Покров Пресвятой Владычицы нашей Богородицы и Приснодевы Марии. ОБЕДНИЦА (Изобразительные).
14 октября́ 2022 гóда. Покрóв Пресвятóй Влады́чицы нáшей Богорóдицы и Приснодéвы Марíи. Прáздничная слýжба для домáшнего (келéйнаго) совершéнiя. Послéдованiе изобразúтельных. Слýжба мiрскúм чúном.
Прежде глаголи часы. Аще имаши произволение то чти ýтреню с канóном и пéрвым чáсом, аще же ни, токмо часы.
ЧИН ОБЕДНИЦЫ
Глагóли сúце: Благословѝ, душé моя́, Гóспода,/ благословéн есѝ Гóсподи.
Псалом 102
Благословѝ, душé моя́, Гóспода,/ и вся внýтренняя моя и҆́мя святóе Егó./ Благословѝ, душé моя, Гóспода,/ и не забывáй всех воздая́нїй Егó,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоé:/ обновится я́ко óрля юность твоя́./ Творя́й ми́лостыни Госпóдь,/ и судьбý всем оби́димым./ Сказá путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концá прогнéвается,/ нижé во век враждýет,/ не по беззакóнїем нáшим сотвори́л есть нам,/ нижé по грехóм нáшым воздáл есть нам./ Я́ко по высотé небéсней от землѝ,/ утверди́л есть Госпóдь ми́лость Свою́ на боя́щихся Егó./ Ели́ко отстоят востóцы от зáпад,/ удáлил есть от нас беззакóнїя нáша./ Я́коже щéдрит отéц сы́ны,/ ущéдри Госпóдь боя́щихся Егó./ Я́ко Той познá создáнїе нáше,/ помянý, яко персть есмы́./ Человéк, яко травá днíе eгó,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегó./ Ми́лость же Госпóдня от вéка и до вéка на боя́щихся Егó,/ и прáвда Егó на сынéх сынóв, храня́щих завéт Егó, и пóмнящих зáповеди Егó твори́ти я./ Госпóдь на Небесѝ уготóва Престóл Свой,/ и Цáрство Егó всéми обладáет./ Благослови́те Гóспода вси Áнгели Егó,/ си́льнїи крéпостїю, творя́щїи слóво Егó, услышати глас словéс Егó./ Благослови́те Гóспода вся Си́лы Егó,/ слýги Егó, творя́щїи вóлю Егó./ Благослови́те Гóспода вся делá Егó,/ на всяком мéсте влады́чества Егó.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Благослови́, душé моя, Гóспода,/ и вся внýтренняя моя и҆́мя святóе Егó./ Благословéн еси, Гóсподи.
Слáва Ѻтцý и Сы́ну и Святóму Дýху.
Псалом 145
Хвали́, душé моя, Гóспода./ Восхвалю́ Гóспода в животé моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгó/ и возврати́тся в зéмлю свою́./ В той день поги́бнут вся помышлéнїя eгó./ Блажéн, eмýже Бог Iáковль Помóщник егó,/ уповáнiе eгó на Гóспода Бóга своегó,/ сотвóршаго нéбо и зéмлю,/ мóре и вся, я́же в них,/ храня́щаго и҆́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы́./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстé Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями
Хор: Во Цáрствiи Твоéм помянú нас, Гóсподи,/ егдá прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Хор: Блажéни плáчущiи,/ я́ко тíи утéшатся.
На 10. Хор: Блажéни крóтцыи,/ я́ко тíи наслéдят зéмлю.
Хор: Блажéни áлчущiи и жáждущiи прáвды,/ я́ко тíи насы́тятся.
На 8. Хор: Блажéни мúлостивiи,/ я́ко тíи помúловани бýдут.
Чтец (стiхúры Прáздника, песнь 3‑я канóна Богорóдицы, глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Хор: Блажéни чúстiи сéрдцем,/ я́ко тíи Бóга ýзрят.
Чтец: Клас прозя́бшая Боже́ственный,/ я́ко ни́ва неора́нная я́ве,/ ра́дуйся, одушевле́нная трапе́зо,/ Хлеб Живóтный вме́щшая.// Ра́дуйся, Живóтныя воды́ истóчниче неистощи́мый, Влады́чице.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: Твои раби́, Влады́чице,/ в це́ркви Твое́й ве́рою предстоя́ще, Твоея́ ожида́ем ми́лости:// посети́ на́ше смире́нiе и Твои́м святы́м Покрóвом защити́ лю́ди от вся́каго зла.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Многоимени́тая Де́во,/ прорóки проображена́ че́стно, и́же Тебе́ ны́не со Áнгелы слу́жат./ С ни́миже о нас к Бóгу моли́ся,// да Твоегó Покрóва святы́й день, ра́дующеся, вси све́тло пра́зднуем.
На 4. Хор: Блажéни естé, егдá понóсят вам,/ и изженýт, и рекýт всяк зол глагóл на вы лжýще Менé рáди.
