Дивен Бог во святых Своих!
продолжение
Канонъ предпразднства со ирмосомъ на 6. И триоди, по чину ихъ. Творение феофаново. Гласъ 4.
Песнь 1.
Ирмосъ: Моря чермную пучину невлажными стопами древний пешешествовавъ Израиль, крестообразными Моисеовыма рукама Амаликову силу въ пустыни победилъ есть.
Миръ обрадованно веселится, яко ощутивъ Господне сошествие на Тя: за милосердие бо милости съ небесъ сходитъ во утробу Девы вселитися.
Се Тебе, Царице, посылается божественный архангелъ Царя всехъ и Бога провозвестити пришествие и возгласити Тебе: радуйся, воззвание праотца.
Стамна светозарная и всезлатая, уготовися на приятие, манны животныя: на Тя бо приидетъ гласомъ ангеловымъ, въ Тя паче естества вселяяся.
Во утробу Твою чистую вселитися хощетъ Господь, живый присно на небеси, онебесити бо грядетъ земнородныхъ смешение, въ сие мудре оболкся.
Инъ канон Глас 4 Егоже краегранесие: Печать твоегоапостольства Ирские люди.
Песнь 1
Ирмос: Воспою Тебе, Господи Боже мой, яко извел еси люди от работы Египетския, покрыл же еси колесницы фараонови и силу.
Проповедниче равноапостольный, словом Богодухновенным и житием слово утверждающим, извел еси люди Ирския, якоже Моисей из Египта, от тьмы языческия ко свету веры Христовой.
Ереси Пелагиевой противостав мужественне, благодатную силу Христову являл еси людем, просвещая цари и князи и всяк возраст и чин, приводя же их во ограду церковную.
Что убо речем, Патрикия святаго вспоминающе, ревность ли его апостольскую восхвалим, озлоблениям ли и прещениям, яже претерпел есть подивимся, труды ли и подвиги и смиренно мудрия глубину воспоем, таже Христа Бога силу Свою избранному своему, к совершению сих, Подавшему, прославим.
Богородичен: Аарон жезл процветший, купина несгораемая, прообразоваху тя, Невесто Неневестная, Дево Богородице, воплощению Слова Предвечнаго Послужившую.
Катава́сія: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.
Песнь 3.
Ирмосъ: Не мудростию, и силою, и богатствомъ хвалимся, но Тобою, Отчею ?постасною Мудростию, Христе: несть бо святъ, паче Тебе, Человеколюбие.
Земля, яже терние страстей печальне израстившая, взыграя, ликуй: се бо Земледелатель Безсмертный, клятвы изымая тя, ныне приходитъ.
Божественное руно, готовися, Дево нескверная: на Тя бо Богъ, яко дождь, снидетъ изсушити потоки преступления.
Свитче божественный, благоукрасися: перстомъ бо Отчимъ напишется въ Тебе Божественное Слово, воплощся, безсловесия моего разрешая преступление.
Златый светильниче, подыми Огнь Божества, возсияющий Тобою, и светъ мирови даруя, имже золъ нашихъ тма разорится.
Инъ.
Ирмос: Утверждение на тя надеющихся, Христе Боже, в вере православней Твоей утверди нас, яко Человеколюбец.
Терпением многим добродетели стяжал еси, делом слово проповеди твоей утверждея, во славу Божию.
Телесня озлобления и искушения многоразличныя и уничижения претерпевая, неустанно на ниве Христвой трудился еси, Патрикие, не отступая, ниже в вере смущаяся, но в вере и надежди на помощь Божию утверждаяся.
Веждем твоим дреманием и телу упокоения не давал еси, сятителю, неустанно горы и долы земли Ирския преходя, веру истинную насаждая и новообращенныя людя настваляя.
Богородичен: Отрада и Утешение подвизающихся, и апостольская немолчныя уста, Ты еси, Владычице, но даждь нам нищим и убогим Тебе, даром взывающе вместо, пение сердечное приносити.
Катава́сія: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.
Кондакъ, гласъ 8. Подобенъ: Взбранной.
