницы, Гóсподи, докóле грéшницы восхвáлятся? Провещáют и возглагóлют непрáвду, возглагóлют вси дéлающiи беззакóнiе? Лю́ди Твоя́, Гóсподи, смири́ша и достоя́нiе Твоé озлóбиша. Вдови́цу и си́ра умори́ша и пришéльца уби́ша, и рéша: не ýзрит Госпóдь, нижé уразумéет Бог Iáковль. Разумéйте же безýмнiи в лю́дех и бýiи нéкогда умудри́теся. Насаждéй ýхо, не слы́шит ли? Или́ создáвый óко, не сматря́ет ли? Наказýяй язы́ки, не обличи́т ли, учáй человéка рáзуму? Госпóдь весть помышлéнiя человéческая, я́ко суть сýетна. Блажéн человéк, eгóже áще накáжеши, Гóсподи, и от закóна Твоегó научи́ши eгó, укроти́ти eгó от дней лю́тых, дóндеже изры́ется грéшному я́ма. Я́ко не отри́нет Госпóдь людéй Свои́х, и достоя́нiя Своегó не остáвит, дóндеже прáвда обрати́тся на суд, и держáщiися ея́ вси прáвiи сéрдцем. Кто востáнет ми на лукáвнующiя? Или́ кто спредстáнет ми на дéлающiя беззакóнiе? Áще не Госпóдь помóгл бы ми, вмáле всели́лася бы во ад душá моя́. Áще глагóлах, подви́жеся ногá моя́, ми́лость Твоя́, Гóсподи, помогáше ми. По мнóжеству болéзней мои́х в сéрдце моéм, утешéнiя Твоя́ возвесели́ша дýшу мою́. Да не прибýдет Тебé престóл беззакóнiя, созидáяй труд на повелéнiе. Уловя́т на дýшу прáведничу, и кровь непови́нную осýдят. И бысть мне Госпóдь в прибéжище, и Бог мой в пóмошь уповáнiя моегó. И воздáст им Госпóдь беззакóнiе их и по лукáвствiю их погуби́т я́ Госпóдь Бог (наш).
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 94]Прiиди́те, возрáдуемся Гóсподеви, воскли́кнем Бóгу Спаси́телю нáшему: предвари́м лицé Егó во исповéданiи, и во псалмéх воскли́кнем Емý. Я́ко Бог Вéлiй Госпóдь, и Царь Вéлiй по всей земли́, я́ко в руцé Егó вси концы́ земли́, и высоты́ гор Тогó суть. Я́ко Тогó есть мóре, и Той сотвори́ é, и сýшу рýце Егó создáсте. Прiиди́те, поклони́мся и припадéм Емý, и восплáчемся пред Гóсподем сотвóршим нас: я́ко Той есть Бог наш, и мы лю́дiе пáжити Его́, и óвцы руки́ Егó. Днесь áще глас Егó услы́шите, не ожесточи́те сердéц вáших, я́ко в прогнéванiи, по дни искушéнiя в пусты́ни, вóньже искуси́ша Мя отцы́ вáши, искуси́ша Мя, и ви́деша делá Моя́. Четы́редесять лет негодовáх рóда тогó, и рех, при́сно заблуждáют сéрдцем, тíи же не познáша путéй Мои́х, я́ко кля́хся во гнéве Моéм, áще вни́дут в покóй Мой.
[Псалом 95]Воспóйте Гóсподеви песнь нóву, воспóйте Гóсподеви вся земля́, воспóйте Гóсподеви, благослови́те и́мя Егó, благовести́те день от дне спасéнiе Егó. Возвести́те во язы́цех слáву Егó, во всех лю́дех чудесá Егó. Я́ко Вéлiй Госпóдь и хвáлен зелó, стрáшен есть над всéми бóги. Я́ко вси бóзи язы́к бéсове: Госпóдь же небесá сотвори́. Исповéданiе и красотá пред Ним, святы́ня и великолéпiе во святи́ле Егó. Принеси́те Гóсподеви отéчествiя язы́к, принеси́те Гóсподеви слáву и честь. Принеси́те Гóсподеви слáву и́мени Егó, возми́те жéртвы, и входи́те во дворы́ Егó. Поклони́теся Гóсподеви во дворé святéм Егó, да подви́жится от лицá Егó вся земля́. Рцы́те во язы́цех, я́ко Госпóдь воцари́ся, и́бо испрáви вселéнную, я́же не подви́жится: су́дит лю́дем прáвостiю. Да возвеселя́тся небесá, и рáдуется земля́, да подви́жится мóре и исполнéнiе eгó. Возрáдуются поля́, и вся я́же на них: тогдá возрáдуются вся древá дубрáвная от лицá Госпóдня, я́ко грядéт, я́ко грядéт суди́ти земли́, суди́ти вселéнней в прáвду, и лю́дем и́стиною Своéю.
