равноапостольный князь Владимир
15 июля (27 июля по новому стилю) Церковь чтит память святаго равоапостольнаго великаго князя Владимира киевскаго, нареченнаго во святом Крещении Василия. Привожу житие равоапостольнаго князя Владимира из Степенной книги царского родословия (летописный свод, созданный в начале XVI века) по публикации Института русской литературы
http://lib.pushkinskijdom.ru/Default.aspx?tabid=10126
МѢСЯЦА ИЮЛИЯ В 15 ДЕНЬ. ПОВѢСТЬ ИЗВѢСТНА ВМАЛЕ ЯВЛЕНА О ВЕЛИЦЕЙ РУСТЕЙ ЗЕМЛИ И О НАЧАЛЕ ЦАРСТВУЮЩИХ В НЕЙ. И ЖИТИЕ И ПОХВАЛА БЛАЖЕННАГО И ДОСТОХВАЛНАГО И РАВНОАПОСТОЛЬНАГО ЦАРЯ И ВЕЛИКОГО КНЯЗЯ СВЯТАГО И ПРАВЕДНАГО ВЛАДИМИРА, НАРЕЧЕННАГО ВО СВЯТОМ КРЕЩЕНИИ ВАСИЛИЯ, ВСЕА РУСКИЯ ЗЕМЛИ САМОДЕРЖЦА: КАКО ВЗЫСКА ПРАВОѢРНЫЯ ВѢРЫ и КАКО ВЗЕМ КОРСУНЬ ГРАД, В НЕМЖЕ И ПОЛУЧИ СВЯТОЕ КРЕЩЕНИЕ, ИМЖЕ И ВСЮ РУСКУЮ ЗЕМЛЮ ПРОСВѢТИ, И КАКО ПРАВОВѢРНО ПОЖИВЕ, И ВСЮ ДЕРЖАВУ СВОЮ БЛАГОЧЕСТНО УПАСЕ, И ВѢРУ ПРАВОСЛАВНУЮ НЕПОКОЛЕБЛЕМО УТВЕРДИ, И О ПРОЧИХ ПРАВЕДНИЦЕХ СВЯТОГО СРОДСТВИЯ ЕГО
Благослови, отче!
Глава 1. Всяко дѣло благо начинается и совершается о имени трисвятыя, единосущныя, вседержителныя и нераздѣлимыя Троицы, Отца и Сына и Святаго Духа, иже есть Богъ нашь, о немже живем, и движемся, и есмы. Егоже благоволением и сия повѣсть хощет предложитися яже о блаженнем и приснопамятнем и всея Руския земли самодержцы, о великом князе Владимире Свѣтославичи, иже всю землю превеликия своея державы просвѣти святым крещением. О немже преже сего обрѣтаеми суть многия повѣсти, глаголемы и пишемы, и похвалами доволно украшены, - но обаче не в едином мѣсте, но на многи части, особь каяждо: ова в лѣтописаниих, иная же индѣ, прочая же вкратцѣ писана в житии его, многая же в похвалах его. И от всѣх сих яко от многоразличных цвѣтецъ хотящу собратися во едину словесную пленицу благословением и повелѣнием господина пресвященнаго Макария, митрополита всеа Русии, в царство боговѣнчаннаго царя и великаго князя Ивана Васильевича, государя и самодержца всеа Русии, иже бысть от сѣмени сего блаженнаго Владимира седмыйнадесят степень, от Рюрика же двадесятый степень.
Егда же повелѣнно есть нам сия снискати, и тогда зазрѣх своему недостоинству, совѣстию обличаем от безмѣрных моих согрѣшений, паче же не имый учения нраву и обычаю и удобну слову, еже касатися сему великому дѣлу. Но обаче убояхся лениваго раба осуждения и смерти от преслушания - и не собою уповающи, но ради богоподражателнаго послушания повелѣнное нам без рассуждения писати дерзнухом, уповающе на молитвы сего Божия избраннаго сосуда, святаго и равноапостольнаго царя и великаго князя Владимира, нареченнаго во святом крещении Василия, яко да испросит у Бога ослабу многим моим согрѣшением, и тако надежду имуще неотъемлемую благодать человѣколюбия Божия, поминающе реченное богоотца Давыда: «Правду твою, и милость, и истинну не скрых в сердцы моем от сонма многа». Такоже и церковный учитель и светило всего мира Павел апостолъ к Тимофею писаше, глаголя: «Еже слыша от мене многими послухи, сия предай вѣрным человѣком». И блаженный апостолъ Лука, начиная святое Евангелие писати, к Феофилу глаголя: «Понеже мнози начаша чинити повѣсть о извѣстованных в нас вещех, якоже предаша нам иже исперва самовидцы и слуги бывши Словеси, изволися и мнѣ послѣдовавшу выше всѣх испытно по ряду писати». Послѣди же той же Лука к тому же Феофилу писаше Дѣяния Апостолская; потомъ же и инии мнози просвѣщением Святаго Духа писаша многих святых Жития и Мучения. Тако и сего блаженнаго Владимира достойно и в лѣпоту яже о немъ многоразличная истинная повѣдания во едину повѣсть снискати во славу Христу Богу, творящему дивная и преславная, и еликоже слово разума подасть нашему недоумѣнию, той сам Господь Богъ нашь, о немже сие начинающе повѣдание, молим и спрызываем всѣх празднолюбныхъ собори, от всѣх требующе благоприятны молитвы на торжество предложения Слову.