Чтец (Песнь 6‑я канóна Богорóдицы, глас 4): Iере́и Богому́дрiи, в це́ркви Твое́й с людьми́ благочести́выми предстоя́ще,/ Твое́й ожида́ют, Богорóдице, ми́лости:/ премени́ на ра́дость на́шу печа́ль, Ра́дость бо родила́ еси́,// всех челове́ков грехи́ отпусти́вшаго.
Хор: Рáдуйтеся и веселúтеся, я́ко мзда вáша мнóга на Небесéх.
Чтец: Тебе́ вся земля́ да́ры принóсит/ я́ко Цари́це Бóжiи Ма́тери:/ архiере́и кла́няются и лю́дiе вси веселя́тся,// покрыва́еми от вся́каго зла Твои́ми, Богорóдице, моли́твами.
Хор: Слáва Отцý и Сы́ну и Святóму Дýху.
Чтец: Гóру Тя вели́ку Данiи́л пронаписа́:/ из Тебе́ бо без се́мене роди́ся Хрiстóс/ и сокруши́ всю де́монскую лесть, и всю Своея́ ве́ры испóлни зе́млю.// К Не́муже за ны, Богорóдице, моли́ся, сла́вящiя Твоегó Покрóва пра́здник.
Хор: И ны́не и прúсно и во вéки векóв. Амúнь.
Чтец: Áнгельский глас взыва́ем Ти, Пречи́стая:/ ра́дуйся, Престóле Бóжiй, на не́мже Iезекiи́ль ви́де Гóспода в подóбiи челове́ка, носи́ма Херувíмы.// С ни́миже за ны, Богорóдице, моли́ся, да спасе́т ду́ши на́ша.
Тропари и кондаки
Тропáрь прáздника, глас 4: Днесь благовéрнiи лю́дiе свéтло прáзднуем,/ осеняеми Твои́м, Богомáти, пришéствiем,/ и к Твоемý взирáюще пречи́стому óбразу, уми́льно глагóлем:/ покры́й нас честны́м Твои́м Покрóвом/ и избáви нас от вся́каго зла,/ моля́щи Сы́на Твоегó, Хрiстá Бóга нáшего,// спасти́ дýши нáша.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Кондáк прáздника, глас 3: Дéва днесь предстои́т в цéркви/ и с ли́ки святы́х неви́димо за ны мóлится Бóгу,/ Áнгели со архiерéи покланя́ются,/ апóстоли же со прорóки ликовствýют:// нас бо рáди мóлит Богорóдица Превéчнаго Бóга.
Трисвятое
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас. (3 раза)
Хор: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас.
Прокимен праздника, глас 3
Чтец: Прокíмен, глас трéтiй, песнь Богорóдицы: Вели́чит душá Моя́ Гóспода, и возрáдовася дух Мой о Бóзе Спáсе Моéм. (Лк.1:46Б-47)
Хор: Велúчит душá Моя́ Гóспода,/ и возрáдовася дух Мой о Бóзе Спáсе Моéм.
Чтец: Я́ко призрé на смирéнiе Рабы́ Своея́, се бо отны́не ублажáт Мя вси рóди. (Лк.1:48)
Хор: Велúчит душá Моя́ Гóспода,/ и возрáдовася дух Мой о Бóзе Спáсе Моéм.
Чтец: Вели́чит душá Моя́ Гóспода.
Хор: И возрáдовася дух Мой о Бóзе Спáсе Моéм.
АПОСТОЛ
Чтец:Ко Еврéем послáнiя святáго апóстола Пáвла чтéнiе.
(Евр.зач.320): Брáтiе, имéяше пéрвая ски́нiя оправдáнiя слýжбы, святóе же людскóе. Ски́нiя бо сооруженá бысть пéрвая, в нéйже свети́льник, и трапéза, и предложéнiе хлéбов, я́же глагóлется Святáя. По вторéй же завéсе ски́нiя глагóлемая, Святáя святы́х. Злáту имýщи кади́льницу, и ковчéг завéта оковáн всю́ду злáтом, в нéмже стáмна златá имýщая мáнну, и жезл Аарóнов прозя́бшiй, и скрижáли завéта. Превы́шше же eгó херувíми слáвы, осеня́ющiи oлтáрь: о ни́хже несть ны́не глагóлати подрóбну. Сим же тáко устрóeным, в пéрвую ýбо ски́нiю вы́ну вхождáху свящéнницы, слýжбы совершáюще. Во вторýю же eди́ною в лéто eди́н архiерéй, не без крóве, ю́же принóсит за себé, и о людски́х невéжествiих.
[русский синодальный перевод]Братья, имел и первый завет* постановления о служении и святилище, принадлежащее этому миру. Ибо устроена была скиния первая, в которой был и светильник, и трапеза, и предложение хлебов: она называется “Святое”. За второй же завесой - скиния, называемая “Святое Святых”, имеющая золотую кадильницу, и ковчег завета, со всех сторон покрытый золотом, в котором - сосуд золотой с манной, и жезл Аарона расцветший, и скрижали завета; а над ним - Херувимы славы, осеняющие очистилище, о чем не стоит ныне говорить подробно. И при таком устройстве в первую скинию постоянно входят священники, совершая служение, но во вторую - однажды в год один только первосвященник, не без крови, которую он приносит за себя и за грехи неведения народа. (Евр.9:1-7)
Аллилуиарий, глас 8
Чтец: Аллилýіа, аллилýіа, аллилýіа, глас осьмы́й.
