АрбагI къоялъул бакъанида, цебехун нижеца хъван букIахъе, «Миллат» газеталъухъ гьоболлъухъ вукIана машгьурав политикияв ва жамгIи-яв хIаракатчи Сулайман Уладиев. ЧIамучIал церерагIиялги тун, бачIинахъего абила, Сулайманилгун нижер гара-чIвариялъе, гIурусаз абухъе, кинабгIаги «информационный повод» абураб жо букIинчIо. «Миллаталъул» редколлегиялъ хIукму гьабуна жакъа республикаялда лъугьа - бахъунеб ахIвал -хIалалда тIаса гара - чIвариялде ахIизе гIалимчи, политолог ва кинабго лъугьа - бахъунелъе къимат кьун бажарулев эксперт Сулайман Уладиев.
Политикияб хIухьбахъи ва цIияб пачалихъ
- Сулайман, дуца цIакъ «хIухьел ккуна» ахираб заманалда. ГIилла букIунищ, ялъуни гьеб политикияб тактикайищ (дуца абулелде кIвар буссинабулелъул дагъистанияз)?
- КиналгIаги политикиял хIаял, тактика гьениб гьечIо. Дун вукIана гьаниса гочун инин, унги вукIана республикаялдаса нахъе. Гьаниб парахалъи гьечIолъиги, рагъ - кьалги букIун гьелдаса хIинкъун гуро, цо - цо мехалда власталдасаги, гIадамаздасаги, кигIан дуца хIаракат бахъаниги хисизабизе кIолеб жо бихьунгутIиялдасаги ракI буссуна. Гьединаб хIалалде ккун вукIана, Эмиратазде ун вукIана хасало дирго лъималазухъе, моцIидасаги мехги бана гьениб. Цо дирго хъвай-хъвагIаязде, аралъул хIасилалги, букIинеселъул хIисабалги гьаризе тIамуна гьелъ. Араб соналъ къо гьоркьоб бахъичIого чIвалел гIадамазулги, дагъистанияз кинаб рахъалдаса батаниги тIолел биязулги хIисаб гьабун, гIемераб хIалтIи гьабуна гьеб ишалъе ахир лъеялъе гIоло къеркьолаго. ЖамгIиял гIуцIабиги гьаруна, данделъабиги ахIана, Россиялъул НАКалъул генералаздаса рахъарал ихтиярал цIуниялъул хIаракатчагIи Федотов, Людмила Алексеева, Николай Сванидзе ва цогидалги гъорлъе рачун, Дагъистаналда динияб дандечIеялъул кIиго рахъ - суфиялги салафиталги цо столалда нахъа чIезарун, кIудияб хIалтIи гьабуна биял тIеялъе ахир лъеялъе.
Кутакалда берцинаб, цоцазул адаб цIунараб диалог ккана, кризисалдаса рорчIиялъе нухалги рихьана, амма щаялиго власталъги, цо-цо политикиял къуватазги гъоб хIалтIи кIварго кьечIого тана. ЦIиял харбал хIисабалда къого секундалъ Дагъистаналъул телевидениялдасан гьелъул бицеян президентасде гIунтIун кIалъазе ккана. Гьелъ тана дица гьеб хIалтIи, гъоб хIажатал чагIи ратуларого. Россиялдайин абуни гьеб заманалда жаниб гIемераб жо хисун бугоан.
- Щибха хисун батараб Россиялда мун вуссинегIан, кинаб къимат кьолеб дуца улкаялдаги, республикаялдаги лъугьа-бахъунелъе?
- Дун тIадвуссиналде республика хисун батанин абизе кIоларо, амма улкаялда киназдаго лъалел хиса-басиял лъугьана. Абизе бегьула дун батIияб Россиялде тIадвуссанин. Бащдаб лъагIелалъ цебе В. Путиниде, тIолго пачалихъалъул миллияв цевехъан ва бищунго кIудияб рейтинг бугев политикасде, гьещтIезе ругин ва гъосул нухмалъиялда дандечIун нусазаргоялдаса цIикIкIун чи къватIив вахъунин Москваялдаян абулев чи гIабдаллъун рикIкIинаан доб мехалъ. Гьел лъугьа - бахъинал кканагури улкаялда. Амма Владимир Путиница гъоб дандечIей ва улкаялда лъугьа - бахъунелъе хIакъикъияб ва ритIухъаб къимат кьуна, гъов цIодорав чилъидал, чекист гIантав вукIунаро, тIадежоялъе гъос демократиялъул нухде рачIиналъе ва жамгIияталъул хIалуцин чучиялъе гIоло хIисабалде босана гъоб дандечIей. Борис Акунингун ва цогидал либералияб дандечIеялъул церехъабигун дандчIвазе хIадур вугин абуна. ХIисабалде росулел руго гъозул тIалабалги.