Приидѣте, отцы, возвѣстите нам и научите ны, и еже ко Христу предстателствомъ вашим помозите нам! Приидѣте, братия, и спотрудитеся, и совѣт благъ к разумѣнию предложите нам, и недостаточная наполняйте, слова вѣнецъ на ползу слышащим украшающе! Приидѣте, чада, и со вниманием послушайте и страху Господню научитеся! Приидѣте, вси единоземнии нам, и благовѣрием преспѣвающе сликоствуйте настоящему торжеству сего преславнаго в самодержцѣх великаго князя Владимира, общаго нашего отца и учителя, имже истиннаго Бога познахомъ и святым крещением просвѣтихомся! Приидѣте, вси окрестнии страны, и разумѣвайте дѣла Божия и, покаряющеся, просвѣтитеся, ревнующе благому произволению дивнаго сего самодержателя Владимира!
Почто же наречеся Владимиръ? Владыческое бо имя преименито есть всякому имяни, понеже единъ Богъ - владый миром, видимымъ и невидимымъ, и всею тварию. Дивно имя Владимиръ, Божияго звания тезоименитое наречение! Таковым дивным именованием преже сего Владимира не получи никтоже именоватися. Сей же самодержавный не туне Владимир именовася, иже никимже отъ человекъ не обладан бысть, но сам владый над всею Русиею и многимъ странам одолевая. И тако самовластно, душелюбителным изволением, наипаче же Святаго Духа осиянием, идолскую прелесть до конца возненавидѣ, истиннаго Бога, Творца вѣком и твари всея содѣтеля и господа, многожелателно взыска и люботрудно обрѣте, его же благодатию весь обогатися, и владычественымъ и царьственымъ именованиемъ преславно прославися.
Сий Владимир - добляя благочестия вѣтвь! Сий Владимир - апостольский ревнитель! Сий Владимир - церковное утвержение! Сий Владимиръ - идольский раздрушитель! Сий Владимир - благовѣрия проповѣдник! Сий Владимир - царская похвала! Вся того правовѣрная исправления дивна! Того вся благочестивая проповѣдания красна! По истинѣ рещи, аще и от нечестива родителя сицевым именемъ прозвася, всеже се Божия промысла дѣйству послѣдуя и въ лѣпоту Владимир наречеся, яко да владый миром и побежая супостаты, не токмо егда в нечестии пребывая, наипаче же послѣди, егда и во благочестии преспѣвая и владый миромъ и премирная наслѣдова, и не токмо видимыя враги побѣжаше, но и невидимыя, и самого диявола и всяко нечестие потреби и правовѣрие укрѣпи. И тако во святомъ крещении сугубо и тезоименитство царскаго звания приобрѣте: Василие наречен бысть. «Василие» же по греческому языку глаголется, по рускому же языку толкуется «царь». Василий бо царское священие, царское же се и Божественое именование.
Глава 2. Владимир бысть сродник Августу Кесарю. Кто же и откуду и от коего сродствия бысть сий Божий избранный сосуд, сугубо царскоименитый самодержец, Владыческо и царско звание имѣя? Сий преименитый самодержавный царь и великий князь Владимиръ - сынъ пресловущаго во храбрости великого князя Свѣтослава, внук самодержавнаго Игоря и достохвалныя в премудрости блаженныя и великия княгини Ольги, правнук Рюриков, первовладычествующаго в великом Новѣграде и во всей Руской земли. Не худа же рода бяху и не незнаема, но паче - преименита и славна римскаго кесаря Августа, обладающаго всею вселенною и единоначальствующаго на земли во время перваго пришествия на землю Господа Бога и Спаса нашего Исуса Христа, иже егда нашего ради спасения изволи родитися от безневѣстныя и Пречистыя Приснодѣвы Мария. Сий кесар Август разреди вселенную братии своей и сродником. Прус. Емуже бяше присный брат именемъ Прус; и сему Прусу тогда поручено бысть властодержство в березех Вислы реки, град Мадборок, и Торун, и Хвойница, и пресловый Гданескъ, и ины многи грады по реку глаголемую Нѣмон, впадшую в море, иже и до нынѣ зовется Пруская земля. От сего же Пруса сѣмени бяше вышереченный Рюрик и братия его; и егда еще живяху за моремъ, и тогда варяги именовахуся и из-за мория имаху дань на чюди, и на словенех, и на кривичех. (,,,)
Глава 5. О Свѣтославовѣ самодержьствѣ, и одолѣние на болгары, и дан на греки. Такоже и сынъ Игорев Свѣтослав, отецъ сего равноапостольнаго Владимира, велми бяше храбор и легок и совокупляя избранныя воины многии храбрыи; возовѣ же по себѣ не возяше, ни шатра, ни котла, мяс бо не варяше, но, изрѣзав тонко, на углии печаше; спаше же на войлоце, в возглавия же мѣсто - сѣдло; и всюду побѣжая сопротивныя ему; в лѣто 6475 и болгары дунайския одолѣ и взя 80 градов их - и сѣде в Переславцѣ, граде их; и греческаго воинства 100 тысящ победи токмо десятию тысящама своимъ воинством, и грады их разби и пустыи остави, и дан велику взя на Царѣграде.
