Сретение Господа Бога и Спаса нашего Иисуса Христа, ОБЕДНИЦА (изобразительные) служба мирским чином.
15 февраля 2021 года. Срéтение Гóспода Бóга и Спáса нáшего Иисýса Христá.
Прежде глаголи часы.
Часы и обедницу с ударениями скачать в формате дос, в формате pdf
ЧИН ОБЕДНИЦЫ
Глагóли сúце: Благослови, душé моя, Гóспода,/ благословéн еси Гóсподи.
Псалом 102
Благослови, душé моя, Гóспода,/ и вся внýтренняя моя имя святóе Егó./ Благослови, душé моя, Гóспода,/ и не забывáй всех воздаяний Егó,/ очищáющаго вся беззакóния твоя,/ исцеляющаго вся недýги твоя,/ избавляющаго от истлéния живóт твой,/ венчáющаго тя милостию и щедрóтами,/ исполняющаго во благих желáние твоé:/ обнови́тся яко óрля юность твоя./ Творяй милостыни Госпóдь,/ и судьбý всем обидимым./ Сказá пути Своя Моисéови,/ сыновóм Изрáилевым хотéния Своя:/ Щедр и Милостив Госпóдь,/ Долготерпелив и Многомилостив./ Не до концá прогнéвается,/ нижé во век враждýет,/ не по беззакóнием нáшим сотворил есть нам,/ ниже по грехóм нáшым воздáл есть нам./ Яко по высотé небéсней от земли,/ утвердил есть Госпóдь милость Свою на боящихся Егó./ Елико отстоят востóцы от зáпад,/ удáлил есть от нас беззакóния нáша./ Якоже щéдрит отéц сыны,/ ущéдри Госпóдь боящихся Егó./ Яко Той познá создáние нáше,/ помянý, яко персть есмы./ Человéк, яко травá дние eгó,/ яко цвет сéльный, тако оцветéт,/ яко дух прóйде в нем,/ и не бýдет, и не познáет ктомý мéста своегó./ Милость же Госпóдня от вéка и до вéка на боящихся Егó,/ и прáвда Егó на сынéх сынóв, хранящих завéт Егó, и пóмнящих зáповеди Егó творити я./ Госпóдь на Небеси уготóва Престóл Свой,/ и Цáрство Егó всéми обладáет./ Благословите Гóспода вси Áнгели Егó,/ сильнии крéпостию, творящии слóво Егó, услышати глас словéс Егó./ Благословите Гóспода вся Силы Егó,/ слýги Егó, творящии вóлю Егó./ Благословите Гóспода вся делá Егó,/ на всяком мéсте владычества Егó.
Слáва Отцý и Сы́ну и Святóму Дýху, и ны́не и присно и во вéки векóв. Аминь.
Благослови, душé моя, Гóспода,/ и вся внýтренняя моя имя святóе Егó./ Благословéн еси, Гóсподи.
Слáва Отцý и Сыну и Святóму Дýху.
Псалом 145
Хвали, душé моя, Гóспода./ Восхвалю Гóспода в животé моéм,/ пою Бóгу моемý, дóндеже есмь./ Не надéйтеся на князи, на сы́ны человéческия,/ в нихже несть спасéния./ Изы́дет дух eгó/ и возвратится в зéмлю свою./ В той день погибнут вся помышлéния eгó./ Блажéн, eмуже Бог Иáковль Помóщник егó,/ уповáние eгó на Гóспода Бóга своегó,/ сотвóршаго нéбо и зéмлю,/ мóре и вся, яже в них,/ хранящаго истину в век,/ творящаго суд обидимым,/ дающаго пищу áлчущим./ Госпóдь решит оковáнныя./ Госпóдь умудряет слепцы́./ Госпóдь возвóдит низвéрженныя./ Госпóдь любит прáведники./ Госпóдь хранит пришéльцы,/ сира и вдову приимет/ и путь грéшных погубит./ Воцарится Госпóдь во век,/ Бог твой, Сиóне, в род и род.