[Псалом 96]Госпóдь воцари́ся, да рáдуется земля́, да веселя́тся óстрови мнóзи. О́блак и мрак óкрест Eгó, прáвда и судьбá исправлéнiе Престóла Егó. Огнь пред Ним предъи́дет, и попали́т óкрест враги́ Егó. Освети́ша мóлнiя Егó вселéнную: ви́де, и подви́жеся земля́. Гóры я́ко воск растáяша от лицá Госпóдня, от лицá Гóспода всея́ земли́. Возвести́ша небесá прáвду Егó, и ви́деша вси лю́дiе слáву Егó. Да постыдя́тся вси клáняющiися истукáнным, хвáлящiися о и́долех свои́х, поклони́теся Ему́ вси Áнгели Егó. Слы́ша и возвесели́ся Сióн, и возрáдовашася дщéри Иудéйскiя, судéб рáди Твои́х, Гóсподи, я́ко Ты Госпóдь Вы́шнiй над всéю землéю, зелó превознéслся еси́ над всéми бóги. Лю́бящiи Гóспода, ненави́дите злáя, храни́т Госпóдь ду́ши преподóбных Свои́х, из ру́ки грéшничи избáвит я́. Свет возсiя́ прáведнику, и прáвым сéрдцем весéлiе. Весели́теся, прáведнiи, о Гóсподе и исповéдайте пáмять Святы́ни Егó.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 97]Воспóйте Гóсподеви песнь нóву, я́ко ди́вна сотвори́ Госпóдь. Спасé Егó десни́ца Егó, и мы́шца святáя Егó. Сказá Госпóдь спасéнiе Своé, пред язы́ки откры́ прáвду Свою́. Помяну́ ми́лость Свою́ Iáкову, и и́стину Свою́ дóму Iзрáилеву, ви́деша вси концы́ земли́ спасéнiе Бóга нáшего. Воскли́кните Бóгови вся земля́, воспóйте, и рáдуйтеся, и пóйте. Пóйте Гóсподеви в гу́слех, в гу́слех и глáсе псалóмсте. В трубáх кóваных и глáсом трубы́ рóжаны воструби́те пред Царéм Гóсподем. Да подви́жится мóре и исполнéнiе eгó, вселéнная и вси живу́щiи на ней. Рéки восплéщут рукóю вку́пе, гóры возрáдуются. От лицá Госпóдня, я́ко грядéт, я́ко и́дет суди́ти земли́, суди́ти вселéнней в прáвду, и лю́дем прáвостiю.
[Псалом 98]Госпóдь воцари́ся, да гнéваются лю́дiе: седя́й на Херуви́мех, да подви́жится земля́. Госпóдь в Сióне вели́к, и высóк есть над всéми людьми́. Да исповéдятся и́мени Твоему́ вели́кому, я́ко стрáшно и свя́то есть. И честь царéва суд лю́бит: Ты уготóвал еси́ правоты́, суд и прáвду во Iáкове Ты сотвори́л еси́. Возноси́те Гóспода Бóга нáшего, и покланя́йтеся поднóжiю нóгу Егó, я́ко свя́то есть. Моисéй и Аарóн во iерéех Егó, и Самуи́л в призывáющих и́мя Егó: призывáху Гóспода, и Той послу́шаше их. В столпé óблачне глагóлаше к ним: я́ко храня́ху свидéнiя Егó и повелéнiя Егó, я́же дадé им. Гóсподи Бóже наш, Ты послу́шал еси́ их: Бóже, ты ми́лостив бывáл еси́ им, и мщáя на вся начинáнiя их. Возноси́те Гóспода Бóга нáшего, и покланя́йтеся в горé святéй Егó, я́ко Свят Госпóдь Бог наш.
