СВЯТОЙ ПРЕПОДОБНОМУЧЕНИК АДРИАН ОНДРУСОВСКИЙ.
Click to viewТропарь:
Боже́ственною любо́вию уязви́вся, вся кра́сная ми́ра сего́ возненави́дел еси́; в пусты́ню же всели́вся, в моли́твах и поще́ниих до́блественне подвиза́лся еси́; разбо́йника к покая́нию сподви́гл еси́ равноа́нгельное житие́ страда́льчески сконча́в, страстоте́рпцев и пра́ведных воздая́ние прия́л еси́, Адриа́не, преподо́бне о́тче наш, моли́ Христа́ Бо́га спасти́ся душа́м на́шим.
Кондак:
Сви́рским тайнови́дцем Святы́я Тро́ицы наставля́емь, жите́йския молвы́ оста́вил еси́, преподо́бне, и, на бре́зе бу́рныя Ла́доги до́бре подвиза́вся, и́ноком му́дрый наста́вник яви́лся еси́, неви́нно же от разбо́йник лю́тую смерть прие́м, в Небе́сный Черто́г, ра́дуяся, преше́л еси́. Те́мже с ве́рою и любо́вию тебе́ вопие́м: ра́дуйся, богоно́сне Адриа́не, о́тче наш.
Молитва:
О, преподо́бне о́тче Адриа́не, уго́дниче Бо́жий, пусты́нный жи́телю, послу́шниче Христо́в! Ты́ убие́ние от нечести́вых челове́к по науще́нию вра́жию претерпе́л еси́, но Госпо́дь Бо́г десна́го стоя́ния Своего́ со святы́ми тя́ сподо́би. Сего́ ра́ди к ра́це честны́х моще́й твои́х припа́даем и мо́лим тя́ усе́рдно: бу́ди моли́твенник ко Го́споду Бо́гу о на́с гре́шных, святы́ми твои́ми моли́твами сохрани́ на́с от вся́каго зла́, огня́, гла́да, пото́па и вся́кия боле́зни и внеза́пныя сме́рти, и умоли́ Го́спода Бо́га дарова́ти на́м оставле́ние грехо́в, десна́го же стоя́ния и на́с сподо́бити, да непреста́нно прославля́ем Пресвяту́ю Тро́ицу, Отца́ и Сы́на и Свята́го Ду́ха, во ве́ки веко́в. Ами́нь.
Величание:
Ублажа́ем тя, преподобному́чениче Адриа́не, и чтим святу́ю па́мять твою́, наста́вниче мона́хов и собесе́дниче А́нгелов.
#Православие, #Христианство, #русскийсвятой, #ПреподобныйАдрианОндрусовский, #ПреподобномученикАдрианОндрусовский, #житиясвятых, #житиеПреподобногоАдрианаОндрусовского, #житиеПреподобномученикаАдрианаОндрусовского