Введение во храм Пресвятой Богородицы. Неделя 25 по Пятидесятнице, глас 8 УТРЕНЯ(окон-ие) ЧАС ПЕРВЫЙ
4 декабря́ 2022 гóда. Введéнiе (Вход) во храм Пресвятóй Влады́чицы нáшей Богорóдицы и Приснодéвы Марíи. Недéля 25 по Пятидеся́тнице. Глас 8. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном.
Окончáние всенóщного бдéния. Начáло здесь ( великая вечéрня), здесь ( ýтреня) здесь ( продолжéние ýтрени с канóном)
Глас 4
Хор: Пресвятáя Богорóдице, спасù нас.
Чтец: Се днесь возсiя́ концéм веснá рáдостная,/ просвещáющи нáшу дýшу, и помышлéнiе и ум благодáтiю,// торжествóм Богорóдицы днесь тáинственно да учреди́мся.
Хор: Пресвятáя Богорóдице, спасù нас.
Чтец: Да даронóсят днесь вся́ческая Цари́це, Мáтери Бóжiи,/ Нéбо и земля́, и Áнгелов чи́ни, и человéков мнóжество/ и да вопiю́т:// во храм ввóдится Рáдость и Избавлéнiе.
Хор: Пресвятáя Богорóдице, спасù нас.
Чтец: Писáнiе мимотечé и оскудé закóн, я́коже сень,/ и благодáти лучи́ возсiя́ша в храм Бóжiй вшéдшей Тебé, Дéво Мáти Чи́стая,// в нем благословéнная.
Хор: Пресвятáя Богорóдице, спасù нас.
Чтец: Повинýся Рождествý Твоемý, Всечи́стая,/ я́ко Творцý и Бóгу Нéбо, и земля́, и преиспóдняя,/ и всяк язы́к земны́х исповéдает,// я́ко Госпóдь яви́ся, Спас душ нáших.
Глас 1
Хор: Пресвятáя Богорóдице, спасù нас.
Тропáрь: Ликовствýим, празднолю́бцы, днесь,/ воспои́м Чи́стую Влады́чицу,// Iоакíма и Áнну достóйно чтýще.
Хор: Пресвятáя Богорóдице, спасù нас.
Тропáрь: Прорóчествуй, Давíде, глагóля Дýхом:/ приведýтся дéвы вслед Тебé,// приведýтся Тебé во храм Цари́це Мáтери.
Слáва Ѻтцý и Сы́ну и Святóму Дýху.
Трóичен: Прослáвим Трóицу Нераздéльную,/ воспои́м Еди́но Божествó// со Отцéм Слóво и Дýха Всесвятáго.
И ны́не и прúсно и во вéки векóв. Амúнь.
Богорóдичен: Моли́, Егóже родилá еси́, Гóспода,/ я́ко благоутрóбна естествóм сýща, Богороди́тельнице,// спаси́ дýши воспевáющих Тя.
Катавáсiя Рождествá (глас 1): Óтроцы, благочéстiю совоспитáни,/ злочести́ваго велéнiя небрéгше,/ óгненнаго прещéнiя не убоя́шася,/ но, посредé плáмени стоя́ще, поя́ху:// отцéв Бóже, благословéн еси́.
ПЕСНЬ 8
Iрмóс: Седмери́цею пещь/ халдéйскiй мучи́тель Богочести́вым неи́стовно разжжé,/ си́лою же лýчшею спасéны сiя́ ви́дев,/ Творцý и Избáвителю вопiя́ше:/ óтроцы, благослови́те,/ свящéнницы, воспóйте,// лю́дiе, превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Iисýсова Божествá Пребожéственная си́ла,/ в нас боголéпно возсiя́ла есть:/ плóтiю бо вкуш за всех смерть крéстную,/ разруши́ áдову крéпость./ Егóже непрестáнно дéти благослови́те, свящéнницы воспóйте,// лю́дiе превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Распны́йся востá, великовы́йный падé,/ пады́й и сокрушéнный испрáвися,/ тля отвéржена бысть, и нетлéнiе процветé:// Жи́знiю бо мéртвенное пожéрто бысть. Дéти благослови́те, свящéнницы воспóйте, лю́дiе превозноси́те во вся вéки.