[Псалом 99]Воскли́кните Бóгови вся земля́, рабóтайте Гóсподеви в весéлiи, вни́дите пред Ним в рáдости. Увéдите, я́ко Госпóдь той есть Бог наш: Той сотвори́ нас, а не мы, мы же лю́дiе Егó и óвцы пáжити Егó. Вни́дите во вратá Егó во исповéданiи, во дворы́ Егó в пéнiих: исповéдайтеся Ему́, хвали́те и́мя Егó. Я́ко благ Госпóдь, в век ми́лость Егó, и дáже до рóда и рóда и́стина Егó.
[Псалом 100]Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Чтец: Слáва Отцý и Сыну и Святóму Дýху, и ныне и присно и во вéки векóв, аминь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, поми́луй. (12 раз)
СЕДАЛЬНЫ
Хор (по кафíсме седáлен прáздника, глас 3): Я́вльшуся Тебé во Iордáне, Спáсе,/ и крéщшуся Тебé от Предтéчи, Хрїстé,/ возлю́бленный Сын свидéтельствован был еси́,/ тéмже и Собезначáлен Отцу́ яви́лся еси́,/ Дух же Святы́й на Тя схождáше,/ И́мже и просвети́вшеся, вопiéм:// слáву Бóгу, Су́щему в Трóице.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Глас 4: Струи́ освяти́л еси́ Iордáнскiя,/ держáву сокруши́л еси́ грехóвную, Хрїстé Бóже наш,/ преклони́л еси́ длáни Себé Предтéчеве/ и спасл еси́ от лéсти человéческiй род.// Тéмже Тя мóлим: спаси́ ду́ши нáша.
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ныне и присно и во вéки векóв. Аминь.
КАФИЗМА ЧЕТЫРНАДЦАТАЯ
И чтем кафíсму 14-ю (или одúн псалóм, или до 1-й Слáвы)
[Псалом 101]Гóсподи, услы́ши моли́тву мою́, и вопль мой к Тебé да прiи́дет. Не отврати́ лицá Твоегó от менé: вóньже áще день скорблю́, приклони́ ко мне ýхо Твоé: вóньже áще день призовý Тя, скóро услы́ши мя. Яко исчезóша я́ко дым днíе мои́, и кóсти моя́ я́ко суши́ло сосхóшася. Уя́звен бых я́ко травá, и и́зсше сéрдце моé, я́ко забы́х снéсти хлеб мой. От глáса воздыхáнiя моегó прильпé кость моя́ плóти моéй. Уподóбихся нея́сыти пусты́нней, бых я́ко нощны́й вран на ны́рищи. Бдех и бых я́ко пти́ца осóбящаяся на зде. Весь день поношáху ми врази́ мои́, и хвáлящiи мя мнóю кленя́хуся. Занé пéпел я́ко хлеб ядя́х, и питié моé с плáчем растворя́х. От лицá гнéва Твоегó и я́рости Твоея́: я́ко вознéс низвéргл мя еси́. Днíе мои́ я́ко сень уклони́шася, и аз я́ко сéно изсхóх. Ты же, Гóсподи, во век пребывáеши, и пáмять Твоя́ в род и род. Ты воскрéс ущéдриши Сióна, я́ко врéмя ущéдрити eгó, я́ко прiи́де врéмя. Яко благоволи́ша раби́ Твои́ кáменiе eгó, и персть eгó ущéдрят. И убоя́тся язы́цы и́мене Госпóдня, и вси цáрiе зéмстiи слáвы Твоея́. Яко сози́ждет Госпóдь Сióна, и яви́тся во слáве Своéй. Призрé на моли́тву смирéнных, и не уничижи́ молéнiя их. Да напи́шется сié в род ин, и лю́дiе зи́ждемiи восхвáлят Гóспода. Яко прини́че с высоты́ святы́я Своея́, Госпóдь с Небесé на зéмлю призрé, услы́шати воздыхáнiе оковáнных, разреши́ти сы́ны умерщвлéнных, возвести́ти в Сióне И҆́мя Госпóдне, и хвалý Егó во Iерусали́ме. Внегдá собрáтися лю́дем вкýпе, и царéм, éже рабóтати Гóсподеви. Отвещá eмý на пути́ крéпости eгó: умалéнiе дней мои́х возвести́ ми. Не возведи́ менé в преполовéнiе дней мои́х: в рóде родóв лéта Твоя́. В начáлех Ты, Гóсподи, зéмлю основáл еси́, и делá рукý Твоéю суть небесá. Та поги́бнут, Ты же пребывáеши: и вся, я́ко ри́за обетшáют, и я́ко одéжду свиéши я́ и изменя́тся. Ты же тóйжде еси́, и лéта Твоя́ не оскудéют. Сы́нове раб Твои́х вселя́тся, и сéмя их во век испрáвится.