И ныне и прúсно и во вéки векóв. Амúнь.
Единорóдный Сыне и Слóве Бóжий, Безсмéртен Сый/ и извóливый спасéния нáшего рáди/ воплотитися от Святы́я Богорóдицы и Приснодéвы Марии,/ непрелóжно вочеловéчивыйся,/ распны́йся же, Христé Бóже, смéртию смерть попрáвый,/ Един Сый Святыя Трóицы,/ спрославляемый Отцý и Святóму Дýху, спаси нас.
И поем Блаженны с тропарями из Октоиха
Хор: Во Цáрствии Твоéм помянú нас, Гóсподи,/ егдá приúдеши, во Цáрствии Твоéм.
Хор: Блажéни нúщии дýхом,/ яко тех есть Цáрство Небéсное.
Хор: Блажéни плáчущии,/ яко тúи утéшатся.
Хор: Блажéни крóтции,/ яко тúи наслéдят зéмлю.
Хор: Блажéни áлчущии и жáждущии прáвды,/ яко тúи насытятся.
На 8. Хор: Блажéни мúлостивии,/ яко тúи помúловани бýдут.
Чтец (Cрéтения, глас 3): Утверждéние на Тя надéющихся,/ утверди́, Гóсподи, Цéрковь,/ Ю́же стяжáл еси́// честнóю Твоéю Крóвию.
Хор: Блажéни чúстии сéрдцем,/ яко тúи Бóга ýзрят.
Чтец: Перворождéн из Отцá прéжде век,/ Перворождéн Младéнец из Дéвы нетлéнныя,// Адáму рýку простирáя, яви́ся.
Хор: Блажéни миротвóрцы,/ яко тúи сынове Бóжии нарекýтся.
На 6. Чтец: Младоýмна бы́вша прéлестию первоздáннаго// пáки исправля́яй Бог Слóво, младéнствовав, яви́ся.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Земли́ исчáдие, пáки потéкшее в ню,/ Божествá сообрáзное естествó Зижди́тель// я́ко непрелóжне, младéнствовав, яви́.
Хор: Блажéни естé, егдá понóсят вам,/ и изженýт, и рекýт всяк зол глагóл на вы лжýще Менé рáди.
На 4.Чтец: Возопи́ к Тебé, ви́дев стáрец очи́ма спасéние,/ éже лю́дем прии́де от Бóга:// Христé, Ты Бог мой.
Хор: Рáдуйтеся и веселúтеся,/ яко мзда вáша мнóга на небесéх.
Чтец: Сиóну Ты кáмень возложи́лся еси́,/ непокори́вым претыкáние и соблáзна кáмень,// неруши́мое вéрных спасéние.
Хор: Слáва Отцý и Сыну и Святóму Дýху.
Чтец: Извéстне нося́ начертáние/ И́же прéжде век Тя израсти́вшаго,// земны́х за милосéрдие ны́не нéмощию обложи́ся.
Хор: И ныне и прúсно и во вéки векóв. Амúнь.
Чтец (Богорóдичен): Сы́ну Вы́шняго,/ Сы́ну Дéвы,/ Бóгу, Отрочáти бы́вшему,// поклóньшася Тебé ны́не отпусти́ с ми́ром.
Тропари и кондаки
Тропáрь Cрéтения, глас 1: Рáдуйся, Благодáтная Богорóдице Дéво,/ из Тебé бо возсия́ Сóлнце Прáвды - Христóс, Бог наш,/ просвещáяй сýщия во тьме./ Весели́ся и ты, стáрче прáведный,/ приéмый во объя́тия Свободи́теля душ нáших,// дáрующаго нам воскресéние.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Кондáк Cрéтения, глас 1: Утрóбу Деви́чу освяти́вый Рождествóм Твои́м/ и рýце Симеóне благослови́вый,/ я́коже подобáше, предвари́в,/ и ны́не спасл еси́ нас, Христé Бóже,/ но умири́ во бранéх жи́тельство// и укрепи́ лю́ди, и́хже возлюби́л еси́, Еди́не Человеколю́бче.
