Исх.5. Плинфоделание
исх5:1 И по сих вниде моисей и аарон к фараону и реша ему: сия глаголет Господь Бог израилев: отпусти люди моя, да праздник сотворят мне в пустыни.
исх5:2 Рече же фараон: кто есть, егоже послушаю гласа, яко отпустити имам сыны израилевы? не вем Господа, и израиля не отпущу.
исх5:3 И глаголют ему: Бог еврейский призва нас: пойдем убо путем трех дний в пустыню, да пожрем Господу Богу нашему, да не когда случится нам смерть или убийство.
исх5:4 И рече им царь египетский: вскую, моисей и аарон, развращаете люди моя от дел их? идите кийждо вас на дела своя.
исх5:5 И рече фараон: се, ныне умножишася людие сии на земли: убо не дадим почити им от дел.
исх5:6 Заповеда же фараон приставником дел людских и книгочиям, глаголя:
исх5:7 не ктому приложите даяти плев людем к плинфоделанию, якоже вчера и третияго дне: но сами да идут и собирают плевы себе:
исх5:8 и урок плинфоделания, еже они творят, на кийждо день наложите им: не уемлите ничтоже: праздни бо суть: сего ради возопиша, глаголюще: да пойдем, и пожрем Богу нашему:
исх5:9 да отягчатся дела людий сих, и да пекутся о них, и не помыслят о словесех суетных.
исх5:10 Понуждаху же их приставницы и книгочия и глаголаху людем, рекуще: сия глаголет фараон: не ктому даю вам плев:
исх5:11 сами вы шедше собирайте себе плевы, идеже аще обрящете: ибо не будет уято от урока вашего ничтоже.
исх5:12 И разыдошася людие по всей земли египетстей собирати тростие на плевы.
исх5:13 Приставницы же понуждаху их, глаголюще: совершайте дела ваша урочная на всяк день, якоже и егда плевы даяхом вам.
исх5:14 И биени быша книгочия рода сынов израилевых, иже быша приставлени над ними от приставников фараоновых, глаголюще: почто не совершисте урока вашего плинфеннаго, якоже вчера и третияго дне, такожде и днесь?
исх5:15 Вшедше же книгочия сынов израилевых, возопиша к фараону, глаголюще: почто ты тако твориши рабом твоим?
исх5:16 плев не дают рабом твоим, и плинфы нам глаголют творити: и се, раби твои мучими суть: обидиши убо людий твоих.
исх5:17 И рече им: праздни, праздни есте: сего ради глаголете: да идем, пожрем Богу нашему:
исх5:18 ныне убо шедше делайте плев бо не дам вам, урок же делания плинфеннаго да отдаете.
исх5:19 Видяху же книгочии сынов израилевых себе во злых, глаголюще: не оставите плинфоделания урочнаго дню.
исх5:20 Сретоша же моисеа и аарона, идущих во сретение им, исходящым им от фараона,
исх5:21 и реша им: да видит Бог и судит вам, яко огнусисте дух ваш пред фараоном и пред рабы его, дати мечь в руки его убити нас.
исх5:22 Возвратися же моисей ко Господу и рече: молютися, Господи, почто озлобил еси люди сия? и вскую послал еси мя?
исх5:23 и отнележе внидох к фараону, глаголати твоим именем, (он) озлоби люди сия, и не избавил еси людий твоих.
*
Ум человека в мире обычно занят плинфоделанием, утверждением в себе мира, как преемственного течения страстей.
Плинфы (саман) есть соединение неживого и неразумного (брение, глина) с мертвыми смыслами (плевы).
Источником мертвых смыслов для людей обычно бывает язычество, а для обратившихся к Богу бесы (приставники) и неразумные толкователи божественного (книгочия).
**