Хор: Пресвятáя Богорóдице, спасù нас.
Трóичен: Трисвéтлое Божествó,/ Еди́ну сiя́ющее зарю́ от Еди́наго Трiипостáснаго Естествá, Роди́теля Безначáльна:/ Единоестéственно же Слóво Отцý, и Сцáрствующаго Единосýщнаго Дýха,/ дéти благослови́те, свящéнницы воспóйте,// лю́дiе превозноси́те во вся вéки.
Глас 8
Хор: Пресвятáя Богорóдице, спасù нас.
Чтец: Сопроти́вных разжжéнныя и пламенови́дныя на нас угаси́ стрéлы:// я́ко да поéм Тя во вся вéки.
Хор: Пресвятáя Богорóдице, спасù нас.
Чтец: Преестéственне Содéтеля и Спáса,/ Бóга Слóва родилá еси́, Дéво:// тéмже Тя поéм, и превознóсим во вся вéки.
Глас 4
Хор: Пресвятáя Богорóдице, спасù нас.
Тропáрь: Пречи́стый храм в дом Бóжiй приводя́щи Áнна иногдá,/ вопiю́щи, с вéрою речé свящéннику:/ чáдо, от Бóга дáнное мне, прiи́м ны́не,/ введи́ во храм Зижди́теля твоегó/ и, рáдуяся, пой Емý:// благослови́те, вся делá Госпóдня, Гóспода.
Хор: Пресвятáя Богорóдице, спасù нас.
Тропáрь: Речé, ви́дев, Áнне иногдá Дýхом Захáрiя:/ Жи́зни Мáтерь ввóдиши и́стинную,/ Ю́же свéтло прорóцы Бóжiи Богорóдицу проповéдаша,/ и кáко храм вмести́т Ю?/ Тем чудя́ся, вопiю́:// благослови́те, вся делá Госпóдня, Гóспода.
Хор: Пресвятáя Богорóдице, спасù нас.
Тропáрь: Рабá Бóжiя бых аз, - отвещá Áнна емý, -/ призывáющи Сегó вéрою и моли́твою, прiя́ти моея́ болéзни плод,/ по прiя́тiи же рождéнную привести́ Дáвшему Ю́./ Тем, зовя́, вопiю́:// благослови́те, вся делá Госпóдня Гóспода.
Хор: Пресвятáя Богорóдице, спасù нас.
Тропáрь: Закóнное вои́стинну дéло есть, - свящéнник речé ей, - стрáнну же весьмá вещь поразумевáю,/ зря Приводи́мую в дом Бóжiй,/ преслáвно превосходя́щую святáя благодáтiю./ Тем и рáдуяся, вопiю́:// благослови́те, вся делá Госпóдня, Гóспода.
Глас 1
Хор: Пресвятáя Богорóдице, спасù нас.
Тропáрь: Весели́тся днесь свéтло Iоакíм,/ и Áнна непорóчная Гóсподу Бóгу принóсит жéртву,// дáнную ей от обещáнiя Святýю Дщерь.
Хор: Пресвятáя Богорóдице, спасù нас.
Тропáрь: Хвáлятся святíи Давíд и Iессéй,/ и Iýда чти́тся,/ из кóрене бо их израстé плод - Дéва Чи́стая,// из Нея́же роди́ся Бог Превéчный.
Благословúм Отцá, и Сы́на, и Святáго Дýха, Гóспода.
Трóичен: Да поéтся Трисвяты́й Отéц, и Сын, и Дух Святы́й,/ Нераздéльная Еди́ница, Еди́но Божествó,// держáщее длáнiю всю тварь во вся вéки.
И ны́не и прúсно и во вéки векóв, амúнь.
Богорóдичен: Безначáльное начинáется Слóво плóтiю,/ роди́вся, я́ко благоволи́,/ Бог же и Человéк из Отрокови́цы Дéвы,/ возсозидáя ны, прéжде пáдшiя,// рáди крáйняго благоутрóбiя.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Рождествá (глас 1): Чýда преестéственнаго/ росодáтельная изобрази́ пещь óбраз:/ не бо, я́же прiя́т, пали́т ю́ныя,/ я́ко нижé огнь Божествá Дéвы,/ в Ню́же вни́де утрóбу./ Тем воспевáюще, воспоéм:/ да благослови́т тварь вся Гóспода// и превознóсит во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На кáждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Ужасéся о сем Нéбо,/ и земли́ удиви́шася концы́,/ я́ко Бог яви́ся человéком плóтски,/ и чрéво Твоé бысть прострáннейшее Небéс./ Тем Тя, Богорóдицу,// Áнгелов и человéк чиноначáлiя величáют.