Трисвятое
Хор: Святы́й Бóже,/ Святы́й Крéпкий,/ Святы́й Безсмéртный, помилуй нас. (Трúжды)
Хор: Слáва Отцý и Сыну и Святóму Дýху, и ныне и присно и во вéки векóв, аминь.
Хор: Святы́й Безсмéртный, помилуй нас.
Хор: Святы́й Бóже,/ Святы́й Крéпкий,/ Святы́й Безсмéртный, помилуй нас.
Прокимен праздника, глас 3
Чтец: Прокимен, глас трéтий, песнь Богорóдицы: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Хор: Велúчит душá Моя́ Гóспода,/ и возрáдовася дух Мой о Бóзе Спáсе Моéм.
Чтец: Я́ко призрé на смирéние Рабы́ Своея́, се бо, отны́не ублажáт Мя вси рóди.
Хор: Велúчит душá Моя́ Гóспода,/ и возрáдовася дух Мой о Бóзе Спáсе Моéм.
Чтец: Вели́чит душá Моя́ Гóспода.
Хор: И возрáдовася дух Мой о Бóзе Спáсе Моéм.
Апостол
Чтец: Ко Еврéем послáния святáго апóстола Пáвла чтéние.
(Праздника:Евр.зач.316) Брáтие, без вся́каго прекослóвия мéншее от бóльшаго благословля́ется. И зде ýбо десяти́ны человéцы умирáющии приéмлют, тáмо же свидéтельствуемый, я́ко жив eсть. И да си́це рекý, Авраáмом и Леви́й приéмляй десяти́ны, десяти́ны дал eсть. Eщé бо в чрéслех óтчиих бя́ше, eгдá срéте eгó Мелхиседéк. Аще ýбо совершéнство леви́тским свящéнством бы́ло, лю́дие бо на нем взаконéни бы́ша: кáя eщé потрéба по чи́ну Мелхиседéкову инóму востáти свящéннику, а не по чи́ну Аарóнову глагóлатися? Прелагáему ýбо свящéнству, по нýжди и закóну пременéние бывáет. О нéмже бо глагóлются сия́: колéну инóму причасти́ся, от негóже никтóже приступи́ ко oлтарю́. Я́ве бо, я́ко от колéна Иýдова возсия́ Госпóдь наш, о нéмже колéне Моисéй о свящéнстве ничесóже глагóла. И ли́шше eщé я́ве eсть, я́ко по подóбию Мелхиседéкову востáнет Свящéнник ин, Иже не по закóну зáповеди плотски́я бысть, но по си́ле животá неразрушáемаго. Свидéтельствует бо, я́ко Ты eси́ свящéнник во век по чи́ну Мелхиседéкову.
[Русский синодальный перевод](Без всякого же прекословия меньший благословляется большим. И здесь десятины берут человеки смертные, а там - имеющий о себе свидетельство, что он живет. И, так сказать, сам Левий, принимающий десятины, в лице Авраама дал десятину: ибо он был еще в чреслах отца, когда Мелхиседек встретил его. Итак, если бы совершенство достигалось посредством левитского священства,- ибо с ним сопряжен закон народа,- то какая бы еще нужда была восставать иному священнику по чину Мелхиседека, а не по чину Аарона именоваться? Потому что с переменою священства необходимо быть перемене и закона. Ибо Тот, о Котором говорится сие, принадлежал к иному колену, из которого никто не приступал к жертвеннику. Ибо известно, что Господь наш воссиял из колена Иудина, о котором Моисей ничего не сказал относительно священства. И это еще яснее видно из того, что по подобию Мелхиседека восстает Священник иной, Который таков не по закону заповеди плотской, но по силе жизни непрестающей. Ибо засвидетельствовано: Ты священник вовек по чину Мелхиседека.(евр.7:7-17)
Аллилуиарий
Чтец: Аллилýиа, аллилýиа, аллилýиа, глас осьмы́й.