Глава 6. Фотия патриарха свидѣтелство. Разумно же да будет, еяже ради вины предложися слово о храбрости руских скипетродержателей, - понеже нача удержаватися руская брань на греки блаженнаго сего самодержца Владимира миролюбием, восприятия ради благочестия от греческаго правовѣрия, якоже о сихъ свидѣтелствует и самого Царствующаго града святѣйший патриархъ Фотий во своем послании, иже к восточным архиерѣйским престолом, Александрѣйскому и прочимъ, на многое еретическое обличение, и яко не подобает глаголати Духа Святаго от Отца и от Сына исходяща, но от единого Отца; идѣже пишет и о болгарех, како от христоненавистнаго варварства во истинное християнство к благочестию нечаятелне прицѣпишася, и, двою лѣт во благочестии не пребывши, всѣяша в них еретицы многия ереси, иже тогда блаженный патриархъ Фотие тщашеся паки в совершенное благочестие возвратити. В том же послании благодарствено воспоминает и о руских самодержателех, како и отъ каковыи злобы и сверѣпства и непрестаннаго ратования на греки внезапу на любов премѣнишася и от богомерзостнаго идолобѣсия ко истинному приобщищася благочестию, егоже держаху усердно и непревратно. Пишет же Фотий патриархъ в таковѣм своем послании сице: «Иже у многих многажды повѣдаемый язык, иже в лютость и в совершенное убийство всѣх вторых сотворяя, сей глаголемый руский, иже убо на Греческое царство и окрестъ их живущих поработивше и от того гордстию возвысившеся руцѣ сопротив простроша, но обаче нынѣ и тии християнскую чистую и непорочную вѣру восприяша и вмѣсто языческаго и безбожнаго идолобѣсия, въ немъже преже одержими бяху, премѣнишася в чин послушник и приятелей и вмѣсто еже за мало преже на ны от них пленения и велия дерзости нынѣ к намъ любовне себе поставиша; и в толицей их вѣре такова любовь и ревность распалися в них, яко епископов и самого пастыря прияша, святѣйшаго митрополита и християнския службы со многим потщаниемъ и прилежанием облобызаша».
Не в новых бо лѣтех Руская земля многа и велика пространствомъ и неисчетна силна воиньством, но вельми от древних лѣт и времен многим странамъ и царствомъ страшни бяху и многим одолѣваху. (...)
Глава 12. Начало о святем Владимире, иже бысть 4 степень от Рюрика, благочестию 1. Время уже настоит воспомянути о сем преславном Владимире, - како преже, еллинскимъ обычаемъ послѣдуя, в нечестии самодержствуя, и како послѣди и истиннаго Бога взыска и обрѣте, и како во благочестии самодержствуя и преспѣвая правовѣрием древле царствовавших во благочестии, такоже и процвѣтший иже от чреслъ его многорасленый плодъ благословеный в род и род непреложнии исполнители бяху всему закону християнскому. И не зрим никтоже на первое нечестие и злострастное ко грѣху Владимирово рачение, но послѣдними его иже к Богу и человѣкомъ благочестивыми дѣлы уцеломудримся. Стремления бо его нечестивая и страстная сего ради явлена здѣ, да не впаднем в таковая, а иже впадшии и останем от согрѣшения, Владимирову подражающе исправлению и совершению благочестия.
Глава 13. О святей Олгѣ. Сего великаго самодержца, святаго Владимира, преблаженная баба, великая княгиня Олга, предтеча руская к Богу, егда позна сущаго Бога, и благовѣрно живущи в Киевѣ граде; с нею же бяху трие внуцы ея, Ярополкъ, и Олег, и сий великий князь Владимир, Свѣтославичи, ихже премудрая Олга любляше и снабдѣвати их всячески тщашеся. Аще же и хотяше крестити их, но невозможно бѣ, понеже сынъ ея Свѣтослав непокорив бяше благочестивымъ словесем: много бо со слезами увѣщаваше его блаженная мати его, дабы вѣровал во Христа и крестил бы сея, и не послуша. Тогда бо сии рустии людие невѣрием одержими, и слово Божие яко уродство вменяшеся имъ. Дивная же Олга остави сие на воли Божии. Самъ бо тогда самодержец Свѣтослав живяше в Переяславцѣ на Дунаи; и тогда печенѣзи, яко время си улучивше, нападоша на град Киев; и аще не бы Господь храняй Владимира, раба своего, хотящаго послѣди быти ему сосуда избраннаго, и молитвъ ради преподобныя Олги, вмале бы взят был Киев град. И посла Олга к сыну си, возвѣщая ему случшаяся. Он же вскорѣ прииде и целова матерь свою и чад своих, и прогна печенѣг, и бысть мир. При нем же, в лѣто 6475, блаженная Олга, мати его, с миром к Богу отиде, память добру, начало благочестия всѣм нам остави.