Хор: Слáва, Гóсподи, Святóму Воскресéнiю Твоемý.
Чтец: Божéственным и Безначáльным Естествóм прост сый,/ сложи́лся еси́ прiя́тiем плóти, в Тебé Самóм Сiю́ состáвив, Слóве Бóжiй,/ и пострадáв я́ко человéк, пребы́л еси́ кромé страстéй, я́ко Бог.// Тéмже Тя во Двою́ Существý нераздéльно и неслiя́нно величáем.
Хор: Слáва, Гóсподи, Святóму Воскресéнiю Твоемý.
Чтец: Отцá по Существý Божéственному,/ я́коже естествóм быв человéк,/ рекл еси́ Бóга Вы́шнiй, рабóм снизходя́,/ воскрéс от грóба, благодáтiю Отцá/ земнорóдным полóж, и҆́же по естествý Бóга же и Влады́ку,// с Ни́мже Тя вси величáем.
Хор: Пресвятáя Богорóдице, спасù нас.
Богорóдичен: Яви́лася еси́, о Дéво Мáти Бóжiя,/ пáче естествá рóждши плóтiю Бóга Слóва,/ Егóже Отéц отры́гну от сéрдца Своегó прéжде всех век, я́ко Благ,// Егóже ны́не и телéс превы́шша разумéем, áще и в тéло облечéся.
Глас 8
Хор: Пресвятáя Богорóдице, спасù нас.
Чтец: Рáдости и весéлiя испóлнь есть пáмять Твоя́,/ приступáющим исцелéнiя точáщи,// и благочéстно Богорóдицу Тя возвещáющим.
Хор: Пресвятáя Богорóдице, спасù нас.
Чтец: Псалмы́ Тя воспевáем Благодáтная,/ и немóлчно, éже рáдуйся, принóсим:// Ты бо источи́ла еси́ всем рáдость.
Глас 4
Хор: Пресвятáя Богорóдице, спасù нас.
Чтец: Я́ко пресвéтлую, Богорóдице Чи́стая, душéвныя чистоты́ имýщи добрóту,/ благодáтiю же Бóжiею исполня́ема с Небесé,/ Свéтом Присносýщным просвещáеши всегдá с весéлiем вопiю́щiя:// и́стинно вы́шши всех еси́, Дéво Чи́стая.
Хор: Пресвятáя Богорóдице, спасù нас.
Чтец: Прелетáет, Богорóдице, Чи́стая, чýдо Твоé си́лу словéс:/ тéло бо в Тебé поразумевáю пáче слóва,/ течéнiя грехóвнаго непрiя́тно./ Тéмже благодáрственно вопiю́ Ти:// и́стинно вы́шши всех еси́, Дéво Чи́стая.
Хор: Пресвятáя Богорóдице, спасù нас.
Чтец: Преслáвно прообразовáше, Чи́стая, закóн Тя ски́нiю и Божéственную стáмну,/ стрáнен кiвóт, и катапетáсму, и жезл,/ храм неразруши́мый и дверь Бóжiю./ Тéмже научáют Тебé звáти:// и́стинно вы́шши всех еси́, Дéво Чи́стая.
Хор: Пресвятáя Богорóдице, спасù нас.
Чтец: Песнопоя́ Тебé,/ провозглашáше Давíд, глагóля Тя Дщерь Царéву,/ красотóю добродéтелей, одеснýю предстоя́щую Бóга, ви́дев Тя упещрéну./ Тéмже, прорóчествуя, вопiя́ше:// и́стинно вы́шши всех еси́, Дéво Чи́стая.
Глас 1
Хор: Пресвятáя Богорóдице, спасù нас.