Хор: Аллилýиа, аллилýиа, аллилýиа.
Чтец: Ны́не отпущáеши рабá Твоегó, Влады́ко, по глагóлу Твоемý, с ми́ром.
Хор: Аллилýиа, аллилýиа, аллилýиа.
Чтец: Свет во откровéние язы́ков и слáву людéй Твои́х Изрáиля.
Хор: Аллилýиа, аллилýиа, аллилýиа.
Евангелие
От Луки́ Святáго Евáнгелия чтéние.
Хор: Слáва Тебé, Гóсподи, слáва Тебé.
(Праздника:Лк.зач.7): Во врéмя óно, вознесóста роди́теля Отрочá Иисýса во Иерусали́м, поста́вити Eгó пред Гóсподем. Я́коже eсть пи́сано в закóне Госпóдни: я́ко всяк младéнец мýжеска пóлу, разверзáя ложеснá, свя́то Гóсподеви наречéтся. И éже дáти жéртву, по речéнному в закóне Госпóдни: два гóрличища или два птeнцá голуби́на. И се бе человéк во Иерусали́ме, eмýже и́мя Симеóн. И человéк сей прáведен и благочести́в, чáя утéхи Изрáилевы, и Дух бе Свят в нем. И бе eмý обещáно Дýхом Святы́м, не ви́дети смéрти, прéжде дáже не ви́дит Христá Госпóдня. И прии́де дýхом в цéрковь. И eгдá введóста роди́тeля Oтрочá Иисýса, сотвори́ти и́ма по обы́чаю закóнному о Нем. И той приéм Eгó на рукý своéю, и благослови́ Бóга, и речé: Ны́не отпущáеши рабá Твоегó, Влады́ко, по глагóлу Твоемý с ми́ром. Яко ви́десте óчи мои́ спасéние Твоé, Éже eси́ уготóвал пред лицéм всех людéй. Свет во откровéние язы́ком и слáву людéй Твои́х Изрáиля. И бе Иóсиф и Мáти Eгó чудя́щася о глагóлемых о Нем. И благослови́ я Симеóн, и речé к Мари́и, Мáтери Eгó: се лежи́т Сей на падéние и на востáние мнóгим во Изрáили, и в знáмение пререкáемо. И Тебé же Самóй дýшу прóйдет орýжие, я́ко ýбо да откры́ются от мног сердéц помышлéния. И бе Áнна прорóчица, дщи́ Фанýилева, от колéна Аси́рова. Сия́ заматорéвши во днех мнóзех, жи́вши с мýжем седмь лет от дéвства своегó. И та вдовá я́ко лет óсмьдесят и четы́ре, я́же не отхождáше от цéркве, постóм и моли́твами служáщи день и нощь. И та в той час пристáвши, исповéдашеся Гóсподеви, и глагóлаше о Нем всем чáющим избавлéния во Иерусали́ме. И я́ко скончáшася вся по закóну Госпóдню, возврати́шася в Галилéю, во град свой Назарéт. Oтрочá же растя́ше и крепля́шеся дýхом, исполня́яся премýдрости: и благодáть Бóжия бе на Нем.
