Пра гаўнавоз. Ці вясковыя нарысы.
Адпампаваць каналізацыю каштуе даволі шмат, як выклікаць асінізатар са Стоўпцаў. Спачатку кошт быў 120 рублёў, потым 130 рублёў. Потым мэханізатар (я яго не магу назваць кіроўцам) загруз у студзеньскім сьнезе і захацеў ужо 160 рублёў.
Вясковае тутэйшае людзтва з мяне сьмяецца, як з лоха, маўляў, купі-сабе-помпу-ды-адпампуй-у-кусты. Яны ня ведаюць, што пакараньне можа быць пад 10 базавых, як гэта хто з мясцовых уладаў убачыць гэнае «безабразіе».
Таму я знайшоў больш танны спосаб: у бліжэйшым «гарадзкім пасёлку» ёсьць ОКС, а пры ім ёсьць пан Сяргей, у якога, у сваю чаргу, ёсьць карпарацыйны асінізатар, які ў народзе клічуць «гаўнавоз». Кошт нашмат таньнейшы, як у Стоўпцах.
Тут мне трэба зрабіць невялічкую рэмарку: карпарацыйны асінізатар прызначаны для невялікіх вясковых каналізацыяў і да нашай каналізацыі не зусім прызначаны. Ды каго гэта цікавіць? Галоўнае на вёсцы абы грошы плацілі.
Таму, калі ў першы раз зьмест каналізацыі не зьмясьціўся ў карпарацыйны гаўнавоз, Сяргей, пачухаўшы патыліцу, сказаў:
- Гаўно вапрос. Я зараз.
Ён, бы на «опелі» і з амаль паліцэскім разваротам, рушыў да першага ярка-канавы, дзе проста ТУПА ўсё зьліў. А я падумаў, што, як што здарыцца, штраф будзе Сяржук плаціць.
Гэтым і карыстаемся амаль што паўгады. Але пад зіму помпу з сэкатарам я ўсё-жа набуду.