Косарі
Дуже рано, ще до днины
Косы острят косарі
Косят горы і долины
Ще ни встали й комарі
Засвистіла зашуміла
Наострена вта коса
Бо росов она запила
Тої пила ще й оса
В полю скоро вни косили
Доки сонце не зыйшло
Діти воду їм носили
Помагати ся прийшло
Першый косит Цильо дідо
Слідом косят і вуйкы
За горами стає блідо
Видно стало вже й валкы
Тихо стало, вже без свисту
Тай запахло довганом
Їм принесли в поле їсти
Токану із молоком
Вот поїли, й закурили
Вже і сонечко зыйшло
І шпакы вд нам прилитіли
Та й нас сонечко найшло
Треба й в холоді скосити
А на сонцю потрясти
Ще й шпакы нам помагают
Всьо з валку йсе розгребсти
Докосили вже в садови
Докосили й на межи
Буде сіна ще й волови
Боже! Посушити поможи.
Файно пахне свіжым сіном
Досушити спішеме
Выдкысь тягне сырым вітром
Всьо в копицю кладеме
Так косили та сушили
Сіно наші косарі
Много з ним роботы было
Аж до самої зорі.
Анатолий Сава
