Ой у гаю при Дунаю…
фото: Єрик (вшыткы фоты да ся клацати)
Настали травневы сьвята, а я вырушыл до давно омріяного Вилкова - на край украінской ґеоґрафіі, на дунайску страну. Тото єдно зо сіл старообрядців в гырлі Дунаю. Трошечку в Украіні, а іщы вецей - в Румуніі. Называют іх ліпованами - ци то од липовых гаів, в якых нібы ся переховували, ци то од секты пилипівців. Останнє припущыня барз недоладне, кєд же пилипівці сут безпоповцы, а на Дунаю священство є.
Раз в Єрусалимі трафил єм на липованку. Кобіта в хусточці, бесідує по росийскы, лем якысо дивні, з акцентом наче молдавскым. Нашы то, вилковскы, гварят по росийскы нормальні, іно вшытко инче дост не росийскє - як будуют хыжы, як ведут господарство.
фоты: Буде дощ; Дунайскій причал; Виноград "Новак"
А што будуют хыжы, то не робят улиц. Замісто них тутай сут каналы - єрикы. Нажаль частина іх уж давно ся замулила и перетворила ся на звыклы дорогы для автівок. Но автівка автівком, а без чолна тутай не жыти. Так мож ся пересувати не лем по місьці, але и поза ним - до дач, якы сут на выспах.
фоты: Білгородскій канал; За рыбом; Дачка
По суху мож дойти ґу церквам. Тутай их три - дві старообрядскы, и єдна православна. Прецін опріч росиян-старообрядців до Вилкова гво свойом часі втікли запоріжці од катькы-2. Повідают, же в давнину велька неприязн розділяла старовірів од нововірів. Козакови напити ся дадут, лем погар розибют. Тераз такого юж ніт.
фоты: Старообрядска церков Різдва Богородиці; В старообрядскій церкві сьв. Миколая; Бузок коло церквы
Єдине кєпско - Вілково далеко. Не рятуює го єднак то од туристів. Знайти сой переночівлю в выхідний ден не єст легко. В місьці сут турбазы и два готелі - єден цивільний, другий зас радянскій - 30 грн з рила и смердит што в лазареті.
Ліпше питати ся в люди, бо здают кімнати. Штоправда, такых мож стріти на автостанциі лем дообід, бо зме приіхали над вечур та мали клопіт. Наступном нєсподзянком стал брак банкоматів. Тотіж іхайте гев з готівком.
фоты: Мостечок без єрик; Айвы цьвіт; Гундертвассер?
А пенязи на Дунаю йой як потрібны! Мож зіздити на нульовий кілометр, де Дунай в Чорне море впадат, мож покатати ся на чорных чолниках, мож сой купити смачных дунайскых оселедців домашнього засолу. А ищы вилковці роблят винко з місцевого винограду «Новак», якє ся продає мало не в каждым подвірку. Но а до того в сезон - трускавкы з дачных высп.