Пӱсӧ лийже перада!
Р
оссий печать кечым Марий Элыште 14 январьыште палемдышна. Йӱла почеш республикым вуйлатыше журналист-влак дене вашлие, Марий Элысе главан да правительствын премийышт дене сеҥыше-влакым саламлыш. Вара Курчак театрыште пайрем мероприятий эртыш. Туштат 2012 ийыште ойыртемалтше СМИ пашаеҥ-влакым, тӱҥ шотышто Россий журналист ушемын марий пӧлкажын конкурсыштыжо сеҥыше-шамычым палемдышт.
Ынде кумшо ий Марий Элыште журналист ушемым вуйлатыше Оксана Старикован темлыме у йӱлажым шыҥдарен толыт. Пайремым музыкальный номерла дене шкештак СМИ пашаеҥ-шамыч да нунын икшывышт сӧрастарат. Теве тений угыч «Марий Эл» ГТРК-н корреспондентше Вера Рублёва куандарыш. А тудын пелен (ӧрмаш!!!) ты телевиденийын дикторжо Денис Носов лектын муралтыш. Район газет редакций-влак кокла гыч «Шернур вел» ӧрыктарыш - тӱҥ редактор Елена Лебедева коллегыж-влак дене пырля шкежат муралтыш.
Каласыман: тений Российысе «Ведомости» икымше газетын икымше номерже лекмылан 310 ий темеш. «Марла календарь» савыктышын ик редакторжо, шымлызе, кусарыше Валериан Васильевлан - 130 ий…
А таче Марий Элыште 100 наре печать изданий лектын шога. Тушеч 13-шылан правительство шийвундым ойыра. Марий йылме дене республик кӱкшытыштӧ мер-политик сынан "Марий Эл", самырыктукымлан пӧлеклалтеш "Кугарня", йоча-влакын "Ямде лий!", тӱрлӧ ой-каҥашым пуышо "Суртпече" газет-влак, литературно-художественный журнал-влак - "Ончыко" ден "У сем", йоча-влаклан "Кече-Солнышко" журнал савыкталтыт.
Марий кундемыште гына огыл, а марий калык илыме тӱрлӧ регионыштат чот палыме да вучымо лийын "Марий сандалык - Марийский мир" - Марий Эл да марий калык нерген информационно-аналитический журнал.
Оҥай проект - "Тукым памаш" газет. Тудо республикын йӱдвел-эрвел ужашыжым - Шернур, Параньга, Марий-Турек, Кужеҥер, У Торъял районлам - авалта. Район кӱкшытыштӧ тыгак марла лектыт "Шернур вел", "Морко мланде", "Жерӓ", "Район илыш", "Юл увер", "Йӓмде ли" газет-влак.
Эше Пошкырт кундемыште кок газет марла лектеш - "Чолман" да "Келшымаш".
Марла йоҥгалтыт Марий радио ден Марий Эл радио. Марий передаче ден увер аршашым "Марий Эл" ГТРК да "Марий Эл ТВ" дене ончаш лиеш.
Интернет-СМИат эркын вияҥеш.
Эше ик гана пайрем дене!!! Перада эреак пӱсӧ лийже!!!
Михаил Скоболевын фотожо-влак.
Сеҥыше-влак нерген тыште:
- http://mincult12.ru/node/1754
- http://portal.mari.ru/president/Pages/news/2013/130115_1.aspx