Глава 14. О позорной ловитвѣ, и о братоубийстве, и о гиганте. По погребении же честнаго телеси блаженныя Олги, паки иде Свѣтослав Игоревич в Переяславец на Дунаи, сына же своего Ярополка в себѣ мѣсто посади в Киевѣ, а другаго сына Олега в Деревѣх. Новогородцы же испросиша себѣ у Свѣтослава сына его, сего великаго князя Владимира, и даде имъ. Он же иде с ними, и сѣде Владимир в Великом Новѣграде.
По смерти же Свѣтославли воздвижеся братоубийственая крамола в Руси по образу древния злобы перваго Каинова братоубийства. Како же и откуду начася братоубийство в руских самодержателех? Начало же бяше таковыя братоненавистныя вражды от ловитвы животных. Гигантъ Невротъ. Сия же ловы первѣе показа дѣяти и волшвения в первых родѣх нѣкий гигантъ именемъ Неврот, создавый Вавилонъ град, иже бяше от племени проклятаго Хама. И таковою прелестию и до нынѣ тѣшахуся мнози властодержателие, не токмо нечестивии, но и благочестивии прелщахуся глумными утѣхами, внимающе поганским обычаем, любяще многообразныя позоры и глумления, и на песие брехание в ловитвах кличюще, и от всея силы кричаху беспрестани, елико можаху многоразличными козлогласовании, яко неистови. И сих ради бесовских коварствъ от властоначалствующих многажды приимаху скороминующее дарование и маловременную почесть, не богараднаго ради подвига, ни людския ради ползы. И вмѣсто таковых худых прибытков от ловитвы мнози отщетишася не токмо многаго своего имѣния, но вкупѣ и живота своего, с ним же и душевнаго прибытка, и вмѣсто веселия и жкогосладостныя утѣхи восприимаху с плачем горким и многоразличное уязвление и нелѣпотною смертию незапное животу применение, а по смерти вѣчное мучение. (...)
Глава 38. О крещении всея Русии. Потом же блаженный Владимир со отцем своим Михаилом митрополитом и со благородными новопросвѣщенными чады своими, и со епископы и презвитеры, и з боляры и со всѣми вѣрующими в Господа нашего Исуса Христа бяху вкупѣ единодушно благодарствующе Бога, в молитвах и молениих и в воздержании пребывающе и подвизающеся, и совѣщевающе душеспасителное совѣщевание, еже проповѣдати слово Божие с трудолюбным потщанием всѣм людем, не токмо единем кияном, но и во всей Русстей земли, яко да вси отвратятся от идолския лсти и от грѣх очистятся и крещение да приимут во имя Отца и Сына и Святаго Духа. И со властию заповѣда во всѣх градѣх всѣм быти християном, рабом и свободным, юным и старым, богатым и убогим, и во всѣх ясно и велегласно славитися Святѣй Троицы, непокоривых же и обетшавших во идолобѣсии и сих учителными словесы с любовию наказати, прочим же и страхом запрещати, дабы никтоже не прекословил слову Божию.
Поучение к народом. И многу народу собрану бывшу, к ним же много поучение простирашеся от пресвященнѣйшаго митрополита, такоже и от епископовъ и от презвитер; наипаче же и сам равноапостольный Владимир многих смиреномудрено и любезно, не яко властелски и запрѣщая, но учителски, моля всѣх и наказуя, разумно же и богоразсудително извѣсти им истинную Христову вѣру, ясно являя благодать Божию, еюже самъ сподобися просвѣщен быти. Множество же народа, слышавше от дивнаго самодержца словеса Божия, вси единомудрено внимаху с вѣрою глаголемымъ, и никтоже противно не глагола ничтоже благочестивому его повелѣнию, но вси, благодатию Святаго Духа осияваеми, люботщателно обратишася вѣровати истинному Богу; вси радостными сердцы, вкупѣ же и усты, единомыслено обѣщашася креститися, единогласно глаголюще: «Аще сия вѣра не бы истинна была, то не бы восприял ю сам великомудреный самодержець нашь и премудрии боляре его. Якоже они лучшую вѣру избраша, юже и мы достойно восприяти имамы». И бысть радость велия во всем граде.