[Псалом 102]Благослови, душé моя, Гóспода, и вся внýтренняя моя имя святóе Егó. Благослови, душé моя, Гóспода, и не забывáй всех воздаянiй Егó, очищáющаго вся беззакóнiя твоя, исцеляющаго вся недýги твоя, избавляющаго от истлéнiя живóт твой, венчáющаго тя милостiю и щедрóтами, исполняющаго во благих желáнiе твоé: обнови́тся яко óрля юность твоя. Творя́й милостыни Госпóдь, и судьбý всем обидимым. Сказá пути Своя Моисéови, сыновóм Iзрáилевым хотéнiя Своя: Щедр и Ми́лостив Госпóдь, Долготерпели́в и Многоми́лостив. Не до концá прогнéвается, нижé во век враждýет, не по беззакóнiем нáшим сотвори́л есть нам, нижé по грехóм нáшым воздáл есть нам. Яко по высотé небéсней от земли́, утверди́л есть Госпóдь ми́лость Свою́ на боя́щихся Егó. Ели́ко отстоя́т востóцы от зáпад, удáлил есть от нас беззакóнiя нáша. Якоже щéдрит отéц сы́ны, ущéдри Госпóдь боя́щихся Егó. Яко Той познá создáнiе нáше, помянý, я́ко персть есмы́. Человéк, яко травá днíе eгó, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегó. Ми́лость же Госпóдня от вéка и до вéка на боя́щихся Егó, и прáвда Его на сынéх сынóв, храня́щих завéт Егó, и пóмнящих зáповеди Егó твори́ти я. Госпóдь на Небеси́ уготóва Престóл Свой, и Цáрство Егó всéми обладáет. Благослови́те Гóспода вси Ангели Егó, си́льнии крéпостию, творя́щии слóво Егó, услы́шати глас словéс Егó. Благослови́те Гóспода вся Си́лы Егó, слýги Егó, творя́щии вóлю Егó. Благослови́те Гóспода вся делá Егó, на вся́ком мéсте влады́чества Егó, благослови́, душé моя́, Гóспода.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 103]Благослови, душé моя, Гóспода, Бóже мой, возвеличился еси зелó. Во исповéданiе и в велелéпоту облéклся еси. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слуги́ Своя плáмень óгненный. Основáяй зéмлю на твéрди ея, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл еси им. Предéл положи́л еси, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, извести́ хлеб от земли́. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Ливáнстiи, и́хже еси насади́л. Тáмо пти́цы вогнездя́тся, еродíево жили́ще предводи́тельствует и́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л еси тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и́мже несть числá, живóтная мáлая с вели́кими, тáмо корабли́ преплáвают, змiй сей, eгóже создáл еси ругáтися eму. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé земли́. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от земли́, и беззакóнницы, я́коже не бы́ти им. Благослови́, душé моя́, Гóспода.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 104]Исповéдайтеся Гóсподеви, и призывáйте и́мя Егó, возвести́те во язы́цех делá Егó. Воспóйте Ему́ и пóйте Ему́, повéдите вся чудесá Егó. Хвали́теся о и́мени святéм Егó, да возвесели́тся сéрдце и́щущих Гóспода. Взыщи́те Гóспода, и утверди́теся, взыщи́те лицá Егó вы́ну. Помяни́те чудесá Егó, я́же сотвори́, чудесá Егó, и судьбы́ уст Егó. Сéмя Аврáамле раби́ Егó, сы́нове Iáковли избрáннiи Егó. Той Госпóдь Бог наш, по всей земли́ судьбы́ Егó. Помяну́ в век завéт Свой, слóво, éже заповéда в ты́сящи родóв, éже завещá Авраáму, и кля́тву Свою́ Iсаáку. И постáви ю́ Iáкову в повелéнiе, и Iзрáилю в завéт вéчен, глагóля: тебé дам зéмлю Ханаáню, у́же достоя́нiя