[Русский синодальный перевод](Во время оно, когда исполнились дни очищения их по закону Моисееву, принесли Его в Иерусалим, чтобы представить пред Господа, как предписано в законе Господнем, чтобы всякий младенец мужеского пола, разверзающий ложесна, был посвящен Господу, и чтобы принести в жертву, по реченному в законе Господнем, две горлицы или двух птенцов голубиных. Тогда был в Иерусалиме человек, именем Симеон. Он был муж праведный и благочестивый, чающий утешения Израилева; и Дух Святый был на нем. Ему было предсказано Духом Святым, что он не увидит смерти, доколе не увидит Христа Господня. И пришел он по вдохновению в храм. И, когда родители принесли Младенца Иисуса, чтобы совершить над Ним законный обряд, он взял Его на руки, благословил Бога и сказал: Ныне отпускаешь раба Твоего, Владыко, по слову Твоему, с миром, ибо видели очи мои спасение Твое, которое Ты уготовал пред лицем всех народов, свет к просвещению язычников и славу народа Твоего Израиля. Иосиф же и Матерь Его дивились сказанному о Нем. И благословил их Симеон и сказал Марии, Матери Его: се, лежит Сей на падение и на восстание многих в Израиле и в предмет пререканий,- и Тебе Самой оружие пройдет душу,- да откроются помышления многих сердец. Тут была также Анна пророчица, дочь Фануилова, от колена Асирова, достигшая глубокой старости, прожив с мужем от девства своего семь лет, вдова лет восьмидесяти четырех, которая не отходила от храма, постом и молитвою служа Богу день и ночь. И она в то время, подойдя, славила Господа и говорила о Нем всем, ожидавшим избавления в Иерусалиме. И когда они совершили всё по закону Господню, возвратились в Галилею, в город свой Назарет. Младенец же возрастал и укреплялся духом, исполняясь премудрости, и благодать Божия была на Нем. (Лк.2:22-40)
Хор: Слáва Тебé, Гóсподи, слáва Тебé.
Помяни нас, Гóсподи, егдá прии́деши во Цáрствии Твоéм.
Помяни нас, Владыко, егдá прии́деши во Цáрствии Твоéм.
Помяни нас, Святый, егдá прии́деши во Цáрствии Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
Стих: Приступите к Немý и просветитеся, и лицá вáша не постыдятся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
Слáва Отцý и Сыну и Святóму Дýху.
Лик святых Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.
И ныне и прúсно и во вéки векóв. Амúнь.
Символ веры
Вéрую во Еди́наго Бóга Отцá, Вседержителя, Творцá нéбу и земли, видимым же всем и невидимым. И во Единаго Гóспода Иисýса Христа, Сына Бóжия, Единорóднаго, Иже от Отцá Рождéннаго прéжде всех век; Свéта от Свéта, Бóга Истинна от Бóга Истинна, рождéнна, несотворéнна, единосýщна Отцý, Имже вся быша. Нас рáди человéк и нáшего рáди спасéния сшéдшаго с небéс и воплотившагося от Дýха Свята и Мари́и Дéвы и вочеловéчшася. Распятаго же за ны при Понти́йстем Пилáте, и страдáвша и погребéнна. И воскрéсшаго в трéтий день по Писáнием, и возшéдшаго на небесá и седяща одеснýю Отцá. И пáки грядýщаго со слáвою судити живым и мéртвым, Егóже Цáрствию не бýдет концá. И в Дýха Святáго, Гóспода, Животворящаго, Иже от Отцá исходящаго, Иже со Отцéм и Сыном спокланяема и сслáвима, Глагóлавшего прорóки. Во едину Святýю, Собóрную и Апóстольскую Цéрковь. Исповéдую едино крещéние во оставлéние грехóв. Чáю воскресéния мéртвых, и жи́зни бýдущаго вéка. Аминь.
Ослáби, остáви, прости Бóже, прегрешéния нáша, вóльная, и невóльная, яже в слóве и в дéле, яже в вéдении и не в вéдении, яже во дни и в нощи, яже во умé и помышлéнии, вся нам прости, яко Благ и Человеколюбец.
Óтче наш, Иже еси на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, яко на небеси́ и на земли́. Хлеб наш насýщный даждь нам днесь, и остáви нам дóлги нáша, якоже и мы оставляем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сыне Бóжий, помилуй нас. Аминь.
