Молитва перед Почаевской иконой Божией Матери
Молитва
О всемилостивая Госпоже, Царице и Владычице, от всех родов избранная, и всеми роды небесными и земными ублажаемая! Воззри милостивно на предстоящия пред святою иконою Твоею и усердно к Тебе молящиеся люди сия, и сотвори предстательством и заступлением Твоим у Сына Твоего и Бога нашего, да никтоже изыдет отсюду упования своего тощь и посрамлен в надежде своей, но да приимет кийждо от Тебе вся по благому изволению сердца своего и по нужде и потребе своей, во спасение души и во здравие телу. Призри благосердием, всепетая Богородице, и на обитель, Твоим именем нарицающуюся, юже от лет древних возлюбила еси, избравших ю в достояние Себе, и неоскудно источающи токи исцелений от чудотворныя иконы Твоея и от приснотекущаго источника, в следе стопы Твоея нам открытаго, и сохрани ю от всякаго прилога и навета вражия, якоже древле сохранила еси Твоим явлением целу и неврежденну от лютаго нашествия агарянскаго, да выну воспевается и славится в ней и повсюду пресвятое имя Отца, и Сына, и Святаго Духа, и Твое преславное успение, во веки веков. Аминь.
Тропарь, глас 5-й
Пред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети, и к Сыну Твоему молитву вознеси о спасении душ наших.