Проповѣдь святому крещению. Блаженный же Владимир посла проповѣдники по всему граду, по данней ему благодати всѣм людем со властию заповедь предлагая, и нарек имъ день, глаголя: «Аще кто не обрящется на рецѣ, богат или нищ, или свободь или работникъ, мужеска полу и женска, от мала и до велика, креститися во единого Бога Отца и Сына и Святаго Духа, и той явѣ противен будет Христу Богу и нашей державе, и не имат сей пощадѣн быти от нас». Сия же слышавше людие с радостию отвсюду течаху креститися, исповѣдающе грѣхи своя и оглашени бывше. Дни же нареченному приспѣвшу святаго просвѣщения всѣм людемъ, и тогда со заутрия пресвященный митрополит Михаил, с нимъ же епископи, и презвитеры, и дияконы, и прочии причетницы, облекшеся во все священное благолѣпное одѣяние, изыдоша на Днѣпръ рѣку со кресты, и со иконами, и евангелии, и с кандилы благовонными и со свѣщами. Вкупѣ же подвижеся с ними приити ту и самъ и равноапостолный Владимир и со своими новопросвѣщенными чады, и со князми, и з боляры, и с прочими сановники и чиновники.
Крещение всенародное в Киевѣ. Снидоша же ся креститися многое множество людей мужеска полу и женска, от мала и до велика, и с сущими млеко младенцы. И вси людие внидоша в рѣку, и стояху овии до шии, а друзии до персей, младенцов же на руках в водѣ держаще, совершеннии же бродяху. Святителие же и презвитеры, стояще на брегу, молитвы глаголаху святаго крещения и елеом святым помазаху их; и тако крестишася все множество народа русскаго во имя Отца и Сына и Святаго Духа; и священным миром помазающе их, и словеса утѣшения глаголавше к ним и благословивше, отпустиша я.
Радость и благодарение крестившихся. И тако вси изыдоша от воды, просвѣщени душею и тѣлом, радующеся и славяще и хваляще Христа Бога, яко спасе их, якоже древле Израиля от работы рукою Моисѣовою, тако и нынѣ новаго Израиля, руския люди, рукою Владимировою, равноапостолнаго самодеръжца. И бѣ видѣти радость велию и неизреченную не токмо на земли человѣком, но и на небеси ангелом; и арханггели возвеселишася, и святыхъ дуси взыграшася о толице душь спасаемых. Сам бо рече Господь: «Велика бывает радость на небесѣх о едином грѣшнице кающемся», колми паче - о толицѣ бесчисленых душах во всей Земли руской, приведеных к Богу святым крещением. И тако бяху ликовствующе и красовахуся Божии людие вси, в нихже бѣ веселие непрестанно, и торжество пресвѣтло, и шум празднующих, уму непостижим. Смирением к Богу возвышающеся и вѣрою приближающеся, вси, в любви преспѣвающе утѣшением Святаго Духа, растяху и множахуся, ублажающе самодержца Владимира, яко повелѣнием его просвѣтишася, и время похваляюще, в неже Бога познаша, и день благословея нарицающе, в онже крестишася. И тако, во благодушии и в пространствии сердца, идоша в домы своя, радующеся и благодаряще Бога.
На мѣсте же, идѣже снидошася киевстии людие, крестишася, и ту поставлена бысть церковь во имя святаго мученика Турова, и оттоле наречеся мѣсто оно святое. По истинѣ же свято мѣсто, идѣже много множество людий, сшедшеся, диявола отрекошася и святымъ крещением просвѣтишася и осветишася. В лѣпоту же и самый град той преименитый Киев наречеся мати всѣм градовом руским. Не тунѣ бо тако наречеся, но яко в нем Руская земля обновися благочестием от блаженныя и равноапостольныя великия княгини Олги, и паки благородный внук ея, сий богоблаженный и равноапостолный Владимир, в том же граде первее вся люди своя въ богоразумие приведе, и от того же града проповѣданием благочестия во всей Рустей земли дияволя прелесть упразднися, вѣра же християнская расплодися и непоколеблемо утвердися и всюду яко неугасимая свѣща свѣтяшеся.
Рыдание дияволе. Злодѣивый же диявол и все его бѣсовское множество и темное их богопротивное соборище, видяще многих людей благочестием просвѣщаемы, а идолы на земли попираемы, и рыдая диявол стоняше и сѣтуя, глаголя: «Увы мнѣ! О, горе мнѣ, яко и отсюду прогоним есмь! Здѣ бо мнях жилище себѣ имѣти, понеже здѣ не сут учения апостольскаго, и людие, не вѣдуще Бога, мнѣ угодие творяху и служаху ми, о нихже веселяхся преже. Ныне же от таковых невѣглас побѣжен есмь, а не от апостолъ, ни от мученикъ, и не имам уже царствовати во странах их».
Блаженный же Владимир, яко видѣ крещены вся люди града его, возрадовася душею и сердцем, яко позна сущаго Бога не токмо сам, но и люди его, с нимиже ликовствуя и со многим благодарением молитвы прилѣжныя принося Богу и возрѣв на небо, и вопияше, умилно глаголя. Молитва: «Боже, сотворивый небо и землю, призри на новопросвѣщенныя люди сия и дай же нам разум, еже увѣдети и знати тя, единого истиннаго Бога, якоже познаша тя страны християнския! И утверди в них и во мнѣ вѣру твою праву и несовратну! И мнѣ помози, Господи, на вся сопротивныя враги, да надѣяся на твою державную помощ, побѣжу вся козни дьяволя и вся враги видимыя и невидимыя, яко твоя держава нерушима и царствие непремѣнно Отца и Сына и Святаго Духа, нынѣ и присно и в бесконечныя вѣки. Аминь».
