Священномученик Неофит (Любимов)
Тропа́рь священному́ченику Неофи́ту Люби́мову, глас 5:
Отче священному́чениче Неофи́те, / Симби́рска и Москвы́ украше́ние, / до́брый наста́вниче ю́ных дев, / и чад великово́зрастных, душе́ю младе́нствующих, / научи́ нас внима́ти пра́вде Христа́, / да не потщи́мся ми́ром су́етным овладе́ти, // но пре́жде взыску́ем Бо́жия Ца́рствия.
Конда́к, глас то́йже:
Вслед царя́ земна́го / к Небе́сному Царю́ возше́дый, / сященному́чениче Неофи́те, / па́стырю и учи́телю прему́дрый, / показу́еши нам пра́ведный путь, / вразумля́я не угожда́ти мироде́ржцу, / ни слуга́м того́ после́довати: // вся бо суть в руце́ Госпо́дни.
Моли́тва
О, священному́чениче Неофи́те, па́стырю до́брый и богому́дрый, три́десять и три ле́та служе́нию свяще́нническому и учи́тельскому прилежа́вый! От Симби́рска да́же до Москвы́ простре́ся, о́тче, сла́ва о тебе́; та́мо бо и зде, тобо́ю науче́ннии, мно́зи на́ши сро́дницы в ве́ре и благоче́стии укрепля́хуся.
Ве́мы, о́тче, я́ко ве́ра на́ша не доказу́ется, оба́че показу́ется: те́мже у́бо по тебе́ гряду́ще, я́коже ученицы́ учи́теля изря́дна, потщи́мся показа́ти красоту́ и си́лу ве́ры правосла́вныя, вы́ну со смире́нием трезвя́щеся, и с дерзнове́нием к свя́тости подвиза́ющеся, да пости́гнем сию́ нау́ку нау́к твои́м поспе́шеством и детоводи́тельством святооте́ческим. Ты, наста́вниче, мно́гим ю́ношам и де́вам вручи́л еси́ лампа́ды ве́ры, во е́же тьму сомне́ний лука́вых отгоня́ти, све́тлым житие́м и те́плою моли́твою мир озаря́юще и согрева́юще. Сего́ ра́ди мо́лим тя о всех уча́щихся, сугу́бо же о ю́ных де́вах и отрокови́цах, да не са́ми о себе похва́лятся, но Бо́га прославля́ют благоче́стием, Присноде́ве Богоро́дице и всем святы́м подража́юще.
Что еще́ глаго́лем о тебе́, священному́чениче Неофи́те, ты бо, ве́рный ра́бе Царя́ Небе́снаго, не поруга́выйся царю́ земно́му, лиши́вшемуся ца́рства, пра́ведный долг возда́л еси́ убие́нному, и ны́не вку́пе с ним в Раи́ пребыва́еши. Мы же про́сим ва́шего хода́тайства, да не оста́вит Влады́ка небесе́ и земли́ страну́ Росси́йскую, оба́че сотвори́т сию подно́жие престо́ла Своего́. Ве́мы, я́ко мно́жества ра́ди святы́х, земля́ на́ша яви́ся вели́кая держа́ва и Ру́сь свята́я, и ны́не а́ки четверодне́вный Ла́зарь, Бо́жий друг люби́мый, воззва́нием Христо́вым хо́щет воспряну́ти от се́ни сме́ртныя и тле́ния смердя́ща. Те́мже у́бо, священному́чениче Неофи́те, вку́пе с тобо́ю и со все́ми святы́ми, проро́чески и апо́стольски возопие́м: где твое́, сме́рте, жа́ло? где твоя́, а́де, побе́да? Жив Госпо́дь, и жи́вы ду́ши на́ша, и согла́сно сла́вим Отца и Сы́на и Свята́го Ду́ха, Тро́ицу Единосу́щную и Неразде́льную, во ве́ки веко́в.
Ами́нь.
