ВЫСТАВА “ГАНДАЛЬ БЕЛАРУСІ НА ШАЛЯХ ГІСТОРЫІ”
11 лістапада 2015 года адбудзецца прэзентацыя выставачнага праекта “Гандаль Беларусі на шалях гісторыі”, паведамляе Міністэрства гандлю.
Выставачны праект “Гандаль Беларусі на шалях гісторыі”, які адкрываецца ў Нацыянальным гістарычным музеі Рэспублікі Беларусь, з’яўляецца сумеснай плённай працай Нацыянальнага гістарычнага музея Рэспублікі Беларусь і Цэнтра вывучэння гісторыі гандлю кампаній “Менка”, Міністэрства гандлю Рэспублікі Беларусь. У стварэнні выстаўкі прымалі ўдзел вядучыя музеі і архівы краіны, установы адукацыі.
Экспазіцыя дэманструе асноўныя этапы развіцця гандлю, яго ролю ў палітычным, эканамічным і культурным жыцці нашай краіны. Гэта вытокі гандлю на старабеларускіх землях, асаблівасці яго развіцця ў часы натуральнай гаспадаркі, у перыяд рынкавых капіталістычных адносін, сістэма гандлю ў савецкі час.
Развіццё на выстаўцы паказваецца і праз гандляроў, і праз пакупнікоў. Прэзентуюцца прадметы амаль з усіх калекцый музея, таму што практычна любая рэч магла ў розныя часы быць таварам.
У экспазіцыі наведвальнікі ўбачаць шмат цікавых прадметаў: археалагічныя матэрыялы, скарбы зямлі беларускай 12-15 стагоддзяў, літоўскія і наўгародскія грыўны і іншыя ўнікальныя манеты. На выстаўцы будуць прадстаўлены вагі, бязмены, касавыя апараты розных часоў, дзіцячыя цацкі, прадметы раскошы са срэбра, шкло, жаночыя капелюшы, абутак і іншыя прадметы, якія можна было набыць на кірмашах і ў крамах.
Прадметы кантрабанды пачатку 20 стагоддзя - соль і мыла - прадстаўлены ў чамаданах, у вітрынах - фотаапараты, гадзіннікі, футра…
Суправаджаюць паказ постаці вікінга, карчмара, рамесніка, купца, кантрабандыста, прадаўца, спекулянта.
Падчас працы выстаўкі запланаваны шэраг імпрэз - навуковых, адукацыйных, забаўляльных.
____________________________
Музей працуе: з 11.00 да 19.00 без выходных.
Каса працуе: 11.00 - 18.30.
Уваход наведвальнікаў: 11.00 - 18.30
Трэці панядзелак месяца - санітарны дзень.