- Дагъистаналъул рахъалъ щиб абилеб, араб сон нилъер гьанибги букIана цIакъ митингаздалъун гьарзаяб, кинаб батIалъи бугеб москваялъулазда ва нилъеразда гьоркьоб?
- Москваялъул дандечIеялъулъ руго цIакъ гIемерал батIи-батIиял политикиял къуватал ва власталда цере лъолел тIалабал. Гьезул гIуцIиялъул рахъалъги, законалъул рахъалъги, власталда цере лъолел тIалабазул рахъалъги тIадегIанаб даражаялда буго хIалтIи. Гьелъул хIасилалда рукIана Сахаровасул проспекталда, Болотниялда нусазаргоялдаса цIикIкIун чагIи. Нилъеразул цо рахъалъул тIалабал руго: «ГIадамал рикъуге, диван гьабичIого чIваге, риларал чагIи тIад руссинаре» ва цогидал гьезда релълъарал тIалабал. Гьеб дандечIеялда цадахъ ришватаздаса, коррупциялдаса, тухумчилъиялдаса, цIогьалдаса ва нусго батIиял цогидал гIузрабаздаса рази гьечIел дагъистаниял къватIире рахъани, МахIачхъалаялда рахъун чIезе бакI букIинаро. ТалихIалъ лъаларо, талихIкъосиналъ лъаларо, гьел тIалабал жакъа республикаялда жамгIияталъ власталда цере лъолел гьечIо. ГIуцIиялъул рахъалъги цокIаллъи гьечIо.
- Гьел цере рахъулел чагIазул хитIабазде ва политикияб ахIвал - хIалалде балагьун, гражданазулаб жамгIияталъул гIаламатал рихьулищ дуда?
- Рихьуларо, гражданазулаб жамгIият букIунаро ихтиярал цIунулареб (правовое государство) бакIалда.
- Гьезул кинаб цебе бижулеб, жамгIияталъ ва гьелъ бищараб власталдаса гурищ лъугьунеб ихтиярал цIунулеб пачалихъ?
- Цояб гьечIого цояб лъугьунаро, гьел цоцада рухьарал руго, рорженалъе кIиго кваркьи гIадин хIажалъула ихтиярал цIунулеб пачалихъги, гражданазулаб жамгIиятги.
- Россиялда ккараб хиса - баси сундулъ бихьулеб дуда, цохIо гьел гIадамал Сахаровасул проспекталде рахъиналъулъищ, ялъуни цойги щиб хисараб гьаниб?
- Масала, президент Д. Медведевас ва В. Путиница абуна ва парламенталде законалъул проект битIулеб буго субъектазул бутIрул тIолго халкъалъ рищулеб къагIида гьабизе. Дица рикIкIуна гьеб демократиялъул бергьенлъилъун. Гъоба бихьизабун буго кIиго къагIида - партиялъ президентасул кандидатура бихьизаби ва бокьарав чияс жинцаго кандидатура лъей. Дида ккола, кинаб рахъалъ гьабуниги, гьеб бугин ритIухъаб ва гIадамазул пикруялъ бетIер вищулеб къагIидаян.
- Дида ккола Путинил Россиялда гьелъул батIалъиго букIинарин, масала, партиялъ кандидат вихьизавулеб къагIидаги гьениб батани, «Единая Россиялъ» ва В. Путиница рахъ кколеб бугин, бокьарав чи бергьинавилин Москваялъ гьанив, гьеб мехалда рищиязда цIар кинаб бугониги щиб?
- Нилъее, халкъалъе рес щолеб буго кандидат вихьизавизеги, гьев президентлъун вищизеги, жакъалъизегIан гьединаб рес букIинчIелъул. Дида лъаларо халкъалъ гъолдаса пайда кин босизе бугебали, амма лъала гьев чи кинав вукIине кколевали. Масала, дица, избиратель хIисабалда, рехсезе руго кандидат кинав чи вукIине кколевали. Гьев вукIине ккола яхIги бугев, лъайги бугев, биги тIад гьечIев, тухумчилъиялдасаги рикIкIадав, Аллагьасдасаги хIинкъулев, инсанги вичIчIулев, гIураб бихьинчилъиги бугев чи.