Хор: Аллилýіа, аллилýіа, аллилýіа.
Чтец: Слы́ши, Дщи, и виждь, и приклони́ ýхо Твоé. (Пс.44:11А)
Хор: Аллилýіа, аллилýіа, аллилýіа.
Чтец: Лицý Твоемý помóлятся богáтiи лю́дстiи. (Пс.44:13Б)
Хор: Аллилýіа, аллилýіа, аллилýіа.
ЕВАНГЕЛИЕ
От Луки́ Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Лк.зач.54): Во врéмя óно, вни́де Iисýс в весь нéкую: женá же нéкая и҆́менем Мáрфа прiя́т Егó в дом свой. И сестрá ей бе нарицáемая Марíя, я́же и сéдши при ногý Iисýсову, слы́шаше слóво Егó. Мáрфа же мóлвяше о мнóзе слýжбе, стáвши же речé: Гóсподи, не брежéши ли, я́ко сестрá моя́ еди́ну мя остáви служи́ти; рцы ýбо ей, да ми помóжет. Отвещáв же Iисýс, речé ей: Мáрфо, Мáрфо, печéшися и мóлвиши о мнóзе. Еди́но же есть на потрéбу. Марíя же благýю часть избрá, я́же не оты́мется от нея́. Бысть же егдá глагóлаше сiя́, воздви́гши нéкая женá глас от нарóда, речé Емý: блажéно чрéво носи́вшее Тя, и сосцá, яже еси́ ссал. Он же речé: тéмже ýбо блажéни слы́шащiи слóво Бóжiе, и храня́щiи é.
[русский синодальный перевод]В продолжение пути их пришел Он в одно селение; здесь женщина, именем Марфа, приняла Его в дом свой; у неё была сестра, именем Мария, которая села у ног Иисуса и слушала слово Его. Марфа же заботилась о большом угощении и, подойдя, сказала: Господи! или Тебе нужды нет, что сестра моя одну меня оставила служить? скажи ей, чтобы помогла мне. Иисус же сказал ей в ответ: Марфа! Марфа! ты заботишься и суетишься о многом, а одно только нужно; Мария же избрала благую часть, которая не отнимется у неё. Когда же Он говорил это, одна женщина, возвысив голос из народа, сказала Ему: блаженно чрево, носившее Тебя, и сосцы, Тебя питавшие! А Он сказал: блаженны слышащие слово Божие и соблюдающие его.(Лк.10:38-42,11:27-28)
Хор: Слáва Тебé, Гóсподи, слáва Тебé.
Помяни́ нас, Гóсподи, егдá прїи́деши во Цáрствiи Твоéм.
Помяни́ нас, Влады́ко, егдá прїи́деши во Цáрствiи Твоéм.
Помяни́ нас, Святы́й, егдá прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стих: Приступи́те к Немý и просвети́теся, и лицá вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцá, Вседержи́теля, Творцá нéбу и землѝ, ви́димым же всем и неви́димым. И во Еди́наго Гóспода Iисýса Хрїстá, Сы́на Бóжiя, Единорóднаго, И҆́же от Ѻтцá Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пилáте, и страдáвша и погребéнна. И воскрéсшаго в трéтiй день по Писáнiем, и҆ возшéдшаго на небесá и седя́ща одеснýю Ѻтцá. И пáки грядýщаго со слáвою суди́ти живы́м и мéртвым, Егóже Цáрствiю не бýдет концá. И в Дýха Святáго, Гóспода, Животворя́щаго, И҆́же от Ѻтцá исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, прости Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умé и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжiй, поми́луй нас. Ами́нь.
КОНДАК
Кондáк прáздника, глас 3: Дéва днесь предстои́т в цéркви/ и с ли́ки святы́х неви́димо за ны мóлится Бóгу,/ Áнгели со архiерéи покланя́ются,/ апóстоли же со прорóки ликовствýют:// нас бо рáди мóлит Богорóдица Превéчнаго Бóга.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винá, благоволи́ же и о мне грéшнем, утвердѝ, вразумѝ сéрдце моé, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 раза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и҆ вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Его./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Ѻ́чи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негó.
Достойно есть
Хор: Достóйно есть я́ко вои́стинну блажи́ти Тя, Богорóдицу,/Присноблажéнную и Пренепорóчную и Мáтерь Бóга нáшего./ Честнéйшую Херувíм и слáвнeйшую без сравнéнiя Серафíм,/ без истлéнiя Бóга Слóва рóждшую, сýщую Богорóдицу Тя величáем.
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благословѝ.
ОТПУСТ
Хрїстóс, и҆́стинный Бог наш, моли́твами пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́луй и спасѝ нас, яко Благ и Человеколю́бец. Ами́нь.