Dekreti adsur dekreti
En intervali cirkum mi-dia, ante la validesko di uni anuncesas ja altra dekreti plu drastika - plu drastika, ma ne sempre sat klara. Segun aktual informi preske interdiktesas livar sua lojeyo, ecepte por komprar nutraji o facar "important aferi". Promeni permisesas nur por soli o personi de sama apartamento. Ka anke promeno devas esar "important"? Ka restar dum la tota tempo en dense habitata domo es plu sekura? Nulu es parolant pri la komplikoza lego kontre maski dil vizajo. La fenomeno maxim videbla til nun es la panikal kompri di vari: higienal papero, nudli, farino, rizo e c. La granda firmi asertas ke la stoki tote suficos, oportas tamen multa laboranti por povar furnisar la vari ek la magazini al vendeyi. Pro to nun helpas soldati. La guvernerio plulongigas la servotempo di soldati e ri-rekrutas civila servinti - aranji tre extraordinara hike.