- Гьел киналго рахъал ругев чи вукIунаро, вугониги жакъасел дагъистанияз вищуларо…
- Вищулев ватичIони, лъикIаб гIумруялъе мустахIикъал гьечIо нилъ. Гьединал чагIи гьечIин абуге, щиб, лъабго миллион дагъистаниязда гьоркьов мустахIикъав чигойищ гьечIев? Гьев чара гьечIого жакъа нилъеда рихьулел политиказдаса вукIине кколарелъул. Дир буго тIубараб политикияб реформаялъул проект гьелда хурхун, дида ккола гьел шартIал хIисабалде росани, кьучIдасаго хисизабизе кIолин Дагъистан.
Политикияб реформа ва цIиял нухмалъулел
- Батани,Сулайман, мун нижеца толев вуго гьаб интервью лъугIизегIан президентлъун, яги кандидатлъун, рехсе гьеб программа.
- Гьел тIадехун рехсарал рахъал ругев чи вищанаха халкъалъ президентлъун. Щиб гъос гьабизе кколеб? ТIоцебесеб иргаялда, цIияв президент вищарабго тIубанго правительство уна хъулухъалдаса, гьел чагIи ритIила баркалаги кьун нахъе ва 40 проценталъ дагь гьабила министерствабазул къадар, халкъалъул гIарац кваназе хIажат гьечIо гъодигIан министерстваби. ЦIиял чагIи росила тIадехун рехсарав президент гIадал ритIухъал ва рацIцIадал. Гьел гьечIин абуге, гьедизе кIола - руго. Хадусеб гали букIине ккола федералиял хъулухъазул нухмалъулел, цIияв президент кIалъазе ккола Москвагун тIубараб гьеб состав хисиялъул суалалда тIаса.
- Кин хисилел гIемерисел Москваялъ ришватги босун тарал чагIи? ЦIакъ кIудиял анищал рихьула гьел…
- Дица абулеб бугогури, батIияб нух гьечIин, гьеб суал лъезе ккола Москваялда цебе. Нужее Дагъистан Россиялъул картаялда хIажат батани, цойги нух гьечIин гьел чагIи хисичIого. Дида ккола цIидаса вищарав Путин гьеб галиялде инин. Хадусеб суал, районал ва шагьарал. Жакъа Дагъистаналда буго 54 муниципалияб гIуцIи, дица гьабилаан 20 район. Гьел гIадамал жидер районалъул чи бетIерлъун гьечIин цоцалъ рагъилин абураб жо буго гьадингосел харбал. Щибаб районалъул бетIер ва гьесул лага - черхги, хъулухъги хьихьун республикаялъул бюджеталдаса нус-нус миллион халкъалъул гIарац унеб буго, гьез бикъулеб рикIкIинчIого. Гьеб гIарацги тIокI гьабун халкъалъул тIалабал тIурани, лъилниги дандечIей букIинаро. Тарихалда жеги цониги миллаталда гьоркьоб кьал ккечIо Дагъистаналда, гьеб гьабуни жакъаги ккезе гьечIо.
- Гьел чагIи рищизейищ ругел тIамизейищ?
-Рищизе руго.
- Гьеб мехалда гьел дур рацIцIадал чагIи кандидатура лъолеб бакIалде къазе толаро жакъасел бацIаз.
- Толеб къагIида буго. Гъов Исбайица абун буго нилъер гьанив президент вищиялъул темаялда кIалъалаго, Москваялдаса маймалак бихьизабуниги, гьанир кверал рорхулин нилъераз. Маймалакал теларо, гьел дуца абулел бацIал цо ФСБялъул сержантас аскIореги ахIун иш байбихьани, бащдаб уголовный кодекс гьезул ишазул хIакъалъулъ батула. Кандидатураби лъезе риччала рацIцIадал чагIи. БатIайиса реформаби лъугьунаро, нужеда рагIанагури Сингапуралда Ли Куан Ю премьер министрас абурал рагIаби, дурго вацасдаса байбихье ишан. Гьел районалъул цIиял рацIцIадал бутIрул рукIина жамагIаталъул ва президентасул хъаравуллъиялда гъоркь. ТIадежоялъе I3I абилеб бакIалъул нухмалъиялъул законалда хиса - басиги гьабун, гъозухъа нахъе босизе ккола лъайкьей ва сахлъи цIуни. Гьеб букIине ккола профессионалияв тохтур - министрасул ва гIалимчи - педагог лъайкьеялъул министрасул хъаравуллъиялда. Гьеб районалъул бутIрузда цебе букIине кколеб суал гуро. Гьезда лъаларо гьел суалал, гьал жакъа ругезул 80 проценталъ щуабилеб классалъул диктант лъабилалда хъвазе кIоларо. ХутIарал суалал инфраструктура, ЖКХ, канлъи, хинлъи, гIумру гьабиялъул шартIал ва цогидал суалазул жаваб кьезе буго районазул бутIруз. Маргарет Тэтчерида гьикъарабго кин кIвараб дуда гIадлу гьабизеян, гьелъ абун буго I5 вацIцIадав ва лъай бугев чи валагьанин жинца улкаялда. Гъоб нухмалъиги, цебетIейги кинабго кадрабазда бараб жолъидал, гьел нилъер руго. ХIажат буго бищунго, тIад вацIцIадав ва иш гьабун бажарулев чи ккей.
