100 словаў V (закладка)

[backel_k]

пяты кароткі тэкст на Радыё Свабода ў праэкце "100 словаў":

http://www.svaboda.org/content/article/27022348.html

закладка

у мяне зьявілася новая фобія. кожны раз, калі я раскрываю кнігу, якую чытаю, натыкаюся на закладку: фотаздымак Кафкі і пералік яго раманаў - падарунак ад сябра, які ён набыў у музэі Кафкі ў Празе.

кожным разам, калі бачу гэтую закладку, мне становіцца сорамна, што я напісаў сёньня дзьве старонкі раману, і гэтыя старонкі - вымучаныя, нязграбныя і выглядаюць сіроткамі.

я адкладаю чытаньне і сядаю за стол пісаць, але ў выніку нічога не пішу, бо таксама неяк няёмка, што вось я пабачыў Кафку і мяне панесла пісаць.

вар’яцтва. давялося схаваць закладку ў кнігу, якую ўжо прачытаў, каб тая не засмучала мяне.