Всемъ земнымъ начало спасения нашего Ты еси, Богородице Дево, Божий бо служитель съ небесъ посланъ предстати Тебе, великий чиноначальникъ Гавриилъ, радость обрадованную Ти принесе. Темъ вси зовемъ Ти: радуйся, Невесто неневестная.
Ин кондак, глас 8
Яко луч горняго Солнца Правды во Ирландии яви тя Святый Дух, / Крестом Христовым поклонение солнцу дольнему упраздняя, / во отоце окияна моря кельтския языки ко благочестию привел еси, / темже, любовию сошедшеся, празднуем память твою, Патрикие богомудре, / просвещаяй верою призывающия тя и чтущия честную память твою.
Ин кондак, Глас 7.
Да пребудет Христос в сердце всякаго человека помышляющаго о тебе,
да пребудет Христос в устах всякаго взывающаго к тебе,
да пребудет Христос во всяком оке взирающем к тебе,
да пребудет Христос во всяком слухе внимающем тебе,
блаженне Патрикие, отче наш.
Седаленъ, гласъ 4. Подобенъ: Явился еси.
Нашествиемъ Духа Всесвятаго, Отцу Сопрестольнаго и Единосущнаго, гласомъ архангеловымъ зачала еси, Богородительнице, Адамово воззвание.
Слава, Седален, глас 7
Писаний священых рачителю, в слове Божием поучался еси неленостно, душу твою от сего источника Божественнаго напояя, и разум небесною мудростия питая, темже и проповеда еси учеником твоим Богоотроковенную истину, яже и писаниях твоих запечатлел еси.
И ныне, другий, гласъ 3. Подобенъ: Красоте.
Днесь вся тварь радуется, яко - еже радуйся, - Тебе вопиетъ ангелъ, благословенная Мариамъ и Пречистая Мати Христа Бога. Днесь змиино омрачается шатание, клятвы бо праотчи разрешися соузъ. Темже и по всему вопиемъ Ти: радуйся, Обрадованная.
Или богородичен, глас 7:
Мати Божия и Мати христиан, помилуй чада Твоя, аще бо и согрешаем, обаче в покаянии зовем: не остави нас сирых, но простри нам руку Твою, наставляющи ны на путь спасения.
Песнь 4.
Ирмосъ: Вознесена Тя видевши Церковь на Кресте, Солнце Праведное, ста въ чине своемъ, достойно взывающи: слава силе Твоей, Господи.
Таинство, древле прежде векъ предопределенное, явление начинаетъ приимати. Земля и небесная, согласно возвеселитеся и радостно воскликните.
Палата великаго Царя, слуховъ отверзи божественныя входы, уже бо приходитъ Христосъ истина и вселится посреди Тебе.
Праматернее поползновение исправляяй, Избавитель явится, въ неискусобрачную утробу вселяяся, Тому воспоимъ: слава силе Твоей, Господи.
Аввакумъ Тя пронарече гору древле, добродетельми присенну, изъ неяже явитися хощетъ Богъ нашъ, Дево Всенепорочная, едина человекомъ исправление.
Инъ.
Ирмос: Твоего на земли явления, Христе Боже, проповедуя пророк пришествия, с веселием вопияше, слава силе Твоей, Господи.
Еленю на горах Ароматских подобяся, горы и холми обтекал еси, церкви созидая и христианы в вере православней наставляя, в места же пустынныя уединяяся, непрестанно молилсся если, во еже новому стаду твоему спастися.
Грехолюбивый мир от юности твоей оставль, во обителях монашеских Мартина славнаго и ученика его воспитавыйся, в послушании же и научения лета многа пождав, жезл пастырский смиренно приял еси взывая: слава силе Твоей, Господи.
Овцы пажити твоея созывал еси гласом евангельским, и во дворы церковный сия управлял еси, истинным пастырь тем являяся, иже душу свою за овц пологает.
Богородичен: Ангелское целование приносим ти, благословенная Богородице, радуйся Благодатная, Господь с Тобою.
Катава́сія: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.
Песнь 5.
Ирмосъ: Ты, Господи, мой Светъ, въ миръ пришелъ еси, Светъ Святый, обращаяй изъ мрачна неведения верою воспевающия Тя.