- Парламенталда щиб гьабилеб?
- Ункъоялда анцIгоясул бакIалда лъеберго чи тела профессионалияб кьучIалда парламенталда хIалтIулев, гьелги цо мандаталъул округазда тIолго халкъалъ рищарал. Щибизе хIажат вугев бюджеталъул гIарац кваназе цIаличIого законал къабул гьарулев 90 депутат?
- Гьанже нилъ рачIина, Сулайман, гьел анищалги тун, хIакъикъаталда букIине бугеб ахIвал - хIалалде, тIолго халкъалъ президент вищулел рищиязда халкъалда бараб жо кигIандай тела Москваялъ?
-Дида ккола халкъалда гьоркьоб къадру гьечIев чи Москваялъе хIажат ватиларин. Гьадинги квешаб хIалалда бугеб республика кквезе кIвезе гьечIо гьабго политика такрар гьабуни.
- Кандидатасул миллаталда бараб жо кигIан гьениб букIинеб ва Москваялъул финансовиял къокъабазул кигIан асар букIинеб гьеб суалалъулъ.
- Халкъалъе гIакъилавги, ритIухъавги, вацIцIадавги президент вачIани гьесул миллаталъул батIалъиго батиларо. Амма гьеб миллияб суал жалго кандидатаз багъаризабизе буго. Москваялъулалги гIадада чIелищха, гьезул жидергоги хиял лъезе рес буго президентасул хъулухъалде.
Дур хъулухъчи щивали абе, дица абила мун щивали…
- Дуца президентлъун МухIамадсалам МухIамадов вачIараб мехалда хъвараб макъалаялда цо мисал букIана ритIухъав халифасул. Пачалихъалъул иш гьабулеб мехалда рекIараб хIедул чирахъги свинабун, жиндирго хъвай - хъвагIаязе рекIинабулеб цойги хIедул чирахъалъул хIакъалъулъ. РитIухъ гьабунищ президентас дур гьари, яги гьев цохIого чирахъалда гъоркьищ вугев?
- ГьабичIо, дир гьариги, хьулги букIана гъос щиб бугониги хисизабилин. Хисараб жого бихьулеб гьечIо. Президентасда дица гьикъилаан: «Дуца бице щив дуца хъулухъалда толев вугев, дица абила мун щивали» ян. Гъов гIолохъанчи вуго, гъосие рес кьун букIана кинабго хисизабизе, щибниги хисичIо. Цо рацIцIадал ва цIиял чагIи хъулухъалдагIаги тун рукIаралани, мадар букIинаан, щаялиго гьебги гьабичIо.
- Гъосул цониги, гьаб рахъгIаги лъикIаб бугин абизе гIураб жо лъалищ дуда?
- Экономикаялъул специалист дун гуро, амма цо - цо саламатал пикраби загьир гьарулеллъун рихьана гьеб рахъалъ, лъалеб цебетIей гьечIониги. Цойги лъикIаблъун бихьана гъосул гIадамазухъ гIенеккизе лъай, гIодове виччарав сабурав чи вуго гьев. Гьал мэрал руго ццидал, хъачIал гIадамал, гьеб рахъалъ хIалимав чилъун вихьана дида гьев. Нилъер магIарулазе дагьаб жоги гIола разилъизе, гьебги батилаха. Гъос реформаби гьаризе кколароан, революция гьабизе кколаан, хасго кадровияб политикаялъулъ, гIадамазги рахъ кквелаан ишги билълъанхъилаан. Гьеб гьабичIо, нахъойги цо хасал тухумалги хьихьун чIана.
- Гъосда цадахъ президентлъиялде рихьизаруразда гъорлъ бищунго мустахIикъав чи щив вукIарав?
- Дир пикруялда, СайгидхIусен МухIамадов вукIана. Гъов вуго лъикIаб лъайги бугев, Москваялда бухьеналги ругев, экономика, бюджет ва финансалги лъалев ва киналго кланаздаса рикIкIад чIарав чи.
