НОВАЯ "ПЕРАМОГА" НЭАСТАЛІНІЗМУ НАД АХВЯРАМІ САВЕЦКАГА ГЕНАЦЫДУ
Новая «перамога» нэасталінізму ў Магілеве-на-Дняпры.
"Падаруначак" ад нэасталінісцкіх уладаў на Дзяды, кастрычнік 2023. Запомніце гэны дзень.
Такога ўвогуле ніхто ня мог прадбачыць!!! Да міжнароднага, нацыянальнага і дзяржаўнага Дня Памяці ў Беларусі (які, дарэчы, некаторы час паспеў пабыць і выходным днём), званаму па старажытнай беларускай традыцыі «Дзяды», магілеўскія ўлады разам з так званым «маскоўскім патрыярхатам» паднесьлі грамадскасьці своеасаблівы і вельмі непрыемны «сурпрыз», замяніўшы высокі дубовы Крыж Памяці ахвяр савецкіх рэпрэсый, які стаяў на спэцыяльнай пляцоўцы, на невялікі фарбаваны сасновы - у расейскіх традыцыях, - які ня мае дачыненьня ані да месца, ані да ахвяр.
Новы крыж, усталяваны на дзіўнай бэтоннай чушцы, падобнай на супрацьтанкавы «зуб пуціна», мае наступны надпіс па-расейску - «Кресту твоему поклоняемся владыко и воскресение твоё славим». Нездарма тамака нядаўна пад «дахам» улад маскоўскія папы са сваімі «казачкамі» гарцавалі - вось вам і «продолженьице». То бок пры гарачай падтрымцы магілеўскага чынавенства ўзмацняецца й надалей усеагульная расеізацыя, сталінізацыя і ўмасквацаркоўленьне старажытнага і славутага вольнага беларускага горада на вольнай рацэ. Усё гэнае гісторыя ўжо шматкроць бачыла, але не ў ХХІ стагодзьдзі і не ў такім пякельным кактэйлі!