вáшего, внегдá бы́ти им мáлым числóм, малéйшим и пришéльцем в ней. И преидóша от язы́ка в язы́к, и от цáрствiя в лю́ди и́ны. Не остáви человéка оби́дети их, и обличи́ о них цари́. Не прикасáйтеся помáзанным мои́м, и во прорóцех мои́х не лукáвнуйте. И призвá глад на зéмлю, вся́ко утвержéнiе хлéбное сотры́. Послá пред ни́ми человéка: в рабá прóдан бысть Ióсиф. Смири́ша во окóвах нóзе eгó, желéзо прóйде душá eгó, дóндеже прiи́де слóво Егó, слóво Госпóдне разжжé eгó. Послá царь и разреши́ eгó: князь людéй, и остáви eгó. Постáви eгó господи́на дóму своему́, и кня́зя всему́ стяжáнiю своему́, наказáти кня́зи eгó я́ко себé, и стáрцы eгó умудри́ти. И вни́де Iзрáиль во Еги́пет, и Iáков пришéльствова в зéмлю Хáмову. И возрасти́ лю́ди своя́ зелó, и укрепи́ я́ пáче врагóв их. Преврати́ сéрдце их возненави́дети лю́ди Егó, лесть сотвори́ти в рабéх Егó. Послá Моисéа рабá Своегó, Аарóна, eгóже избрá Себé. Положи́ в них словесá знáменiй Свои́х, и чудéс Свои́х в земли́ Хáмове. Послá тму и помрачи́, я́ко преогорчи́ша словесá Егó. Преложи́ вóды их в кровь, и измори́ ры́бы их. Воскипé земля́ их жáбами в сокрóвищницах царéй их. Речé, и приiидóша пéсiя му́хи, и скни́пы во вся предéлы их. Положи́ дожди́ их грáды, огнь попаля́ющ в земли́ их, и порази́ виногрáды их и смóквы их, и сотры́ вся́кое дрéво предéл их. Речé, и прiидо́ша пру́зи и гу́сеницы, и́мже не бе числá. И снедóша вся́ку траву́ в земли́ их, и поядóша всяк плод земли́ их. И порази́ вся́каго пéрвенца в земли́ их, начáток вся́каго трудá их, и изведé я́ с сребрóм и злáтом, и не бе в колéнах их боля́й. Возвесели́ся Еги́пет во исхождéнiи их, я́ко нападé страх их на ня. Распрострé óблак в покрóв им и огнь, éже просвети́ти им нóщiю. Проси́ша и прiидóша крáстели, и хлéба небéснаго насы́ти я́, развéрзе кáмень и потекóша вóды, потекóша в безвóдных рéки, я́ко помяну́ слóво святóе Своé, éже ко Авраáму, рабу́ Своему́. И изведé лю́ди Своя́ в рáдости, и избрáнныя Своя́ в весéлiи. И дадé им страны́ язы́к, и труды́ людéй наслéдоваша, я́ко да сохраня́т оправдáнiя Егó и закóна Егó взы́щут.
Чтец: Слáва Отцý и Сыну и Святóму Дýху, и ныне и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, поми́луй. (12 раз)
СЕДАЛЬНЫ
Хор (по кафíсме седáлен прáздника, глас 5): Iордáнскими струя́ми облóжся,/ И́же свéтом преслáвно одевáяйся,/ в ни́хже Адáмово естествó обнови́л еси́,/ сокру́шшееся злым преслушáнiем, Слóве Бóжiй.// Тéмже Тя восхваля́ем и святóе Твоé вси славослóвим явлéнiе.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Глас 4: Iордáне рекó,/ что удиви́лся еси́, зря Неви́димаго нáга?/ Ви́дех и вострепетáх, - речé, -/ и кáко бо Сегó не хотéх устраши́тися и зайти́?/ Áнгели Егó устраши́шася, зря́ще,/ ужасéся Нéбо, и земля́ вострепетá,/ и смятéся мóре, и вся ви́димая и неви́димая.// Хрїстóс яви́ся на Iордáне освяти́ти вóды.
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýїа (трúжды)
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýїа (трúжды)
Исповéдайтеся Бóгу Небéсному, я́ко в век ми́лость Егó.
Аллилýїа (трúжды)
ВЕЛИЧАНИЕ ПРАЗДНИКА
Хор: Величáем Тя,/ Живодáвче Хрїстé,/ нас рáди ныне плóтiю крестúвшагося// от Iоáнна в водáх Iордáнских.
(И дáлее хор продолжáет чередовáть стiхи Избранного псалмá и Величанiе)
(продолжение зри здесь)