- МухIамад МухIамадов? (Смоленский). Меседил медалалда школа, багIараб дипломалда МГУ, цониги пачалихъалъул хъулухъ кквечIого миллиардал доллараз гIарац гьабурав чи…
-Ватила, гьев мустахIикъав гьечIин абулеб мех гуро, дида лъаларо гьесул гIунгутIаби ва живго. СайгидхIусен, лъала.
- Балагьараб мехалда щивав чияс гьел кандидатазе къимат кьолеб буго жидерго гьоркьорлъабаздалъун. Дида рагIана СайгидхIусен вугин дур гьудул ва гьес дур гIумруялъе хIинкъи бугеб заманалда бронированный BMW кьунилан.
-Кьуна, дие машина кьунин гьел тIокIлъаби гьесухъа нахъе унарелъул. Дица рехсолел руго гьоркьорлъабазухъ валагьичIого дидаго лъалел рахъал.
-Мун тIехьалда тIад хIалтIулев вугин рагIана…
- Буго гьединаб хIалтIи, лъаларо гьелъул бицине рекъон букIунищали. КIиго тIехь буго дица хIадурлъулеб, гьездаса цояб букIине буго «Дагестан на разломе: время, события, люди» абураб. Гьениб букIине буго дир нилъер улкаялдаги, республикаялдаги ккарал кIудиял ва кIвар бугел лъугьа - бахъиназда тIаса пикраби. Гьел процессазулъ дандчIварал гIадамал, политика, гIумру ва гьезул рахъалъ пикраби. КIиабилеб тIехь буго дирго анищазул дунял, кучIдулин дида гъозда абизе кIоларо,кочIохъего гьарурал хъвай - хъвагIаялин телаха, шигIрияб гьунар щивав чиясе кьолеб жо гуреблъи дида лъалелъул. Гьеб букIине буго магIарул мацIалда.
- Дур чIужу балкарай йигин рагIана, авар мацIалъулгун гьоркьоблъи кин бугеб рокъоб, лъималазда гьеб лъалеб батуларо.
- Гьей чIужуялъул рахъалъ бицин рекъечIеб жо букIуна магIарулазе, нужеца гьеб суал лъун бугелъул абила, дир лъималазда лъачIого букIинищ,чIужуялдаги лъала магIарул мацI цониги буртиниселдаса ятIа яхъизе лъалареб хIалалъ. Нилъер наслу умумузул, эбелалъул мацIалдаса махIрум гьабурал чагIи руго гъаримал чагIи.
- Гьеб магIаруллъиялъул нилъеца щибаб хъощниб бицунеб буго, амма нилъго къо бахъанагIан тарихиял лъугьа - бахъиназул рагIдукь хутIулел руго ахираб заманалда, сундулъ бугеб гIилла?
- Дицаги гIемер пикру гьабула гьелъул, магIарулал руго кIудияб бахIарчияб тарихги, рухIияб къуватги бугеб миллат. Дагъистаналъулги Кавказалъулги тарихиял лъугьа - бахъиназда бакьулъ рукIана нилъ - магIарулал ва нилъеца хъвараб буго аслияб тарих. Дица гIажаиблъи гьабула магIарул чиясул хасияталъул жакъа ругел гIадамазухъ валагьун. КъотIноб тохлъукьего цоясул машина цогидалда кьабуни, магIарулав хIадур вукIуна гьев чи чIвазе, яги гьеб щибго гуреб жо сабаблъун жиндир гIумру кьезе нахъе къаларо. Жиндие законалъги, инсанасул намусалъги, яхIалъги тIалаб гьабулеб ишалъулъ цо гIарац бикъулев мэрасда, министрасда данде площадалда вахъине, яги бадибе рагIи абизе хIинкъулев вуго. Гьеб жоялъе баян батизе кIоларо дида. Тункараб машинаялъухъ, яги цохIо рагIи сабалъун гIумру кьезе нахъе къалев гьечIо цо магIарулав, киналго гуроха, амма жиндир ва халкъалъул ихтияразе гIоло абизе хIинкъулев вуго. ГьабсагIаталда буго хиса - басиязул замана (время перемен), гIурусалъ абухъе, кидаго тарихалда кризисалъул ва Дагъистаналъул къисматалъул суал цебе бачIарабго магIарулаз загьир гьаруна бищунго лъикIал рахъал - гIакълуги, къохIехьейги, бахIарчилъиги. Гьедин букIана тарихалда ва гьедин букIине буголъиялда ракIчIола дир.
Гара-чIвари гьабуна МухIамад БисавгIалиевас, "Миллат", 4, 02.02.2012