Молитва особна Святому Духу в день Пятидесятницы
Молитва особна Святому Духу в день Пятидесятницы («Творение святейшаго патриарха Костянтинаграда Филофея: Царю небесный (греч. Βασιλεῦ Οὐράνιε), Утешителю, Владыко сбезначальный...») в эпоху прп. Андрея Рублева († 17.10. 1428) входила в третью группу молитв коленопреклонения на Троицкой вечерне. Она представляет собой творение Константинопольского патриарха святителя Филофея (Коккиноса), которое перевел с греческого митрополит (Киевский и Московский) святитель Киприан).
Молитва особна Святому Духу в день Святыя Троицы:
Царю Небесный, Утешителю Владыко, собезначальный, и присносущный, и купносущный, и единочестный (слав. Триодь - единосущный) Душе Отцу и Сыну; Душе истинный (Триодь - истины), сущий, благий, святый, Господствуяй и животворяй; от Отца исходяй неизреченно, и на Сыне почивай нераздельно; сыноположения и обожения умнаго и словеснаго естества приятен; настоящих и будущих благ сокровище; Душе правый, Душе Владычный, от Отеческого состава, и от Божественных и безначальных (Триодь - безпечальных) Уст Его несказанно исходяй; Соипостасное дыхание, и Премудрость, и Сило. Душе Божий и от Бога, Душе Отчий и от Отца; Душе Сыновний, Душе Христов, она за едино существо, и еже ото нуду исхождение сия за едино существо паки и неразлучное, и еже оттуде изречение и явление. Ты убо благий Владыко, Единый от Троицы Боже, истинный Боже от истиннаго Бога; разумную и чувственную тварь, вкупе создавый со Отцем и Сыном, и сию неизреченною Премудростию и Силою, и обузданием неизреченнаго промысла, паче слова окормлеваяй, и сосвязуяй, и утверждаяй и соблюдаяй; Безначальне (Триодь - безначальные), невидиме, непостижиме, недоразуменне, неизследованне, неизреченне, неисчетне, безчисленне (Триодь - безчисленносильне), всемогий Господи, первее (Триодь - первый) Отцы и Пророки различно действовавый и глаголавый и Святые Троицы тайну показавый, и неизреченное плотское смотрение открывый Единочаднаго Сына и Бога. Последи же на небеси с плотию восхождения и уставления Его (Триодь - установления), и в сей Великий и совершенный спасительный Пятидесятный Праздник; ради естественных ти даров и благодатий, якоже существенне видом огненных язык просветивый мир, и на Святых Апостолех и Ученицех седый, и твоею Благолепною силою сих оболкий, и ниспосливый (Триодь - исполнивый) паче естественных и неизреченных благодатий, по неложному обещанию Христову, их же ради всякое естество человеческое, веры слово приимше, истиннаго Богоразумия и благочестия научихомся, и твоею просветившеся неизреченною Силою и действом, Единому Богу в трех лицех, точию покланятися научихомся. Сам убо Владыко озарение отчее; живый и неизменный Образ Отчий, вкупе и сыновный непреложный образ, и печати существа и Естества Их; источниче освящения, безсмертия же и жизни, и в будущем непременном и безконечном веце. Венче, и конечное Святых восприятие, в нем же Божества вина и Источник, единый нерожденный и безначальный (Триодь - безпечальный) Отец и Бог, единочадным Сыном и Богом, всеблагих подаяние независтно и неизреченно, и паче естества действует, в настоящей и будущей жизни, приими мене грешнаго и недостойнаго моление и всех чад (Триодь - в сей час), множество моих согрешений сведый един. Помилуй мя по велицей твоей милости, и по множеству щедрот твоих беззакония моего (Триодь - моя) очисти, и омый наипаче тину согрешений моих, и надлежащую скверну страстей души моея очисти.
Едине чистый и пречистый, и всякия скверности, смрада же и страсти чистительный, очисти мя от тайных моих Господи, и от чуждых избави раба Твоего; грех юности моея, и неведения моего, и старости окаянства, не помяни. Просвети ми помраченныя мысленныя очи, и погасший светильник благодати возжег, научи ми ум мой искусом, обычаем, и действом видети (Триодь - ведети), яко есть воистину в словесном естестве Дух святый. Даруй мне Слово благосочтанное, и Силу, и высоту, и крепость. Молитвы ми чистыя и пречистыя (Триодь - простертая) приносити о людех (Триодь - о судех) твоих, и о всемирной твоей Церкви и стаде, юже твоею силой и действом кровию Единочаднаго Сына и Бога искупленную, Боголепно водрузил и составил еси. Утверди ю на камени исповедания Божества непреклонно и непоколебимо быти, адских дверей крепчайше и вышше (Триодь - ересей безместных державнейшую и вышшую), бесовских действ и крепости неприкосновенну и неуязвенну, исполнену всячески твоея крепости и благодати. Приими Царю коленопреклонения их и стенания, общыя и согласныя, и простертыя молитвы, и прилежная моления, веру и надежду, и даждь им еже к Тебе единому неуклонно взирати нощно и денно, и к иному не зрети разве Тебе Бога и Владыки, и от Тебе Единого спасения чаяти; и простив им и нам всякое прегрешение вольное и невольное, яко Бог преблагий же и всемогий, и настоящих зол премени, и присносущных благ сподоби. Молитвою (Триодь - милостию) и человеколюбием Бога Отца, и сосущнаго Его Сына, и Тебе пречистаго (Триодь - Пресвятаго) и единочестнаго Духа, единаго Триипостаснаго Божества, ныне и присно и во веки веков. Аминь.