трыццаць другі тэкст для рубрыкі "100 словаў" на Радыё Свабода:
http://www.svaboda.org/a/28186673.html фікус
я выпадкова ўбачыў яго ў бары.
ён быў ростам каля сямідзесяці сантымэтраў, і яго выкарыстоўвалі ў якасьці падпоркі для прамежкавых уваходных дзьвярэй да ліфтаў. на ім было паўтара лістка. адзін вялікі і жоўта-чырвоны, а другі напалову абарваны, але яшчэ зялёны. фікус выглядаў закатаваным, і ўсім сваім станам прасіў у мяне дапамогі, расставіўшы ў розныя бакі свае паўтара ліста.
спачатку я яго паліваў кожны тыдзень, калі прыходзіў піць у гэты бар, пакуль не заўважыў трэці ліст.
счакаўшы, калі бармэн будзе заняты, я скраў яго.
цяпер фікус ростам мне па грудзі, аброслы, як куст, і зялёны, як елка.