Глава 39. Святыя церкви зижемыи и презвитеры поставляемы. И сице помолися и повелѣ святыя церкви воздвизати повсюду, во градѣх же и весех, и честныя монастыри составляти, идолския же храмы истребляти и под тѣх вчиневати областию. На холмѣ же, идѣже стоял кумир Перун и прочии дѣмонстии кумири, и ту постави церковь святаго Василия; такоже и по всѣм градовом и весем воздвизахуся церкви. Дары же великия и стяжания земная доволно святым церквам даяти завѣща. Святителие же поставляху попы, освещше их на вся церкви, помолившеся о них с постом, и предаша их Господеви, в негоже вѣроваша. И тако благодатию Божиею умножашеся число учителей, и вѣра православная преспѣваше вездѣ и цвѣтяше, сияше яко солнце.
Глава 40. Учение книжное отрочатом в Киевѣ. Таже по сих благоволениемъ Божиим пресвященный митрополит Михаил купнотщателно съ сыном своим, богомудрым самодержцем Владимиром, умыслиша, како наипаче утвердити вѣру православную в Рустей земли: и повелѣ взимати у нарочитых людей младыя дѣти, и даяху учити их книжному писанию, азбукам и всякому написанному святых книг слову. И тогда матери чад своих, даемых учитися грамотѣ, плакахуся по них яко по мертвецѣх, еще бо не велми бяху тогда утвердилися вѣрою. И бысть множество училищ книжных. Богодухновенный же учитель, пресвященный митрополит Михаил, призываше к себѣ всѣх тѣх учителей грамотных и наказываше их правѣ и благочиннѣ учити юныя дѣти, якоже словесем книжнаго разума, такоже и благонравию, и правдѣ, и любви, и зачалу премудрости, страху Божию, и чистотѣ, и смиреномудрию; учити же их не яростию, ни жестостию, ни гнѣвом, но растовидным страхом и любовным обычаем и сладким проучением и ласковым утѣшением, да не унывают, ни ослабѣют, прилѣжно и часто прослушивати и наказывати их; предавати же комуждо их урок учения с рассуждением противу коегождо силы и со ослаблением, да не унывают же; наипаче же всегда прилагати имъ учение от закона Господня на ползу души же и тѣлу; от безумных же и неподобных словес всячески ошаятися.
И тако благодатию Божиею елицы научишася грамотѣ, от нихже бысть множество премудрых философовъ, яко сбытися пророчеству, глаголющему яко к лицу Руския земли: «Во дни оны услышат глусии словеса книжная, и ясенъ будет язык гугнивых». Сии убо рустии людие прежде сего никогдаже не слышаша словес Божественых Писаний, но бяху, яко звѣрии, идолослужебни, безумнии и кровопролитливи; нынѣ же премилостиваго Христа Бога премудрымъ устроениемъ и благодатию его просвѣщени и евангельски живуще, и быша премудрии философи дивни, якоже рече пророкъ: «Помилую егоже аще помилую». Тако бо помилова Богъ люди руския порожением банею паки бытия и обновлением Святаго Духа и научением премудрости разума книжнаго, имже мощи обрѣсти путь спасения. Мнози же и обрѣтоша, и совершенно Богу угодиша, и Небесное Царство получиша. Сих же ради всѣхъ и всяческих ради слава единому содѣтелю, всѣх благих подателю Богу! (...)
Преставление митрополита Михаила. Блаженный же и приснопамятный пресвященный митрополит Михаилъ в добродѣтелных исправлениих препроводи житие, преиде от мира в премирное блаженство к желаемому Христу Богу, в вѣчную жизнь с миром радостно преселися, пожив на земли крѣпкимъ житием добре и боголюбезне; многи труды о Господѣ показа, и многия идолския требища разори, и многия люди невѣрныя в вѣру Христову обрати, и вѣру православную в новокрещеных людех утверди, и всѣх богоразумию научи.
Святый же самодержец Владимир велми оскорбися о разлучении отца, бяху бо в духовной любви и во благих совѣтех всегда пребывающе, о исправлении благочестия подвизающеся. Епископи же Фотия патриарха многа словеса утѣшителна от Божественых Писаний на ползу предлагаху, еже утолити скорбь самодержца; такоже и князи и боляре и вси велможи его, благоразумно разсуждающе, утѣшаху его, и едва увѣщаваем бываше.
Глава 49. О митрополите Леонтии. Блаженный же и равноапостольный великий князь Владимир, не терпя видѣти вдовствующаго престола великия руския митрополия, и немедлено посылает в Царствующий град ко вселенскому патриарху кир Николѣ Охрисовергису, любезно прошаше себѣ и всей державе своей всея Земли руския люботрудна духовному учению преосвященна митрополита вмѣсто преставльшагося. И абие назнаменанием Святаго Духа избран бывает Леонтъ, поставлен на русскую митрополию, и вскоре отпущен на Русь, в лѣта 6499. Пришедшу же ему в Киев, его же боголюбивый князь Владимир и вси людие прияша честнѣ; и бысть радость велия в людех.
