Память Св. Блгв. Князя Александра Невскаго
...Князь великый Александръ възвратися из Орды отъ царя, и доиде Новагорода Нижняго, и ту пребывъ мало здравъ, и, дошедъ Городца, разболѣся. О горѣ тобѣ, бѣдный человече! Како можеши написати кончину господина своего! Како не упадета ти зѣници вкупѣ съ слезами. Како же не урвется сердце твое от корения! Отца бо оставити человекъ может, а добра господина не мощно оставити: аще бы лзѣ, и въ гробъ бы лѣзлъ с ним!
Пострада же Богови крѣпко, остави же земное царство и бысть мнихъ, бѣ бо желание его паче мѣры аггельскаго образа. Сподоби же его Богъ и болший чин приати - скиму. И так Богови духъ свой предасть с миромъ месяца ноября въ 14 день, на память святаго апостола Филиппа.
Митрополит же Кирилъ глаголаше: «Чада моя, разумѣйте, яко уже заиде солнце земли Суздальской!» Иерѣи и диакони, черноризци, нищии и богатии, и вси людие глаголааху: «Уже погыбаемь!»
Святое же тѣло его понесоша къ граду Володимерю. Митрополитъ же, князи и бояре и весь народъ, малии, велиции, срѣтоша и въ Боголюбивѣмъ съ свѣщами и с кандилы. Народи же съгнатахутся, хотяще прикоснутися честнѣмъ одрѣ святаго тѣла его. Бысть же вопль, и кричанiе, и туга, яка же нѣсть была, яко и земли потрястися. Положено же бысть тѣло его въ Рожестве Cвятыя Богородица, въ архимандритьи велицѣи, месяца ноябриа, въ 24, на память святаго отца Амфилохия.
Житие Александра Невского