qep'a' wa'maH loSDIch

[jiqel]

qep'a'vo' juHwIjDaq jIcheghta'. Friday Qe' *sushi* SuchDI' ghom, *Worlds of Translation* lutwIj SuqmeH juH jIchegh. Thursday qep'a'Daq, lutmeychaj mugh ghom. wa' ben lutwIj vItlhetlhpu' 'ej vIlIjchu'. 'ach qep'a'Daq jIcheghDI', lutmeychaj mughbe'law' ghom. Do'Ha'.

qaDHommey vItIv. lutmeywIj vImuch:

qaDHom wa'

motlh pab vItIv. reH pab vIHaDnIS, 'ach ... vIHaDbe'. jIbuD. 'ach lI'qu' pab. pab tu'be'lu'chugh, Qapbe' law' Holmey. qaStaHvIS tlhoS DIS, tlhIngan Hol pab vIparHa'. rut jIlaD... chaq DotlhwIj vIja'.

'ach qaStaHvIS DIS, wa'logh, qep'a' vIjeS 'ej mawwI'pu' vISuchDI'...

vaj pab 'oy' vISIQ.

qaDHom cha'

wa'Hu', QInvam jupwI'Daq vIngeH:

wIj jup,

lopno' DajeSmo' jIbel. 'ach wanI' DaSovbe'bogh vIDelnIS.

tachDaq, tlhutlh loDnI'wI' SoH jIH je. majatlh, maqID, maHagh. tagha' puchpa' 'el loDnI'wI'. lojmIt cholDI' poS. veghDI' SoQqa'. puchpa'Daq SaHDI' loDnI'wI', puchvo' toS targh mach. jatlh loDnI'wI'. beychoH targh. HaghchoH loDnI'wI'. jatlh. ghIq loDnI'Daq Sup targh mach. HughDaj chop 'ej ratlh. mongDajDaq 'elchu' Ho''a' machqu' targh, vaj HughDajvo' luH 'e' nID loDnI'wI'. 'ach 'uchqu' targh mach. tajDaj lel 'ej targh DuQ 'e' nID. 'ach nagh rur targh DIr; pe'laHbe' loDnI'wI'. tagha' Haw' 'e' wuq. lojmItDaq qet, 'ach poSbe'. lojmIt qIpqu', 'ej jach. 'ach chuS tach vaj Qoy pagh. tlhoy'vo' chev 'e' nID loDnI'wI'. DaqDaj ratlh lojmIt. tagha' 'uchHa' targh mach. puch 'elqa' 'ej nargh.

vaj qatIch 'e' vIHechbe', 'ach bItlhutlhtaHvIS lojmIt tI'nIS loDnI'wI'.

qep'a' vItIvbej. 'ach DaH jIDoy' vaj jIleSta'DI' jIja'qa'.