Глава 50. Святый Владимир раздѣли грады сыновом своим. Благоволением же Божиим помысли по сих преблаженный Владимир совѣт благ совѣщати со отцем своим, пресвященным митрополитом Леонтом всеа Руси, еже бы раздѣлити ему землю Руския его державы в наслѣдие сыновом своим и устроити во градѣх епископы во исполнение благочестия. И нача раздѣляти грады сыновом своим: Вышеславу - Великий Новград, Изяславу - Полотескъ, Свѣтополку - Туров, Ярославу - Ростов. Умершу же Вышеславу, и даде Ярославу Новград, Борису - Ростов, Глѣбу - Муром, Свѣтославу - Деревы, Всеволоду - Владимир, Мстиславу - Тмуторокань, Станиславу - Смоленескъ, Судиславу - Псков. Поучение. Посылая же их в тыя грады господьствовати, благословение дая имъ и любочадное о Христѣ цѣлование, вкупѣ же наказуя и поучая их, прежде же всего заповѣда им страх Божий имѣти и вѣру православную непорочно держати, злославныя же догматы до конца отвращати, болши же всего на всѣх царя и Бога вседушно имѣти надежу и тому единому покланятися, и того славити, и того вѣдѣти творца и содѣтеля всей твари; и ина многа такова. О всем же повелѣ им и со епископы совѣтовати: дабы како и поганые на благочестие обращати, и требища идолския разоряти, и всякое нечестие истребляти, и церкви Божия воздвизати, самѣм же им от всякия нечистоты и от всякого лукавства и неправды удалятися, и от всякого насилия и от лихоимства огребатися, и ко всякому малому и великому судъ нелицемѣрен предлагати, и о всем рассужати люди Божия в правду, и межу собою братолюбие и единомышление и мир имѣти, и ко всѣм людем, не токмо к любовным, но и ко врагом смиряющемся, милость и любов простирати, и во всем по воли Божии жити, надежи ради вѣчныя жизни.
Глава 51. Поставление епископовъ по градомъ. Пресвященный же митрополит Леонтъ по данней ему благодати от Пресвятаго и Животворящаго Духа избрание сотворяет, якоже есть обычай, и поставляет епископы и посылает их в кииждо град Руския митрополия, коегождо на свой ему Богом порученный жребий, паствити Христово стадо словесных овецъ и имѣти попечение о тѣх единородных бесмертных душах, и душах же, запустѣвших невѣрием, всѣяти сѣмя благовѣрия и возрастити и умножити плод спасения, и церковь Божию всяческим благолѣпием благочиннѣ украсити, и исправити слово истинное. В Новград. Первое же посла в Великий Новград епископа Иоакима Корсунянина. Он же, пришед в Новград, и досталная требища бѣсовская разори и идолы сокруши, а благочестие утверди. В Чернигов. Потом же митрополит Леонтъ посла во град Чернигов епископа Неофита. Таже посла во град Ростов епископа Феодора. Во Владимир и во иныя грады. По сих же посла во град Владимир епископа Стефана и во иныя многия грады разсла епископы. И бысть слава Господня повсюду, и радовахуся людие, и сияше в них православие, и имя Христово величашеся, и слово Божие растяше и множашеся.
Глава 52. Начало церкви соборныя в Киевѣ. И паки благоволением Божиим в четвертое лѣто по крещении блаженный Владимир совѣт благъ совѣща со отцемъ своим, преосвященным митрополитом Леонтом, и со епископы и з боляры, еже бы воздвигнути камениемъ поставлену великую церковь соборную Десятинную во имя Пречистыя владычица нашея Богородица и Приснодѣвы Мария в преименитом граде Киевѣ. Молитвовавше же доволно, яко да обрящут мѣсто удобно, идѣже благоволит Богъ и Пречистая Богородица таковѣй Божественей церкви созданѣ быти, и милостыню многую убозей чади повелѣша раздаяти, - и Божиимъ хотѣнием обрѣтоша мѣсто благопотребно, на немже мѣстѣ дом был прежереченнаго человѣка Божия, зовомаго варяга, и сына его Иванна, идѣже мученическими вѣнцы от Бога увязошася, и честною их кровию первѣе освятил есть Богъ дом той. И на том мѣсте начаша здати соборную церков Богоматери. Мастеры же бяху прежереченнии хитрецы.
