IQ48 - "Зрабі сам (акустыка)"

[buzzika]

Click to view

На 19 кастрычніка заплянаваны рэліз новай праграмы ад гурта IQ48 пад назвай «Зрабі сам (акустыка)», якая будзе прадстаўленая ў відэа і аўдыё-фармаце ў інтэрнэце і на DVD. Самі музыкі называюць альбом ненумарным і незвычайным. Галоўная яго мэта - паказаць як гучыць гурт без дысторшнаў. Прэзэнтацыя адной зь песень альбому «Аб чым марыш» - толькі на ТГ.

Ідэя запісаць акустыку нарадзілася ў IQ48 практычна адразу пасьля выхаду альбома «Героі». «Захацелася зрабіць нешта неўласьцівае нам, бяз гучных гітараў, паказаць, як „айк’юшныя“ (і ня толькі) песьні гучаць без дысторшнаў», - кажа ўдзельнік каманды Яўген Бузоўскі. Ідэя разьвілася ў тое, што музыкі запісалі ня толькі аўдыё-альбом, але і зьнялі выступ на відэа. «Гучыць, можа, пафасна, але гэта акт нашае ўдзячнасьці людзям, якія любяць IQ48, нашым сябрам. Ім гэтае і прызначаецца ў першую чаргу», - кажуць «айк’юшнікі».

Рэпэтыцыі гэтай праграмы пачаліся ў лютым гэтага году, якраз падчас зьменаў у складзе гурта. Напрыклад, з басам гурту дапамог Улад Плюшчаў («Крамбамбуля», ZET). Фактычна з гэтае праграмы пачалося супрацоўніцтва IQ48 з гітарыстам Паўлам Яноўскім (таксама «Пару рублей»), які ў выніку стаў паўнавартасным удзельнікам гурта. Запіс адбываўся на жывым канцэрце гурта, у фальварку Яноўскіх за 35 км ад МКАД, на базе студыі гуказапісу «Таксафон». «Усё ў гэтай праграме зроблена сябрамі і без „капіталізму“, атрымаўся гэткі DIY, „зрабі сам“, карацей», - кажа Яўген.

У праграму ўвайшлі 10 песень, добравядомых прыхільнікам гурта. Толькі адна зь іх ня ўласнага аўтарства «айк’юшнікаў». Яна завецца «Аб чым марыш» і была запісаная адмыслова для праграмы «Зрабі сам (акустыка)». Гэты твор - беларускі кавэр на песьню «Enjoy the Silence» гурта Depeche Mode. «Нам хацелася зрабіць „Аб чым марыш“ менавіта „з душой“, можа нават зь нейкімі тэхнічнымі хібамі, уласьцівымі жывому выкананьню, але галоўнае - перадаць думку гэтае песьні, дух, яе цішыню», - кажуць музыкі.

Перад выхадам свайго альбома IQ48 прэзэнтуюць «Аб чым марыш» на партале «Тузін Гітоў».

Рэліз «Зрабі сам (акустыка)» адбудзецца 19.10.2009. Паглядзець, паслухаць, бясплатна сьцягнуць яго можна будзе на сайце www.iq48.net. Выйдзе таксама наклад DVD, які будзе распаўсюджвацца абсалютна бясплатна.

IQ48 - Аб чым марыш (музыка - Марцін Гор, словы - IQ48)
http://music.fromby.net/mp3/iq48_ab_czym_marysz.mp3