Тропáрь: Из прáведных произы́де Iоакíма и Áнны/ обещáнiя плод - Богоотрокови́ца Марíя/ и, я́ко кади́ло прiя́тное, плóтiю младéнствующи,/ привóдится во святи́лище святóе// я́ко Святáя во святы́х обитáти.
Хор: Пресвятáя Богорóдице, спасù нас.
Тропáрь: Младéнствующую естествóм и пáче естествá я́вльшуюся Мáтерь Бóжiю восхвáлим пéсньми:/ в храм бо закóнный Гóсподу днесь привóдится в воню́ благовóнiя,// прáведных я́ко плод духóвный.
Слáва Ѻтцý и Сы́ну и Святóму Дýху.
Трóичен: Трiипостáсное естествó, и Нераздéльную слáву,/ и в Божествé Еди́ном поéмую непрестáнно на Небеси́ и на земли́/ Трóицу Неразлýчную прослáвим,// с Сы́ном Отцý и Дýху покланя́ющеся благочéстно.
И ны́не и прúсно и во вéки векóв. Амúнь.
Богорóдичен: Под Твое благоутрóбiе прибегáющiя вéрно/ и покланя́ющiяся благочéстно Сы́ну Твоемý, Дéво Богороди́тельнице,// я́ко Бóгу и Гóсподу мíра,/ моли́ся от тли и бед избáвити и вся́ческих искушéнiй.
Катавáсiя Рождествá (глас 1): Тáинство стрáнное ви́жу и преслáвное:/ Нéбо - вертéп, Престóл Херувíмский - Дéву,/ я́сли - вмести́лище,/ в ни́хже возлежé Невмести́мый - Хрiстóс Бог,// Егóже, воспевáюще, величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй воскрéсный трéтiй: Я́ко Хрiстóс воскрéсе, никтóже да не вéрует:/ яви́ся бо Марíи, потóм же ви́ден бысть на селó идýщима,/ таи́нником же пáки яви́ся возлежáщим единонáдесятим,/ и́хже крещáти послáв,/ на небесá вознесéся, отню́дуже и сни́де,// утверждáя проповéданiе мнóжествы знáменiй.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Светúлен Введéнiя: Ю́же дрéвле предвозвести́ прорóческое сослóвiе,/ стáмну, и жезл, и скрижáль, и несекóмую гóру,/ Марíю Богоотрокови́цу вéрно да восхвáлим:// днесь бо ввóдится во святáя святы́х воспитáтися Гóсподу.
ХВАЛИТНЫ
Хор, глас 8: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 8: Гóсподи, áще и суди́лищу предстáл еси́ от Пiлáта суди́мый,/ но не отступи́л еси́ от престóла со Отцéм седя́:/ и воскрéс из мéртвых,/ мiр свободи́л еси́ от рабóты чуждáго,// я́ко Щедр и Человеколю́бец.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Гóсподи, орýжiе на дiáвола/ Крест Твой дал еси́ нам:/ трепéщет бо и трясéтся, не терпя́ взирáти на си́лу Егó:/ я́ко мéртвыя возставля́ет, и смерть упраздни́./ Сегó рáди покланя́емся// погребéнiю Твоемý и востáнiю.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Гóсподи, áще и я́ко мéртва/ во грóбе iудéи положи́ша,/ но я́ко Царя́ спя́ща вóини Тя стрежáху,/ и я́ко животá сокрóвище, печáтiю печáташа,/ но воскрéсл еси́,// и пóдал еси́ нетлéнiе душáм нáшым.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Áнгел Твой, Гóсподи,/ Воскресéнiе проповéдавый,/ стрáжи ýбо устраши́,/ женáм же возгласи́, глагóля:/ что и́щете Живáго с мéртвыми;/ воскрéсе Бог сый,// и вселéнней жизнь даровá.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры Введéнiя, глас 1: Свещенóсицы дéвы,/ Приснодéву свéтло провождáюще,/ прорóчествуют и́стинно Дýхом бýдущее:/ храм бо Бóжiй Богорóдица сýщи,/ в храм со слáвою дéвственною,// младéнствующи, ввóдится.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Обещáнiя святáго и плод благослáвный/ Богорóдица вои́стинну яви́ся ми́ру,/ я́ко всех превы́шшая:/ Я́же благочéстно приводи́ма в храм Бóжiй,/ моли́тву рóждших исполня́ет,// соблюдáема Божéственным Дýхом.