КОНДAК
Кондáк Cрéтения, глас 1: Утрóбу Деви́чу освяти́вый Рождествóм Твои́м/ и рýце Симеóне благослови́вый,/ я́коже подобáше, предвари́в,/ и ны́не спасл еси́ нас, Христé Бóже,/ но умири́ во бранéх жи́тельство// и укрепи́ лю́ди, и́хже возлюби́л еси́, Еди́не Человеколю́бче.
Господи, помилуй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благих Винá, благоволи же и о мне грéшнем, утверди, вразуми сéрдце моé, и всю мою отыми сквéрну, просвети мою мысль, да выну слáвлю, пою, покланяюся и глагóлю: Един Свят, Един Госпóдь, Иисýс Христóс, во слáву Бóга Отцá, аминь.
Бýди имя Госпóдне благословéно от ныне и до вéка. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Псалом 33
Благословлю Гóспода на всякое врéмя,/ вы́ну хвалá Его во устéх моих./ О Гóсподе похвáлится душá моя,/ да услы́шат крóтцыи и возвеселятся./ Возвеличите Гóспода со мнóю,/ и вознесéм имя Егó вкýпе./ Взыскáх Гóспода и услы́ша мя,/ и от всех скорбéй моих избáви мя./ Приступите к Немý и просветитеся,/ и лицá вáша не постыдятся./ Сей нищий воззвá, и Госпóдь услы́ша и,/ и от всех скорбéй егó спасé и./ Ополчится Áнгел Госпóдень óкрест боящихся Егó,/ и избáвит их./ Вкусите и видите, яко благ Госпóдь;/ блажéн муж, иже уповáет нань./ Бóйтеся Гóспода, вси святии Егó,/ яко несть лишéния боящымся Его./ Богáтии обнищáша и взалкáша,/ взыскáющии же Гóспода не лишáтся всякаго блáга./ Приидите, чáда, послýшайте менé,/ стрáху Госпóдню научý вас./ Кто есть человéк хотяй живóт,/ любяй дни видети блáги;/ Удержи язык твой от зла,/ и устнé твои, éже не глагóлати льсти./ Уклонися от зла и сотвори блáго,/ взыщи мира, и пожени и./ Очи Госпóдни на прáведныя,/ и ýши Егó в молитву их./ Лицé же Госпóдне на творящия злáя,/ еже потребити от земли пáмять их./ Воззвáша прáведнии, и Госпóдь услыша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Хранит Госпóдь вся кóсти их,/ ни едина от них сокрушится./ Смерть грéшников лютá,/ и ненавидящии прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющии на Негó.
Вместо Достойно есть (задостойник праздника)
Хор: Богорóдице Дéво, уповáние христиáном,// покры́й, соблюдú и спасú на Тя уповаю́щих.
Ирмóс (глас 3): В закóне сéни и писáний/ óбраз ви́дим, вéрнии:/ всяк мýжеский пол, ложеснá разверзáя, свят Бóгу./ Тем перворождéнное Слóво,/ Отцá Безначáльна,/ Сы́на Первородя́щася Мáтерию неискусомýжно,// величáем.
Слáва Отцý и Сыну и Святóму Дýху, и ныне и присно и во вéки векóв, аминь.
Гóсподи, помилуй. (3 раза)
Гóсподи, благослови.
ОТПУСТ
И́же во объя́тиих прáведнаго Симеóна носи́тися извóливый нáшего рáди спасéния, Христóс, И́стинный Бог наш, моли́твами Пречи́стыя Своея́ Мáтере и всех святы́х, поми́лует и спасéт нас, яко Блáг и Человеколю́бец.
Хор: Аминь. Господи, помилуй. (3 раза)
[Таже, поем многолетие]Благочестивейшаго, Самодержавнейшаго, Великаго грядущаго Государя нашего Императора (его имя Ты вем) святейшыя вселенския патриархи преосвященныя митрополиты, архиепископы и епископы православныя, иереи и дьяконы и весь причет церковный и вся православныя христианы, Господи, сохрани их на многая лета!