О, нескверная Агнице! Агнецъ бо Бога нашего во утробу Твою внити тщится, вземляй наша согрешения.
Жезлъ тайный помале процвететъ, якоже пишетъ, Божественный цветъ отъ корене иессеева намъ являющися.
Ангеловымъ гласомъ утучнившися, яко виноградъ, къ прозябению готовися зрелаго, Дево, и нетленнаго Грозда.
Величайший пророковъ Исаия, возвеселися: Дева бо, о Нейже прореклъ еси, во чреве зачинаетъ Совета Великаго Ангела.
Инъ.
Ирмос: Возсиявый свет и просветливый утро, и показавый день, слава Тебе, слава Тебе, Иисусе сыне Божий.
Просветил еси, Патрикие, землю Ирскую, светом учения Христова, о новоизбранном стаде твоем веселяся, и Богови славу воздая.
Отверзл еси очи умные прежде неверием ослепленныя, иже во тьме невежествия пребывающих, и тыя подвигл еси, со всеми Христа Спаса славити.
Сытости не зная проповедал еси веру православную, настоя и научая во времени и безвремении, со слезами многими, Христу Богу помогающему ти вопия, слава силе Твоей, Сын Божий.
Богородичен: Тьму Отгнавшая и Солнце Правды миру Возсиявшая, Богородице Марие, зловерия от мира отжени.
Катава́сія: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.
Песнь 6.
Ирмосъ: Пожру Ти со гласомъ хваления, Господи, Церковь вопиетъ Ти, отъ бесовския крове очищшися, ради милости отъ ребръ Твоихъ истекшею кровию.
Радуйся, - Тебе Гавриилъ архангелъ вещаетъ, - радость бо во чреве Твоемъ приимеши несказанно, юже Ева преступлениемъ, Дево, погуби.
Не опалитъ, не ужасайся отнюдъ, утробы Твоея Огнь Божества, Отроковице: купина бо древле Тя воображаше, горящи, никакоже опаляема, Всечистая.
Гора, юже Даниилъ провиде Духомъ, радуйся, Дево, изъ Тебе бо мысленный Камень усечется и сокрушитъ демоновъ бездушная требища.
Мира Царь къ Тебе приидетъ и Тобою примиритъ поборенныя и прельщенныя, Богомати, лукавымъ советомъ змиинымъ.
Инъ.
Ирмос: Возопи, прообразуя погребение тридневное , пророкь Иона вь кить моляся , оть тли избави мя , Иисусе, Царю силе.
Обижаем не противуглаголал еси, и уничижаем смирялся еси, образ являя учеником твоим,темже и возвеличи тя Господь, Патрикие.
Льстивым кознем диавольским противобортвуя, не убоялся еси прещения волхвов нечестивых, Христову веру безбоязненно проповедуя и взывая, от сетей их избави мя, Иисусе, Царю сил.
Скорбь и тесноту и горькое рабство в юности твоей претерел, егда плевен был еси, Патрикие, по гласу же Господню свободу улучив, возопил еси, слава Тебе, Иисусе, Царю сил.
Богородичен: Ты еси обидимых Помощница, Ты еси плененных Свобождение, Твои бо мольбы, Приснодева Владичице, приемлет присно Сын Твой и Бог наш.
Катава́сія: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.
Кондак, глас 4:
Показался еси истинный ловец человеков, мрежи бо благовестия Евангельскаго простер, уловил еси языки во Царствие Христово, крещением просвещая во тьме поклонения идольскаго пребывающия и тех сотворяя чада Живаго Бога. / Сего ради молим тя: / предстательствуй о нас, отче Патрикие, чтущих святую память твою.
Икос:
Проповедию твоею, яко блистанием молнииным, озарил еси народ земли Ирския, во тьме неведения и сени погибельней седевших, славне святителю Патрикие, и веру Христову в них насадив, сотворил еси я чада Вышняго. Сего ради славы Небеснаго Царствия сподобился еси, яко Истины ученик красноглаголивый, предстательствуй о нас, чтущих святую память твою.
далее будет