Глава 53. Начало Ростовстей церкви. Такоже и во градѣ Ростовѣ тогда вѣра благочестивая нача обновлятися пришествием святаго и праведнаго страстотерпца, боголюбиваго князя Бориса Владимирича, идѣже тогда прежепомянутый епископъ Феодоръ люботрудно подвизаяся, проповѣдая слово Божие, и аще же и многа озлобления от невѣрных подят, но обаче помощию Божиею и Пречистыя Богоматери постави в Ростовѣ церковь, велми чюдну и прекрасну, дубовными древесы, во имя Пречистыя Богородицы, честнаго ея Успения, о нейже бяше писано, якоже до тоя не бысть така церкви, ниже потом имат быти. И о чюдотворце Леонтии. Пребысть же та дивная церкви лѣт 165. При державѣ же благовѣрнаго великого князя Андрея Георгиевича Боголюбовскаго Божиим попущением погорѣ град Ростов, и чюдная та церковь згорѣ. И на том мѣсте начаша здати церковь каменну. Ей же рвы копающе, обрѣтоша многочюдесныя мощи целы со всею одежею великаго святителя Леонтия, иже бысть родом Царяграда, от Божия же анггела объявлен бысть патриарху, да его освятить во епископы граду Ростову, идѣже прежнии епископи Феодоръ и Ларионъ изгнани быша из Ростова от невѣрных людий.* Святый же Леонтий прииде в Ростов и видѣ люди, состарѣвшася в невѣрии; и остави старыя люди, младенца же к церкви призываше, и сладостною кутьею кормяше их, и благочестию учаше их, и крещаше их. Родителие же их, вземше различная оружия, и устремишася не токмо изгнати святаго Леонтия, но и убити хотяху. Святый же изыде противу их с честным крестом и со всѣм освященным собором, - невѣрнии же ослѣпоша; святый же Леонтий всѣх их крести, - и прозрѣша вси. И оттоле в Ростове утвердися совершенно благочестие и донынѣ.
Глава 54. Начало Белаграда и в нем епископа. И не токмо же тогда древния грады благочестиемъ просвѣщахуся, но и на пустынных мѣстех святый Владимир многия грады созидая и в них святыя церкви воздвизая и благочестием исполняя. Тогда же и Бѣлград постави, и церковь в нем Христова Преображения воздвиже, и возлюби град той паче инѣх градов, наполни же отвсюду множеством людий, в негоже епископа Никиту посла, егоже постави Леонтъ митрополит. (...)
Глава 65. О храбрых мужех. Елико же преблагий Богъ в телесных преспеяниих усугуби благородию его благодать мужества и смысла, тако же дарова ему и велможи премудры и разумны и во благосовѣтии дивны, мнози же и силни и храбростию удалы и нарочиты. Якоже нѣкогда Давыдъ царь имяше у себе силных муж тридесят и седмь таковыи мужествены, яко меншему их могущу быти на сто мужей, вящшему же наипаче возможно, - и противу тысящи братися, тако и сей блаженный Владимер по благодати Божией имяше у себе, якоже вышереченно, мужи храбрыи, и удалы, и силны. Янъ. В них же бяше прежереченный Янъ Усмошвец, иже убивый исполина печенѣжска, велика и силна. Рагдай. Такоже дивен бяше в побѣдах и Рагдай удалый, иже на бран един исходити могий противу триех сот супротивных. Александръ. Подобно же симъ мужество и храбрость имѣя и Александръ, рекомый Поповичь. Малвредъ. Таков же бѣ и Матвред силный. Андрих. Равен же мужеством и Андриох Добляйков, и инии мнози. Храбрость Александрова. Бысть же тогда нѣкто половчин, именуемый Володар, и сей дияволим научением, забывъ многое к себѣ благодѣяние государя своего святаго и великого князя Владимера, прииде бранию ко граду Киеву со братом си и со многими половцы, яко время удобно усмотрив своему зломыслию: великому бо князю Владимеру самому не сущу тогда в Киевѣ, но в Переславце на Дунаи. И бысть тогда в Киевѣ смятение велие; но обаче вѣры ради и благодѣяния блаженнаго Владимера вскорѣ разори Богъ неправедныя совѣты безумнаго Володаря, и не токмо не успѣ граду ничтоже зло сотворити, наипаче же - сам погибе и прочии с ним. На них же бо Богом подвизаем изыде нощию вышереченный Александръ Попович и абие победи их; самого же враждотворца Володаря оружию во снѣд сотвори и конечной пагубе предаде, с ним же вкупѣ и брата его и низложив и мертва сотвори и иных множество половец изби, овѣх же в поле прогна. Слышав же сия блаженный Владимер самодержец возрадовася зѣло и велие благодарение воздаваше Богу, на Александра же возложи гривну злату и сотвори его велможу честнѣй полате своей. Александрово и Яново мужество. И паки потом Александръ Попович и Ян Усмошвец, иже убивый печенѣжска исполина, и сия предивна храбра оба вкупе помощию Божиею многи побѣды показаша и многим сопротивным одолѣваша. Нѣкогда же множество печенѣг избиша и самого князя их Радмана и со трема сыны его живых изымаша и ко блаженному Владимеру в Киев приведоша. Боголюбивый же Владимер о всѣх Божиих благодѣяниих сугубо радовашеся и веселяшеся душею, купно же и тѣлом, в пространствии сердца со всѣми людми и творяше празнование свѣтло, в молитвах и во благодарениих и во псалмѣх и в пѣснех духовных выну хваляще и славяще Бога и Пречистую Богородицу и всѣх святых; и милостыню многу раздаяше по церквам Божиим и по монастыремъ, и нищим, яко да всегда на молитву подвижнѣйше будут к Богу. (...)