Чтец: Хвалúте Егó в тимпáне и лúце,/ хвалúте Егó во стрýнах и оргáне.
Стiхира:Небéсным воспитáна, Дéво, хлéбом/ вéрно в хрáме Госпóдни,/ родилá eси́ мíру Жи́зни Хлеб, Слóво,/ Eмýже, я́ко храм избрáнный и всенепорóчный,/ предобручи́лася eси́ Дýхом тáинственно,// обрученá Бóгу и Oтцý.
Чтец: Хвалúте Егó в кимвáлех доброглáсных, хвалúте Егó в кимвáлех восклицáнiя./ Вся́кое дыхáнiе да хвáлит Гóспода.
Стiхира: Да отвéрзется дверь Богопрiя́тнаго хрáма:/ храм бо всех Царя́ и Престóл,/ днесь со слáвою внутрь прiéм,/ Iоакíм возлагáет, освяти́в Гóсподу// от Негó избрáнную в Мáтерь Себé.
Слáва Ѻтцý и Сы́ну и Святóму Дýху.
Глас 2: Днесь в храм привóдится Всенепорóчная Дéва,/ во оби́телище Всецаря́ Бóга/ и всея́ жи́зни нáшея Питáтеля;/ днесь Чистéйшая Святы́ня,/ я́ко трилéтствующая Ю́ница,/ во святáя святы́х ввóдится;/ Той возопiи́м, я́ко Áнгел:// рáдуйся, Eди́на в женáх Благословéнная.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрiстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя. (3 раза)
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 2: Воскрéс из грóба и ýзы растерзáл еси́ áда,/ разруши́л еси́ осуждéнiе смéрти, Гóсподи,/ вся от сетéй врагá избáвивый;/ яви́вый же Себé апóстолом Твои́м,/ послáл еси́ я на прóповедь,/ и тéми мир Твой пóдал еси́ вселéнней,// Еди́не Многоми́лостиве.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Хрiстóс, и҆́стинный Бог наш, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Отцу и Сыну и Святóму Духу, и ныне и присно и во вéки векóв. Аминь.
Стiхúра евáнгельская третiя, глас 3: Магдали́не Марíи/ Спáсово благовествýющей из мéртвых Воскресéнiе и явлéнiе,/ не вéрующе же ученицы́, поноси́ми бы́ша о жестосéрдiи:/ но знáменьми воорýжшеся и чудесы́,/ ко проповéданiю посылáхуся,/ и Ты ýбо, Гóсподи, к начáльному свéту вознéслся еси́ Отцý,/ они́ же проповéдаша всю́ду слóво, чудесы́ уверя́юще./ Тéмже просвети́вшеся тéми,/ слáвим Твоé éже из мéртвых воскресéнiе,// человеколю́бче Гóсподи.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрiстý, Царéви нáшему Бóгу.
Прiиди́те, поклони́мся и припадéм Самомý Хрiстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 8: С высоты́ снизшéл еси́, Благоутрóбне, погребéнiе прiя́л еси триднéвное, да нас свободи́ши страстéй, Животé и Воскресéнiе нáше, Гóсподи, слáва Тебé!
Слáва Ѻтцý и Сы́ну и Святóму Дýху.
Тропáрь прáздника, глас 4: Днесь благоволéнiя Бóжiя предображéнiе/ и человéков спасéнiя проповéданiе/ в хрáме Бóжiи я́сно Дéва явля́ется/ и Хрiстá всем предвозвещáет./ Той и мы велеглáсно возопiи́м:// рáдуйся, смотрéнiя Зижди́телева исполнéнiе.
И҆ ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сыне Бóжiй, поми́луй нас. Ами́нь.
КОНДАК
Кондáк воскрéсный, глас 8: Воскрéс из грóба, умéршыя воздви́гл еси́, и Адáма воскреси́л еси́, и Éва ликýет во Твоéм Воскресéнiи, и мiрстíи концы́ торжествýют éже из мéртвых востáнiем Твои́м, Многоми́лостиве.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрiстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрiстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Гóсподи, Iисýсе Хрїстé, Сыне Бóжїй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу